ఈ భాగంలో అనుభవం:
- ఐటి రంగంలో ఉద్యోగావకాశాన్నిచ్చిన బాబా
నా పేరు ప్రియ. నేను కెనడా వాసిని. అమ్మాయినైన నేను వ్యక్తిగతంగా, వృత్తిపరంగా చాలా బాధలుపడ్డాను. అయినప్పటికీ బాబా ఆశీస్సుల వలన నేను సజీవంగా, ఆరోగ్యంగా, ధైర్యంగా, సంతోషంగా ఉన్నాను. నేను భారతదేశం నుండి కెనడాకు వచ్చాను. అది బాబా చూపిన ఒక అద్భుతం. ఇప్పుడు నేను నా ఉద్యోగానికి సంబంధించిన ఒక అనుభవాన్ని మీతో పంచుకుంటాను.
నేను ఐటి రంగంలో ఉద్యోగం కోసం ఆశపడ్డాను. అయితే ఆ రంగంలో నాకు అనుభవం లేనందున నేను కోరుకున్నది జరగడం చాలా కష్టం. అందువలన నాకు ఆసక్తిలేని వేరే ఉద్యోగంలో చేరాను. ఆ ఉద్యోగంలో చేరడమైతే చేరాను గానీ మంచి జీతం వచ్చే వేరే ఉద్యోగం కోసం తీవ్రంగా ఎదురుచూశాను. కొత్త దేశంలో నేను కోరుకునే ఉద్యోగం ఎలా పొందాలో తెలియదు, నాకు ఏ దారీ కనబడలేదు. ప్రతిరోజూ రాత్రి నాకోసం ఏదైనా అద్భుతం చేయమని బాబా ముందు ఏడ్చేదాన్ని. సంవత్సరం తరువాత, నా మేనేజర్ మరొక ఉద్యోగం చూసుకోమని నాకు నోటీసు ఇచ్చాడు. ఈ హఠాత్ పరిణామానికి నేను కొంచెం కలత చెందినప్పటికీ ఆరోజు గురువారం, బాబా రోజు కావడంతో చాలా త్వరగా కోలుకోగలిగాను. నాకు సహాయం చేయమని బాబాను ప్రార్థించడం ప్రారంభించాను.
అదృష్టవశాత్తూ, అదే సమయంలో ఇక్కడి ప్రభుత్వ రంగంలో 3 నెలలు ఐటి ఇంటర్న్‌షిప్ ఉందని నా స్నేహితుని ద్వారా తెలిసింది. అతను ప్రతి దశలో నాకు సహాయకారిగా ఉన్నాడు. నేను అతన్ని దేవుడే పంపాడని భావిస్తాను. హైరింగ్ మేనేజర్ అతని స్నేహితుడు. నాకు ఇంటర్వ్యూ కోసం కంపెనీ నుండి కాల్ వచ్చింది. ఇంటర్వ్యూ బాగా జరిగి నాకు ఆ ఇంటర్న్‌షిప్ వచ్చింది. అయితే అది బాబా నాకిస్తున్న అవకాశమని తెలియక నేను దానిని స్వీకరించడానికి ఇష్టపడలేదు. కానీ నా మేనేజర్ నాకు నోటీసు వ్యవధి ఇచ్చి ఉన్నందున నాకు వేరే దారి కూడా లేక వచ్చిన ఆ అవకాశాన్ని స్వీకరించాల్సి వచ్చింది.
ఆ ఇంటర్న్‌షిప్ 3 నెలలు మాత్రమే అయినందున మూడునెలల తరువాత మరో ఉద్యోగం చూసుకోవాలని నేను ఆందోళనచెందాను. ఇంటర్న్‌షిప్ ముగిసేలోపు నేను కొన్నినెలలు పొడిగించమని అడిగాను. బాబా ఆశీర్వదించారు. నేను ఊహించని విధంగా వాళ్ళు మంచి వేతనంతో 6 నెలలు పొడిగించారు. ఆరోజు నేను పట్టలేని ఆనందాన్ని అనుభవించాను. నాకిది నిజంగా అద్భుతమే! ఎందుకంటే, కాంట్రాక్టు పీరియడ్ పొడిగించకుండా కంపెనీకి నిబంధనలున్నప్పటికీ నాకు అవకాశం ఇచ్చారు. అదేరోజు నా సోదరుడికి కూడా మరో కాంట్రాక్టు ఉద్యోగం వచ్చింది. చాలాకాలం తరువాత నా తల్లిదండ్రులు కూడా ఆరోజు చాలా సంతోషాన్ని అనుభవించారు. "బాబా! చాలా చాలా ధన్యవాదాలు. ఇకపై నన్ను బాధపెట్టకండి, ఇంక నేను ఏవీ తట్టుకోలేను బాబా. దయచేసి మంచి వైవాహిక జీవితాన్ని అనుగ్రహించండి. ప్రతి ఒక్కరినీ ఆరోగ్యంగా, సంతోషంగా ఉండేలా ఆశీర్వదించండి. లవ్ యు బాబా! ఎల్లప్పుడూ నాతో ఉండండి. నేను తెలిసీ తెలియక ఏవైనా తప్పులు చేసి ఉంటే నన్ను క్షమించండి. ప్రపంచంలోని ప్రతి ఒక్కరినీ ఆశీర్వదించండి బాబా".
