సాయిభక్తుల అనుభవమాలిక 680వ భాగం.....

---

ఈ భాగంలో అనుభవాలు:

1. అడిగితే తప్పక అనుగ్రహిస్తారు బాబా
2. దయగల సాయితండ్రి కరుణించారు

---

అడిగితే తప్పక అనుగ్రహిస్తారు బాబా

పేరు వెల్లడించని ఒక సాయి భక్తురాలు బాబా తనకి ప్రసాదించిన అనుభవాలను మనతో పంచుకుంటున్నారు:

 

ఓం శ్రీ సాయినాథాయ నమః. నేనొక సాయిభక్తురాలిని. ఈ బ్లాగ్ నిర్వహిస్తున్న సాయికి నా శతకోటి వందనాలు. సాయినాథుడు నాతోనే ఉన్నారన్న అనుభూతిని నేను ప్రతిరోజూ పొందుతుంటాను. బాబా నాకు ఎన్నో అనుభవాలను ప్రసాదించారు. ఈ బ్లాగ్ ద్వారా సాటి సాయిభక్తులతో పంచుకుంటానని బాబాకు మ్రొక్కుకున్న మూడు అనుభవాలను ఇప్పుడు మీతో పంచుకోబోతున్నాను.

మొదటి అనుభవం: 

ఒకరోజు మా అమ్మ వంటిల్లు శుభ్రం చేస్తున్నప్పుడు వంటింట్లో ఉన్న గ్రానైట్ రాయి తన కాలిపై పడింది. అది చాలా బరువుగా ఉండటంతో అమ్మ కాలికి బాగా దెబ్బతగిలింది. నొప్పి ఎక్కువగా ఉన్నప్పటికీ వాపు రాకపోవటంతో మేము అమ్మ కాలికి ఫ్రాక్చరేమీ కాలేదని అనుకున్నాము. కానీ సాయంత్రానికల్లా నొప్పి తీవ్రమై నడవడానికి కూడా కష్టంగా ఉండటంతో అమ్మను డాక్టర్ దగ్గరకు తీసుకెళ్ళాము. అమ్మ కాలిని పరీక్షించిన డాక్టర్ ఎక్స్-రే తీయాలని చెప్పి ఎక్స్-రే తీశారు. “ఎక్స్-రే రిపోర్టులో ఏ ఫ్రాక్చరూ లేకపోతే సాయి మహరాజ్ సన్నిధి బ్లాగులో నా అనుభవాన్ని పంచుకుంటాను” అని బాబాకు మ్రొక్కుకున్నాను. సాయి దీవెన వలన ఎటువంటి ఫ్రాక్చర్స్ లేవని రిపోర్టులో తేలింది. “చాలా చాలా ధన్యవాదాలు బాబా!”

రెండవ అనుభవం:

ఇది మా పెద్దమ్మాయికి సంబంధించిన అనుభవం. మా పెద్దమ్మాయికి నెలసరి సమయంలో బాగా కడుపునొప్పి వస్తుంటుంది. మూడు నెలల క్రితం నేను బాబాకు నమస్కరించుకుని, మా అమ్మాయికి కడుపునొప్పి తగ్గించమని, తన కడుపునొప్పి తగ్గితే నా అనుభవాన్ని ఈ బ్లాగులో పంచుకుంటానని మ్రొక్కుకుని, బాబా ఊదీని నీళ్ళలో కలిపి మా అమ్మాయి చేత త్రాగించాను. బాబా అనుగ్రహంతో తన కడుపునొప్పి చాలావరకు తగ్గింది. కానీ, నేను పనిలో పడి ఆ అనుభవాన్ని ఈ బ్లాగులో పంచుకోవడం మర్చిపోయాను. ఈ నెల మళ్ళీ మా అమ్మాయికి కడుపునొప్పి వచ్చింది. బాబాకు మ్రొక్కిన మ్రొక్కును మర్చిపోయిన నా తప్పుకు శిక్షగా మళ్ళీ తనకు కడుపునొప్పి వస్తుందనుకొని మనస్సులోనే బాబాకు క్షమాపణలు చెప్పుకుని, బాబాను స్మరించుకుంటూ, మా పాపకు వేడినీళ్ళు ఇచ్చి, శిరిడీ లైవ్ దర్శనంలో బాబాను దర్శింపజేశాను. బాబాను దర్శించినప్పటినుండి మా అమ్మాయి కడుపునొప్పి కొద్దికొద్దిగా తగ్గింది. “చాలా చాలా ధన్యవాదాలు బాబా!”

మూడవ అనుభవం:

మేము మా ఊళ్ళో కొంత పొలం కొన్నాము. ఆరు నెలల క్రితం ఆ పొలానికి రిజిస్ట్రేషన్ అయింది. కానీ దానికి రైతుబంధు పథకం వర్తించలేదు. నేను బాబాను మ్రొక్కుకుని అక్కడున్న ఆఫీసరు ద్వారా అన్ని ప్రయత్నాలూ చేశాను. ఎట్టకేలకు బాబా దయవలన గురువారంరోజున రైతుబంధు పథకం క్రింద కొంత డబ్బు నా అకౌంటులో జమ అయింది. “ధన్యవాదాలు బాబా!” ఇలా నాపై ఎల్లప్పుడూ దయచూపాలని బాబాను మనసారా ప్రార్థిస్తున్నాను.

---

దయగల సాయితండ్రి కరుణించారు

సాయిభక్తురాలు శ్రీమతి అంజలి తనకు బాబా ప్రసాదించిన అనుభవాన్ని మనతో పంచుకుంటున్నారు.

బాబా భక్తకోటికందరికీ నా నమస్కారాలు. నా పేరు అంజలి. ఈమధ్య బాబా నాపై చూపించిన అనుగ్రహాన్ని మీతో పంచుకోవాలని అనుకుంటున్నాను. మా బాబుకి జ్వరం తగ్గిన తరువాత మా పాపకు కూడా జ్వరం వచ్చింది. బాబా దయవల్ల రెండు రోజుల్లో జ్వరం తగ్గిపోయింది. అలాగే బాబా దయవల్ల పండుగకు కాస్త ముందే ఆఫీసుకు క్రొత్త బ్యాటరీలు వచ్చాయి. అందువల్ల వాటిని భోగి ముందురోజున ఆఫీసులో ఛార్జ్ చేసి, సంక్రాంతి పండుగకి అమ్మావాళ్ళ ఇంటికి వెళదామని అనుకున్నాము. సంక్రాంతి పండుగరోజున తిరుమలలో వేంకటేశ్వరస్వామి దర్శనానికి ఆన్‌లైన్లో టికెట్లు బుక్ చేశారు మావారు. దాంతో, భోగిరోజున వేటపాలెంలోని దత్తాత్రేయస్వామి గుడికి వెళ్ళి స్వామిని దర్శించుకుని, మరుసటిరోజు తిరుమల వెళ్ళి శ్రీవారి దర్శనం చేసుకుందామనుకున్నాము. కానీ పండుగ ముందురోజు ఆఫీసులో పని పూర్తికాలేదు. అందువల్ల తిరుమల వెళ్ళడానికి నాకు సెలవు దొరుకుతుందో లేదోనని కాస్త ఆందళనగా అనిపించింది. దాంతో నేను బాబాకు నమస్కరించుకుని, “బాబా! తిరుమల వెళ్ళి శ్రీవారిని దర్శించుకోవాలని ఉంది. ఎలాగైనా ఆఫీసులో నాకు సెలవు ఇప్పించు ప్లీజ్!” అని వేడుకున్నాను. దయగల సాయితండ్రి వెంటనే కరుణించారు. నాకు సెలవు దొరికింది. అందరం కలిసి ఆనందంగా తిరుమల వెళ్ళి వేంకటేశ్వరస్వామి దర్శనం చేసుకుని వచ్చాము. శ్రీవారి దర్శనం చాలా బాగా జరిగింది. ప్రయాణ సమయంలో నాకు నెలసరి వస్తుందేమోనని భయపడ్డాను. కానీ, ఎలాంటి అడ్డంకీ లేకుండా బాబా దయవల్ల అంతా చాలా ఆనందంగా జరిగింది. పండుగ తరువాత వచ్చి ఆఫీసులో జాయినయ్యాను. బ్యాటరీలకు సంబంధించిన పనిని జనవరి 18న బాబా పూర్తిచేయించారు. అంతా బాబా దయ. ఇంకా కొన్ని చిన్న చిన్న సమస్యలు ఉన్నాయి. అవి తీరిన తరువాత మరలా మీ అందరితో పంచుకుంటాను. జై సాయిరాం!

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

---