సాయిభక్తుల అనుభవమాలిక 1743వ భాగం....

---

ఈ భాగంలో అనుభవాలు:

1. బాబా దయతో అరుణాచలేశ్వరుని దర్శనం

2. బాబా దయ

---

బాబా దయతో అరుణాచలేశ్వరుని దర్శనం

నా పేరు ఝాన్సీ. మేము కోవిడ్ కాలంలో అరుణాచలం వెళ్ళినప్పుడు గిరిప్రదక్షిణ చేసాముగాని, ఆషాడ కృత్తిక సందర్భంగా జనం పెరుగుతున్నందున అరుణాచలేశ్వరుని దర్శనం చేసుకోకుండానే వచ్చేసాము. అందువల్ల నాకు అంతదూరం వెళ్లి, దర్శనం చేసుకోకుండా వచ్చేశామని బాధగా ఉండేది. చివరికి రెండు సంవత్సరాల తర్వాత మళ్ళీ అరుణాచలం వెళ్లాలనిపించి బాబాతో చెప్పుకొని అరుణాచలం వెళ్ళడానికి ప్రణాళిక మొదలుపెట్టాను. మా కుటుంబసభ్యులందరూ సమ్మతించాక శని, ఆదివారాల్లో  వెళ్ళొద్దామని అనుకున్నాను. అయితే శనివారం నెల్లూరు నుండి అరుణాచలం వెళ్ళడానికి ఒకేఒక్క ట్రైన్ ఉంది. ఆ ట్రైన్ టికెట్ కోసం ప్రయత్నిస్తే టికెట్ దొరకలేదు. చివరికి తత్కాల్ టికెట్ కోసం ప్రయత్నించినా దొరకలేదు. ఇక అప్పుడు బస్సుకి వెళదామని అనుకున్నాము. కానీ మా ఆడపడుచు చెన్నై నుంచి ట్రైన్స్ ఉంటాయేమో ప్రయత్నిద్దామని అంది. ఐతే వాటికి కూడా టిక్కెట్లు దొరకలేదు. ఇక అప్పుడు మా ఆడపడుచు భర్త, "బస్సులో వెళితే, అక్కడికి వెళ్ళాక ప్రదక్షిణ చేయడానికి చాలా కష్టం. కాబట్టి కారులో వెళదామ"ని చెప్పి కారులో వెళ్ళడానికి నిశ్చయించారు. తీరా అంతా నిశ్చయమయ్యాక వాతావరణం మారిపోయింది. సౌత్ ఇండియాకి సైక్లోన్ అని హెచ్చరికలు జారీ చేశారు. అలాగే చెన్నై, నెల్లూరులో వర్షం మొదలైంది. అయినా ఎలాగోలా ధైర్యం చేసి బయలుదేరాము. దారంతా చిన్నగా వర్షం పడుతుంది. అయినప్పటికీ బాబా సహాయం చేస్తారని నమ్మకంతో ప్రయాణం సాగించి చెన్నై చేరుకున్నాము. తర్వాత అక్కడినుండి అరుణాచలంకి బయలుదేరాము. మాకన్నా ముందు అరుణాచలం చేరుకున్న ఒక కుటుంబం ఫోన్ చేసి, "ఇక్కడ వర్షం పడుతుంది" అని అన్నారు. అది విని దేవుడా వర్షంలో ప్రదక్షిణ చేయాలా అని అనుకున్నాము. కానీ బాబా దయవల్ల మేము సాయంత్రం 4 గంటలకి అరుణాచలం చేరుకునేసరికి వర్షం లేదు, వాతావరణం అనుకూలంగా ఉంది. దీపం పెట్టి, కర్పూరం వెలిగించి 'అరుణాచల శివ.. అరుణాచల శివ' అంటూ ప్రదక్షిణ మొదలుపెట్టాము. మధ్యలో అప్పుడప్పుడు చిన్నగా వర్షం పడినా ఎక్కడా మాకు ఇబ్బంది కలగలేదు. రాత్రి 11కి ప్రదక్షిణ ముగించుకొని రూముకి వెళ్ళాము. మర్నాడు ఉదయం లేచి దర్శనంకు వెళ్ళాము. దర్శనానికి చాలా సమయం పట్టింది. ముందురోజు ప్రదక్షిణ వల్ల కాళ్లనొప్పులతో 5 గంటలసేపు క్యూలో నిల్చోడానికి చాలా కష్టమైంది. అయినా కష్టం తర్వాత ఫలితం అద్భుతంగా ఉంటుందని నేను చాలా ఓపికతో ఉన్నాను. బాబా దయవల్ల ఆ అరుణాచలేశ్వరుని దర్శించుకుని సంతోషంగా బయటకి వచ్చి తిరుగు ప్రయాణమయ్యాము. ఎక్కడా ఏ చిన్న ఇబ్బంది లేకుండా ఆదివారం రాత్రి 10 గంటలకు నెల్లూరు చేరుకున్నాము. "ధన్యవాదాలు బాబా. ఎంతో కష్టం అనుకున్నా ప్రయాణం చాలా సులువుగా పూర్తి చేసాము తండ్రీ. మీ ఆశీస్సులుంటే ఎంత కష్టమైన పనైనా సులువుగా పూర్తవుతుందని మరోసారి బలమైన నమ్మకం కలిగేలా చేసావు బాబా. ఇప్పటివరకు ఒక్కసారి కూడా శిరిడీ వచ్చి మీ దర్శనం చేసుకోలేకపోయాను. దయతో ఇకనైనా మీ దర్శనభాగ్యాన్ని నాకు ప్రసాదించండి బాబా, ప్లీజ్!".

---

బాబా దయ

సాయిబంధువులందరికీ నమస్కారం. నేను ఒక సాయిభక్తురాలిని. ఈ బ్లాగు ద్వారా మీ అందరితో బాబా నాకు ప్రసాదించిన కొన్ని అనుభవాలు పంచుకుంటున్నాను. ఒకసారి మా బాబుకి విపరీతమైన జ్వరం వచ్చింది. మందులు వాడినా పూర్తిగా తగ్గలేదు. అప్పుడు నేను సాయికి దణ్ణం పెట్టుకున్నాను. కొద్దిసేపటికే జ్వరం తగ్గిపోయింది.

నా ఫోన్ ఈమధ్య చాలాసార్లు కిందపడటంతో స్క్రీన్ మార్చాల్సి వచ్చింది. ఆ తరువాత కూడా ఫోన్ మరోసారి కింద పడింది. వెంటనే సాయికి దణ్ణం పెట్టుకొని, "ఫోన్ పని చేస్తే, మీ అనుగ్రహం బ్లాగు ద్వారా తోటి భక్తులతో పంచుకుంటాన"ని మొక్కుకున్నాను. తర్వాత నా ఫోన్  తీసి చూస్తే, పని చేసింది.

ఇటీవల ఒకసారి నాకు విపరీతమైన పంటి సమస్య వచ్చింది. దాదాపు మూడు రోజులపాటు తిండి సరిగా తినలేకపోయాను. అప్పుడు సాయికి దణ్ణం పెట్టుకొని, "బాబా! ఈ సమస్య తీరితే, మీ అనుగ్రహం బ్లాగు ద్వారా తోటి భక్తులతో పంచుకుంటాను" అని మొక్కుకున్నాను. బాబా దయవల్ల వెంటనే సమస్య సమసిపోయింది. ఆ తర్వాత ఒకసారి నెలసరి సమయంలో ఇబ్బంది ఎక్కువగా ఉంటే సాయికి దణ్ణం పెట్టుకున్నాను. బాబా దయతో ఆ సమస్య కూడా తీరింది. "చాలా చాలా ధన్యవాదాలు బాబా".

---