గొలుసు ఉత్తరాల గోల!
మన పేరుతో పోస్టులో ఉత్తరం రాగానే ఆతృతగా “ఎక్కడనుంచబ్బా!” అనుకొంటూ అందుకొంటాము. ఇంతా చూస్తే అది ‘గొలుసు ఉత్తరం’! ఉఫ్.ఫ్.. నిత్యజీవితంలో ఎటూ వుండే సమస్యలకు తోడు ఈ గొలుసు ఉత్తరాల(లింక్ లెటర్స్)బెడద బెదిరింపు ఎక్కువౌతున్నదీ మధ్య. సాయిబాబా, వేంకటేశ్వరస్వామి, సంతోషిమాత తదితర దైవాల పేర్లు యే 11మందికో 21 మందికో తిరిగి ఉత్తరాలు వ్రాయమనీ, అలా వ్రాసిన ‘ఫలానా’ వారికి ఏవో సిరిసంపదలొచ్చాయనీ ఆశబెడుతూ, నిర్లక్ష్యంచేసి అలా వ్రాయని వారెందరో పెద్ద ఆపదలలో చిక్కుకొన్నారని బెదరిస్తూ,.. సాగే సంతకం లేని (ఆకాశరామన్న) ఉత్తరాలే – ఈ ‘గొలుసు ఉత్తరాలు’. ఇటీవల కాలంలో ఈ గొలుసు ఉత్తరాల ‘పిచ్చి’ మరీ ముదిరినట్లు కనిపిస్తున్నది. ఇలాంటి ఉత్తరాలు వస్తే ఏమి చేయాలి అన్నదానికి సాయిపథం వివరణ!
డబ్బు వస్తుందని ఆశ చూపో, ఆపదలొస్తాయని భయపెట్టో తమ పేరు ఉత్తరాలద్వారా ప్రచారం చేసుకొనే దుర్గతి ఖర్మ శ్రీసాయిబాబా వంటి దైవస్వరూపులకు లేదు. శ్రీసాయిస్వరూపం – శ్రీఉపాసనీబాబా స్తుతించినట్లు – ‘అహంభావహీనం ప్రసన్నాత్మ భావం’. అందరినీ అనుగ్రహించడమే తమ అవతారకార్యమని (“My mission is to give blessings!”) శ్రీసాయియే చెప్పారు కూడా! అంతేకాదు. తమకెప్పటికీ ఎవరి మీదా కోపం రాదని గూడా బాబా చెప్పారు. బాబా అనుగ్రహం ఎప్పుడూ అందరిమీదా కుండబోతగా వర్షిస్తూనే ఉన్నది. మన అజ్ఞానమనే గొడుగు ఆ అమృతధారలు మనమీద పడకుండా అడ్డుకొంటున్నది. అనన్యప్రేమతో శ్రీసాయిని శరణు పొందితే ఆ ‘అడ్డు’ తొలగిపోతుంది. అంతేకానీ, భయంచేత ఆశచేత కార్డు ముక్కల్లో బాబా పేరు వ్రాసి పదిమందికి పంపడం వల్ల శ్రీసాయికృపను పొందుదామని అనుకోవడం కేవలం భ్రమ. అలా తమ పేర్లు ప్రచారం చెయ్యకపోతే, – క్షుద్ర పిశాచగణాల్లా – ఆగ్రహించి ఆపదలు కలిగిస్తారని భావించడం శ్రీసాయివంటి దైవస్వరూపులను అవమానించినట్లే! ఆధ్యాత్మికతత్త్వం సాధన మొదలయిన విషయాలలో ప్రాధమిక సూత్రాలపట్ల కూడా అవగాహన లేని మూర్ఖశిఖామణులే ఈ గొలుసు ఉత్తరాల వంటి అవివేకపు చర్యలను ప్రోత్సహిస్తుంటారు. “వారు వ్రాయమన్నదీ మనం వ్రాసేదీ కూడా శ్రీసాయినామమే కదా? వ్రాసి పంపితే మనకు పోయేదేమున్నది?” అని ఎవరైనా భావిస్తే, అది పైన చెప్పిన కారణంగా కేవలం ఆత్మవంచనే అవుతుంది. అంతే కాదు! వివేకాన్ని ఆత్మగౌరవాన్ని పోగొట్టుకొని, సంతకం కూడా పెట్టలేని భీరువుల్లా ‘ఆకాశరామన్న’ ఉత్తరాలు వ్రాసే దుస్థితికి మనలను దిగజారుస్తున్న ఈ బాపతు మూర్ఖత్వాన్ని ఏ కారణంగా ప్రోత్సహించినా అది శ్రీసాయిభక్తి సంప్రదాయానికి ‘అపచారమే’ అవుతుంది. సరి! అయితే మరిలాంటి ఉత్తరాలు వచ్చినప్పుడు ఏమి చెయ్యాలి?౼ అని మమ్మల్ని అడిగిన వారికి మేము చెప్పే సమాధానం ఒక్కటే!... వెంటనే చింపి చెత్తబుట్టలో పారవేయండి!
Source: సాయిభక్తి సాధన రహస్యం, రచన: పూజ్యశ్రీ సాయినాథుని శరత్ బాబూజీ.
ఓం సాయిరాం
ReplyDeleteOm Sai
ReplyDeleteSri Sai
Jaya Jaya Sai
🙏🙏🙏
ఓం శ్రీ సాయినాథాయ నమః 🙏
ReplyDeleteఓం శ్రీ సాయి ఆరోగ్య క్షేమదాయ నమః🙏