సాయిభక్తుల అనుభవమాలిక 630వ భాగం.....

---

ఈ భాగంలో అనుభవాలు:

1. బాబా తగ్గించింది సాధారణ తలనొప్పి, జ్వరం కాదు, కరోనాని
2. బాబా దయతో తగ్గిన చేయినొప్పి

---

బాబా తగ్గించింది సాధారణ తలనొప్పి, జ్వరం కాదు, కరోనాని

సాయిబంధువులకు నమస్కారం. బాబా నాకు ఎన్నో అనుభవాలు ప్రసాదించారు. వాటిలోనుండి ఒక ముఖ్యమైన అనుభవాన్ని ఇప్పుడు మీతో పంచుకుంటున్నాను.

లాక్‌డౌన్ ఎత్తివేసిన తరువాత కొన్ని షరతులతో మా కంపెనీని తిరిగి ప్రారంభించారు.  అయితే చుట్టుపక్కలా కరోనా కేసులు విపరీతంగా పెరుగుతుండటం వల్ల కరోనా భయం చాలా ఉండేది. అందువల్ల బయటివాళ్ళు గ్రామంలోకి రాకుండా అడ్డంగా ముళ్ళకంప వేసేవాళ్ళు. మేమంతా భయం భయంగానే మా విధులకు హాజరయ్యేవాళ్ళం, రోజంతా మాస్క్ వేసుకుని పనిచేసేవాళ్ళం. ఒకరోజు నేను కంపెనీలో పనిచేస్తుండగా, ఉన్నట్టుండి చలితో కూడిన తలనొప్పి మొదలైంది. విధులు ముగించుకుని ఇంటికి వచ్చిన తరువాత టాబ్లెట్ వేసుకుంటే తలనొప్పి తగ్గింది, కానీ సాయంకాలానికి మళ్ళీ ఎక్కువైంది. చలి, తలనొప్పితో పాటు జ్వరం కూడా వచ్చింది. టాబ్లెట్ వేసుకున్నా తగ్గలేదు. డాక్టర్ దగ్గరకు వెళదామంటే ఆదివారం సూళ్లూరుపేట మొత్తం లాక్‌డౌన్ ప్రకటించారు. ఎవరినైనా సహాయం అడుగుదామంటే, ‘ఒంట్లో బాగాలేదు’ అని చెప్తే భయంతో అయిదడుగులు వెనక్కి వేసి మాట్లాడటం, ఇంటికి రావడం మానేస్తారు. ఏం చేయాలో తోచలేదు, అలా అని ఇంట్లో పడుకోవడానికి కూడా మనస్కరించలేదు. ఎందుకంటే, ఇంట్లో చిన్నపిల్లలు ఉన్నారు, వాళ్ళపై ఎలాంటి ప్రభావం ఉంటుందోనని భయం. రానురానూ జ్వరం, తలనొప్పి ఇంకా ఎక్కువ అయ్యాయి. దాంతోపాటు వాసన కూడా గుర్తించలేకపోయాను. దాంతో కరోనా సోకిందేమోనని భయమేసి ఇంట్లోవాళ్ళకి దూరంగా ఉందామని వెళ్లి పూజగదిలో పడుకున్నాను. తలనొప్పి తగ్గటానికి నా భార్య సాధారణ తలనొప్పి మాత్ర ఇచ్చింది. కానీ, నేను ఆ టాబ్లెట్ వేసుకోకుండా దిండు క్రింద పెట్టుకుని, బాబాకు నమస్కరించుకుని, “బాబా! లాక్‌డౌన్ వలన డాక్టర్ దగ్గరకు వెళ్లలేను, ఎవరినీ సహాయమూ అడగలేను. నాకు చాలా భయంగా ఉంది. ఈ పరిస్థితుల్లో నువ్వు మాత్రమే నాకు సహాయపడగలవు. నా వలన నా కుటుంబం ఇబ్బందులు పడకుండా రక్షించు తండ్రీ! నీ అనుగ్రహంతో నా జ్వరం, తలనొప్పి తగ్గిపోతే నా అనుభవాన్ని సాయి మహరాజ్ సన్నిధి బ్లాగులో పంచుకుంటాను బాబా!” అని ప్రార్థించాను. బాబాను ప్రార్థించిన తరువాత గాఢమైన నిద్ర పట్టేసింది. రెండు మూడు గంటల తరువాత విపరీతమైన చెమటలు పట్టి మెలకువ వచ్చి చూసుకునేసరికి జ్వరమూ లేదు, తలనొప్పీ లేదు. ఎంతో ఆనందంతో బాబాకు మనసారా కృతజ్ఞతలు తెలుపుకున్నాను. బాబా నాకు తగ్గించింది సాధారణ తలనొప్పి, జ్వరం కాదు, అది కరోనా అని నేను బలంగా నమ్ముతున్నాను. మామూలు పరిస్థితుల్లో అయితే జ్వరం, తలనొప్పి సాధారణమైనవే కావచ్చు, కానీ నేను అనుభవించిన పరిస్థితులు అసాధారణమైనవి. కొన్ని పరిస్థితుల్లో చేతిలో డబ్బు ఉన్నా మనం ఏమీ చేయలేం. డబ్బు కన్నా గురువు అనుగ్రహం ఎంతో గొప్పది. నా సాయికి అసాధ్యమైనది ఏదీ లేదు. నా అనుభవాన్ని ఈ బ్లాగులో పంచుకునే అవకాశమిచ్చిన సాయికి హృదయపూర్వక ధన్యవాదాలు.

---

బాబా దయతో తగ్గిన చేయినొప్పి

సాయిభక్తురాలు శ్రీమతి అనూష ఇటీవల బాబా తనకు ప్రసాదించిన అనుభవాన్ని మనతో పంచుకుంటున్నారు.

ప్రియమైన సాయి స్నేహితులకు హాయ్! నా పేరు అనూష. ప్రస్తుతం నేను 6 నెలల గర్భవతిని. కేవలం సాయిబాబా అనుగ్రహం వల్ల పెళ్ళైన మూడేళ్లకు నేను గర్భవతినయ్యాను. ఆ అనుభవాన్ని ఇదివరకు ఈ బ్లాగు ద్వారా 'భక్తురాలినైన మూడు నెలలకే అనుగ్రహించిన బాబా' అన్న టైటిల్‌తో మీ అందరితో పంచుకున్నాను. ఆ అనుభవం చదవాలనుకునేవారికోసం క్రింద లింక్ జతపరుస్తున్నాను.

https://saimaharajsannidhi.blogspot.com/2020/08/493.html

ఇప్పుడు 2020, నవంబరు నెల చివరివారంలో, బహుశా 23 లేదా 24వ తేదీన బాబా ప్రసాదించిన ఒక చిన్న ఊదీ మహిమను పంచుకుంటాను. ఆరోజు రాత్రి 2 గంటల సమయంలో అకస్మాత్తుగా నా కుడిచేయి చాలా నొప్పిపెట్టసాగింది. గర్భవతినైన నాకు ఆ సమయంలో ఏం చేయాలో తోచక బాబాను ప్రార్థించి నిద్రపోయాను. మరుసటిరోజుకి నొప్పి అలానే ఉంది. అప్పుడు నా చేతికి బాబా ఊదీ రాసుకుని, "బాబా! మీ కృపతో ఈ చేయినొప్పి తగ్గిపోతే నా అనుభవాన్ని మీ బ్లాగులో పంచుకుంటాను" అని బాబాను ప్రార్థించాను. బాబా దయవలన నొప్పి తగ్గిపోయింది. ప్రస్తుతం ఏ నొప్పీ లేదు. బాబా దయవల్ల నేను ఆరోగ్యంగా ఉన్నాను. "చాలా చాలా ధన్యవాదాలు బాబా!"

---