డాక్టర్ తల్వైల్కర్ బాబా భక్తుడు. అతనికి బాబాపట్ల ఎంత భక్తి అంటే డాక్టరై ఉండీ మందుల మీద ఆధారపడక బాబా ఊదీయే అత్యంత శక్తివంతమైన ఔషధమని నమ్మేవాడు. ఒకసారి అతను శిరిడీ వెళ్ళినప్పుడు బాబా అతనిని ఆశీర్వదించి ఊదీ ఇచ్చారు. ఆ ఊదీని అతనెంతో జాగ్రత్తగా భద్రపరచుకున్నాడు. తరువాత అతను ఇండోర్‌లో తన వైద్యవృత్తిని ప్రారంభించాడు. అతను బాబా పూజ చేసిన తరువాతనే తన వద్దకు వచ్చే రోగులను పరీక్షించి చికిత్స చేస్తుండేవాడు. బాబా కృపతో అతి ప్రమాదకర పరిస్థితులలో ఉన్న ఎంతోమంది రోగులకు నయం చేయడం వలన కొద్దికాలంలోనే అతనికి మంచి గుర్తింపు వచ్చింది.
ఒకరోజు జబ్బు బాగా ముదిరిపోయిన ఒక రోగిని అతని బంధువులు చివరి ప్రయత్నంగా వైద్యం కోసం తల్వైల్కర్ వద్దకు తీసుకొచ్చారు. అప్పటికి ఎంతోమంది వైద్యులు అతనికి చికిత్స చేసి విఫలమయ్యారు. ఆ రోగి జీవిత చరమాంకంలో ఉన్నప్పటికీ బంధువులు డాక్టర్ తల్వైల్కర్ మీద ఎన్నో ఆశలు పెట్టుకుని రోగిని అతని వద్దకు తీసుకుని వచ్చారు. తల్వైల్కర్ రోగి బంధువులను భయపడవద్దని ఓదార్చి, రోగికి కొన్ని ఔషధాలిచ్చి, “బాబా! మీ దయవల్లే ఇతను రక్షింపబడగలడు. ఇతనికి నయం చేయండి” అని బాబాను ప్రార్థించాడు. తరువాత రోగి బంధువులకు మూడు ఊదీ పొట్లాలిచ్చి, “రోజుకొక పొట్లం చొప్పున ఊదీని నీళ్లలో కలిపి రోగి చేత వరుసగా మూడు రోజులు త్రాగించండి” అని చెప్పాడు. వాళ్ళు తల్వైల్కర్ సూచించిన విధంగా మూడు రోజులు ఊదీనీటిని రోగి చేత త్రాగించారు. ఊదీ మహత్యం వల్ల రోగి స్పృహలోకి వచ్చాడు. అప్పుడు అతని బంధువులు, “రోగి ఆరోగ్యం చాలావరకు మెరుగుపడింది, ఒకసారి ఇంటికి వచ్చి చూసివెళ్లమ”ని తల్వైల్కర్‌కి కబురుపెట్టారు. అతను వాళ్ళింటికి వెళ్లి మరికొన్ని మందులను వాడమని సూచించాడు. ఆ మందులతో రోగి క్రమక్రమంగా కోలుకొని కొద్దిరోజుల్లోనే పూర్తి ఆరోగ్యవంతుడయ్యాడు. చివరిసారిగా ఆ వ్యక్తి పరీక్ష చేయించుకోవడానికి వచ్చినప్పుడు డాక్టర్ తల్వైల్కర్, “నీ జబ్బు నయంచేసి నిన్ను రక్షించింది నేను కాదు” అని చెప్పి అతనిని శిరిడీ తీసుకుని వెళ్ళాడు. మసీదులో అడుగుపెడుతూనే అతనికి బాబాను చూపిస్తూ, “మరణం నుండి నిన్ను రక్షించింది ఈయనే” అని చెప్పాడు. అది విన్న ఆ వ్యక్తి పరుగున వెళ్ళి, తనపై అంత అనుగ్రహాన్ని చూపినందుకు బాబా పాదాలు పట్టుకొని కృతజ్ఞతలు తెలుపుకున్నాడు.
సోర్స్: అంబ్రోసియా ఇన్ శిరిడీ.
