1. అంతా బాబా మహిమ
2. బాబాకి చెప్పుకున్నాక చేకూరిన ఆరోగ్యం
అంతా బాబా మహిమ
నేను ఒక సాయిభక్తురాలిని. 2013లో నేను బిటెక్ పూర్తిచేస్తే 2021లో నాకు ఒక MNC కంపెనీలో ఉద్యోగం వచ్చింది. అప్పుడు నేను 2013 నుండి 2021 వరకు ఉన్న గ్యాప్ని కవర్ చేయడానికి ఫేక్ ఎక్స్పీరియన్స్ (ఉద్యోగ అనుభవం లేకపోయినప్పటికీ ఉన్నట్టుగా) పెట్టాను. అలా చేయడం తప్పని నాకు తెలుసు. అయినా నా కుటుంబ ఆర్థిక పరిస్థితులననుసరించి అలా చేయక తప్పలేదు. అప్పటికీ బాబాతో నాకంత అనుబంధం కూడా లేదు. 2023, జనవరి 18న మా నాన్నగారు కాలం చేసారు. నేను ఆ బాధ నుండి బాబా కృపావల్లనే బయటపడ్డాను. అప్పటినుండి నాకు ఏ కష్టమొచ్చినా బాబాకే చెప్పుకుంటున్నాను. ఆయన నాకు ప్రతి విషయంలో సహాయం చేస్తున్నారు. 2023, సెప్టెంబర్లో నేను అప్పటివరకు చేసిన ప్రాజెక్ట్ వేరే వెండర్కి తరలించబడటంతో నన్ను అదే కంపెనీలోని వేరే ప్రాజెక్ట్లో నియమించారు. ఆ కొత్త ప్రాజెక్ట్ క్లయింట్ నా BGV(బ్యాక్ గ్రౌండ్ వెరిఫికేషన్) చేయడం ప్రారంభించారు. ఆ క్రమంలో BGV వెండర్ నన్ను నా మునుపటి కంపెనీ బ్యాంకు స్టేట్మెంట్ ఇచ్చి వెరిఫికేషన్కి సహకరించమని అన్నారు. కానీ నేను ఆ పని చేయలేను. ఎందుకంటే, నేను పెట్టింది ఫేక్ సర్టిఫికెట్. కాబట్టి బ్యాంకు స్టేట్మెంట్ వెరిఫై చేస్తే, BGV రెడ్ వస్తుంది. అందుకని నేను నా ఉద్యోగానికి రాజీనామా ఇచ్చాను. అయినా 90 రోజుల నోటీసు పీరియడ్ ఉన్నందున నేను ఉద్యోగంలో కొనసాగుతుండగా 2023, నవంబర్ 23 నాటికీ 45 రోజులు పూర్తయ్యాయి. అప్పుడు హెచ్ఆర్ టీమ్ నా దగ్గరకి వచ్చి, "ఎందుకు బ్యాంకు స్టేట్మెంట్ వెరిఫికేషన్కి సహకరించడం లేదు" అని అడిగారు. నాకు ఏం చేయాలో తెలియక చాలా భయపడి, 'ఇప్పుడు నాకు రిలీవింగ్ లెటర్ ఎలా వస్తుంద'ని ఆలోచనలో పడ్డాను. ఇలా నడుస్తుండగా మా వదిన(నా భర్త అక్క)వాళ్లు అరుణాచలం వెళ్లాలని అనుకుంటుంటే, నేను కూడా వస్తానని వాళ్లతో చెప్పాను. కారణమేమిటంటే, ఒకరోజు నేను నా సమస్య గురించి బాబాని అడిగి క్వశ్చన్&ఆన్సర్ సైట్లో చూస్తే, 'శివుని పూజించు. అది నాకు చేరుతుంది' అని వచ్చింది. అందువల్ల నేను అరుణాచలం వెళ్లి అక్కడంతా, 'నాకు ఏ ఇబ్బంది లేకుండా మంచిగా రిలీవింగ్ లెటర్ రావాల'ని అని అనుకున్నాను.
ఇకపోతే, హెచ్ఆర్ టీమ్ నాకు ప్రతివారం మెయిల్ చేస్తుండేది. నేను ఏదో ఒక రిప్లై ఇస్తూ ఉండేదాన్ని. ఇలా ఉండగా ఒకరోజు నా హెచ్ఆర్ స్పాక్(SPOC-single point of contact) నాకు ఫోన్ చేసి, "డిసెంబర్ 15, శుక్రవారం మీ చివరి పనిదినం" అని చెప్పారు. అఫీషియల్ మెయిల్ కూడా పంపారు. ఆ వెంటనే హెచ్ఆర్ నా BGV రెడ్ వచ్చినట్లు మెయిల్ పంపి, మీ హెచ్ఆర్ స్పాక్ మిమ్మల్ని సంప్రదిస్తారని అన్నారు. కానీ నా హెచ్ఆర్ స్పాక్ నా ఈ మెయిల్లో లేరు. ఎందుకో తెలీదుగానీ నా ముందు ప్రాజెక్ట్ స్పాక్నే మెయిల్ సీసీలో పెడుతున్నారు. తర్వాత ఆ హెచ్ఆర్ నాకు ఫోన్ చేసి చాలా మాట్లాడక, "నిన్ను ఉద్యోగం నుండి తొలగిస్తారు. ఈరోజే నీ చివరి పనిదినం" అని అంది. నేను తనతో, "నా చివరి పనిదినం డిసెంబర్ 15. ఇది నా హెచ్ఆర్ స్పాక్ అప్డేట్. అందుకు సంబంధించిన అఫీషియల్ మెయిల్ కూడా నాకు వచ్చింది. మరి మీరు ఎలా అలా చెప్తారు?" అని అన్నాను. అప్పుడు తను, "నేను మెయిల్ చెక్ చేసి మళ్ళీ నిన్ను సంప్రదిస్తాను" అంది. కానీ తను నన్ను మళ్ళీ సంప్రదించలేదు. ఇంతలో నా ఫైనల్ సెటిల్మెంట్ మొదలైనట్లు నా పర్సనల్ మెయిల్కి మెయిల్ వచ్చింది. నేను చాలా సంతోషించి మళ్లీ అరుణాచలం వెళ్ళొచ్చాను. ఎందుకంటే, మునుపు వెళ్లినప్పుడు అంతా మంచిగా జరిగితే వస్తానని అనుకున్నాను. ఆరోజు శనివారం. మాములుగా శనివారం పనిదినం కాదు, సెలవు దినం. అలాంటిది ఆ రాత్రి 11 తర్వాత నాకు రిలీవింగ్ లెటర్ వచ్చింది. అంతా బాబా మహిమ. నా అసలు హెచ్ఆర్ స్పాక్ మెయిల్ సీసీలో ఉండకవపోవడమేంటో! నన్ను ఉద్యోగం నుండి తొలగించడానికి ఒక గంట ముందే నా చివరి పనిదినం అప్డేట్ అవడం ఏంటో! బాబా శివుణ్ణి పూజించు అనడం ఏంటో! అరుణాచలం వెళ్లొచ్చిన రోజే నాకు రిలీవింగ్ లెటర్ రావడం ఏంటో! అదంతా సర్వాంతర్యామి అయిన సాయిబాబాకే తెలియాలి. ఆయన నాకు ఏ సమస్యా లేకుండా రిలీవింగ్ లెటర్ వచ్చేలా చేసారు. “బాబా! మీకు వెలది కృతజ్ఞతలు”.
బాబాకి చెప్పుకున్నాక చేకూరిన ఆరోగ్యం
సాయిభక్తులందరికీ నమస్కారాలు. నా పేరు స్రవంతి. ఈ 'సాయి మహారాజ్ సన్నిధి' బ్లాగు గురించి ఈ మధ్యనే మావారు నాకు చెప్పారు. అప్పటినుంచి నేను ఈ బ్లాగులోని భక్తుల అనుభవాలు చదువుతున్నాను. మాకు ఇద్దరు సంతానం. మొదట పాప పుట్టింది. తర్వాత 8 సంవత్సరాలకి బాబు పుట్టాడు. ఇద్దరూ బాబా వరప్రసాదమే. బాబుకి 9వ నెలప్పుడు 2023, అక్టోబర్లో జ్వరం, జలుబు, దగ్గు వచ్చాయి. డాక్టర్ని సంప్రదిస్తే మందులిచ్చారు. రెండు రోజులకి జ్వరం తగ్గింది కానీ, జలుబు, దగ్గు తగ్గలేదు. బాబు చాలా ఇబ్బందిపడుతూ ఆహారం సరిగా తినేవాడు కాదు. దాంతో మళ్ళీ డాక్టర్ వద్దకి వెళితే ఎక్స్-రే తీయించి, "ఊపిరితిత్తుల్లో ఇన్ఫెక్షన్ ఉంది. బాబుకి 5 రోజులు నెబ్యులైజర్ పెట్టండి" అని అన్నారు. అయితే బాబు చిన్నవాడైనందున నెబ్యులైజర్ పెడితే ఏడుస్తూండేవాడు. నాకు భయమేసి, "బాబా! మీ దయవల్ల వాడికి తగ్గితే, మీ అనుగ్రహం గురించి మన 'సాయి మహారాజ్ సన్నిధి' బ్లాగు ద్వారా తోటి భక్తులతో పంచుకుంటాను" అని బాబాకి చెప్పుకున్నాను. బాబా దయవల్ల మూడు రోజులలో బాబుకి పూర్తిగా నయమైపోయింది. "ధన్యవాదాలు సాయి. మొదటిసారి నా అనుభవాన్ని పంచుకున్నాను, తప్పులుంటే క్షమించు సాయి".