ఈ భాగంలో అనుభవాలు:
- బాబా దయవల్ల తీరిన కష్టాలు
- కరోనా నుంచి రక్షించడమే కాదు, తమకు అంకిత భక్తునిగా మలుచుకున్న బాబా
బాబా దయవల్ల తీరిన కష్టాలు
సాయిబంధువులకు నమస్కారం. నేను ఒక సాయిభక్తురాలిని. 2020, ఫిబ్రవరి నెలలో మావారికి క్రొత్త కంపెనీలో ఉద్యోగం వచ్చింది. దాంతో మావారు తాను పనిచేస్తున్న కంపెనీలో నోటీస్ పీరియడ్ కూడా ఇచ్చేశారు. మార్చి 17వ తేదీన క్రొత్త కంపెనీలో జాయిన్ కావాల్సి ఉంది. క్రొత్త కంపెనీలో చేరేముందు బాబాను దర్శించుకోవాలని మార్చి 15వ తేదీన మేము శిరిడీ వెళ్ళాము. కనులారా బాబాను దర్శించుకుని ఇంటికి తిరిగి వచ్చాక క్రొత్త కంపెనీలో జాయినింగ్ డేట్‌కి on-board అవుదామంటే, బ్యాక్‌గ్రౌండ్ వెరిఫికేషన్ క్లియర్ అవలేదని చెప్పి మరో వారం రోజులు వెయిట్ చేయమన్నారు కంపెనీవాళ్ళు. ఈలోపు మార్చి 22వ తేదీన దేశవ్యాప్తంగా లాక్‌డౌన్ ప్రకటించారు. ఆరోజు నుండి 2021 వచ్చినా క్రొత్త కంపెనీ మావారిని సంప్రదించలేదు. దాదాపు ఒక సంవత్సరం నుండి మావారికి ఆదాయం లేకపోవడంతో అప్పటివరకు ఎంతో ఆనందంగా సాగుతున్న మా జీవితాలు ఒక్కసారిగా ఎంతో సంఘర్షణకు లోనయ్యాయి. 2020 చివరిలో నేను బాబాకు నమస్కరించుకుని, “మీ అనుగ్రహంతో మావారికి ఉద్యోగం వస్తే, మీ అనుగ్రహాన్ని తోటి భక్తులతో పంచుకుంటాను” అని మ్రొక్కుకున్నాను. బాబా అనుగ్రహంతో 2021 ఆరంభంలో మావారికి ఎయిర్‌పోర్టులో ఉద్యోగం వచ్చింది. ఎంతో సంతోషంతో బాబాకు మనసారా కృతజ్ఞతలు తెలుపుకున్నాను. బాబా దయవలన మేమిప్పుడు చాలా సంతోషంగా ఉన్నాము. పూర్వజన్మ కర్మల వలన మేము కొన్ని కష్టాలను అనుభవించాము. కేవలం బాబా దయవల్లనే మా కష్టాలు తీరాయని నేను మనస్ఫూర్తిగా నమ్ముతున్నాను.
కరోనా నుంచి రక్షించడమే కాదు, తమకు అంకిత భక్తునిగా మలుచుకున్న బాబా
నేను శిరిడీసాయి భక్తుడిని. నేను యుఎస్ఏలో నివాసం ఉంటున్నాను. నేనిప్పుడు పంచుకోబోయే అనుభవం 2020, జులై నెలలో జరిగింది. మా నాన్న ఆఫీసర్ క్యాడర్లో ఉద్యోగం చేస్తున్నారు. వాళ్ళ ఆఫీసులో చాలామంది వైరల్ ఫీవర్‌తో బాధపడ్డారు. మా నాన్న కూడా వైరల్ ఫీవర్‌తో బాధపడ్డారు. మొదట్లో మేము అది మామూలు జ్వరం, జలుబు అనుకున్నాము. కానీ డాక్టర్ నాన్నగారిని ఆర్.సి-పి.టి.ఆర్ పరీక్ష చేయించుకోమన్నారు. రిపోర్టులో నాన్నకి స్వల్పంగా కరోనా ఎఫెక్ట్ అయిందని వచ్చింది. కానీ కేవలం ఆ టెస్ట్ మీద ఆధారపడలేమని, స్వాబ్ టెస్ట్ కూడా చేయాలని చెప్పారు. దాంతో యు.ఎస్.ఏలో ఉంటున్న నేను ఆందోళనతో ఆ రాత్రంతా సచ్చరిత్ర చదువుతూ, “సానుకూల ఫలితాన్ని ఇవ్వమ”ని బాబాను ప్రార్థించాను. రెండురోజులు గడిచాయి. ఆ టెస్టు రిజల్ట్ ఖచ్చితంగా నెగిటివ్ వస్తుందని, అంటే నాన్నకి కరోనా లేదని వస్తుందని నేను ఆశించాను. కానీ బాబా నన్ను పరీక్షించదలచారు. రిజల్ట్ పాజిటివ్ వచ్చింది. ఆ విషయం తెలిసి నేను నిర్ఘాంతపోయాను. బాబాను పూర్తిగా నమ్మినప్పటికీ ఎందుకిలా జరిగిందని నేను చాలా బాధపడ్డాను. అయితే, నాన్న కోలుకుంటారని, బాబా మా విశ్వాసాన్ని పరీక్షిస్తున్నారని నాకు తెలుసు. అందువలన నేను ఆశ వదులుకోకుండా పారాయణ మొదలుపెట్టాను. అంతేగాక, ప్రతిరోజూ ఉదయం ఐదు గంటలకి బాబా ఆరతి వింటూ ఆయనను హృదయపూర్వకంగా ప్రార్థిస్తూ ఉండేవాడిని. నాన్న షుగర్ పేషెంట్. షుగర్ వ్యాధిగ్రస్థులపై కరోనా ప్రభావం చాలా తీవ్రంగా ఉంటుందన్న వార్త నన్ను మరింత ఆందోళనకు గురిచేసింది. సరిగ్గా అప్పుడే రాత్రంతా నిద్రపట్టక నాన్న చాలా ఇబ్బందిపడ్డారని మా చెల్లి ద్వారా తెలిసి నేను బాబా నుండి ఏదైనా భరోసా పొందాలనుకుని క్వశ్చన్&ఆన్సర్ వెబ్‌సైట్లో నాన్న ఆరోగ్యం గురించి బాబాను అడిగాను. “నాలుగురోజుల్లో రోగి కోలుకోవడం ప్రారంభిస్తాడు” అని బాబా సమాధానం వచ్చింది. నాకు బాబాపై పూర్తి విశ్వాసముంది, కాబట్టి సహనంతో వేచి చూశాను. సరిగ్గా నాలుగవరోజు నాన్న ఆరోగ్యంలో మెరుగుదలను మేము గుర్తించాము. ఆయన కోలుకోవడం ప్రారంభించారు. అప్పుడు నేను యథాలాపంగా శిరిడీసాయి వెబ్‌సైట్ ఓపెన్ చేసి చూస్తే, “మూడు గురువారాలు పొగాకు మరియు నూనె దానం చేయమ”ని వచ్చింది. నేను మొదటి గురువారం సిగరెట్, నూనె బాబాకు సమర్పించి పూజ పూర్తిచేశాను. మరుక్షణం నా ఫేస్‌బుక్ అకౌంట్ ఓపెన్ చేసినప్పుడు, చిలిం నోటిలో పెట్టుకుని ఉన్న బాబా ఫోటో చూసి ఆశ్చర్యపోయాను. బాబా అనుగ్రహంతో కేవలం పది రోజుల్లో నాన్న పూర్తిగా కోలుకున్నారు. నా ఆనందానికి అవధులు లేవు. నాన్న పూర్తిగా కోలుకున్న తరువాత నేను బాబాని, “నాన్నని మీ భక్తునిగా చేసుకుని సంరక్షించండి” అని ప్రార్థించాను. నేను ఆశ్చర్యపోయేలా బాబా నాన్నకి తన ఆఫీసు గోడమీద శివుడితోపాటు దర్శనమిచ్చారు. ఇక అప్పటినుంచి మా అమ్మానాన్నలు రోజూ ఉదయం నాలుగు గంటలకే నిద్రలేచి శిరిడీ ప్రత్యక్షప్రసారంలో కాకడ ఆరతి చూస్తున్నారు. అంతలా వాళ్ళు బాబాకు అంకిత భక్తులయ్యారు. నేను ప్రతి ఒక్కరికీ చెప్పాలనుకునేది ఒక్కటే, ‘బాబాను నమ్మండి, మన ప్రార్థనకు సమాధానం వచ్చేవరకు సహనంతో వేచి ఉండండి’. “థాంక్యూ, థాంక్యూ సో మచ్ బాబా!”.
