సాయిభక్తుల అనుభవమాలిక 576వ భాగం.....

---

ఈ భాగంలో అనుభవాలు:

1. సదా తోడుగా ఉంటూ కాపాడుతున్న బాబా
2. బాబా దయవలన మా నాన్నగారికి కోవిడ్ పరీక్షలో నెగిటివ్

---

సదా తోడుగా ఉంటూ కాపాడుతున్న బాబా

సాయిభక్తురాలు శ్రీమతి తేజశ్రీ తనకు బాబా ప్రసాదించిన అనుభవాలను మనతో ఇలా పంచుకుంటున్నారు:

ఓంసాయి శ్రీసాయి జయజయ సాయి

ఈ సృష్టిని సృష్టించిన దైవస్వరూపం శ్రీసాయి భగవానుడు. సాయిని నమ్మినచో సర్వకష్టాలు దూరం. ఆరోగ్యప్రదాయిని మన సాయినాథుని నామం.

నా పేరు తేజ. మేము సౌత్ ఆఫ్రికాలో ఉంటున్నాము. సాయిబాబా లీలలను ఎలా వర్ణించాలో నాకు అర్థం కావట్లేదు. ఆపద సంభవించనున్న ప్రతి సందర్భంలోనూ బాబా నన్ను కంటికి రెప్పలా కాపాడుతున్నారు. నా జీవితంలో బాబా లీలలెన్నో జరిగాయి. వాటిలోనుండి మూడు అనుభవాలను ఇప్పుడు మీతో పంచుకుంటున్నాను. 

మొదటి అనుభవం: 

ఒకరోజు అర్థరాత్రి 12 గంటల నుండి 2 గంటల వరకు మావారు తీవ్రమైన ఛాతీనొప్పితో బాగా అల్లాడిపోయారు. ఛాతీనొప్పితో పాటుగా తనకు విరేచనాలు కూడా మొదలయ్యాయి. తన పరిస్థితి చూసి నేను చాలా భయపడ్డాను. ఎందుకంటే, నేనది హార్ట్ స్ట్రోక్ అనుకున్నాను. 2.30 గంటలకి ఛాతీనొప్పి ఇంకా ఎక్కువైంది. తను కూర్చోలేకపోతున్నారు, నిల్చోలేకపోతున్నారు. బాబాను ప్రార్థించి వెంటనే తనను హాస్పిటల్లో చేర్పించాము. నేను బాబాకు నమస్కరించుకుని, “బాబా! రిపోర్టులలో హార్ట్ స్ట్రోక్ అని రాకూడదు, అది కేవలం గ్యాస్ట్రిక్ ప్రాబ్లమ్ అని రావాలి” అని మ్రొక్కుకున్నాను. 2.30 గంటలకు మావారిని హాస్పిటల్లో జాయిన్ చేశాము, 4.30 గంటలకు ‘గ్యాస్ట్రిక్ ప్రాబ్లమ్’ అని రిపోర్టు వచ్చింది. చాలా సంతోషంగా అనిపించింది. బాబాకు మనసారా కృతజ్ఞతలు తెలుపుకున్నాను. బాబా కృపతో అలాంటి అనుభవాలు నా జీవితంలో చాలా ఉన్నాయి.

రెండవ అనుభవం: 

ఒకటిన్నర సంవత్సరాల వయసున్న మా బాబు ఒకరోజు కడుపునొప్పితో బాధపడుతూ బాగా ఏడుస్తున్నాడు. నేను, “బాబా! 5 నిమిషాల్లో బాబు ఏడవకుండా హాయిగా పడుకోవాలి” అని బాబాను వేడుకున్నాను. అలా బాబాను వేడుకున్న 2 నిమిషాలలో బాబు ఏడుపు ఆపి హాయిగా నిద్రపోయాడు. అలా బాబా ఎల్లప్పుడూ నా వెంటనే ఉండి నన్ను రక్షిస్తూ ఉన్నారు.

మూడవ అనుభవం: 

ఒకరోజు మా బాబుకి ఆవిరిపడుతుంటే అనుకోకుండా వేడినీళ్ళు మావారి కాలిమీద పడి తన కాలు బాగా కాలిపోయింది. కాలిన గాయం దానంతటదే తగ్గిపోతుందని అలాగే నొప్పిని భరిస్తూ రెండు రోజులు వేచి చూశారు. గాయం తగ్గలేదు. తరువాతిరోజు ఆసుపత్రికి వెళ్తే డాక్టర్ మావారిని పరీక్షించి, “కాలు బాగా కాలింది, చికిత్స చేయాలి” అని చెప్పి కాలిన దగ్గర కాలిపైన చర్మం మొత్తం తీసేసి, “5 రోజుల్లో తగ్గిపోతుంద”ని చెప్పారు. 5 రోజులైనా గాయం తగ్గలేదు. తీవ్రమైన నొప్పితో మావారు రాత్రిపూట నిద్రపోయేవారు కూడా కాదు. ఒక గురువారంనాడు నేను బాబాకు నమస్కరించి, “బాబా! వచ్చే గురువారానికల్లా కాలిన గాయమంతా తగ్గిపోయేలా అనుగ్రహించండి” అని మ్రొక్కుకున్నాను. బాబా అనుగ్రహంతో 2 రోజుల్లో నొప్పి తగ్గిపోయింది. మరుసటి గురువారానికల్లా గాయం కూడా మానిపోయి పైన క్రొత్త చర్మం కూడా వచ్చింది. అలా ఎల్లప్పుడూ నా వెంటనే ఉంటున్న బాబాకు నా సాష్టాంగనమస్కారాలు. “బాబా! నన్ను ఎల్లప్పుడూ మీ పాదాలు విడువకుండా చూడు సాయీ!” బాబానే నా సర్వస్వం. నా గురువు. బాబాకన్నా ఎక్కువ నాకు ఎవరూ లేరు. బాబా లేనిదే నేను లేను. 

అంతా సాయిమయం

అంతా శిరిడిమయం

అంతా నీ సృష్టియేనయా

అంతా నీ నామమే

అంతా నీ ధ్యానమే

అంతా నీ రూపమేనయా

సాయిరాం సాయిరాం శిరిడీ సాయిరాం

ఓం శ్రీ సచ్చిదానంద సద్గురు సాయినాథ్ మహరాజ్ కీ జై!

---

బాబా దయవలన మా నాన్నగారికి కోవిడ్ పరీక్షలో నెగిటివ్

పేరు వెల్లడించని ఒక సాయిభక్తురాలు  తన అనుభవాన్ని మనతో ఇలా పంచుకుంటున్నారు:

ముందుగా ఈ బ్లాగ్ నిర్వహిస్తున్నవారికి నా హృదయపూర్వక నమస్కారాలు. సాయిబంధువులందరికీ నా నమస్కారాలు. ప్రతిరోజూ ఈ బ్లాగులో ప్రచురించే బాబా లీలలను చదువుతుంటే బాబా పట్ల నమ్మకం, జీవితం పట్ల ధైర్యం కలుగుతున్నాయి.

ఇక నా అనుభవానికి వస్తే.. ఇటీవల మా నాన్నగారికి తరచూ జ్వరం వస్తోంది. హాస్పిటల్కి వెళ్లి డాక్టరును సంప్రదించి మందులు వాడినా జ్వరం తగ్గలేదు. అందరూ కోవిడ్ టెస్ట్ చేయించుకోమన్నారు. నాకు చాలా భయమేసింది. ఎందుకంటే, మా ఇంట్లో 9 నెలల గర్భవతియైన మా సిస్టర్ ఉంది. పైగా మా అమ్మగారికి ఆరోగ్యం కూడా బాగుండటం లేదు. నేను వెంటనే బాబాకు నమస్కరించి, "బాబా! కోవిడ్ పరీక్షలో నాన్నకి నెగిటివ్ వస్తే నా అనుభవాన్ని బ్లాగులో పంచుకుంటాను. మీకు కిచిడీని నైవేద్యంగా సమర్పిస్తాను బాబా" అని చెప్పుకున్నాను. బాబా దయవలన మా నాన్నగారికి కోవిడ్ పరీక్షలో నెగిటివ్ వచ్చింది. అందరం చాలా సంతోషించాము, మనసారా బాబాకు కృతజ్ఞతలు తెలుపుకున్నాము.

నాకున్న ఒక సమస్యకు బాబా నుండి సమాధానం కోసం ఎదురుచూస్తున్నాను. బాబా ఇచ్చే సమాధానంతో మరలా మీ ముందుకు రావాలని కోరుకుంటున్నాను. "బాబా! ఎల్లప్పుడూ మీ దయ నా మీద, నా కుటుంబం మీద ఉండాలని మనస్ఫూర్తిగా కోరుకుంటున్నాను".

సమర్థ సద్గురు సాయినాథ్ మహరాజ్ కీ జై!

---