సాయిభక్తుల అనుభవమాలిక 1399వ భాగం....

---

ఈ భాగంలో అనుభవాలు:

1. ఎటువంటి టెన్షన్లు అయినా ఇట్టె తీసేస్తారు బాబా

2. బాబా ఆశీస్సులు ఉంటే ఏదీ అసాధ్యం కాదు

3. కోరుకున్న దానికంటే మించి సహాయం చేసిన బాబా

---

ఎటువంటి టెన్షన్లు అయినా ఇట్టె తీసేస్తారు బాబా

సాయిబంధువులందరికీ నా హృదయపూర్వక నమస్కారాలు. నేనొక సాయిభక్తురాలిని. నా పేరు హేమ. మేము విజయవాడలో ఉంటాము. నేను నా చిన్నప్పటినుండే బాబాను పూజిస్తూ ఉన్నాను. నా జీవితంలో ఏది జరిగినా అది సాయినాథుని కృపాకటాక్షాలే. నేను ఇంతకుముందు ఈ బ్లాగులో నా అనుభవాలు కొన్ని షేర్ చేసుకున్నాను. మళ్ళీ మరికొన్ని అనుభవాలను మీతో షేర్ చేసుకోవాలని మీ ముందుకు వచ్చాను. కొంతకాలం క్రితం మావారి మేనకోడలు గర్భవతిగా ఉన్నప్పుడు డాక్టర్లు తనకి 2022, జులై 13న డెలివరీ డేట్ ఇచ్చారు. సరిగ్గా ఆరోజు విశాఖ నక్షత్రం ఉంది. విశాఖ నక్షత్రంలో బిడ్డ పుడితే ఆ ప్రభావం వల్ల తల్లికి, మేనమామకి(అంటే, మావారికి) ప్రాణగండం ఉంటుంది. అంతకుముందు ఇలాంటి రెండు సంఘటనలు నేను మా ఇంట్లోనే చూసి ఉన్నందువల్ల చాలా టెన్షన్ పడ్డాను. ఎంతగా టెన్షన్ పడ్డానంటే, ఏ గుడికి వెళ్ళినా దీనిగురించే నా ప్రార్థన. ఈ విషయం గురించి పదేపదే ప్రార్థిస్తూ బాబాను కూడా చాలా విసిగించాననే చెప్పాలి. ఒకరోజు ఈ విషయం గురించి నాకు చాలా భయమేసింది. బాబా తన బిడ్డలకి ఎలాంటి కష్టమూ రానివ్వరని తెలుసుగానీ, మనసులో ఏదో భయం, టెన్షన్. నిజంగా ఆ సమయంలో నేను పడిన టెన్షన్ ఆ సాయినాథునికే తెలుసు. అప్పుడు నేను బాబాకు నమస్కరించుకుని, “బాబా, డాక్టర్లు ఇచ్చిన సమయానికన్నా ముందే మావారి మేనకోడలికి డెలివరీ అయ్యేలా చూడు స్వామీ. మావారికి ఎలాంటి సమస్యా రాకుండా ఉంటే నా అనుభవాన్ని బ్లాగులో సాటి సాయిబంధువులందరితో షేర్ చేసుకుంటాను. అలాగే, ‘సాయికోటి’ కూడా రాస్తాను” అని చెప్పుకున్నాను. దయగల నా సాయితండ్రి నన్ను చాలా బాగా కరుణించారు. బాబా దయవల్ల మావారికి ఎలాంటి సమస్యా రాకుండా తన మేనకోడలికి జులై 1వ తేదీనే డెలివరీ అయింది. బాబా నా టెన్షన్ మొత్తం ఒక్కసారిగా తీసేశారు. చాలా చాలా సంతోషంగా ఫీల్ అయ్యాను. నా ఆనందాన్ని నేను మాటల్లో చెప్పలేను. అది ఆ సాయితండ్రికే తెలుసు. “చాలా చాలా థాంక్స్, థాంక్యూ సో మచ్ బాబా”. 

ఇంకొక అనుభవం: ఒకసారి మా అన్నయ్యకి ఉన్నట్టుండి వెన్నునొప్పి వచ్చింది. గుంటూరులోని ఒక డాక్టరుకి చూపిస్తే, “ఆపరేషన్ చెయ్యాలి, రెండు లక్షల వరకు ఖర్చవుతుంది. ఒక నెలరోజులు పూర్తిగా బెడ్ రెస్ట్ తీసుకోవాలి” అని చెప్పారు. “ఇక్కడ విజయవాడలో డాక్టరుకి చూపిద్దాం, ఇక్కడికి రా” అని నేను చెప్తే తను మా వద్దకు వచ్చాడు. అన్నయ్య డాక్టర్ వద్దకు వెళ్లేముందు నేను బాబాకు నమస్కరించుకుని, “బాబా, అన్నయ్యకి టెస్ట్ రిపోర్టులో ప్రాబ్లమ్ ఏమీ ఉండకూడదు. తన వెన్నునొప్పి టాబ్లెట్లతో తగ్గిపోతుందని డాక్టర్ చెప్పాలి. అలా జరిగితే నా అనుభవాన్ని బ్లాగులో సాటి సాటిబంధువులందరితో షేర్ చేసుకుంటాను” అని చెప్పుకున్నాను. బాబా మాపై అపారమైన దయ కురిపించారు. మా అన్నయ్యని పరీక్షించిన ఇక్కడి డాక్టర్, “ఆపరేషన్ అవసరం లేదు, మందులతో నయమవుతుంది” అని చెప్పి, కొన్ని మందులు రాసిచ్చారు. డాక్టర్ ఇచ్చిన మందులను మా అన్నయ్య రెండు మూడు నెలలు వాడారు. అంతే, బాబా దయవల్ల అన్నయ్యకి వెన్నునొప్పి పూర్తిగా తగ్గిపోయింది. అసలు నిలబడటానికే ఇబ్బందిపడేంత నొప్పితో బాధపడే అన్నయ్య ఇప్పుడు నొప్పి లేకుండా ఆనందంగా ఉన్నాడు. ఇది మన బాబా చేసిన అద్భుతంకాక ఇంకేమిటి? “చాలా చాలా థాంక్స్ బాబా. నా అనుభవాన్ని షేర్ చేసుకోవడం ఆలస్యమైనందుకు నన్ను క్షమించండి బాబా. మా పాప ఉద్యోగం విషయంలో ఎందుకో మీరు ఆలస్యం చేస్తున్నారు. మీరు అలా చేస్తున్నారంటే తనకి ఇంకా మంచి ఉద్యోగం ఇప్పిస్తారనే నేను అనుకుంటున్నాను బాబా. కారణం లేకుండా మీరు ఏదీ చెయ్యరు. అలాగే, మా తమ్ముడి ఆరోగ్యం కూడా బాగాలేదు బాబా. డాక్టర్లు తనకి ఆపరేషన్ చెయ్యాలని అంటున్నారు. ఆపరేషన్ లేకుండా తమ్ముడి ప్రాబ్లమ్ క్లియర్ అయ్యేలా చూడండి బాబా. లేకపోతే, తమ్ముడిని ఆపరేషన్‌కి ఒప్పించండి బాబా. బాబా, మీ కృపాకటాక్షాలు అందరిపైనా ఎల్లప్పుడూ ఇలాగే ఉండాలనీ, నాకు, నా కుటుంబానికి ఎల్లప్పుడూ మీరు తోడునీడగా ఉండాలని కోరుకుంటున్నాను స్వామీ”.

ఓంసాయి శ్రీసాయి జయజయసాయి!!!

అఖిలాండకోటి బ్రహ్మాండనాయక రాజాధిరాజ యోగిరాజ శ్రీ సచ్చిదానంద సద్గురు సాయినాథ్ మహరాజ్ కీ జై!!!

---

బాబా ఆశీస్సులు ఉంటే ఏదీ అసాధ్యం కాదు

నా పేరు విజయ. మేము ఢిల్లీలో ఉంటాము. బాబా నాకు ప్రసాదించిన అనుభవాలను సాయి బంధువులందరితో పంచుకుంటున్నాను. నా కజిన్ సిస్టర్ కూతురికి 30 ఏళ్లు పైబడినా పెళ్లి కాలేదు. తగిన సంబంధం కోసం వెతుకుతున్నప్పటికీ అమ్మాయి కోరుకునే లక్షణాలు ఉండే సంబంధం దొరకక నా సోదరి నాతో చెప్పుకుని తన కుమార్తె వివాహం గురించి ఎప్పుడూ చింతిస్తూ ఉండేది. నేను ఆమెతో "ఖచ్చితంగా అమ్మాయికి మంచి అబ్బాయి దొరుకుతాడు. శ్రీసాయికి సంపూర్ణ శరణాగతి చెందండి" అని చెప్తూ ఉండేదాన్ని. ఇలా సమయం గడుస్తుండగా గత సంవత్సరం(2021) నవంబర్‌లో హాంకాంగ్‌లో ఉన్న నా బంధువు ఒకరు నాకు ఫోన్ చేసి, తన తోడికోడలు కొడుకు యుఎస్‍లో పనిచేస్తున్నడని, తనకి మంచి కుటుంబ నేపథ్యం ఉన్న తగిన అమ్మాయి కోసం వెతుకుతున్నారని చెప్పింది. నేను ఆమెతో నా కజిన్ సిస్టర్ కుమార్తె గురించి చెప్పి, ఆ అమ్మాయి వివరాలు పంపాను. ఆమె ఆ అబ్బాయి వివరాలు నాకు పంపింది. నేను వెంటనే వాటిని నా కజిన్‌ సిస్టర్‍కి పంపాను. ఆ వివరాలు ఇరు కుటుంబాలకు నచ్చాయి. జాతకాలు కూడా కలవడంతో మిగతా అన్ని విషయాలు మాట్లాడుకోవడం మొదలుపెట్టారు. బాబా ఆశీస్సులతో ఇప్పుడు ఆ సంబంధం నిశ్చయమై త్వరలోనే వాళ్ళ వివాహం జరగనుంది. "బాబా! మీ అనుగ్రహానికి ధన్యవాదాలు. ఎల్లప్పుడూ మాకు తోడుగా ఉండి ఇలాగే మమ్మల్ని అనుగ్రహించండి. మేము మా సర్వస్వం మీ పాదపద్మాలకు సమర్పిస్తున్నాము".

నా కజిన్ సిస్టర్ కుమార్తె డబ్బులు కట్టి యుఎస్‍లో రీసెర్చ్ సీటు సంపాదించింది. తన వీసా గురించి అందరం ఆందోళన చెందాం. ఎందుకంటే, కరోనా కారణంగా యుఎస్ ఎంబసీ ఎవరికీ వీసాలు జారీ చేయడం లేదు. ఆ అమ్మాయి వీసా ఇంటర్వ్యూ స్లాట్ కోసం చాలాకాలం ప్రయత్నిచింది. కానీ తన ప్రయత్నాలు ఫలించలేదు. ఇటువంటి స్థితిలో నేను మన జీవితాల్లో తక్షణమే అద్భుతం చేయగలిగేది బాబా ఒక్కరే కాబట్టి, ఆయనను ప్రార్థించాలనుకుని అలాగే చేశాను. బాబా ఆశీస్సులు ఉంటే ఏదీ అసాధ్యం కాదు. ఆయన అసాధ్యాన్ని సుసాధ్యం చేస్తూ ఆగస్టులో ఆ అమ్మాయికి వీసా ఇంటర్వ్యూ స్లాట్ ఇచ్చి, ఎంబసీ వీసా జారీ చేసేలా అనుగ్రహించారు. ఇప్పుడు ఆమె పని చేస్తూ రీసెర్చ్ చేస్తోంది. బాబా ఆశీస్సులతో ఇది సాధ్యమైంది. "ధన్యవాదాలు బాబా. ఈ అనుభవాలను సాయి కుటుంబంతో చాలా ఆలస్యంగా పంచుకున్నందుకు క్షమించండి. నన్ను, నా కుటుంబానికి సంబంధించి ప్రతిదీ చూసుకుంటున్న మీకు ధన్యవాదాలు. దయచేసి నాకు మంచి ఆరోగ్యాన్ని, ఆనందాన్ని, మనశ్శాంతిని ప్రసాదించండి. ఆ అనుగ్రహాన్ని కూడా పంచుకుంటాను". 

సర్వేజన సుఖీనోభవంతు!!!

సర్వం శ్రీసాయినాథార్పణమస్తు!!!

---

కోరుకున్న దానికంటే మించి సహాయం చేసిన బాబా

ఓంసాయి శ్రీసాయి జయజయ సాయి!!! నా పేరు శ్రేయ. నేను ఒక సాయి భక్తురాలిని. 2022, నవంబరు నెల చివరి వారంలో మా కాలేజీలో ల్యాబ్ పరీక్షలు జరిగాయి. నేను ఆ పరీక్షలు బాగా వ్రాస్తే, ఈ బ్లాగులో పంచుకుంటానని అనుకున్నాను. బాబా దయవల్ల నేను చదివిన ప్రశ్నలే రావడంతో అన్ని పరీక్షలు బాగా రాశాను. ఇకపోతే మేము మా కాలేజీలో టీచర్లని ఎన్నుకోవాలి. కొంతమంది టీచర్లు కఠినంగా పేపర్లు దిద్దుతారు, కొంతమంది సరళంగా దిద్దుతారు. నేను అన్ని సబ్జెక్టులకి సరళంగా పేపరు దిద్దే టీచర్లను ఎన్నుకోగలిగాను. అంతా సాయి కృప. ఆయన దయతో నేను బాగా చదివి మంచి మార్కులతో ఉత్తీర్ణురాలిని అవుతానని ఆశిస్తున్నాను. "ధన్యవాదాలు బాబా. నా మీద ఎల్లప్పుడూ మీ కృప ఇలాగే ఉండాలి తండ్రి".

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు శ్రీసాయినాథ్ మహరాజ్ కీ జై!!!

---