సాయిభక్తుల అనుభవమాలిక 385వ భాగం....

---

ఈ భాగంలో అనుభవాలు:

1. మనసులో మెదిలిన చిన్న కోరికను బాబా తీర్చిన వైనం
2. మనం బాధలో ఉంటే బాబా కూడా ఏడుస్తారు

---

మనసులో మెదిలిన చిన్న కోరికను బాబా తీర్చిన వైనం

ఓం శ్రీ సాయిరాం! అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

‘సాయి మహరాజ్ సన్నిధి’ బ్లాగ్ నిర్వాహకులకు నా నమస్కారం. ఈ బ్లాగ్ ద్వారా నా అనుభవాలను మీతో పంచుకుంటున్నందుకు నాకు చాలా ఆనందంగా ఉంది. మా మనుమడి రూపంలో బాబానే మా ఇంటికి రాబోతున్నారని ఇంతకుముందు నేను మీతో పంచుకున్నాను. సాయి కృపతో మళ్ళీ ఇంత త్వరగా మరో అనుభవంతో మీ ముందుకు వస్తున్నందుకు చాలా సంతోషంగా ఉంది. బాబా అనుగ్రహంతో మార్చి 10వ తేదీన మా మనుమడు జన్మించాడు. బాబానే మా మనవడి రూపంలో పసిబిడ్డగా వచ్చి మా వంశాన్ని వృద్ధి చేస్తున్నారు. మా ఆనందానికి అవధుల్లేవు. బాబా దయవల్ల బాబు బాగున్నాడు.

ఇటీవల జరిగిన మరొక అనుభవాన్ని ఇప్పుడు మీతో పంచుకుంటాను. నేను మొన్న నా స్నేహితురాలి ఇంటికి వెళుతూ బొబ్బట్లు తీసుకువెళ్ళాను. బొబ్బట్లు కొనే సమయంలో ఒకరి ఇంటివద్ద సాయి దివ్యపూజ ఉద్యాపన జరుగుతోందని తెలిసింది. “ఈ బొబ్బట్లలో కొన్నైనా బాబాకు నైవేద్యంగా వాళ్ళింటికి చేరితే బాగుండు” అనిపించింది. కానీ, “వాళ్ళు ఐదుగురినే ఆహ్వానించారు, మనం వెళితే బాగుండదు కదా” అని అనుకున్నాను. అయితే ఉద్యాపనకు ఆహ్వానించిన ఆవిడ బాబా కోసం స్వీటు తయారుచేయడం మరచిపోయారట. నేను బొబ్బట్లు ఇచ్చిన నా స్నేహితురాలు తనకు ఆ విషయం తెలియకుండానే, ఇంట్లో బొబ్బట్లు ఉన్నాయి కదా అని నేనిచ్చిన బొబ్బట్లు తీసుకుని ఉద్యాపనకు వెళ్లారట. అది చూసి ఉద్యాపనకు ఆహ్వానించిన ఆవిడ  ఎంతో సంతోషంతో, “సాయిభక్తురాలు పంపిన స్వీటు వచ్చింది” అని అన్నారట. ఇది నిజంగా బాబా సంకల్పం. నాకు ఈ విషయం తెలియగానే, "బొబ్బట్లు కొంటున్నప్పుడు నా మనసులో మెదిలిన చిన్న కోరికను బాబా ఇలా తీర్చార"ని ఎంతో సంతోషంతో బాబాకు కృతజ్ఞతలు తెలుపుకున్నాను.

కొరోనా వైరస్‌తో ప్రపంచమంతా వణికిపోతున్న ఈ సమయంలో, ఒకరోజు మావారికి ఒక తుమ్ము వస్తే, “బాబా! నీవు ఉండగా ఏమీ కాదు” అనుకుని బాబా ఊదీని మావారి నోట్లో వేశాను. అంతే! వెంటనే తగ్గిపోయింది. మనందరినీ చూసుకునే బాబా మనకు ఉండగా మనకి ఏమీ భయం లేదు. “బాబా! మీరు ప్రపంచాన్నంతటినీ కొరోనా బారినుండి కాపాడండి”.

ఓంసాయి శ్రీసాయి జయజయసాయి

---

మనం బాధలో ఉంటే బాబా కూడా ఏడుస్తారు

సాయిభక్తురాలు కోమల్ తన అనుభవాన్ని ఇలా పంచుకుంటున్నారు:

నేను పోస్ట్ గ్రాడ్యుయేషన్ చేస్తున్న డాక్టర్ని. నేను సాయిబాబా భక్తురాలిని. ఆయన చాలా దయగలవారు. 7 సంవత్సరాల కాలంలో ఆయన నాకు 4సార్లు స్వప్నదర్శనం ఇచ్చారు. చివరిసారిగా ఇటీవల ఆయన స్వప్నదర్శనం ఇచ్చినప్పుడు నేను బాబాని చాలా దగ్గరగా చూశాను. అయితే ఆయనెందుకో ఏడుస్తున్నారు. ఆయన మౌనంగా ఉన్నారు, కళ్ళనుండి కన్నీళ్లు చెంపల మీదుగా క్రిందకి జారుతున్నాయి. ఆయన బాధ నన్ను మేల్కొనేలా చేసింది. చూస్తే సమయం తెల్లవారుఝామున 4.30 అయ్యింది. ఏమీ అర్థంకాక చుట్టూ చూస్తూ బాబా ఫోటో చూశాను. నేను, “ఏమి జరిగింది బాబా? ఎందుకు ఏడుస్తున్నారు?” అని అడిగాను. తరువాత 'నాకు ఏదైనా చెడు జరగబోతోందా?' అని భయపడ్డాను. కానీ బాబాతో, "నన్ను రక్షించడానికి మీరున్నారు. కాబట్టి చింతించకండి సాయీ" అని అన్నాను. అప్పుడు నేను, “మీ భక్తులు మీకు భారంగా అనిపిస్తున్నారా?” అని అడిగాను. అందుకు ఆయన సమాధానం కూడా నేనే, “చింతించకు, నిన్ను జాగ్రత్తగా చూసుకోవడానికి నేనున్నాను!” అని చెప్పి నిద్రపోయాను. ఆశ్చర్యం! కలలో మళ్ళీ బాబా దర్శనం ఇచ్చారు. కలలో నేను పనిమీద ఎక్కడికో వెళ్లడంలో బిజీగా ఉన్నాను. ఎవరో నా కుడిచేయి పట్టుకుని నన్ను ఆపారు. నేను వెనక్కి తిరిగి చూశాను. సాయి నా చేయి పట్టుకుని నిలబడి ఉన్నారు. నేను “సాయీ!” అన్నాను. ఆయన నన్ను చూస్తూ నవ్వారు. ఆయన ముఖం ప్రకాశవంతంగా, సంతృప్తికరంగా ఉంది. నాకు మెలకువ వచ్చి గడియారం చూస్తే ఉదయం 6.30 అయ్యింది. కేవలం రెండు గంటల వ్యవధిలో బాబా నాకు రెండుసార్లు దర్శనం ఇచ్చారు. రోజంతా నేను 'మొదట ఆయన ఏడ్చారు, రెండోసారి నవ్వారెందుకని' ఆలోచిస్తూ గడిపాను. చివరికి ఇలా అర్థం చేసుకున్నాను: 'ఆయన ఏడ్చారు ఎందుకంటే నా హృదయంలో బాధ ఉందని ఆయనకు తెలుసు. నా బాధను ఆయన చూడలేక కన్నీళ్లు పెట్టుకున్నారు. నేను ఆయనతో, “చింతించకు, నిన్ను జాగ్రత్తగా చూసుకోవడానికి నేనున్నాను!” అని ఆయన సమాధానం కూడా నేనే చెప్పడంతో మళ్ళీ బాబా కలలో దర్శనమిచ్చి నవ్వారు'.

గురువే సర్వము. ఆయన మన దేవుడు. ఆయన మాత్రమే మన బాధను అర్థం చేసుకుంటారు. మనం బాధలో ఉంటే ఆయన ఏడుస్తారు.

---