సాయిభక్తుల అనుభవమాలిక 361వ భాగం....

---

ఈ భాగంలో అనుభవాలు:

1. దయామయుడైన బాబా తన భక్తులను సమస్యలలో వదిలిపెట్టరు
2. ఊదీ, ప్రసాదాలతో లభించిన బాబా ఆశీస్సులు

---

దయామయుడైన బాబా తన భక్తులను సమస్యలలో వదిలిపెట్టరు

న్యూజిలాండ్ నుండి పేరు వెల్లడించని ఒక సాయిభక్తుడు తన అనుభవాన్ని మనతో ఇలా పంచుకుంటున్నారు:

"బాబా! మీకు నా ధన్యవాదాలు. నాకున్న త్వరగా కోపానికి గురయ్యే స్వభావం రోజురోజుకూ దిగజారిపోతోంది. దయచేసి నన్ను మంచి వ్యక్తిగా మలచండి". నాకు బాబా చాలా అనుభవాలిచ్చారు. కానీ ఇప్పుడు నేను పంచుకోబోయేది నా జీవితంలో చాలా ముఖ్యమైనది.

భక్తులందరికీ ఓం సాయిరామ్! కొన్ని ఆరోగ్య సమస్యల కారణంగా నేను గత సంవత్సరం(2018) నా ఉద్యోగానికి రాజీనామా చేశాను. నా ఆరోగ్యం కుదుటపడ్డాక 5 నెలల తరువాత నేను బాబాని తలచుకుని మళ్ళీ అదే సంస్థలో నా అదృష్టాన్ని పరీక్షించుకున్నాను. బాబా ఆశీస్సులతో నా టీమ్ లీడర్ నాకు అవకాశం ఇచ్చాడు. అతను నాకొక కాంట్రాక్ట్ ఉద్యోగాన్ని ఇచ్చాడు. దానితో నేను నిజంగా చాలా సంతోషించాను. తరువాత నా కాంట్రాక్టు ముగియబోతున్న సమయంలో అతను నాకు ఆ సమాచారాన్ని తెలియజేస్తూ, మళ్ళీ నన్ను సంప్రదిస్తానని చెప్పాడు. నేను చాలా టెన్షన్ పడ్డాను. కానీ బాబా తన పిల్లలను రక్షించడానికి ఉన్నారు. ఒక శుభదినాన నా టీమ్ లీడర్ నా చేతికొక కవరు ఇచ్చి, 'ఇది పర్మినెంట్ పోస్ట్' అని చెప్పాడు. నేను విన్నదాన్ని, చూసినదాన్ని నమ్మలేకపోయాను. నేను తనతో "ఇది నిజమా?!" అని అడిగాను. అతను "అవున"ని బదులిచ్చాడు. నా సంతోషానికి అవధులు లేవు. "చాలా చాలా ధన్యవాదాలు బాబా!"

ఇక నా మరో అనుభవానికి వస్తాను. ఒకరోజు పనిలో ప్రాసెస్ చేయడానికి చాలా శాంపిల్స్ ఉన్నాయి. వాటిలో కొన్ని చేశాక నా మనస్సులో ఒక ఆలోచన వచ్చింది, నేనొక్కడినే చేయడానికి ఇవి చాలా ఎక్కువ గనక కొన్నింటిని ప్రాసెస్ చేయమని నా సహోద్యోగిని అడుగుదామని. కానీ ఆమె ఏమనుకుంటుందోనని భయపడ్డాను. అప్పుడు నేను, “బాబా, ఈ పరిస్థితిలో దయచేసి నాకు సహాయం చెయ్యండి. నేను అడగకుండానే నా సహోద్యోగి ఏదోవిధంగా తానే ఈ పని చేయడానికి ముందుకు రావాలి" అని బాబాను ప్రార్థించాను. దయగల బాబా తన భక్తులను సమస్యలలో వదిలిపెట్టరు. కొద్ది నిమిషాల్లో నాకు, నా సహోద్యోగికి మధ్య సంభాషణ మొదలైంది. ఆ సంభాషణలో ఆమె తనంతట తానుగా నాతో, "నేను ఆ శాంపిల్స్ ప్రాసెస్ చేయనా? మీరు వేరే పని చేసుకోవచ్చు" అని అడిగింది. నేను ఆనందాశ్చర్యాలకు లోనై మనసులోనే బాబాకు కృజ్ఞతలు చెప్పుకున్నాను.

పరిస్థితులు ఎలా ఉన్నా బాబాను నమ్మండి. ఆయన ఖచ్చితంగా మనకు సహాయం చేసి కాపాడుతారు. "బాబా, మేము ఎదుర్కొంటున్న మరో పరిస్థితి గురించి మీకు తెలుసు. అది సమస్య అని నేను అనను, ఎందుకంటే దాన్ని జాగ్రత్తగా సరిచేయడానికి మీరున్నారని నాకు తెలుసు. ఎవరూ చెడుగా భావించకుండా విషయం సజావుగా సాగేలా సహాయం చేయండి బాబా. నేను మీ పాదకమలాల వద్ద అన్నీ విడిచిపెడుతున్నాను, అంతా మీరే చూసుకోండి".

ఓం సాయిరామ్! ఓం సాయిరామ్! ఓం సాయిరామ్!

source: http://www.shirdisaibabaexperiences.org/2019/12/shirdi-sai-baba-miracles-part-2576.html

---

ఊదీ, ప్రసాదాలతో లభించిన బాబా ఆశీస్సులు

పేరు వెల్లడించని ఒక సాయిభక్తురాలు తన అనుభవాన్ని ఇలా పంచుకుంటున్నారు:


ఓం సాయిరామ్! సాయిబంధువులందరికీ నమస్కారం. ఈ బ్లాగు నిర్వహిస్తున్నవారికి  ధన్యవాదాలు. ఇటీవల బాబా నాకు ప్రసాదించిన ఒక చక్కటి అనుభవాన్ని నేనిప్పుడు మీతో పంచుకుంటాను. నేను 2020, ఫిబ్రవరిలో సాయి నవగురువారవ్రతం మొదలుపెట్టాను. మార్చి 5వ తారీఖున 4వ వారం వ్రతం పూర్తిచేసి, "బాబా! మమ్మల్ని ఆశీర్వదించండి" అని వేడుకున్నాను. బాబా అద్భుతం చూపించారు. మాకు శిరిడీ సంస్థాన్‌లో పనిచేస్తున్న ఒక పండిత్ తెలుసు. ఆయన ఎప్పుడు హైదరాబాదు వచ్చినా ఆయనకి తెలిసిన వాళ్ళింట్లో దిగుతారు. ఎప్పుడూ మా ఇంటికి రాలేదు. ఆయన మార్చి 7వ తారీఖున మావారికి ఫోన్ చేసి, "8వ తారీఖున హైదరాబాదు వస్తున్నాను, ఎయిర్‌పోర్టుకి రండి" అని చెప్పారు. ఆయన మా ఇంటికి వస్తారని మేమస్సలు ఊహించలేదు. అలాంటిది ఆయన ఎయిర్‌పోర్టు నుంచి నేరుగా మా ఇంటికే వచ్చారు. మాకు బాబా ఊదీ, ప్రసాదాలు ఇచ్చారు. ఆరోజు మా ఇంట్లోనే ఉండి మరునాడు శిరిడీకి తిరుగు ప్రయాణమయ్యారు. మేము పొందిన ఆనందాన్ని మాటల్లో చెప్పలేను. "బాబా! అడిగినంతనే ఊదీ, ప్రసాదాలు పంపి మమ్మల్ని ఆశీర్వదించిన మీకు మా శతకోటి ధన్యవాదాలు. ఏమైనా తప్పులు ఉంటే మన్నించండి బాబా!"

---