సాయిభక్తుల అనుభవమాలిక 575వ భాగం.....

---

ఈ భాగంలో అనుభవాలు:

1. ఆరోగ్యప్రదాయి సాయి
2. స్వప్న దర్శనమిచ్చి నాతో ఉన్నానని తెలియజేసిన బాబా

---

ఆరోగ్యప్రదాయి సాయి

సాయిబంధువులందరికీ నా నమస్కారాలు. ఈ బ్లాగ్ నిర్వాహకులకు నా హృదయపూర్వక నమస్కారాలు. నేను ఇంతకుముందు రెండుసార్లు ఈ బ్లాగ్ ద్వారా నా అనుభవాలను మీతో పంచుకున్నాను. సాయి అనుగ్రహంతో మరలా మీ ముందుకి వచ్చి నా అనుభవాలను పంచుకుంటున్నాను.

మా బావగారు ఒక ప్రైవేట్ కంపెనీలో ఉద్యోగం చేస్తుంటారు. 2020, జులై నెలలో వాళ్ళ కంపెనీలో ఒక చిన్న ఫంక్షన్ జరిగింది. ఆ ఫంక్షన్లో మా బావగారు ఒక వ్యక్తితో సన్నిహితంగా ఉన్నారు. 3 రోజుల తర్వాత అతనికి జ్వరం వచ్చింది. పరీక్షలు చేయిస్తే తనకు కరోనా పాజిటివ్ అని తేలింది. మా బావగారికి కూడా కొంచెం ఛాతీలో నొప్పి వచ్చింది. గ్యాస్ట్రిక్ సమస్య వల్ల నొప్పి వచ్చిందేమోనని గ్యాస్ట్రిక్ సమస్యకు మందులు వాడారు. అయినా ఛాతీనొప్పి తగ్గలేదు. ఇంట్లో అందరం తనకు కరోనా సోకిందేమోనని భయపడ్డాము. మా బావగారు హైదరాబాద్ వెళ్ళి పరీక్షలు చేయించుకున్నారు. ఆ సమయంలో నేను, “బాబా! మా బావగారికి కరోనా లేదని రిపోర్టు రావాలి. అంతా నీ దయ. మేము చాలా ఆందోళనగా ఉన్నాము. మా బావగారికి కరోనా నెగిటివ్ అని రిపోర్టు వస్తే సాయి మహరాజ్ సన్నిధి బ్లాగులో నా అనుభవాన్ని పంచుకుంటాను” అని బాబాను ప్రార్థించాను. బాబా దయవల్ల మా బావగారికి కరోనా నెగిటివ్ అని రిపోర్టు వచ్చింది. ఆ తరువాత, “అంతా నార్మల్ గానే ఉంది, కాకపోతే కొంచెం హార్ట్ ప్రాబ్లం ఉంది” అని అసలు విషయం చెప్పారు డాక్టర్. బాబా దయవలన కేవలం మందులతోనే ఆ సమస్య పరిష్కారమవుతుందని చెప్పారు. “సాయీ! మీకు శతకోటి ధన్యవాదాలు”.

మరొక అనుభవం: 

ఆగస్టు 15వ తారీఖున మావారికి షుగర్ రీడింగ్ 360 యూనిట్లు ఉంది. అంతకుముందు తనకు షుగర్ నార్మల్ గానే ఉండేది. “ఏమిటి బాబా, షుగర్ ఇంత ఎక్కువగా ఉంది?” అని మేము చాలా ఆందోళనపడ్డాము. ఆరోజు బాగా వర్షం. డాక్టరును సంప్రదించడానికి తెల్లవారుఝామున బస్సుకి ఖమ్మం వెళదామని అనుకున్నాము. కానీ, కరోనా వల్ల బస్సులో ప్రయాణించాలంటే భయమేసింది. “ఇప్పుడు ఏం చేయాలి బాబా? మీరే దారి చూపించండి” అని బాబాను వేడుకున్నాను. అప్పుడు ఉన్నట్టుండి మాకు తెలిసినవాళ్ళకి కారు ఉందని గుర్తొచ్చింది. అయితే వాళ్ళని కారు ఇమ్మని అడగటానికి మేము మొహమాటపడ్డాము. చివరికి మొహమాటంగానే వాళ్ళను కారు అడిగితే వాళ్ళు కారు ఇవ్వటానికి ఒప్పుకున్నారు. వేరే అబ్బాయిని డ్రైవరుగా తీసుకొని ఖమ్మం వెళ్ళి మావారికి షుగర్ టెస్ట్ చేయించాము. “షుగర్ కొంచెం ఎక్కువగా ఉంది, మందులు వేసుకోండి” అని డాక్టర్ మందులు ఇచ్చారు. తరువాత అన్ని పరీక్షలు చేసి, “మరే సమస్యా లేదు” అని చెప్పారు. బాబా దయవల్ల మేమిప్పుడు ఏ ఆందోళనా లేకుండా ఆనందంగా ఉన్నాము.

సాయి రక్షకుడుగా వారి దయ నాపై ఎల్లప్పుడూ చూపుతున్నారు.

ఓం సాయిరామ్!

అఖిలాండకోటి బ్రహ్మాడనాయక రాజాధిరాజ యోగిరాజ శ్రీ సద్గురు సాయినాథ్ మహరాజ్ కీ జై!

---

స్వప్న దర్శనమిచ్చి నాతో ఉన్నానని తెలియజేసిన బాబా

సాయిభక్తురాలు ప్రసన్న తనకు బాబా ప్రసాదించిన స్వప్నానుభవాన్ని మనతో పంచుకుంటున్నారు.

ఓం సాయినాథాయ నమః. సాయిబంధువులందరికీ నా నమస్కారాలు. సాయి మహరాజ్ సన్నిధి బ్లాగ్ నిర్వహించే సాయికి నా నమస్కారం. “సాయీ! మీకు నా కృతజ్ఞతలు. వెంకటదత్తసాయి ప్రేమను పంచుకునే అవకాశాన్ని ఈ బ్లాగ్ ద్వారా మాకు కల్పించినందుకు మిమ్మల్ని, మీ కుటుంబాన్ని ఆ వెంకటదత్తసాయి సదా రక్షిస్తూ, ఆశీర్వదిస్తూ ఉండాలని కోరుకుంటున్నాను”. 

కొన్ని రోజుల క్రితం ఈ బ్లాగులో ఒక సాయిభక్తురాలు తనకు కలిగిన అనుభవాన్ని పంచుకున్నారు. తాను బాబా చరిత్ర పారాయణ చేస్తున్న సమయంలో బాబా తనకు స్వప్నదర్శనం ఇచ్చారని ఆమె ఆ అనుభవంలో తెలియజేశారు. అది చదివిన నేను, “నా వెంకటదత్తసాయి నాకు స్వప్నంలో దర్శనమిచ్చి చాలారోజులు అయింద”ని అనుకున్నాను. ఆ తరువాతిరోజు రాత్రి 2 గంటల సమయంలో నా వెంకటదత్తసాయి నాకు స్వప్నంలో దర్శనమిచ్చారు. నేను తరచూ దర్శించుకునే సాయిమందిరంలోని పల్లకీలో ఉండే బాబా ఫోటో ఆ కలలో నాకు చాలాసేపు కనిపించింది. అంతేకాకుండా, ఆ బాబా ఫోటో క్రింద మరో ముగ్గురు వ్యక్తుల ఫోటోలు కూడా కనిపించాయి. అలాగే మరోప్రక్కగా ఒక కాలువ, ఆ కాలువగట్టు మీద ఉన్న కుర్చీలో బాబా ఫోటో, క్రింద భరధ్వాజ మాస్టర్ ఫోటో, ప్రక్కన బాబా చరిత్ర పుస్తకం కనిపించాయి. అక్కడ బాబాకు పూజ చేసినట్టుగా కనిపించింది. భరద్వాజ మాస్టర్ కూడా చాలారోజుల తరువాత నాకు స్వప్నంలో దర్శనమిచ్చారు. ఇంతలో బాబా పల్లకీ ఊరేగింపు మొదలైంది. పల్లకీ మా ఇంటి ముందు నుంచి వెళుతోంది. పల్లకీ వెంట ఉన్నవారిలో ఒకరు, “11 రూపాయలు దక్షిణ ఇవ్వండి” అని నన్ను, మా అక్కను అడిగారు. పల్లకీ మా ఇల్లు దాటి ముందుకు వెళ్లిపోతోంది. దాంతో నేను బాబాకు దక్షిణ ఇవ్వలేనేమో అని బాధ కలిగింది. రెండు ఇళ్ళు దాటినప్పటికీ బాబా మా దక్షిణ స్వీకరించారు. నాకు ఎంతో సంతోషం కలిగింది. అప్పుడే పల్లకీ ప్రక్కనున్న ఒకావిడ నాతో, "బ్యాంకులో ఉన్న మా డబ్బులు పోయాయి” అని అన్నది. మళ్ళీ వెంటనే, “బాబా దయతో డబ్బులు దొరికాయి” అని అన్నది. ఆవిడ ఎందుకలా అన్నదో నాకు అర్థం కాలేదు. ‘వెంకటదత్తసాయిని కలలో చూసి చాలా రోజులైంది’ అని బాధపడినందుకు నాకు వెంటనే స్వప్నంలో దర్శనమిచ్చి తాము నాతో ఉన్నారని తెలియజేశారు బాబా. “మీకు చాలా చాలా ధన్యవాదాలు సాయిభగవాన్”. నాకు బాబా ప్రసాదించిన ప్రేమను మీ అందరితో పంచుకునే అవకాశం ఇచ్చిన సాయి మహరాజ్ సన్నిధి బ్లాగ్ వారికి మరోసారి నా ధన్యవాదాలు. బాబా నాకు పంచిన ఆశీస్సులను ఇలాగే ఇంకా మీతో పంచుకుంటాను. వెంకటదత్తసాయికీ జై! సాయినాథ్ మహరాజ్ కీ జై! “ఐ ఆల్వేస్ లవ్ యూ సాయిరాం!”

నాకు కలలో కనిపించిన బాబా ఫోటోను, భరద్వాజ మాస్టర్ ఫోటోను మీరూ చూస్తారని ఈ క్రింద జతపరుస్తున్నాను.

                 

---