సాయిభక్తుల అనుభవమాలిక 1401వ భాగం....

---

ఈ భాగంలో అనుభవాలు:

1. ఎలాంటి ఇబ్బందినైనా దూరం చేస్తున్న బాబా

2. కావాల్సిన లాకెట్‍ను నా దగ్గరకే పంపిన బాబా

---

ఎలాంటి ఇబ్బందినైనా దూరం చేస్తున్న బాబా

ఓం శ్రీసాయి శరణాగతవత్సలాయ నమః!!! ఓంసాయి శ్రీసాయి జయజయ సాయి!!! సాయి బంధువులకు నా నమస్కారాలు. ఈ బ్లాగు నిర్వహిస్తున్న వారికి నా కృతజ్ఞతలు. నేను ఒక సాయి భక్తురాలిని. నాపేరు స్రవంతి. 2022, నవంబర్ 11న నేను, మా అమ్మ యాదగిరిగుట్ట వెళ్లాలనుకున్నాము. కానీ మా అమ్మ, "ఇద్దరము ఆడవాళ్ళమే, ఇప్పుడు వెళ్ళొద్దులే. మీ నాన్నగారు (ఆయన సౌదీలో ఉంటారు) వచ్చినప్పుడు వెళదాము" అని అంది. నేను, "అమ్మా! నువ్వేం భయపడకు. మనతో శ్రీసాయిబాబా తోడుగా వస్తారు. మనతోపాటు ఒక చిన్న బాబా ఫోటో తీసుకుని వెళదాం" అని అన్నాను. ఇంకా అమ్మ, "సరే, వెళదాము" అంటే ఇద్దరం శ్రీయాదగిరిగుట్ట వెళ్ళాము. బాబా దయవల్ల మాకు 10 నిమిషాల్లోనే శ్రీలక్ష్మీనరసింహస్వామి వారి దర్శనం అయింది. అమ్మ శ్రీలక్ష్మీనరసింహస్వామి వారి కళ్యాణం జరిపించింది. తరువాత మేము ప్రసాదం కొనడానికి వెళితే, అక్కడ బాబా విగ్రహ రూపంలో మాకు దర్శనమిచ్చారు. నేను చాలా సంతోషించాను. నాకు, మా అమ్మకు బస్సు ప్రయాణం అస్సలు పడదు, వాంతులు అవుతాయి. అలాంటిది మేము ఇంటి నుండి బయలుదేరి యాదగిరిగుట్ట వెళ్లి, తిరిగి ఇంటికి వచ్చేంతవరకు ఒక్కసారి కూడా మాకు వాంతి కాలేదు. అలా బాబా మాకు ప్రయాణంలో ఎలాంటి ఇబ్బంది కలగకుండా చూసుకుని, స్వామి దర్శనం చేయించి క్షేమంగా తిరిగి మా ఇంటికి చేర్చారు. "చాలా చాలా ధన్యవాదాలు బాబా".

2022, నవంబర్ 21న మామయ్య వరసయ్యే మా బంధువు ఆరోగ్యం బాలేదని, అతనిని చూడటానికి మా అమ్మ, మామయ్య, అత్తయ్య బైక్ మీద హాస్పిటల్‍కి వెళ్లారు. రాత్రి 7 గంటలప్పుడు వాళ్ళు తిరిగి ఇంటికి వస్తుంటే దారిలో కుక్క అడ్డం రావడంతో ఆక్సిడెంట్ అయింది. మామయ్యకి, అత్తయ్యకి చిన్నచిన్న దెబ్బలు తగిలాయి కానీ మా అమ్మకి కొంచెం తీవ్రంగానే తగిలాయి. కానీ వాళ్ళు సిటీకి వెళ్లి హాస్పిటల్లో చూపించుకోకుండా గ్రామంలోని ఆర్.ఎమ్.పి డాక్టర్ దగ్గర చికిత్స చేయించుకుని ఇంటికి వచ్చారు. నేను 'వాళ్ళు ముగ్గురూ ఆరోగ్యంగా ఉండాల'ని ఆ రాత్రంతా బాబా చాలీసా, శ్రీసాయిసచ్చరిత్ర చదువుతూ బాబాను ప్రార్థించాను. మరుసటిరోజు ఉదయం అమ్మని సిటీలోని హాస్పిటల్‍కి తీసుకెళ్తే, స్కాన్ చేయాలని అన్నారు. అమ్మని స్కానింగ్ చేయడానికి తీసుకుని వెళ్ళినప్పుడు నేను నా చేతిలో బాబా ఫోటో, ఊదీ పట్టుకుని, "బాబా! రిపోర్టులన్నీ నార్మల్‌గా రావాలి" అని బాబాను ప్రార్థించాను. బాబా నా ప్రార్ధనలకు సమాధానమిచ్చారు. మా అమ్మకి చేసిన పెద్ద స్కానింగ్‍లో అమ్మకి అంతా నార్మల్ అని వచ్చింది. నేను చాలా హ్యాపీ ఫీల్ అయ్యాను. "చాలా ధన్యవాదాలు బాబా". కానీ మా అమ్మ ముఖమంతా ఉబ్బిపోయింది, ఒకటే నొప్పులు, ఒక కన్ను సరిగా కనిపించట్లేదు, పళ్ళు ఊడిపోయాయి. డాక్టర్లు అన్నం పెట్టొద్దు అన్నారు. కేవలం జ్యూసులు ఇస్తున్నాము. దయచేసి శ్రీసాయి భక్తులందరూ మా అమ్మ తొందరగా కోలుకోవాలని, ఆమె ఆరోగ్యంగా ఉండాలని ప్రార్థించండి ప్లీజ్.

2022, నవంబర్ 23న నేను రూట్ కెనాల్ చికిత్స కోసం మా అమ్మని హాస్పిటల్‍కి తీసుకెళ్తూ, "బాబా! మీరు కూడా మాతోపాటు హాస్పిటల్‍కి రండి. అమ్మకి ఎలాంటి నొప్పులు లేకుండా చికిత్స బాగా జరిగేలా అనుగ్రహించండి" అని వేడుకున్నాను. మేము హాస్పిటల్‍కి వెళ్ళగానే ఫోటో రూపంలో బాబా మాకు దర్శనమిచ్చారు. అమ్మకి ట్రీట్మెంట్ చాలా బాగా జరిగింది. "థాంక్యూ సో మచ్ సాయిబాబా".

ఒకరోజు రాత్రి మా అమ్మకి చెస్ట్ లో పెయిన్ వచ్చింది. నేను బాబా ఫోటో ముందుకెళ్ళి సాయిబాబా ఊదీ మంత్రం, అలానే 'ఓం శ్రీసాయి ఆరోగ్యక్షేమదాయ నమః' అనే నామాన్ని 9సార్లు జపించి, ఊదీ బాబా చేతికి తాకించి ఆ ఊదీ అమ్మ చెస్ట్ కి రాసి, అమ్మ చెస్ట్ పెయిన్ బాబా తగ్గిస్తారని పూర్తి నమ్మకం ఆయన యందు ఉంచాను. ఉదయం లేచేసరికి అమ్మకి పెయిన్ తగ్గింది. "థాంక్యూ సో మచ్ సాయి".

ఒకరోజు రాత్రి నాకు విపరీతమైన వెన్నునొప్పి వచ్చింది. అప్పుడు నేను బాబా ఊదీ తీసుకుని 'ఓం శ్రీసాయి ఆరోగ్యక్షేమదాయ నమః' అని అనుకుంటూ నొప్పి ఉన్న చోట రాసాను. బాబా దయవల్ల కొద్దిసేపట్లో నొప్పి పూర్తిగా తగ్గిపోయింది. "థాంక్యూ సో మచ్ బాబా".

చివరిగా మరో చిన్న అనుభవం: 2022, నవంబర్ 12న మా ఆంటీవాళ్ళు శిరిడీ వెళ్లారు. వాళ్ళు శిరిడీలో ఉన్నప్పుడు నేను వాళ్లకు ఫోన్ చేసి ఒక్క చిన్న బాబా విగ్రహం తెమ్మని చెప్పాలనుకున్నాను. కానీ తెస్తారో, లేదో అనిపించి నేను వాళ్లకు కాల్ చేయలేదు. వాళ్ళు శిరిడీ నుంచి వచ్చిన ఒక వారం తర్వాత ఆంటీవాళ్ళ అబ్బాయి మా ఇంటికి వచ్చి శిరిడీ ప్రసాదం, ఒక బాబా విగ్రహం  నా చేతిలో పెట్టాడు. బాబాని చూడగానే నాకు చాలా చాలా ఆనందం కలిగింది. ఇప్పుడు ఈ అనుభవం పంచుకుంటుంటే కూడా నాకు చాలా సంతోషంగా ఉంది. "థాంక్యూ సో మచ్ బాబా".

---

కావాల్సిన లాకెట్‍ను నా దగ్గరకే పంపిన బాబా

ఓం శ్రీసాయీశ్వరాయ నమ:!!!

ముందుగా శ్రీసాయినాథుని మార్గంలో 'సాయి మహారాజ్ సన్నిధి' బ్లాగును నిర్వహిస్తున్న సాయి అన్నయ్యకి నా హృదయపూర్వక ధన్యవాదాలు. సాయిభక్తజనులకు నా నమస్కారాలు. నా పేరు చండీశివప్రియ. నేను ఇదివరకు కలలు కన్న ఉద్యోగం ఇచ్చిన బాబా, పుట్టిన రోజున బాబా అనుగ్రహం అన్న టైటిల్స్ తో రెండుసార్లు నా అనుభవాలు ఈ బ్లాగు ద్వారా మీ అందరితో పంచుకున్నాను. ఆసక్తి ఉన్నవారు పైన బ్లూ లెటర్స్ ఉన్న ఆ టైటిల్స్ పై టచ్ చేసి చదువుకోవచ్చు. ఇక ఇప్పుడు నేను నా శిరిడీయాత్ర గురించి తెలియజేయాలనుకుంటున్నాను. బాబా నాకు ఉద్యోగం ప్రసాదించాక మొదటి నెల జీతం ఆయనకి సమర్పించుకోవాలని మా తమ్ముడితో కలిసి నేను శిరిడీ వెళ్ళాను. బాబాను దర్శించి డొనేషన్ కౌంటరులో నా జీతాన్ని డొనేట్ చేసి నా మొక్కు తీర్చుకున్నాను. సంస్థాన్ ట్రస్ట్ వాళ్ళు నాకు ఒక సచ్చరిత్ర పుస్తకంతోపాటు ఆరతికి హాజరయ్యే అవకాశం కల్పించారు. మేము ఎంతో సంతోషంగా ఆరతిలో పాల్గొన్నాము. తరువాత ప్రసాదాలయం వెళ్లి బాబా ప్రసాదం స్వీకరించాము. తరువాత మేమిద్దరం మాకోసం, స్నేహితులకోసం బాబా విగ్రహాలను, బాబా కంకణాలు, రేవడి(నువ్వుల జీడిలు), దూద్ పేడా, లడ్డూలు అందరికీ ప్రసాదంగా ఇవ్వడానికి తీసుకున్నాము. కొన్ని కార్లలో చూసిన బాబా లాకెట్లు కూడా కొనాలని అనుకున్నాను. కానీ అవి ఎక్కడా కనిపించలేదు. అంతలో మా తిరుగు ప్రయాణానికి సమయం అవ్వడంతో బస్సెక్కి మా సీట్లలో కూర్చున్నాం. నాది విండో సీటు. అందులో నుండి బయటకు చూస్తే బాబా కనిపించారు(ఫోటో కింద జతపరుస్తున్నాను). ఆయన దగ్గరుండి నన్ను సాగనంపుతున్నట్లు అనిపించి ఒక్కసారిగా నా కళ్ళ నుండి నీళ్లు వచ్చాయి. ఎంతటి ప్రేమ? ఆయన నన్ను సాగనంపడానికి మాత్రమే కాదు, నేను కొనాలనుకున్న లాకెట్లు కూడా కనపడేలా అనుగ్రహించారు. ఒకతను బస్సు ఎక్కి మరీ వాటిని అమ్ముతున్నాడు. ఒక లాకెట్ కొనుక్కొని చాలా సంతోషించాను. 'మరోసారి నీ దర్శన భాగ్యమివ్వు సాయినాథా' అని అనుకుంటూ, బాబా పాటలు వింటూ మా ఊరికి చేరుకున్నాను. కొన్నిరోజులకి బాబా నా స్నేహితుల ద్వారా శిరిడీ నుండి తమ విగ్రహాన్ని, హృదయరూపంలో ఉండే లాకెట్, ప్రసాదం పంపించారు. బాబా ప్రేమ అటువంటింది. ఆయనలా నన్ను ఎవరూ చూసుకోరేమో అనిపిస్తుంది. ఆయనే నన్ను బాగా చూసుకుంటారని నాకు చాలా నమ్మకం. "ధన్యవాదాలు బాబా. నేను చేస్తున్న ఉద్యోగంలో మంచి పేరు తెచ్చుకుని ఇంకా మంచి పొజిషన్ పొందేలా దీవించు తండ్రి. ఇంకా నాకున్న సమ్యసలు మీకు తెలుసు. వాటిని మీరు తప్పక తీరుస్తారని నమ్మకంతో, సబూరీతో ఎదురుచూస్తున్నాను తండ్రి. మీ దయవల్ల నా సమస్యలన్నిటికీ పరిష్కారం లభించాక మరోసారి మీ అనుగ్రహాన్ని బ్లాగులో పంచుకుంటాను". బాబాని నమ్మండి. సచ్చరిత్ర చదవండి. బాబా తప్పక అందరి కోరికలు తీరుస్తారు.

---