సాయి అనుగ్రహసుమాలు - 359వ భాగం ~ Sai Devotees Experiences In Telugu- Shiridi Saibaba Miracles in Telugu

ఖపర్డే డైరీ - నలభై నాలుగవ భాగం

1924-25లో శ్రీసాయిలీలలో ఈ డైరీ ప్రచురింపబడింది. అయితే ప్రచురింపబడిన భాగాలలో కొన్ని విషయాలు అసంపూర్తిగానూ, కొన్ని విషయాలు పూర్తిగా తొలగించబడీ ఉన్నాయి. ఆ లోపాలేమిటో ఇప్పుడు చూద్దాం.

8-12-1911: ఈ తేదీలో వ్రాసిన దానినుండి ఈ క్రింది వాక్యాలు తొలగించబడ్డాయి:

మాధవరావు దేశ్‌పాండే ఇక్కడే నిద్రపోయాడు. కేవలం పుస్తకాల్లో మాత్రమే చదివినదీ, నేను ఎన్నడూ అనుభవించనిదీ అయిన విచిత్రాన్ని నేను స్వయంగా నా కళ్ళతో చూశాను, చెవులతో విన్నాను. మాధవరావు దేశ్‌పాండే ప్రతి ఉచ్ఛ్వాస నిశ్వాసలోనూ 'సాయినాథ్ మహారాజ్', సాయినాథ్ బాబా' అని స్పష్టంగా వినిపిస్తోంది. మాధవరావు దేశ్‌పాండే గురక పెడుతున్నప్పుడు దూరానికి కూడా ఈ పదాలు స్పష్టంగా వినిపిస్తున్నాయి. ఇది నిజంగా చాలా అద్భుతం.

12-03-1912 నుండి 15-03-1912 వరకు:

ఈ క్రింది వాక్యాలు మార్చి 12, 13 తేదీలలో లేవు. వీటిని మరాఠీ జీవిత చరిత్రలో నుంచి తీసుకొని ఇంగ్లీషులోకి వ్రాయటం జరిగింది.

మార్చి 12:

మేము ఈరోజు తరగతిలో 'పంచదశి' చదవటం పూర్తి చేశాము. ఈ సందర్భాన్ని మేము రెండు దానిమ్మపండ్లతో వేడుకగా జరుపుకున్నాము. 'బాబాపాలేకర్' (దాదాసాహెబ్ ఖపర్డే వద్ద పనిచేస్తున్న ఓ జూనియర్ ఎడ్వొకేట్) ఆమ్రావతి నుంచి వచ్చి, మా కుటుంబసభ్యులు చాలా కష్టాల్లో ఉన్నారని చెప్పాడు.

మార్చి 13:

రేపో, ఎల్లుండో నన్ను తీసుకు వెళ్ళటానికి బాబాపాలేకరుకు సాయిబాబా నుంచి అనుమతి లభించింది.

1912 మార్చి 14, 15:

తారీఖుల్లోని వివరాలు శ్రీసాయిలీలలో పూర్తిగా వదిలేయబడ్డాయి. ఈ క్రింద ఇవ్వబడిన వివరాలు మరాఠీ జీవితచరిత్ర నుండి తీసుకుని ఇంగ్లీషులోకి అనువదించబడ్డాయి.

మార్చి 14:

బాబాపాలేకర్ నాకంటే ముందు బాబా వద్దకు వెళ్ళి నన్ను తీసుకెళ్ళటానికి అనుమతి సంపాదించాడు.

మార్చి 15:

నేను, బాబాపాలేకర్, దీక్షిత్ మశీదుకు వెళ్ళాం. నేను ఆమ్రావతి తిరిగి వెళ్ళే విషయాన్ని దీక్షిత్ ప్రస్తావించాడు. సాయి అనుమతి ఇచ్చాక నేను తిరిగి వచ్చి నా భార్యను నా సామాన్లు సర్దమన్నాను. ఆమెలాగూ భీష్మ, బందూలతో పాటు ఇక్కడే ఉంటుంది. మధ్యాహ్న భోజనానంతరం నేను, పాలేకర్ సాయిబాబాని దర్శించుకోవటం కోసం వెళ్ళాం. మేము వారిని గ్రామ సరిహద్దు దగ్గర కలిసి వారి ఆజ్ఞానుసారం వెనక్కి వెళ్ళి, కొద్దిగా ఊదీ తీసుకొచ్చి బాబా చేతుల మీదుగా తీసుకున్నాం. బాబా మమ్మల్ని వెంటనే బయలుదేరమని, 'అల్లా భలా కరేగా' (భగవంతుడు నీకు మేలు చేస్తాడు) అని ఆశీర్వదించారు.

తరువాయి భాగం రేపు ......