సాయిభక్తుల అనుభవమాలిక 1400వ భాగం....

---

ఈ భాగంలో అనుభవాలు:

1. ఊహకందని బాబా అనుగ్రహం

2. బాబాతో చెప్పుకున్నంతనే తీరిన సమస్యలు

3. భయపడాల్సిన పని లేకుండా అనుగ్రహించిన బాబా

---

ఊహకందని బాబా అనుగ్రహం

‘సాయి మహరాజ్ సన్నిధి’ బ్లాగ్ ద్వారా భక్తుల భక్తిని మరింత దృఢపరుస్తూ, సమస్యలకు పరిష్కారం సూచిస్తూ, మమ్ములను సతతం రక్షిస్తున్న అఖిలాండకోటి బ్రహ్మాండనాయకుడు ఆ సద్గురు సాయినాథుని పాదకమలాలకు కోటానుకోట్ల నమస్కారములు. ఈ బ్లాగును నిర్వహిస్తున్న సాయికి నా ధన్యవాదాలు. నా పేరు శ్రీదేవి. మేము విశాఖపట్నంలో ఉంటున్నాము. ఈమధ్యకాలంలో ఆ సాయినాథుని కృపను మేము ఏవిధంగా పొందామో ఇప్పుడు మీతో పంచుకుంటాను. నేను ఒక ఆటో ఇమ్యూన్ డిసీజ్‌తోనూ, డయాబెటిస్‌తోనూ బాధపడుతున్నాను. నాకున్న ఈ వ్యాధుల నివారణ కోసం ఇటీవల నేను ఒక ఆయుర్వేద వైద్యుని సంప్రదించి, ఆయన సూచించిన మందులు వాడటం మొదలుపెట్టాను. అంతకు రెండువారాల ముందు నాకు ఒక సమస్య వచ్చింది. దానంతట అదే తగ్గుతుందేమోనని ఒక వారంరోజులు ఎదురుచూసి, తరువాత ఒక అల్లోపతి డాక్టర్ (ఇంగ్లీష్ డాక్టర్) దగ్గరకు వెళ్ళాను. ఆయన నా సమస్యకి మందులు వ్రాస్తూ, “డయాబెటిస్‌కి మీరు వాడుతున్న మందులు మీ షుగర్ లెవెల్స్‌ని కంట్రోల్‌లో ఉంచడం లేదు. నేను వ్రాసిన మందులు వాడండి” అని డయాబెటిస్‌కి కూడా మందులు వ్రాశారు. సరేనని నేను ఆ మందులు కొని వాడటం మొదలుపెట్టాను. తర్వాత ఆయుర్వేద మందులు కూడా వాడటం మొదలుపెట్టాను. ఒక 4 రోజుల తర్వాత కాళ్ళు విపరీతంగా వాచిపోయి, ఒళ్ళునొప్పులు, నీరసం మొదలైంది. ఇదంతా ఆయుర్వేద మందుల ప్రభావం అనుకొని ఆయుర్వేద డాక్టరుకి వాట్సాప్ మెసేజ్ ద్వారా నా సమస్యను తెలియజేశాను. కానీ ఆయన వద్దనుండి ఏ సమాధానమూ లేదు. సంకోచిస్తూనే ఆయుర్వేద మందులు వాడసాగాను. 3 రోజుల తరువాత మళ్లీ ఆయుర్వేద డాక్టరుతో మాట్లాడదామని రెండు మూడుసార్లు ఫోన్ ద్వారా ప్రయత్నిస్తే ఒక్కసారి ఫోన్లో మాట్లాడే అవకాశం వచ్చింది. నా సమస్యనంతా విని, “ఆ కాళ్ళవాపులు ఆయుర్వేద మందు ప్రభావం వల్ల కాదు” అన్నారాయన. అయినప్పటికీ, నేను క్రొత్తగా వాడుతున్నది ఈ ఆయుర్వేద మందులే కాబట్టి అవే నా కాళ్ళవాపుకి కారణమనుకుని వాటిని వాడటం మానేశాను. అయినా పాదాలవాపు, కాళ్ళవాపు కొంచెం కూడా తగ్గలేదు. కాళ్ళంతా నీరు పట్టి బరువెక్కి బాధపెడుతుండేవి. ఇలాఉండగ, వృత్తిరీత్యా ఒకరోజు నేను తిరుగు ప్రయాణంలో నిద్రపోయాను. అప్పుడు ఉన్నట్టుండి “ఏం, ఆయుర్వేద మెడిసిన్ అని ఎందుకు అనుకోవాలి? నువ్వు ఈమధ్యకాలంలో మార్చిన ఇంగ్లీష్ మెడిసిన్ అని ఎందుకు అనుకోకూడదు?” అని ఒక ఇన్నర్ వాయిస్ (అంతర్వాణి) నన్ను నిద్రలేచేలా చేసింది. అది బాబానే అనడంలో సందేహమే లేదు. ఎందుకంటే, “బాబా! నా తండ్రీ! నాకేంటి ఈ పరిస్థితి?” అని నేను అంతకుముందే బాబాను ఆర్తిగా ప్రార్థిస్తూ ఉన్నాను. బాబా అలా చెప్పడంతో, ఇంటికి రాగానే కొత్త మందులను పక్కన పెట్టి, డయాబెటిస్‌కి నేను వాడే పాత మందులనే తెప్పించుకుని వాటిని వేసుకోవడం మొదలుపెట్టాను. మూడు నాలుగు రోజుల్లో పూర్తిగా నార్మల్ అయిపోయాను. బాబా తప్ప ఇంకెవరు నాకు ఆ ఆలోచన వచ్చేలా చేసి నన్ను రక్షించారో చెప్పండి? సాక్షాత్తూ ఆ సాయితండ్రే నన్ను ఆ సమస్య నుండి బయటపడేశారు. అలాగే, ఇటీవల మావారు ప్రయాణిస్తున్న బైక్ ప్రమాదానికి గురికాకుండా బాబా చివరిక్షణంలో రక్షించారు. చివరిక్షణంలో మావారు అప్రమత్తమయ్యేలా చేసి బాబానే ప్రమాదం బారిన పడకుండా తనను రక్షించారు. “బాబా! మా ప్రయాణంలో నిరంతరం మాకు తోడుగా ఉండి రక్షించండి తండ్రీ” అని రోజూ బాబాను ప్రార్థిస్తూ ఉండటమే అందుకు కారణం.

బాబా భక్తురాలైన నా స్నేహితురాలికి ఒకసారి ఒంట్లో బాగలేనప్పుడు తనకేమౌతుందోనన్న భయంతో తను బాబాను ప్రార్థించింది. బాబా తనకి అభయం ఇవ్వడంతో పాటు, “నిన్ను విమానంలో కూర్చోబెట్టుకుని తీసుకుని వెళ్తాను” అని మాట ఇస్తూ మెసేజ్ ఇచ్చారు. అది చూసి, ‘తాను చనిపోతానేమోన’ని నా స్నేహితురాలు భయపడింది. తనకు సమస్యలను ఎదుర్కొనే ధైర్యం ఇస్తూ తనని రక్షించారు మన సాయితండ్రి. మరుసటి నెల మేము కొంతమంది స్నేహితులం కలిసి శిరిడీకి విమానం టికెట్లు బుక్ చేసుకుంటూ అనుకోకుండా నా స్నేహితురాలిని అడగటం, తన భర్త తనని శిరిడీ వెళ్ళమని ప్రోత్సహిస్తూ పర్మిషన్ ఇవ్వడం, తనకి కూడా విమానం టికెట్ తీసుకోవడం జరిగింది. తనకి ఇదే మొదటిసారి విమాన ప్రయాణం చేయడం. “బాబా, ఇదా తండ్రీ నీ మాటలకి అర్థం? నన్ను విమానంలో తీసుకెళ్ళి నీ దర్శనం ఇప్పిస్తున్నావా తండ్రీ? అది నాకు ముందే చెప్పావా నాయనా?” అని తను ఆనందభాష్పాలు పెడుతుంటే అనుకోకుండా అదే సమయంలో నేను తనకి ఫోన్ చేసి, “అనితా, నీకు సాయితండ్రి ముందే చెప్పారుగా విమానంలో కూర్చుండబట్టి తీసుకువెళ్తానని. ఎలా నిజం చేశారో చూడు!” అని చెప్పాను. నా మాట విని తను ఆనందం పట్టలేక, “ఇప్పుడు నేను కూడా అదే ఆలోచనలో ఉండి బాబా పట్ల భక్తిభావంతో కన్నీళ్ళు పెట్టుకుంటున్నాను” అని చెప్పింది. ఇలా ఇద్దరికీ ఒకేసారి ‘ఇది బాబా మహాత్మ్యం’ అని స్ఫురించడం బాబా దయే కాక ఇంకేమిటి?

దాదాపు 20 సంవత్సరాల క్రితం ఒకసారి నేను స్కూలునుండి తిరిగి వచ్చే క్రమంలో నేను ఎక్కాల్సిన బస్సును డ్రైవర్ కాస్త ముందుకు తీసుకువెళ్ళి ఆపాడు. దాంతో నేను వెనుక డోర్ నుండి బస్సు ఎక్కి వెనుకనున్న మూడు ఖాళీ సీట్లలో ఒకదానిలో కూర్చున్నాను. కొంత దూరం వెళ్ళాక ఒకాయన బస్సులో ఎక్కి నా ప్రక్కసీటులో కూర్చుని నన్ను పలకరించి నాతో మాట్లాడసాగారు. నేను ఆయనకి మర్యాదగా సమాధానం ఇస్తున్నాను. ఉన్నట్టుండి ఆయన తన బ్యాగులోంచి ఒక చిన్న కార్డు తీసి, “ఇందులో ‘సాయిబాబా కష్టనివారణ మంత్రం’ ఉంది. ప్రతిరోజూ భోజనానికి ముందు ఇది చదువుకోమ్మా” అని చెప్పారు. నేను ఆ కార్డులో ఉన్న మంత్రం చదివి తల తిప్పి చూస్తే ఆయన కనపడలేదు. ఈలోపల వచ్చిన బస్టాపులో దిగిపోయినట్లున్నారు. మహాఅయితే నేను ఆయనతో బస్సులో 4 కిలోమీటర్లు ప్రయాణించి ఉంటాను. ఈలోపే ఆయన నాకు ఆ కార్డు ఇచ్చి బాబా మంత్రంపై దిశానిర్దేశం చేసి దిగిపోయారు. ఇది నిజంగా నాకు ఇప్పటికీ వింతగానే ఉంటుంది. పరిచయంలేని వ్యక్తి ఈవిధంగా బాబా గురించి చెప్పడం కేవలం బాబా ప్రేరణే. ఇలా చెప్పుకుంటే ఎన్నో, ఎన్నెన్నో అనుభవాలు. “మా అమ్మగారిని, మమ్మల్ని, మా పిల్లలను అందరినీ క్షేమంగా, ఆరోగ్యంగా, మనశ్శాంతిగా ఉండేలా అనుగ్రహించండి బాబా. స్థిరపడలేని జీవితాలను స్థిరపరచండి బాబా. అందరి కష్టాలను తొలగించండి. మా మనస్సులోని బాధలు, కోరికలు మీకు తెలుసు. దయచేసి అనుగ్రహించండి బాబా. ఇంకా ఏమైనా అనుభవాలు మర్చిపోయివుంటే గుర్తొచ్చేలా చేసి బ్లాగులో పంచుకునేలా అనుగ్రహించండి సాయితండ్రీ. మీకు శతసహస్ర పాదాభివందనాలు”.

---

బాబాతో చెప్పుకున్నంతనే తీరిన సమస్యలు

అందరికీ నమస్కారం. నేను ఒక సాయి భక్తురాలిని. నా పేరు విజయలక్ష్మి. నేనిప్పుడు బాబా నాకు ప్రసాదించిన మూడు అనుభవాలు మీతో పంచుకుంటాను. 2022, అక్టోబర్ 18న నాకు పాప పుట్టింది. అదివరకే మాకు ఒక బాబు ఉన్నాడు. బాబు పుట్టినపుడు నాకు పాలు సరిగా రాలేదు. అందువల్ల బాబుకి డబ్బా పాలు తాగించాము. ఇప్పుడు పాప విషయంలో కూడా అలా కాకూడదని నేను, "బాబా! మీ దయతో పాలు మంచిగా వచ్చి, పాప ఇబ్బంది లేకుండా తాగితే, నా అనుభవాన్ని బ్లాగులో పంచుకుంటాను" అని బాబాకి మ్రొక్కుకున్నాను. ఆ తండ్రి దయవల్ల నాకు పాలు మంచిగా వచ్చి పాప సంతుష్టిగా తాగుతుంది. కానీ తీరిక లేక నేను నా అనుభవం పంచుకోలేదు. హాస్పిటల్ నుండి ఇంటికి వెళ్ళాక మా బాబుకి బాగా జ్వరం వచ్చింది. అప్పుడు నేను, "బాబా! మీ అనుగ్రహాన్ని బ్లాగులో పంచుకుంటానని ఇంకా పంచుకోలేదు. నేను ఆ విషయం మార్చిపోలేదు. కానీ క్షణం తీరిక ఉండట్లేదు. నా పరిస్థితి మీకు తెలుసు. దయచేసి మీ బిడ్డకు సహాయం చేయండి" అని బాబాను వేడుకున్నాను. బాబా దయ చూపారు. బాబుకి జ్వరం తగ్గింది.

ఒకరోజు నాకు బాగా తలనొప్పి వచ్చింది. ఆ కారణంగా రాత్రి నిద్ర కూడా పట్టలేదు. అప్పుడు నేను బాబాకి దణ్ణం పెట్టుకుని, 'ఓం శ్రీసాయి ఆరోగ్యక్షేమదాయ నమః' అని అనుకుంటూ పడుకున్నాను. తలనొప్పి ఎప్పుడు తగ్గిపోయిందో కానీ, కొద్దిసేపట్లో నాకు బాగా నిద్రపట్టేసింది.

ఇంకోసారి జలుబు వల్ల మావారికి బాగా తలనొప్పి వచ్చింది. ఆయన నాలుగైదు రోజులు నొప్పితో బాగా ఇబ్బందిపడ్డారు. అప్పుడు నేను, "బాబా! ఈరోజు సాయంత్రం కల్లా మావారికి తలనొప్పి తగ్గితే, మీ అనుగ్రహాన్ని బ్లాగులో పంచుకుంటాను" అని బాబాకి మ్రొక్కుకున్నాను. కొద్దిసేపటికి మావారు, "ఇప్పుడు నొప్పి తగ్గింది" అని అన్నారు. నేను మనసులోనే బాబాకి కృతఙ్ఞతలు చెప్పుకున్నాను. "నా ఆరోగ్యం మరియు ఇద్దరు చిన్న పిల్లల వల్ల నా అనుభవాలు పంచుకోవడం అలస్యమైంది. నన్ను క్షమించండి బాబా. నా జీవిత లక్ష్యాన్ని నేరవేర్చి నన్ను ఎప్పుడు శిరిడీకి రప్పించుకుంటారా అని వేయి కళ్ళతో ఎదురుచూస్తున్నాను తండ్రి. మాకు మీరే దిక్కు బాబా. మాపై దయ ఉంచండి తండ్రి".

---

భయపడాల్సిన పని లేకుండా అనుగ్రహించిన బాబా

సాయి భక్తులకు నమస్కారం. నేను ఒక సాయి భక్తురాలిని. మా బంధువులలో ఒకరు గొంతులో వాపుతో చాలా బాధపడ్డారు. మందులు వాడినా తగ్గలేదు. డాక్టరు దగ్గరకి వెళితే, స్కాన్ చేయాలి అన్నారు. స్కాన్ రిపోర్టులో ఏదో సమస్య ఉందని రావడంతో డాక్టరు, "ఇంకో టెస్టు చేయాలి. ఆ రిపోర్టు వస్తేగాని ఏమీ చెప్పలేం. రిపోర్టులో ఏదైనా రావచ్చు" అని అన్నారు. మాకు చాలా భయమేసి బాబాకి దణ్ణం పెట్టుకున్నాము. బాబా దయవలన రిపోర్టు మూమూలుగా వచ్చింది. డాక్టరు, "భయపడాల్సిన పని లేదు" అని చెప్పారు. "బాబా! మీకు కృతజ్ఞతలు తండ్రి. నేను ఈ బ్లాగులో నా అనుభవం పంచుకోవడం ఇదే మొదటిసారి. తప్పులుంటే క్షమించండి బాబా".

---