1. ఊదీ మహిమ
2. వ్యాపారం పెట్టుకోవడంలో బాబా సహకారం
ఊదీ మహిమ
ఓం శ్రీ సాయినాథాయ నమః!!! అఖిలాండకోటి బ్రహ్మాండనాయకుడైన సాయినాథునికి నా నమస్కారములు. నా పేరు శ్వేత. సాయిదేవుడు అందరికీ తమ దైనందిన జీవితంలోని ఎన్నో విషయాలలో సహాయం చేస్తుంటారు. మనం వాటిని ఒక్కోసారి గుర్తిస్తాము, ఒక్కోసారి గుర్తించము. కానీ బాబా ఎంతటి దయామయుడు అంటే మన చిన్న చిన్న విన్నపాలను సైతం గుర్తుంచుకొని వాటిని నెరవేర్చి మనకి ఆనందాన్ని ప్రసాదిస్తారు. ఒకసారి మా ఇంటిలోని వాషింగ్ మెషిన్ నడుస్తున్నప్పుడు మధ్యలో ఉన్నట్టుండి చాలా పెద్ద శబ్దం వచ్చింది. నేను వెంటనే మెషిన్ ఆపు చేశాను. తర్వాత నాకు వాషింగ్ మెషిన్ రిపేరుకు వచ్చిందనిపించి ఫ్రంట్ లోడ్ మిషన్ రిపేరుకు చాలా ఖర్చు అవుతుందని డబ్బులు లేని సమయంలో ఇలా అయిందని చాలా భయపడ్డాను. కాసేపటికి బాబాను తలుచుకుని ఊదీ వాషింగ్ మెషిన్కు పెట్టి ఆన్ చేశాను. బాబా దయవల్ల మెషిన్ నార్మల్గా పని చేసింది. బాబా ఊదీ ఎంతటి మహిమ గలదో కదా!
2023, డిసెంబర్ నెలలో నాకు గుండెలో ఏదో ఒకలాగా అనిపిస్తూ ఉండేది. నొప్పిగా ఉండేది కాదు కానీ, చాలా దడగా ఉండేది. చమటలు పట్టి చాలా టెన్షన్ వచ్చేది. ఇంటిలో ఎలాంటి టెన్షన్లు లేకపోయినా కూడా నాకు చాలా టెన్షన్ అనిపించేది. బాబాను తలుచుకుని ఊదీ గుండెలకు పూసుకొని, అలాగే నూదటన పెట్టుకొని, నోట్లో వేసుకున్నాను. బాబా దయవల్ల గుండెలో ఉన్న ఆ బాధ తగ్గుముఖం పట్టింది. అయినప్పటికీ గుండెకు సంబంధించినది కాబట్టి డాక్టర్ దగ్గర ఒకసారి చూపించుకుందామని వెళ్ళాము. ఈసీజీ చేస్తే అంతా నార్మల్ అని వచ్చింది. అంతా సాయిదేవుని కృప. సాయిదేవుని మహిమలు వర్ణించడానికి మాటలు చాలవని నాకు అనిపిస్తుంది. "ధన్యవాదాలు బాబా. మీకు మాటిచ్చినట్లు ఈ రెండు అనుభవాలను తోటి సాయి భక్తులతో పంచుకున్నాను తండ్రి". చదువరులకు నాదొక మనవి, 'నేను రోజూ బాబాతో విన్నవించుకుంటున్న ఒక విషయాన్ని ఎంత త్వరగా వీలైతే అంత తొందరగా తీర్చమని నా తరుపున మీరు కూడా ప్రార్థించండి’.
సచ్చిదానంద సద్గురు సాయినాథ్ మహరాజ్ కీ జై!!!
వ్యాపారం పెట్టుకోవడంలో బాబా సహకారం
నేను ఒక సాయిభక్తుడిని. నేను 10వ తరగతి చదువుతున్నప్పటి నుంచి 'శ్రీసాయి లీలామృతం' పారాయణ చేస్తున్నాను. నేను బీటెక్ పూర్తి చేసిన తరువాత రెండు సంవత్సరాలు ఉద్యోగం చేశాను. ఆపై సొంతంగా వ్యాపారం మొదలుపెట్టాను. అయితే చాలావరకు నష్టపోయాను. నా డబ్బులు అన్నీ అయిపోయి అప్పులు మిగిలాయి. అప్పుడు కొందరు నువ్వింకా ఉద్యోగానికి తిరిగి వెళ్లడం మంచిదని సలహా ఇచ్చారు. కానీ నాకు అలా వెళ్లడం ఇష్టం లేక మరో మంచి వ్యాపారం మొదలుపెట్టి, ఈసారి ఖచ్చితంగా విజయం సాధించాలని అనుకున్నాను. అందుకోసం ఒక మంచి వ్యాపారం చేయడానికి ప్రణాళిక చేశాను. కానీ నాకు దాదాపు 20 లక్షలు కావాలి. నా దగ్గర చూస్తే ఒక్క రూపాయి కూడా లేదు. నా తల్లిదండ్రులకి అంత డబ్బు ఇచ్చే స్తోమత లేదు. అందుకని నేను బాబా మీద భారమేసి డబ్బుకోసం ప్రయత్నాలు మొదలుపెట్టాను. అప్పుడు మా అత్తగారు, "నేను లోన్కి అప్లై చేశాను. అది వస్తే అందులో సగం అంటే దాదాపు 5 లక్షలు నీకిస్తాను. నువ్వు పెట్టుబడి కింద వాడుకో" అని చెప్పారు. కానీ కొన్ని కారణాల వల్ల ఆ లోన్ ఆవిడకు రాలేదు. నేను చాలా బాధపడ్డాను. కానీ బాబా నాకు తోడు ఉన్నారనే నమ్మకంతో డబ్బుకోసం ప్రయత్నం చేశాను. బాబా దయవల్ల నా స్నేహితుడు ఒకతను 2 లక్షల రూపాయలు నాకు ఇచ్చి, "నువ్వు పని మొదలుపెట్టుకో. మిగత డబ్బు అదే వస్తుందిలే" అని ధైర్యం చెప్పాడు. నేను ఆ డబ్బుతో పని మొదలుపెట్టాను. కొన్ని నెలలు తర్వాత మా అత్తగారు నాకోసం ఇంకోసారి లోన్కి ప్రయత్నాలు చేశారు. అప్పుడు నేను, "బాబా! ఈసారి లోన్ శాంక్షన్ అయితే మీ అనుగ్రహం 'సాయి మహారాజ్ సన్నిధి' బ్లాగు ద్వారా తోటి గురుబంధువులతో పంచుకుంటాను" అని బాబాకి, భరద్వాజ్ మాస్టర్గారికి మొక్కుకున్నాను. బాబా దయవల్ల అనుకున్న దానికంటే ఎక్కువ లోన్ శాంక్షన్ అయింది. తర్వాత కూడా ఎప్పుడు, ఏ కష్టం వచ్చినా బాబా దగ్గర చెప్పుకుంటే వెంటనే అది తొలగిపోయేది. నా వ్యాపారానికి ఏ పేరు పెట్టాలని అనుకున్నప్పుడు కూడా బాబా సన్నిధిలోనే నాకు సమాధానం దొరికింది. ఇలా ప్రతి అడుగులో బాబా, మాస్టర్ గారు నా వెంట ఉండి నన్ను నడిపించారు. వారి దయతో నేనిప్పుడు చాలా సంతోషంగా ఉన్నాను. ఇది అంతా బాబా, మాస్టర్గారి కృప. "చాలా చాలా ధన్యవాదాలు బాబా".
