సాయిభక్తుల అనుభవమాలిక 1752వ భాగం....

---

ఈ భాగంలో అనుభవాలు:

1. నమ్మినవారికి అన్యాయం చేయరు బాబా

2. బాబా దర్శనంతో చేకూరిన మనోధైర్యం - సర్జరీ సఫలం

---

నమ్మినవారికి అన్యాయం చేయరు బాబా

ఓం శ్రీసాయినాథాయ నమః!!! సాయి భక్తులకు నమస్కారాలు. నా పేరు జయ. 2023, అక్టోబర్ నెలలో ఒకతను ఎక్కడినుండో వచ్చి  మా ఇంటి ఎదురుగా బత్తాయి జ్యూస్ బండి పెట్టాడు. ఆ జ్యూస్ తాగడానికి వచ్చే కుర్రాళ్ళు మా ఇంటి వైపు చూస్తుండటంతో మాకు ఇబ్బందిగా అనిపించి ఫ్రీగా తిరగలేకపోతుండేవాళ్ళము. మా అబ్బాయి మావారితో, "ఆ బండిని ఇంటికి ఎదురుగా తీయమని చెప్పండి డాడీ" అని అన్నాడు. దాంతో మావారు అతనిని బండి అక్కడినుండి తీయమని చెప్పారు. కానీ అతను ఆ బండి పక్కకు జరపకుండా నాకు చాలా పలుకుబడి ఉందని ఎవరెవరితోనో ఫోన్లో చేయించి మాతో మాట్లాడిస్తుండేవాడు. దాంతో అతను తేడానే అనిపించి నాకు భయమేసింది. నాకు తల్లి, తండ్రి అన్నీ బాబానే. ఏ సమస్య వచ్చినా ఆయనే నాకు దిక్కు. అందువల్ల, "ఇదేమిటి సాయిబాబా తాతయ్యా! ఇప్పటికే ఎన్నో సమస్యలతో చాలా డిస్టర్బ్ అయి వున్నాను. మళ్ళీ ఇదొక సమస్యేమిటి తండ్రీ? నాకు నువ్వే దిక్కు" అని చాలా బాధపడ్డాను. అప్పుడు నేను ఒకసారి ఆ బండి అతనికి చెప్పి చూడాలనిపించింది. అదే విషయం మా అబ్బాయితో, "తమ్ముడూ! ఇంటికి ఎదురుగా నువ్వు బండి పెట్టడం వల్ల మాకు ఇబ్బందిగా ఉంది, కొంచెం అర్థం చేసుకొని అవతలికి పెట్టుకోమ్మా అని చెప్పి  చూస్తాను" అని అన్నాను. అందుకు మా బాబు, "అమ్మా! ఈ విషయం డాడీతో చెప్పాక ఆ అబ్బాయితో మాట్లాడు" అని అన్నాడు. నేను వెంటనే, "మీ నాన్నతో కాదు. నాకు అన్నిటికి బాబాయే దిక్కు. చీటీలు వేసి ఆయన్నే అడుగుతాను. ఆయన ఏది చేయమంటే అదే చేస్తాన"ని చీటీలు వేసాను. బాబా నన్ను ఆ అబ్బాయిని అడగవద్దు అని చెప్పారు. ఆ చీటీ మా బాబుకి చూపించి, "బాబా వద్దన్నారుగా నేను ఆ బండి అబ్బాయిని ఏమీ అడగను. బాబానే చూసుకుంటారు" అని అన్నాను. తరవాత, "బాబా! మీ దయతో మా ఇంటికెదురుగా ఆ బండి తీసేస్తే, మీ అనుగ్రహం గురించి బ్లాగు ద్వారా తోటి భక్తులతో పంచుకుంటాన"ని బాబాని ప్రార్థించాను. మా అబ్బాయి, "డాడీ చెప్పినా తీయడం లేదు గనక కేసు పెడదాం" అని అంటుండేవాడు. ఒకరోజు నేను తనతో, "అలాంటి ఆలోచనేదీ చేయకు. ఈ విషయం గురించి నేను బాబాని చీటీలు వేసి అడిగినప్పుడు బాబా నన్ను అడగవద్దన్నారు. అందువల్ల నేను అడగట్లేదు. నువ్వు కూడా ఎలాంటి ఆలోచన చేయకు. బాబా చూసుకుంటారు. మనకు అన్యాయం చేయరు" అని చెప్పి ఆఫీసుకి వెళ్లాను. నేను ఆ సాయంత్రం ఆఫీస్ నుండి ఇంటికి వచ్చేసరికి మా బాబు, "అమ్మా! నేను ఈ సమస్య గురించి స్పందన అమరావతికి కంప్లైంట్ చేశాను. వాళ్లు పరిష్కరిస్తామన్నారు" అని అన్నాడు. నేను, "అదేంటి? బాబా వద్దన్నారని నీకు చీటీ కూడా చూపించాను కదా! మరి నువ్వు ఎందుకు కంప్లైంట్ చేశావ"ని కోప్పడ్డాను. దానికి మా బాబు, "నిన్ను అడగవద్దన్నారు. నన్ను కాదుగా. ఏమీ పరవాలేదు" అన్నాడు. వెంటనే నాకు 'బాబా తండ్రే ఇలా నడిపిస్తున్నాడు’ అనిపించింది. ఎందుకంటే, మా బాబుకి ధైర్యం తక్కువ. అదీకాక నేను వద్దన్న పని అంతా తేలికగా చేయడు. అందుచేత కంప్లైంట్ చేయడం బాబా ప్రేరణ వలనే జరిగిందని భావించాను. తర్వాత కంప్లైంట్ తీసుకున్న ఆఫీసర్లు మా బాబుకి ఫోన్ చేసి, అన్ని వివరాలు తీసుకొని స్వయంగా వచ్చి మా ఇంటి ముందున్న బత్తాయి బండి ఫోటోలు తీసి, అతని అక్కడినుండి ఖాళీ చేయమని వార్నింగ్ ఇచ్చారు. రెండురోజుల్లో అతను అక్కడినుండి ఖాళీచేసి వెళ్ళిపోయాడు. సాయిబాబా దయవల్ల మేము చాలా తేలికగా ఆ సమస్య నుండి బయటపడ్డాము. సాయిబాబాతండ్రి నమ్మినవారికి అన్యాయం చేయరు. కొన్ని సమస్యల నుండి బయటపడటానికి ఎక్కువ సమయం పడుతుందంటే ఆ సమయంలో మనం అనుభవించే ఆందోళన రూపంలో బాబా మన పాపాలను తొలగిస్తున్నారని అర్థం. "చాలా చాలా ధన్యవాదాలు బాబా. మా అందరికీ సంపూర్ణ సుఖసంతోషాలు ప్రసాదిస్తావని ఆశిస్తున్నాను తండ్రీ".

ఓం సమర్థ సద్గురు సాయినాథ్ మహారాజ్ కీ జై!!!

---

బాబా దర్శనంతో చేకూరిన మనోధైర్యం - సర్జరీ సఫలం

శ్రీ సచ్చిదానంద సద్గురు సాయినాథ్ మహారాజ్ కీ జై!!! సాయి భక్తులందరికీ నమస్కారం. నేను ఒక సాయి భక్తురాలిని. దాదాపు సంవత్సరంన్నర నుండి నాకు తరచూ కడుపునొప్పి వస్తుండేది. ఇద్దరు డాక్టర్లను సంప్రదిస్తే, వాళ్ళు ఆ నొప్పి గ్యాస్ వల్ల వస్తుందని చెప్పడంతో నేను అందుకు సంబంధించిన మందులు వాడుతూ ఉండేదాన్ని. ఇలా ఉండగా 2023, ఆగస్టులో నేను నెల తప్పాను. కానీ గర్భం నిలబడలేదు. అప్పుడు నాకు లాప్రోస్కోపి చేయాల్సి వచ్చి చేసి, నా గర్భాశయంలో కణిత(ఫైబ్రాయిడ్) ఉందని, దానివల్ల నాకు కడుపునొప్పి వస్తుందని, భవిష్యత్తులో కూడా గర్భం దాల్చినప్పుడు ఇబ్బందులు ఉండొచ్చని నిర్ధారణ చేసి మూడు నెలలు తర్వాత మళ్ళీ స్కానింగ్ తీసి ఫైబ్రాయిడ్ విషయంలో ఏం చేద్దామన్నది ఆలోచిద్దామని డాక్టర్ అన్నారు. తర్వాత నవంబరులో మళ్ళీ స్కానింగ్‌కి వెళితే, "సర్జరీ చేసి ఫైబ్రాయిడ్ తీసేయాలి" అని చెప్పారు. నేను బాబా మీద భారమేసి, 'అంతా బాగా జరిగితే, నా అనుభవాన్ని బ్లాగులో పంచుకుంటాను" అని అనుకున్నాను. అప్పటికే మేము డిసెంబర్ 4, 5 తేదీల్లో శిరిడీ వెళ్ళడానికి టిక్కెట్లు బుక్ చేసుకొని ఉన్నాము. అయినప్పటికీ కొన్ని అనివార్య కారణాల వల్ల డిసెంబర్ 4న సర్జరీ చేయించుకోవాల్సి వుంటుందని అనుకున్నాము. నాకెంతో బాధేసింది. అయితే బాబా దయవల్ల డాక్టరు వేరే పేషంట్లు ఉన్నారని, కాబట్టి డిసెంబర్ 6న చేస్తానని అన్నారు. అప్పుడు మేము, "అయితే మేము శిరిడీ వెళ్ళొస్తామ"ని అన్నాము. అందుకు డాక్టర్, "సంతోషంగా వెళ్లిరండి. వచ్చాక సర్జరీ చేద్దాం" అని అన్నారు. ఆ మాట వినగానే నాకు చాలా సంతోషమేసింది. అలా బాబా అనుగ్రహం వల్ల మేము ముందుగా అనుకున్నట్టు శిరిడీ వెళ్ళి బాబా దర్శనం చేసుకున్నాము. మనం ఎంత దూరంలో ఉన్నా వారిని పిచ్చుక కాలికి దారం కట్టి లాగినట్లు మనల్ని శిరిడీకి లాగి తమ దర్శనాన్ని అనుగ్రహిస్తారు. సర్జరీకి ముందు వారి దర్శనం నాకు కావాల్సినంత మనోధైర్యాన్ని ఇచ్చింది. ఆ ధైర్యంతో శిరిడీ నుండి వచ్చిన మరుసటిరోజు అంటే డిసెంబరు 6న నేను సర్జరీ చేయించుకోవడానికి వెళితే రోబోటిక్ సర్జరీ చేసి పైబ్రాయిడ్ తీసారు. బాబా దయవలన నేను సర్జరీ అయిన రెండో రోజే లేచి నడవగలిగాను. ఇప్పుడు మాములుగా తిరగగలుగుతున్నాను. ఇది అంతా బాబా లీల. "థాంక్యూ బాబా".

---