- బాబా దయ
- బాబా దయవలన అమ్మకు చేకూరిన ఆరోగ్యం
- బాబాని తలచుకొని అడగగానే చేతికందిన డబ్బు
బాబా దయ
సాయిభక్తులందరికీ నమస్కారం. నా పేరు ఇందిర. మా నాన్నకి మేమిద్దరం ఆడపిల్లలమే, మగపిల్లలు లేరు. 2020లో గుండె సమస్యకు కొంతకాలంగా ట్రీట్మెంట్ తీసుకుంటున్న నాన్న పరిస్థితి నిలకడగా ఉందని మేమంతా సంతోషించే సమయంలో హఠాత్తుగా(అక్టోబర్ నెల మొదటి వారాంతంలో) ఆయనకి మైల్డ్ స్ట్రోక్ వచ్చింది. దాంతో ఆయనని విజయవాడలోని ఆయుష్ ఆసుపత్రిలో చేర్పించారని మా చెల్లెలు ఫోన్ చేసి నాకు చెప్పింది. అసలే కరోనా కారణంగా అందరినీ ఆసుపత్రి లోపలికి అనుమతించని పరిస్థితి. అందువలన కాస్త ఆందోళనగా అనిపించింది. వెంటనే నేను వెళ్లలేక, ఆయనకి ఎలా ఉందో తెలియక చాలా బాధపడ్డాను. దిక్కుతోచని స్థితిలో మనస్పూర్తిగా ఆ సాయినాథునితో నేను ఇలా చెప్పుకున్నాను: "బాబా! నాన్న గుండె నీ చేతులలో ఉంది. దానిని కాపాడు తండ్రీ" అని. నాన్నకి ఎప్పుడు ఆపద వచ్చినా నేను బాబానే నమ్ముకుంటాను. ఆ రాత్రంతా నేను బాబాని స్మరిస్తూ, "నాన్న పరిస్థితి నిలకడగా ఉండేలా అనుగ్రహించు బాబా!" అని బాబాని వేడుకున్నాను. తరువాత రాత్రి పదిగంటలకి మా అమ్మ ఫోన్ చేసి నాన్నతో మాట్లాడించింది. ఆయన మాట విన్నాక నాకు సంతోషంగా అనిపించినా, దుఃఖం కూడా ఆగలేదు. ఎందుకంటే, "నాన్న హార్ట్ ప్రాబ్లెమ్కి చికిత్స లేదు. ఆయన గుండె ఎప్పుడు ఆగిపోతుందో చెప్పలేమ"ని డాక్టర్స్ తేల్చి చెప్పేశారు. దాంతో మేము ఎంతగానో ఆందోళనచెందినప్పటికీ ఆ సాయినాథునిపై భారం వేసి రోజులు గడుపుతున్నాం. నాకు నమ్మకం ఉంది, 'మా నాన్నని బాబా మాకు దూరం చెయ్యర'ని. నా అనుభవాన్ని మీ అందరితో పంచుకొనే అవకాశం ఇవ్వడమే కాక, మీ అందరి అనుభవాల ద్వారా నాలో ధైర్యాన్ని నింపుతున్న ఈ బ్లాగ్ నిర్వాహకులకు నా ప్రత్యేక ధన్యవాదములు.
శ్రీ సాయినాథ్ మహారాజ్ కీ జై!
బాబా దయవలన అమ్మకు చేకూరిన ఆరోగ్యం
నా పేరు పద్మజ. మా అమ్మ వయస్సు 80 సంవత్సరాలప్పుడు 2020, ఆగస్టు నెల చివరివారంలో 99.5 డిగ్రీల జ్వరంతో, విరోచనాలతో బాధపడ్డారు. రెండు రోజులపాటు తన పరిస్థితి అలానే ఉంది. అసలే కరోనా సమయం. పైగా మా ప్రాంతంలో కరోనా వైరస్ ప్రభావం ఎక్కువగా ఉన్నందున మేమంతా చాలా భయపడ్డాము. తనకు ఆరోగ్యం బాగాలేనప్పటినుండి అమ్మ సాయిబాబా నామస్మరణ చేస్తూ, బాబా ఊదీ పెట్టుకుంటుండేది. కానీ తన ఆరోగ్యం మెరుగుపడలేదు. చివరికి కరోనా రాపిడ్ టెస్ట్, ఫుల్ టెస్ట్ చేయించాము. బాబా దయవల్ల రిపోర్టులు నెగటివ్ వచ్చాయి. అప్పుడే అమ్మ అనారోగ్యానికి కారణం 'అజీర్తి' అని తెలిసింది. తరువాత బాబా దయవల్ల తన ఆరోగ్యం కుదుటపడింది, జ్వరం పూర్తిగా తగ్గిపోయింది, మళ్ళీ రాలేదు. ఇదంతా బాబా దయవల్లే. మనము బాబాను పూర్తిగా నమ్మి సర్వస్యశరణగతి చేస్తే ఆయన మనల్ని తప్పక కాపాడుతారు.
బాబాని తలచుకొని అడగగానే చేతికందిన డబ్బు
సాయిభక్తులందరికీ నమస్కారం. నేను ఒక సాయి భక్తురాలిని. 2020, సెప్టెంబరు 11న బాబా నాకు చేసిన చిన్న సహాయం గురించి నేనిప్పుడు మీతో పంచుకుంటాను. నాకున్న ఒక బిజినెస్కి సంబంధించి కొంత అమౌంట్ వేరే వాళ్ల దగ్గర ఆగిపోయింది. డబ్బు ఇవ్వమని ఎప్పుడు అడిగినా, వాళ్ళు 'ఇస్తాము, ఇస్తాము' అని రోజులు గడిపేస్తున్న స్థితిలో నేను, "బాబా! నాకు ఆ అమౌంట్ ఇప్పించండి" అని బాధతో బాబాకి మొరపెట్టుకున్నాను. తరువాత ఒక గురువారంనాడు వాళ్లని అమౌంట్ అడిగితే, ఎప్పటిలాగే 'ఇస్తామ'ని చెప్పారు. అప్పుడు నేను బాబాను తలచుకొని వాళ్లతో, "నా డబ్బు నాకిప్పుడు ఇవ్వకపోతే పైఅధికారులకు ఫిర్యాదు చేయాల్సి వస్తుంద"ని చెప్పాను. 5 నిమిషాలలో వాళ్ళు నా అమౌంట్ నా అకౌంట్లో జమ చేశారు. అన్ని రోజుల నుంచి ఇవ్వనివాళ్ళు, బాబాను తలచుకొని అడగగానే ఇచ్చేశారు. అంతా బాబా దయ. "శతకోటి వందనాలు బాబా".
