సాయిభక్తుల అనుభవమాలిక 633వ భాగం....

---

ఈ భాగంలో అనుభవాలు:

1. బాబా అనుగ్రహంతో తీరిన ఆరోగ్య సమస్యలు
2. సద్గురు సాయి సమాధానం

---

బాబా అనుగ్రహంతో తీరిన ఆరోగ్య సమస్యలు

ఓం సాయిరామ్! అందరూ బాగుండాలి. సాయి దాసులందరికీ నా నమస్కారాలు. నా పేరు మంగ. నేను సాయిభక్తురాలిని. అన్నింటిలోనూ నాకు తోడుగా ఉంటున్న శ్రీ సాయిబాబాకు నేనెప్పటికీ ఋణపడి ఉంటాను. నా జీవితం వారి ఆశీర్వాదమే! నా నిశ్చితార్థం, వివాహం గురువారంనాడే జరిగాయి. 2020, అక్టోబరు 1న నాకు పాప పుట్టింది, అది కూడా గురువారంనాడే. ఇలా బాబా తమ ఆశీస్సులు సదా నాపై కురిపిస్తున్నారు. ఇకపోతే, బాబా నాకు ప్రసాదించిన రెండు చిన్న అనుభవాలను నేనిప్పుడు మీతో పంచుకుంటాను.

మొదటి అనుభవం:

మా పాపకిప్పుడు మూడో నెల వచ్చింది. నవంబరు మూడవ వారం నుండి రెండు వారాల పాటు తనకు తీవ్రంగా జలుబు చేసి బాగా ఏడుస్తుండేది. తన బాధను కూడా చెప్పుకోలేని చిట్టితల్లి అంతలా ఏడుస్తుంటే తల్లిగా నాకు చాలా బాధగా ఉండేది. అప్పుడు బాబాను తలచుకుని, "పాప ఆరోగ్యం బాగుండేలా అనుగ్రహించమ"ని వేడుకున్నాను. నా మీద దయతో పాపకు త్వరగా నయమయ్యేలా చేశారు బాబా. ఇప్పుడు పాప ఆరోగ్యం బాగుంది. "చాలా చాలా ధన్యవాదాలు బాబా!"

రెండవ అనుభవం:

2018 నుండి నా ఆరోగ్యం బాగాలేక ఎన్నో హాస్పిటల్స్‌ తిరిగి ఎందరో డాక్టర్లను సంప్రదించాను. కానీ ప్రయోజనం లేకపోయింది. నా ఆరోగ్యం ఏ మాత్రమూ కుదుటపడలేదు. తమ కష్టం తీరితే తమ అనుభవాలను బ్లాగులో పంచుకుంటామని బాబాకు చెప్పుకున్నామని, బాబా కృపతో ఆ కష్టాలు తీరాయని సాటి సాయిభక్తులంతా పంచుకుంటున్న అనుభవాలను బ్లాగులో చదివాక నేను కూడా, "నా ఆరోగ్యం బాగుంటే, నా అనుభవాన్ని బ్లాగులో పంచుకుంటాన"ని బాబాకు చెప్పుకున్నాను. నిజంగా బాబా ఎంతో దయార్ద్రహృదయులు. రెండేళ్లుగా నయంకాకుండా ఉన్న నా అనారోగ్యాన్ని బాబా ఇట్టే నయం చేశారు. బాబా ఆశీస్సులతో నేనిప్పుడు పూర్తి ఆరోగ్యంగా ఉన్నాను. "బాబా! మీకు నా కృతజ్ఞతాపూర్వక నమస్కారాలు". నన్ను ఈ గ్రూపుకి పరిచయం చేసినవాళ్ళకి నేను ఋణపడి ఉంటాను.

సాయినాథ్ మహరాజ్ కీ జై!

---

సద్గురు సాయి సమాధానం

యు.ఎస్.ఏ నుండి ఒక సాయి భక్తురాలు తన అనుభవాన్నిలా పంచుకుంటున్నారు:

ఓం సాయిరామ్! సాయి లీలలను మనం మన దైనందిన జీవితంలో ఏదో ఒక విధంగా అనుభవిస్తూ ఉంటాం. వాటిలో కొన్నింటిని నేనిప్పుడు మీతో పంచుకోబోతున్నాను.

నేను యు.ఎస్.ఏ లో నివాసముంటున్నాను. నా సోదరి వివాహం 2020, మార్చి 19న జరపడానికి పెద్దలు నిశ్చయించారు. నా భర్త, పిల్లలని వదిలి నేను వెళితే, వాళ్ళు తమ పనులు నిర్వహించుకోలేరు. ఇలా కొన్ని కారణాల వలన నేను వివాహానికి వెళ్ళాలా, వద్దా అనే సందిగ్ధంలో పడ్డాను. నేను ఏ నిర్ణయం తీసుకోలేక ఫిబ్రవరి నెల చివరివరకు వేచి చూసి,  'ఎస్', 'నో'  అని రెండు చీటీలు వ్రాసి, "బాబా! నేను వివాహానికి 'వెళ్లాలా? వద్దా?' మీ నిర్ణయం ఏమిటో చెప్పండి" అని ప్రార్థించి ఒక చీటీ తీసాను. బాబా సమాధానం 'వెళ్లొద్దు'అని వచ్చింది. ఇక్కడ మీకో విషయం చెప్పాలి, ఇలా చీటీల ద్వారా బాబాను అడిగిన సందర్భాలలో నాకు నచ్చని విధంగా బాబా సమాధానం వచ్చిన ప్రతిసారి నేను నాకు నచ్చినట్లు చేసేదాన్ని. అలాంటిది నాకు ఏ ప్రేరణ కలిగిందోగాని మొట్టమొదటిసారిగా నేను నా మనసు మార్చుకుని, బాబా సమాధానానికి కట్టుబడి నా భర్త, పిల్లలు, ఇంకా ప్రతి ఒక్కరితో వివాహానికి వెళ్ళనని చెప్పాను. 

తరువాత కోవిడ్ 19 కారణంగా మార్చినెలలో ఏమి జరిగిందో మీ అందరికీ తెలుసు. ఆ వివాహమైన మరుసటిరోజే నా పెద్ద కూతురు యుక్తవయస్సుకు వచ్చింది. మార్చి 23 నుండి అన్ని విమానాలు రద్దు చేయబడ్డాయి. విమానాల రాకపోకలు ప్రారంభించడానికి ఎన్ని రోజులు పడుతుందో తెలియని పరిస్థితి. ఒకవేళ వివాహానికి వెళ్లి ఉంటే, నేను భారతదేశంలో చిక్కుకుపోయేదాన్ని. అవసరమైన సమయంలో నేను లేకపోవడంవలన, జాగ్రత్తగా చూసుకోవడానికి వేరెవరూ లేనందున నా కూతురుకి చాలా కష్టంగా ఉండేది. జరపవలసిన కార్యక్రమాలు చేయలేకపోయేవాళ్ళం. ఇటు నా కుటుంబం, అటు నేను ఎంతో బాధ పడేవాళ్ళం. బాబా చెప్పినట్లు నడుచుకోవడం వల్ల ఎంతో మేలు జరిగింది. ఈ అనుభవం నుండి బాబా సమాధానం ప్రతికూలంగా వస్తే, మనం ఓపికగా ఉండాలని, అలా చేయడం వల్ల ఎంతో మేలు పొందుతామని, ఆయన లీలని చూస్తామని నేను తెలుసుకున్నాను.

"సాయి తండ్రి! మీరు కాకుండా ఇంతలా మాకు రక్షణనివ్వడానికి ఎవరు ఉన్నారు? కోటి కోటి ప్రణామాలు తండ్రి. నేను అన్నింటినీ మీకే వదిలి పెడుతున్నాను, ఏది మంచో, ఏది చెడో మీకు తెలుసు. మమ్మల్ని జాగ్రత్తగా చూసుకోండి. పనిలో ఎదురయ్యే క్లిష్ట పరిస్థితుల నుండి బయటకు రావడానికి, సకాలంలో పనులు పూర్తి చేయడానికి సహాయం చేస్తున్న మీకు ధన్యవాదాలు సాయి. కఠినమైన పరిస్థితులను ఎదుర్కొంటున్న సమయంలో మేము ధైర్యంగా ఉండేలా అనుగ్రహించండి. కఠినమైన సమస్యలను అధిగమించడానికి మీ దైవిక నామాన్ని జపించేలా ఆశీర్వదించండి. ఆధ్యాత్మిక మార్గంలో ముందుకు వెళ్ళడానికి దయచేసి మాకు ఒక మార్గాన్ని చూపించండి".

మరో చిన్న అనుభవం:

నేను చాలాకాలంగా సచ్చరిత్ర సప్తాహ పారాయణ చేయడం మొదలుపెట్టి, "కోవిడ్ 19 మహమ్మారి నుండి కాపాడమ"ని బాబాను కోరుకున్నాను. రెండుసార్లు పారాయణ చేసిన తరువాత నేను, "ఈ మహమ్మారి నుండి ఎందుకు మమ్మల్ని బయటపడేయడం లేద"ని బాబాను అడిగాను. అదేరోజు నేను చూస్తున్న న్యూస్ ఛానెల్‌లో, "శిరిడీలో కోవిడ్ 19 కేసు ఒక్కటి కూడా లేద"ని చూసాను. దాంతో నేను, 'ఈ మహమ్మారి నుండి బాబా మనల్ని జాగ్రత్తగా చూసుకుంటారని, ఇది త్వరలోనే ముగుస్తుంద'ని నేను అనుకున్నాను. "బాబా! దయచేసి గోధుమపిండితో కలరాను నిర్ములించిన విధంగా ఈ కోవిడ్ 19ని ఏదోఒకటి చేసి తొలగించండి. మీరు మాత్రమే ఈ మహమ్మారి నుండి మమ్మల్ని రక్షించగలరు".

శ్రీసద్గురు సాయినాథ్ మహారాజ్ కి జై.

సోర్సు: http://www.shirdisaibabaexperiences.org/2020/05/shirdi-sai-baba-miracles-part-2727.html

స్వీయ అనుభవం:

నేను, నా స్నేహితుడు 2020, మే 16 రాత్రి ఫోన్ లో మాట్లాడుకుంటున్నాము. మాటల సందర్భంలో ఈ కరోనా కారణంగా శిరిడీ వెళ్లి బాబాను దర్శించలేకపోతున్నామని, మళ్ళీ ఎప్పటికి భక్తులకి ఆ అవకాశం వస్తుందో అని చాలా బాధపడ్డాం. భక్తుల ప్రేమకోసం తప్పించే బాబా తమ బిడ్డలని ఎందుకిలా దూరంగా ఉంచారో అని కూడా అనుకున్నాము. చాలారోజులుగా మా మనసులో ఉన్న బాధ ఇదే. అయితే ఆ మాటల్లో "శిరిడీలో కరోనా కేసులున్నాయా?" అని నా స్నేహితుడు ఒక ప్రశ్న వేసాడు. "ఏమో! దాని గురించి తెలీదు. ఒకవేళ నమోదై ఉన్నాఇప్పుడు లేకపోయి ఉండొచ్చు" అని నేను అన్నాను. బాబా దానికి సమాధానం ఎలా ఇచ్చారో చూడండి. రెండురోజుల తరువాత నేను ఇంగ్లీష్ బ్లాగులోని భక్తుల అనుభవాలు చదువుతుండగా పై భక్తురాలి అనుభవం కనిపించింది. అది చదివి బాబా ఇచ్చిన సమాధానానికి ఆనందాశ్చర్యాలకి లోనయ్యాను. వెంటనే నా స్నేహితుడికి మెసేజ్ చేశాను. అది చూసి తను హ్యాపీగా, "నేను చాలా వెతికాను. కానీ ఎక్కడా ఆ సమాచారం దొరకలేదు. అందుకే నిన్ను అడిగాను. నేను కోవిడ్ 19 డేటా పూర్తిగా చూసాను. మహారాష్ట్ర సమాచారం ఉంది కానీ, ఎక్కడా శిరిడీ గురించి లేదు. థాంక్స్ నా సందేహం క్లియర్ అయ్యింది" అని అన్నాడు. నిజంగా మన బాబా చాలా గ్రేట్. ఆయన తన భక్తులను సదా కనిపెట్టుకొని ఉంటారు. మనం అడగకపోయినా అవసరమైనది చేస్తూ ఉంటారు. "థాంక్యూ సో మచ్ బాబా!".

---