సాయిభక్తుల అనుభవమాలిక 683వ భాగం.....

---

ఈ భాగంలో అనుభవాలు:

1. బాబా ఆశీస్సులతో నెరవేరిన కోరికలు
2. ఆరోగ్యాన్ని ప్రసాదించిన బాబా

---

బాబా ఆశీస్సులతో నెరవేరిన కోరికలు

పేరు వెల్లడించని ఒక సాయిభక్తురాలు ఇటీవల బాబా తనకు ప్రసాదించిన అనుభవాలను మనతో పంచుకుంటున్నారు.

బాబా నాకు ఎన్నో అనుభవాలను ప్రసాదించారు. వాటిలో కొన్ని అనుభవాలను ఇదివరకు మీతో పంచుకున్నాను. ఇప్పుడు మరికొన్ని అనుభవాలను పంచుకుంటాను.

మొదటి అనుభవం - వెంటనే శస్త్రచికిత్స అవసరం లేకుండా రక్షించిన బాబా:

గత సంవత్సర కాలంగా నేను గైనిక్ సంబంధిత సమస్యలతో బాధపడుతున్నాను. కరోనా కారణంగా హాస్పిటల్‌కి వెళ్లడానికి నేను ఇష్టపడలేదు. ప్రతి నెలా నేను బాబాను ప్రార్థిస్తూ బాబా దయవల్ల కాస్త ఉపశమనం పొందుతుండేదాన్ని. కానీ డిసెంబరు నెలలో నేను ఇంకా వేచి ఉండలేక హాస్పిటల్‌కి వెళ్ళాను. డాక్టరు కొన్ని రకాల పరీక్షలు మరియు స్కానింగ్ చేసి రిపోర్టుల కోసం మరుసటిరోజు రమ్మని చెప్పారు. నేను బాబాను ప్రార్థించి, "బాబా! నేను మిమ్మల్ని ఎక్కువగా ఏమీ అడగదల్చుకోలేదు. కానీ నేను ఇప్పుడు శస్త్రచికిత్సకు సిద్ధంగా లేను. నాకు రెండు మూడు నెలల సమయం కావాలి బాబా" అని వేడుకున్నాను. మరుసటిరోజు హాస్పిటల్‌కి వెళ్తే, రిపోర్టులు పరిశీలించిన డాక్టరు, "తిత్తి మరియు గర్భాశయం వ్యాప్తి చెందినందువల్ల కొన్ని చెప్పుకోదగ్గ పెద్ద సమస్యలున్నాయి. ప్రస్తుతానికి కొన్ని మందులు ఇస్తాను. రెండు నెలల పాటు ఆ మందులు వాడి మళ్ళీ రండి. అప్పటి పరిస్థితిని బట్టి ఒక నిర్ణయం తీసుకుందాము" అని చెప్పారు. నేను కోరుకున్నట్లే  బాబా రెండు నెలల సమయం ఇచ్చారు. బాబా కృపవలన కేవలం మందులతో నాకు పూర్తిగా నయం కావచ్చని ఆశిస్తున్నాను.

రెండవ అనుభవం - ఎటువంటి ఆరోగ్య సమస్యలు లేకుండా సురక్షితంగా ఇంటికి చేరుకున్న మా అబ్బాయి:

11 సంవత్సరాల మా అబ్బాయి మా పొరుగింటి స్నేహితులతో కలిసి పండుగ సెలవులకు మొదటిసారి ఆంధ్ర ప్రాంతానికి వెళ్ళడానికి సిద్ధపడ్డాడు. కరోనా కారణంగా నేను తనను రైలులో పంపించడానికి ఇష్టపడలేదు. కానీ తను ఆ ప్రాంతాన్ని చూడటానికి ఎంతో ఆసక్తి కనబరుస్తుండటంతో వాడి ఉత్సాహాన్ని చూసి బాబా వద్ద అనుమతి తీసుకొని తనను పంపడానికి సిద్ధపడ్డాను. నేను బాబాకు నమస్కరించుకుని, "బాబా! నేను మీ అనుమతితో మా అబ్బాయిని పంపుతున్నాను. ఎటువంటి ఆరోగ్య సమస్యలు లేకుండా తను సురక్షితంగా ఇంటికి చేరుకునేలా మీరే చూడాలి బాబా" అని ప్రార్థించాను. తను వాళ్లతో వెళ్లి 6 రోజులపాటు తన సెలవు దినాలను అక్కడ ఆనందంగా గడిపి బాబా ఆశీస్సులతో సురక్షితంగా ఇంటికి తిరిగి వచ్చాడు.

మూడవ అనుభవం - అనుకోకుండా అందిన భీమా డబ్బులు:

2009లో నేను ఒక భీమా పాలసీ తీసుకున్నాను. 3 సంవత్సరాలు భీమా మొత్తాన్ని చెల్లించి, ఆపై చెల్లించడం మానేశాను. ఆ భీమా మొత్తాన్ని తిరిగి పొందడానికి నేను చాలాసార్లు ప్రయత్నించాను, కానీ ప్రయోజనం లేకపోయింది. వాస్తవానికి ప్రస్తుత నా ఫోన్ నెంబరు, చిరునామాలను భీమా సంస్థలో నేను మార్పించుకోలేదు. పాత ఫోన్ నెంబర్ ప్రస్తుతం నా దగ్గర లేదు. ఆ విషయమై నేను బాబాకు చెప్పుకొని, నవగురువార వ్రతం చేస్తానని మ్రొక్కుకున్నాను. హఠాత్తుగా డిసెంబరు నెలలో ఆ భీమా సంస్థకి సంబంధించిన వ్యక్తి నా పాత చిరునామాకి వెళ్లి, నా ఫోన్ నెంబరు సంపాదించి నాకు ఫోన్ చేసి అన్ని వివరాలనూ అప్డేట్ చేశాడు. ఫలితంగా నాకు రావలసిన సుమారు 1.6 లక్షల రూపాయలు నాకు వచ్చాయి. ఇప్పటికి నేను 5 వారాల పూజ పూర్తి చేశాను, ఇంకా 4 వారాలు చేయాల్సి ఉంది. "థాంక్యూ సో మచ్ బాబా. నేను ఎప్పటికీ మీకు ఋణపడి ఉంటాను".

---

ఆరోగ్యాన్ని ప్రసాదించిన బాబా

సాయిభక్తురాలు ప్రశాంతి తనకు బాబా ప్రసాదించిన ఒక అనుభవాన్ని ఇలా పంచుకుంటున్నారు:

సాయిభక్తులందరికీ నా నమస్కారాలు. ఈ బ్లాగ్ నిర్వాహక బృందానికి సాయిబాబా ఆశీస్సులు సదా ఉండాలని కోరుకుంటున్నాను. నా పేరు ప్రశాంతి. నేను కాకినాడ నివాసిని. బాబా నాకు ప్రసాదించిన అనుభవాన్ని ఈరోజు మీ అందరితో పంచుకోబోతున్నాను. ఒక సంవత్సరం క్రితం నాకు 'గ్యాస్ట్రిక్ పెయిన్' వచ్చింది. అప్పటినుండి ఏది తిన్నా జీర్ణం కాక నేను చాలా ఇబ్బందిపడుతున్నాను. కనీసం మజ్జిగ అన్నం తిన్నా కూడా కడుపులో చాలా ఇబ్బందిగా ఉండేది. అటువంటి సమయంలో మా ఫ్లాట్ ఎదురుగా ఉన్న విజయగారి కుటుంబంతో నాకు పరిచయం ఏర్పడింది. ఆవిడ సాయిభక్తురాలు. ఒకరోజు నేను ఆవిడతో మాట్లాడుతూ నా అనారోగ్య సమస్య గురించి చెప్పాను. అప్పుడు ఆవిడ, “సాయి మహారాజ్ సన్నిధి అనే బ్లాగ్ ఉంది. దానిలో సాయిభక్తుల అనుభవాలను ప్రచురిస్తారు. అందులో (వాట్సాప్\టెలిగ్రామ్ గ్రూపు) మీరు కూడా జాయిన్ అవ్వండి” అని చెప్పి, “మీ సమస్యను బాబాకు విన్నవించుకొని, ‘ఆ సమస్య తీరితే నా అనుభవాన్ని బ్లాగులో పంచుకుంటాన’ని బాబాకు మ్రొక్కుకోండి” అని అన్నారు. ఆవిడ చెప్పినట్లే ఒకరోజు బాబా దగ్గర నా సమస్యను చెప్పుకొని, “నాకు ఆరోగ్యాన్ని ప్రసాదించు స్వామీ!” అని వేడుకున్నాను. ఆ మరుసటిరోజునుండి క్రమక్రమంగా నా ఆరోగ్య విషయంలో చాలా మార్పు వచ్చింది. చాలావరకు నా అనారోగ్య సమస్యను తీర్చి నాకు ఆరోగ్యాన్ని ప్రసాదించారు బాబా. కరుణామయుడైన బాబాకు నేను మనసారా కృతజ్ఞతలు తెలుపుకుంటున్నాను. “సాయీ! మీ అనుగ్రహం ఎప్పుడూ ఇలాగే నాపై, నా కుటుంబంపై, మీ బిడ్డలందరిపై ఉండాలని మనసారా కోరుకుంటున్నాను”. 

సాయినాథ చరణం శరణం శరణం.

---