సాయిభక్తుల అనుభవమాలిక 562వ భాగం.....

---

ఈ భాగంలో అనుభవాలు:

1. నమ్మినవారికి బాబానే తోడూ నీడ
2. 'సాయీ! నువ్వు ఉన్నావయ్యా... నీ భక్తులను కాపాడుకోవడానికి!'

---

నమ్మినవారికి బాబానే తోడూ నీడ

'అభయప్రదాత సాయి - మా తండ్రి ఐశ్వర్యదాత సాయి

ఆరోగ్యదాత సాయి - మా తండ్రి ఆనందదాత సాయి'

అందరికీ నమస్కారం! నా పేరు లక్ష్మి. నేను హైదరాబాద్ నివాసిని. ప్రతిరోజూ ఈ బ్లాగులో ప్రచురితమయ్యే భక్తుల అనుభవాలను నేను చదువుతూ ఉంటాను. అవి చదువుతుంటే బాబాపై నమ్మకం, విశ్వాసం రెట్టింపు అవుతున్నాయి. ఇక నా అనుభవానికి వస్తే..

2020, ఆగస్టు 19, బుధవారంనాడు రోజులానే పూజ, పనులు చేసుకొని భోజనం చేయడానికి కూర్చునేసరికి ఆలస్యమైంది. భోజనం చేస్తుంటే విపరితమైన నీరసంగా, గుండెదడగా అనిపించి చాలా భయం వేసింది. తిన్నాక కూడా పరిస్థితి అలానే ఉంది. కొంతసేపు నిద్రపోదామన్నా నిద్రపట్టలేదు. స్థిమితంగా ఉండలేక ఇబ్బందిపడ్డాను. సాయంత్రమైనా అలాగే ఉంది. డాక్టరు దగ్గరకు వెళ్లి చెకప్ చేయించుకుందామంటే కరోనా కారణంగా చిన్న చిన్న క్లినిక్‌లు తెరవడంలేదు. అందువల్ల మన సాయినాథుని తలుచుకొని, "స్వామీ! ఎలాగైనా నా ఆరోగ్యం కుదుటపడేలా చేయండి" అని ప్రార్థించి, భారం ఆయన మీదే వేశాను. తరువాత కొంచెం బాబా ఊదీని నీళ్ళలో వేసుకొని, దాన్నే పరమౌషధంగా భావించి త్రాగాను. మరుసటిరోజు ఉదయానికి అంతా నార్మల్‌గా ఉంది. తరువాత బి.పి చెక్ చేయించుకుంటే సాయి దయవల్ల నార్మల్‌గా ఉంది. ఎంతో ఆనందంగా బాబాకు ధన్యవాదాలు తెలుపుకున్నాను. నమ్మినవారికి బాబానే తోడూ నీడ.

---

'సాయీ! నువ్వు ఉన్నావయ్యా... నీ భక్తులను కాపాడుకోవడానికి!'

సాయిబాబా భక్తులకు నా నమస్కారాలు. నా పేరు కమల. 2020లో మన చుట్టూ ఉన్న భయానక పరిస్థితి అందరికీ తెలిసిందే. ఏ నోట విన్న కరోనా! ఆ మాట వింటేనే భయంతో వణుకుపుడుతుండేది. అటువంటి సమయంలో ఒకరోజు మా తమ్ముడు ఫోన్ చేసి, "అక్కా! మా అత్తగారి కుటుంబంలో అందరికీ కరోనా పరీక్షలు జరిగాయి. అందరికీ పాజిటివ్ వచ్చింది" అని చెప్పాడు. ఒక్కసారిగా చాలా భయంగానూ,  బాధగానూ అనిపించింది. ప్రతిరోజూ మా అమ్మకి, డాడీకి ఫోన్ చేసి, "వాళ్ళకి ఎలా ఉంది?" అని అడిగేదాన్ని. కానీ మా మరదలితో మాట్లాడటానికి బాధగా ఉండేది. మాటిమాటికీ అడిగి బాధపెట్టినదాన్ని అవుతానేమోననిపించి అమ్మావాళ్ళతోనే మాట్లాడుతుండేదాన్ని. 'పర్వాలేద'ని 'జ్వరం తగ్గింద'ని, 'మళ్ళీ వచ్చింద'ని, 'జలుబు ఉంద'ని ఇలా పరిపరివిధాల వాళ్ళు తెలుసుకున్నది వాళ్ళు చెప్పేవారు. ఇదిలా ఉండగా ఒకరోజు ఈ బ్లాగులోని కొందరి భక్తుల అనుభవాలు చదువుతున్నపుడు, "బాబా! వాళ్ళ కుటుంబమంతా ఈ కరోనా బారినుండి ఆరోగ్యవంతులుగా బయటపడాలి. ఒక్క వారంలో అందరి ఆరోగ్యం బాగుందన్న శుభవార్త వినేలా చేయండి సాయి" అని అనుకున్నాను. బాబా అనుగ్రహించారు. వాళ్ల కుటుంబమంతా కరోనాను జయించి ఆరోగ్యవంతులయ్యారు. ఆ మాట విన్నాక నాకు చాలా ఆనందంగా అనిపించింది. "సాయి! నువ్వు ఉన్నావయ్యా... నీ భక్తులని కాపాడుకోవడానికి" అని అనుకుంటూ ఇదిగో.. మీ అందరిముందు ఈ అనుభవాన్ని పంచుకున్నాను.

---