సాయిభక్తుల అనుభవమాలిక 393వ భాగం....

---

ఈ భాగంలో అనుభవాలు:

1. పిలిస్తే బాబా వస్తారు, అండగా నిలుస్తారు
2. అన్నయ్య క్షేమాన్ని తెలియజేసిన బాబా

---

పిలిస్తే బాబా వస్తారు, అండగా నిలుస్తారు

నా పేరు ప్రసన్న. మాది గుంటూరు. సాయినాథుని దివ్యపాదాలకు శిరసాభివందనాలు సమర్పించుకుంటూ, 2020, ఏప్రిల్ నెల మొదటి వారంలో ఆ సాయినాథుడు నాకు ఆరోగ్యాన్ని ప్రసాదించిన అనుభవాన్ని మీతో పంచుకుంటున్నాను.

5-4-2020 రాత్రి నాకు ఛాతీనొప్పి వచ్చింది. రాత్రంతా నొప్పితో బాధపడ్డాను. మరుసటిరోజుకి నొప్పి ఇంకా ఎక్కువైంది. నేను వెంటనే బాబా వద్దకు వెళ్ళి, “నొప్పి చాలా ఎక్కువగా ఉంది బాబా. ప్రస్తుతం లాక్‌డౌన్ కారణంగా ఏ ఆసుపత్రులూ ఉండవు, ఏ డాక్టరూ అందుబాటులో ఉండరు. నువ్వే నా డాక్టర్, నీ ఊదీయే నాకు మెడిసిన్ బాబా. దయచేసి ఈ ఛాతీనొప్పిని తగ్గించి నాకు ఆరోగ్యాన్ని ప్రసాదించండి. నా ఆరోగ్యం మెరుగైన వెంటనే నాకు వీలుపడిన చోట నీ మందిరంలో కొబ్బరికాయను సమర్పిస్తాను” అని సాయినాథుడిని మనసారా వేడుకున్నాను. బాబా అనుగ్రహంతో మూడు రోజుల్లో నా ఛాతీనొప్పి తగ్గిపోయింది. ఇప్పుడు నా ఆరోగ్యం బాగుంది. మన సాయినాథుడు మనం ఏ సమస్యలో ఉన్నా మనందరినీ తప్పక కాపాడుతారు. ఏ పరిస్థితిలోనైనా, ఎవ్వరికి ఏ అవసరం వచ్చినా మన సాయినాథుడు పలుకుతారు, రక్షిస్తారు. “కృతజ్ఞతలు బాబా! దయగల తండ్రిలా నన్ను ఈ పరిస్థితిలో కాపాడి, ఆరోగ్యాన్ని ప్రసాదించినందుకు మీకు ఎన్నిసార్లు కృతజ్ఞతలు చెప్పినా తక్కువే తండ్రీ. ఎల్లప్పుడూ ప్రతి ఒక్కరినీ తప్పకుండా రక్షించు బాబా!”.

---

అన్నయ్య క్షేమాన్ని తెలియజేసిన బాబా


నేను బాబాకు సామాన్య భక్తురాలిని. నేను నా భర్త, పిల్లలతో కలిసి హైదరాబాదులో ఉంటున్నాను. మా సంసారంలో చిన్న చిన్న ఒడిదుడుకులు ఉన్నప్పటికీ బాబా దయతో హాయిగా సాగుతోంది. నేను వర్క్ ఫ్రమ్ హోమ్ చేస్తాను. మావారు ప్రైవేట్ సంస్థ ఉద్యోగి. నేను రోజులో కనీసం ఒక్కసారైనా ‘సాయి మహరాజ్ సన్నిధి’ బ్లాగ్ చదువుతాను. పదకొండు సంవత్సరాలుగా నా మనసు పడుతున్న వేదన బాబా అనుగ్రహంతో ఒక ఆత్మీయ సోదరుడి పరిచయం వల్ల తగ్గింది. ఇప్పుడు మా మధ్య సంబంధాల్లో మార్పులు వచ్చాయి. లాక్ డౌన్ వల్ల ఆ అన్నయ్య ఉద్యోగం, వ్యక్తిగత జీవితం ఇబ్బందుల్లో పడింది. వారం క్రితం అన్నయ్యతో స్పర్థ వల్ల మేము మాట్లాడుకోవటం లేదు. నా తప్పు కొంత ఉన్నప్పటికీ తను నాతో మాట్లాడటం మానేసేంత స్థాయి గొడవ కాదు మాది. అన్నయ్యకి అనారోగ్య సమస్య ఉంది. తన ఆరోగ్యం కోసం నేను శ్రీగురుచరిత్ర పారాయణ, బాబా మహాపారాయణ చేస్తున్నాను. మా అమ్మని, ఒక ఫ్రెండుని, ఆ అన్నయ్యని నేను ఏ దశలోనూ వదులుకోవడానికి ఇష్టపడను. ఇక నా అనుభవానికి వస్తే, శనివారం (11-04-2020) రోజున, “అన్నయ్య నాతో మాట్లాడకపోయినా, తను ఆరోగ్యరీత్యా ఎలా ఉన్నారో నాకు తెలియాలి బాబా” అని బాబాకు దణ్ణం పెట్టుకున్నాను. బాబా దయవలన ‘అన్నయ్య బాగానే ఉన్నార'ని మంగళవారం(14.04.2020) నాడు తెలిసింది. నేను ఎంతో సంతోషించాను. అన్నయ్య ఆయురారోగ్యాలతో నిండు నూరేళ్ళు ఆనందంగా ఉండాలని బాబాని మనస్ఫూర్తిగా కోరుకుంటున్నాను. ఇప్పటికీ తను నాతో మాట్లాడటం లేదు. త్వరలోనే మాట్లాడతారని ఆశిస్తున్నాను. మా బాంధవ్యం ఎప్పటిలా అన్యోన్యంగా ఉండాలని బాబాని కోరుకుంటున్నాను. ‘తెలియని మనిషి, రక్తసంబంధం లేదు, మరి ఎందుకింత తపన?’ అని నన్ను చూసి మీరు నవ్వుకోవచ్చు. కానీ, ద్రౌపది-కృష్ణులది కూడా ఒక తల్లి సంతానం అనే బంధం కాదు కదా, అయినా వారి బంధం ఎంత గొప్పది!

---