1. బాబాని నమ్ముకుంటే ఎటువంటి సమస్య నుండైనా బయటపడేస్తారు
2. ఊదీ మహాత్మ్యము
బాబాని నమ్ముకుంటే ఎటువంటి సమస్య నుండైనా బయటపడేస్తారు
ఓం శ్రీసాయినాథాయ నమః!!! నేను ఒక సాయిభక్తుడిని. 2023, డిసెంబర్ నెలలో మా కుటుంబం, నా భార్య అక్కల కుటుంబాలు కలిసి మూడు రోజులు బెంగుళూరు మరియు కేరళ పర్యటనకి వెళ్లాలని ప్లాన్ చేసి టిక్కెట్లు బుక్ చేసాము. తర్వాత 'ట్రైన్ కాన్సల్' అని, మళ్ళీ రిస్టోర్ అయ్యిందని, మరోసారి యశ్వంతపూర్(బెంగళూరు సిటీలో ఒక రైల్వేస్టేషన్) వరకు ట్రైన్ వెళ్ళదని ముందు స్టేషన్లో ఆగిపోతుందని మెసేజ్లు వస్తూ ఉండేవి. కానీ ఆ బాబా దయవల్ల మేము బయలుదేరే రోజు ఆ ట్రైన్ గమ్యస్థానం వరకు పూర్తి జర్నీ చేస్తుందని మెసేజ్ వచ్చింది. ఇకపోతే ఆ రోజు ఉదయం నుంచి నాకు జ్వరం వచ్చినట్లు అనిపించి నీళ్ల విరేచనాలు కూడా అయ్యాయి. అదే సమయంలో కేరళలో కరోనా మళ్ళీ మొదలైందని వార్త వచ్చింది. అప్పుడు నేను "బాబా! నేను, నా భార్య సంవత్సరం వయసున్న మా బాబుతో కేరళ పర్యటనకు వెళ్తున్నాం. మేము ఇక్కడ నుండి బయలుదేరి తిరిగి వచ్చేవరకు మీరు మాకు తోడుగా ఉండి ఎటువంటి ఇబ్బంది కలగకుండా చూడండి తండ్రీ. మీ అనుగ్రహం 'సాయి మహారాజ్ సన్నిధి' బ్లాగులో పంచుకుంటాను. అలాగే గురువారం మీ మందిరానికి వచ్చి 101 రూపాయల దక్షిణ సమర్పించి, ఒకరికి అన్నదానం చేస్తాను" అని బాబాను ప్రార్థించాను. మేము టెంపోలో వెళ్తున్నప్పుడు దారంతా ఏదో ఒక వాహనం మీద బాబా దర్శనమిస్తూ 'నేను మీతోనే ఉన్నాను, మిమ్మల్ని ముందుండి నడిపిస్తున్నాను' అని తెలియజేసారు. మేము మా పర్యటనను మైసూరు శ్రీచాముండేశ్వరిదేవి దర్శనంతో మొదలుపెట్టి వయనాడ్లో అన్ని ప్రసిద్ధ ప్రదేశాలు చూసాము. తిరిగి వచ్చేటప్పుడు మైసూరులో ప్రదేశాలు చూసుకొని యశ్వంతపూర్లో ట్రైన్ ఎక్కి సోలాపూర్ వచ్చాము. అలా మా పర్యటనను పూర్తి చేసాము. ఆ బాబా దయతో మాకు ఎక్కడా ఎటువంటి ఇబ్బందీ కలగకుండా చూసుకున్నారు. ముఖ్యంగా మా బాబు పెద్దగా అల్లరి చేయలేదు. మా అందరి ఆరోగ్యాలు కూడా బాగానే ఉన్నాయి. "చాలా చాలా ధన్యవాదాలు బాబా. మీ కృప మీ భక్తులందరిపై ఉండేలా చూడు తండ్రీ".
2024, జనవరి 8న మా ఆఫీసులో GM మరియు ఇతర హై లెవెల్ ఆఫీసర్ల ఇన్స్పెక్షన్ జరిగింది. ఆ ఇన్స్పెక్షన్కి మా మెకానికల్ జోనల్ హై లెవెల్ ఆఫీసరు కూడా వచ్చారు. ఆయన చాలా కోపిష్టి. చిన్న చిన్న తప్పులకు కూడా సస్పెండ్ చేయడం, చార్జిషీట్లు ఇవ్వడం వంటివి చేస్తుంటారు. కాబట్టి ఇన్స్పెక్షన్లో నా పనిలో ఏదైనా లోపం కనిపించిందంటే నేను ఆయన కోపానికి, పనిష్మెంట్కి గురికాక తప్పదు. అందుచేత నేను బాబాను, "బాబా! ఇన్స్పెక్షన్లో నా అధీనంలో జరిగే ఏ పనిలోనూ ఎటువంటి సమస్య, లోపం కనపడకుండా చూడండి. ఒకవేళ ఏదైనా సమస్య వచ్చినా అది సమసిపోయేలా చేయండి. అలాగే ఎవరికీ ఎటువంటి సమస్య లేకుండా కాపాడండి" అని ప్రార్థించాను. ఇన్స్పెక్షన్ జరిగే ముందురోజు మా సార్ నాతో, "రేపు ఇన్స్పెక్షన్ జరిగే లొకేషన్కి 2 కెమెరాలు స్టాఫ్తో పంపమ"ని చెప్పారు. అయితే నేను హెవీ వర్క్ వల్ల ఆ విషయం అక్కడికి వెళ్ళే స్టాఫ్కి చెప్పడం మర్చిపోయాను. ఇన్స్పెక్షన్ జరిగినరోజు మా డివిజనల్ ఆఫీసరు కెమెరా గురించి మా సార్ని అడిగితే, మా సార్ వెంటనే నాకు ఫోన్ చేశారు. నాకు ఏమి చెప్పాలో అర్ధంకాక ఏదో సర్ది చెప్పాను. మా సార్ అదేరోజు సాయంత్రం వేరే కార్యక్రమానికి కూడా కెమెరా ఏర్పాటు చేయమని చెప్పారు. నేను ఒక స్టాఫ్కి చెప్పి, “కెమెరా తీసుకెళ్లామ”ని చెప్పాను. కానీ అతను మొబైల్లో ఫొటోలు బాగా వస్తాయని మొబైల్లోనే ఫోటోలు తీయసాగాడు. మా సార్ అది చూసి చాలా కోపమయ్యారు. నన్ను మరుసటిరోజు తమ క్యాబిన్కి పిలిచి మందలించి, ఆ స్టాఫ్ మీద రిపోర్ట్ పంపించమని, రెస్పాన్సిబుల్ పర్సన్స్ మీద ఏక్షన్ తీసుకుంటానని అన్నారు. నేను ఒకవేళ ఆ స్టాఫ్ మీద రిపోర్ట్ వ్రాసి పంపితే, ఆ లోపంలో నేను కూడా భాగమే కాబట్టి స్టాఫ్తోపాటు నాకు కూడా పనిష్మెంట్ పడుతుంది. అందువల్ల నేను, "బాబా! నేను చేసిన తప్పుని క్షమించండి. నాకు గానీ, నా స్టాఫ్కి గానీ పనిష్మెంట్ లేదా ఎటువంటి నష్టం రాకుండా కాపాడండి. అలా జరిగితే వచ్చే గురువారం మీ పేరు మీద ఒకరికి అన్నదానం చేసి నా అనుభవాన్ని ‘ఆధునిక సచ్చరిత్ర’గా పిలవబడే 'సాయి మహారాజ్ సన్నిధి' బ్లాగులో పంచుకుంటాను" అని బాబాకి మొక్కుకున్నాను. బాబా చూపిన దయ చూడండి. మా జోనల్ హై లెవెల్ ఆఫీసరు, నాకు ఇంస్ట్రుక్షన్స్ ఇచ్చిన మా సార్ ఆ విషయాన్ని పూర్తిగా మర్చిపోయారు. దానివల్ల నాకుగానీ, మా స్టాఫ్ గానీ ఎటువంటి నష్టం/పనిష్మెంట్ రాలేదు. బాబాని నమ్ముకుంటే ఎటువంటి ఆటంకం నుండైనా బయటపడేస్తారు. భవిష్యత్తులో మరి ఎప్పుడూ ముఖ్యమైన విషయాల్లో నిర్లక్ష్యం వహించకూడదని ఈ అనుభవం వల్ల బాబా నాకు తెలిపారు. ఆయనకి మాటిచ్చినట్లు ఒకరికి అన్నదానం చేశాను. "ధన్యవాదాలు బాబా. ఇలానే నీ కృప నీ భక్తులందరిపై ఉండేలా చూడు తండ్రీ".
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహారాజ్ కి జై!!!
ఊదీ మహాత్మ్యము
సాయిబంధువులకు నమస్కారం. నా పేరు శ్రీనివాసరావు. 2023, డిసెంబర్ నెల చివరి వారంలో ఒక మూడు రోజులపాటు నాకు వెన్నుపూస నొప్పి వల్ల వంగడానికి, కూర్చుని లేవడానికి చాలా కష్టంగా ఉండేది. టాబ్లెట్ వేసుకున్నా, ఆయింట్మెంట్ రాసుకున్నా ఫలితం లేకపోయింది. చివరికి నాల్గవ రోజు నడవడానికి కూడా కష్టం అయింది. అప్పుడు నేను బాబా ఊదీ నొప్పి ఉన్న చోట రాసుకొని, "సాయంత్రానికి ఉపశమనం లభిస్తే, మీ అనుగ్రహాన్ని బ్లాగు ద్వారా తోటి సాయి భక్తులతో పంచుకుంటాను" అని బాబాను వేడుకున్నాను. బాబా దయవల్ల సాయంత్రానికి నొప్పి తగ్గి నేను నడవగాలిగాను. ఇలా కష్టమొచ్చిన ప్రతిసారీ బాబా మమ్మల్ని కాపాడుతున్నారు. "ధన్యవాదాలు బాబా".
ఓం శ్రీ సాయినాథాయ నమః!!!

