.jpeg)
1. సమస్యలను బాబా వద్దకు తీసుకెళ్లడమే తరువాయి - వెంటనే పరిష్కరిస్తారు2. బాబా దయ
సమస్యలను బాబా వద్దకు తీసుకెళ్లడమే తరువాయి - వెంటనే పరిష్కరిస్తారు
ఓంసాయి శ్రీసాయి జయజయసాయి!!! నేను ఒక సాయిభక్తురాలిని. మా నాన్నగారు పోయిన తర్వాత నా చేయి పట్టుకుని నన్ను నడిపిస్తూ, ఓదారుస్తూ ముందుకు తీసుకెళ్తుంది నా సాయి మాత్రమే. నాకు కష్టమొచ్చినా, బాధ కలిగినా నాకు తోడుగా ఉండేది ఆయనొక్కరే. నాకెప్పుడు ఆరోగ్యం బాగోకపోయినా నా కళ్ళు వాలిపోతాయి. అలా కళ్ళు వాలిపోయినప్పుడు రెండు, మూడు రోజుల దాకా నేను మనిషిని కాలేను. నీరసంతో ఏదో లోకంలో ఉన్నట్టు ఎటో చూస్తూ, ఎవరైనా, ఏదైనా మాట్లాడినా అస్పష్టంగా సమాధానమిస్తాను. అలా ఈమధ్య నేను ఆరోగ్యం బాగాలేక బాధపడుతున్నప్పుడు కేవలం బాబా ఊదీ కలిపిన నీళ్లు తాగాను. అంతే! సాయి నాకు స్వస్థత చేకూర్చి నన్ను ఆ అనారోగ్య సమస్య నుంచి బయటపడేసారు. ఊదీ అంటే సంజీవని. "థాంక్యూ బాబా. మీరు లేకపోతే నేను ఏమైపోతాను?".
మేము గత కొన్ని సంవత్సరాలుగా సాయి మార్గంలో పయనిస్తూ ఆయన పద్ధతులే అవలంబిస్తున్నాం. మాకు వీధి కుక్కలు అంటే ఎనలేని ప్రేమ. మేము రోజూ దగ్గర దగ్గర 10 నుండి 15 కుక్కలకు అన్నం పెడతాం. ఇది చూసి మా వీధిలో ఉండే వేరే మతానికి చెందిన కొందరు, "మీరు ఒక్కళ్ళే ఉన్నవాళ్ళా? మీకు అన్నం మిగిలితే కాలువలో పారేసుకోండి. కానీ వీధి కుక్కలను పిలిచి, వాటికి మాత్రం పెట్టొద్దు. మీరు అన్నం పెట్టడం వల్ల ఆ కుక్కలు మా పిల్లల్ని రోడ్డు మీద ఆడుకోనివ్వటం లేదు" అని మా మీద గొడవకి వచ్చారు. అప్పుడు నేను ఆ సమస్య గురించి సాయికి చెప్పుకుని, "వీధిలో వాళ్లతో మాకు ఎటువంటి గొడవలు రాకూడదు. వాళ్లు కుక్కలని కొట్టకూడదు" అంటూ ప్రతిరోజూ విన్నవించుకుంటుండేదాన్ని. బాబా దయవల్ల మా మీద విపరీతమైన కోపంతో ఊగిపోయేటటువంటివాళ్ళు ఎంతో ప్రేమగా, మర్యాదగా మాతో మాట్లాడటం మొదలుపెట్టారు. సాయికి సాధ్యం కానిది ఏదీ లేదు. మనం సమస్యలను ఆయన దాకా తీసుకెళ్లడమే తరువాయి వెంటనే వాటిని పరిష్కరిస్తారు. అలాంటి ఉదాహరణలు నా జీవితంలో ఎన్నో ఉన్నాయి. వాటన్నిటిని వ్రాసుకుంటూ పోతే ఒక పుస్తకం అవుతుంది. సమస్య ఏదైనా సాయికి చెప్పేసి వదిలేయండి. అన్నీ ఆయన చూసుకుంటారు. ఆయన చేయరేమో అని అపనమ్మకం వద్దు. ఆయన ఖచ్చితంగా చేస్తారు. శ్రద్ధ - సబూరీలతో వేచి ఉండాలంతే!
అనంతకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహారాజ్ కీ జై!!!
బాబా దయ
నా పేరు తేజశ్రీ. మేము యూరప్లో నివాసముంటున్నాము. మేము ఇటీవల ఇల్లు మారాం. ఇక్కడ ఇల్లు అద్దెకు ఇవ్వడానికి చాలా నియమనిబంధనలు ఉంటాయి. వాటిని సరిగా పాటిస్తున్నామో, లేదో చూడటానికి ఓనర్లు ఎవరో ఒకరని ప్రతివారమూ పంపిస్తుంటారు. వాళ్ళు ముఖ్యంగా పిల్లల విషయంలో చాలా స్ట్రిక్ట్గా వుంటారు. ఒకరోజు నా భర్త మా చిన్నబాబుని హాస్పిటల్కి తీసుకుని వెళ్ళారు. అదే సమయంలో నేను పరీక్షకి వెళ్ళాల్సి ఉంది. అది ఫైనల్ పరీక్ష అవ్వడం వల్ల నేను నిర్ణిత సమయానికల్లా అక్కడుండాలి. అందుచేత నేను నా భర్త త్వరగా వచ్చేస్తారన్న ఉద్దేశ్యంతో మా పెద్దబాబుని ఇంటిలో వదిలిపెట్టి పరీక్షకి వెళ్లిపోయాను. వాడికి 5 సంవత్సరాలు. బాబు అల్లరి ఏమీ చేయకుండా ఇంట్లో ఉన్నాడు. కానీ అదే సమయంలో చెకింగ్ కోసం వచ్చిన అమ్మాయి బాబుని తనతో తీసుకెళ్లి, మావారు వచ్చిన తర్వాత ఆయన్ని బాగా తిట్టింది. ఇంకా మరుసటిరోజు మీటింగ్కి మమ్మల్ని రమ్మన్నారు. నాకు, ‘ఏమైనా సమస్య అవుతుందేమో, మమ్మల్ని ఇల్లు ఖాళీ చేసి అక్కడినుండి వెళ్ళిపోమంటారేమోనని’ చాలా భయమేసింది. అప్పుడు నేను, "బాబా! మీ దయవల్ల వాళ్ళు మమ్మల్ని ఏమీ అనకుండా వదిలిస్తే మీ అనుగ్రహం గురించి బ్లాగు ద్వారా తోటి సాయిభక్తులతో పంచుకుంటాను" అని బాబాకి మొక్కుకున్నాను. బాబా దయవల్ల మరుసటిరోజు మీటింగ్లో మమ్మల్ని ఏమీ అనలేదు. అలాగే నేను ఫ్రెంచ్ కోర్సులో జాయినై, "మొదటి లెవెల్లో పాసైతే, బాబా అనుగ్రహం తోటి భక్తులతో పంచుకుంటాను" అని బాబాకి మొక్కుకున్నాను. బాబా దయవల్ల ఫస్ట్ లెవల్ పాసయ్యాను. "చాలా చాలా ధన్యవాదాలు బాబా".
