ఈ భాగంలో అనుభవాలు:
- బాబా ప్రసాదించిన అనుభవాలు
- ప్రతి చిన్న ఇబ్బందినీ ప్రేమతో అధిగమింపజేస్తున్న బాబా
- సాయి కృప - మానసిక ఒత్తిడి నుండి ఉపశమనం
బాబా ప్రసాదించిన అనుభవాలు
అందరికీ నమస్కారం! సాయి అనుగ్రహం ఎల్లవేళలా మీ అందరిపై ఉండాలని కోరుకుంటున్నాను. నా పేరు బెహరా ఛత్రపతి. కరోనా సమయంలో పరీక్షల నిమిత్తం నేను కాలేజీకి వెళ్ళవలసి వచ్చి వెళ్ళాను. బాబా దయవల్ల పరీక్షలు బాగా జరిగాయి. కానీ ఆ మరుసటిరోజు మా బ్యాచ్‌లో ఒకరికి కరోనా పాజిటివ్ అని తెలిసి నేను చాలా ఆందోళనపడ్డాను. ఆ స్థితిలో నేను సాయినే నమ్ముకుని, "ఈ విపత్కర పరిస్థితి నుండి బయటపడితే మీకు నైవేద్యం సమర్పించుకుంటాను" అని బాబాని వేడుకున్నాను. తరువాత ఇంట్లో అందరికీ దూరంగా ఉంటూ, సాయి ఊదీని నీళ్లలో కలిపి త్రాగుతుండేవాడిని. చివరిగా కరోనా పరీక్ష చేయించుకుంటే, బాబా అనుగ్రహం వల్ల 'నెగెటివ్' వచ్చింది. బాబా కృపతో ఏ చింతా లేకుండా ఆ కష్టం నుండి బయటపడ్డాను. "బాబా! మీకు చాలా చాలా ధన్యవాదాలు".
2020లో నాకొక స్వప్నం వచ్చింది. ఆ కలలో నేను సాయిబాబా మందిరానికి వెళ్ళాను. పక్కనే ఆంజనేయస్వామి గుడి ఉంది. అక్కడ దత్తస్వరూపులైన వాసుదేవానందస్వామి నాకు ఆంజనేయస్వామి తాయెత్తు ఇచ్చారు. తరువాత 10 రోజులకు శ్రీపాద శ్రీవల్లభస్వామి చరితామృతం గురించి నాకు తెలిసింది. అందులో 45వ అధ్యాయంలో ఆంజనేయస్వామిని శ్రీపాదులవారు సాయిబాబాగా అవతరించమని చెప్పినట్లు ఉంది. (ఆ పేజీలను ఈ క్రింద జతపరుస్తున్నాను.) అది చదివాక, నాకొచ్చిన కల ద్వారా సాయిబాబా ఆంజనేయస్వామి అవతారమని సందేశమిచ్చారని గ్రహించాను. అద్భుతమైన ఆ స్వప్నం ఇంకా నా కళ్ళముందే కదలాడుతున్నట్లు ఉంది.
ప్రతి చిన్న ఇబ్బందినీ ప్రేమతో అధిగమింపజేస్తున్న బాబా
అందరికీ నమస్తే! నా పేరు అంజలి. నాకు ఏ చిన్న ఇబ్బంది కలిగినా నేను సాయినే ఆశ్రయిస్తాను. ఆయన నా ప్రతి కష్టాన్నీ ఇట్టే పరిష్కరిస్తూ నాపై అపారమైన ప్రేమను కురిపిస్తున్నారు. అందుకు నిదర్శనంగా ఎన్నో అనుభవాలు. నేను ఎలక్ట్రికల్ డిపార్ట్‌మెంటులో పనిచేస్తున్నాను. నా విధులననుసరించి నేను ప్రతి నెలా ఆఫీసు ల్యాప్‌టాప్‌లో రీడింగ్స్ తీయాలి. 2020, డిసెంబరు 1న ఆ పనిలో నిమగ్నమయ్యాను. ల్యాప్‌టాప్‌లో మీటర్ రీడింగులు వస్తుండగా ప్రెస్ వాళ్లమంటూ ఒక నలుగురు మా ఆఫీసుకి వచ్చి, ఏదో మీటింగ్ కోసం డబ్బులు ఇమ్మని అడిగారు. అంతకుముందు కూడా వాళ్ళు అలాగే వచ్చారు. అప్పుడు నాకు తెలియక నేను వాళ్ళకి డబ్బులిచ్చాను. వాళ్ళు మరలా వచ్చేసరికి నాకు ఏం చేయాలో అర్థం కాలేదు. నేను ఇవ్వనంటే వాళ్ళు ఏమైనా గొడవ చేస్తారేమోనని నాకు భయమేసింది. వెంటనే బాబాను తలుచుకుని, "బాబా! వాళ్ళు ఏ గొడవా చేయకుండా వెళ్ళిపోవాలి" అని చెప్పుకున్నాను. తరువాత వాళ్ళతో, "మీకు డబ్బులు ఇవ్వటం కుదరదు. మొదటిసారంటే ఏదో ఇచ్చాను కానీ, ఇప్పుడు ఇవ్వలేను. నాకు జీతం తప్ప అదనంగా డబ్బులేమీ రావు. కాబట్టి దయచేసి వెళ్లిపోండి" అని చెప్పాను. వాళ్ళు కొంచెంసేపు ఉండి వెళ్లిపోయారు. అంతా బాబా దయ. ఆయన కృపవలన వాళ్ళు ఏ గొడవా చేయకుండా వెళ్లిపోయారు.
ఇకపోతే, నేను అప్పటికే రీడింగులు తీస్తున్న పని విషయానికి వస్తే, ఒక మీటర్ రీడింగ్ మధ్యలో ఆగిపోయింది. నేను ఎంత ప్రయత్నించినా రీడింగ్ రాలేదు. ఇక చివరిగా బాబాను తలచుకుని, "బాబా! ఎలాగైనా రీడింగ్ వచ్చేలా చేయండి" అని ఆయనకు శరణువేడాను. అంతే! మిరాకిల్ జరిగినట్లు మరుక్షణంలో ఆ మీటర్ రీడింగ్ రావటం మొదలైంది. 'బాబా దయ' అనుకుని ఆనందంగా వారికి కృతజ్ఞతలు చెప్పుకున్నాను.
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!
