సాయిభక్తుల అనుభవమాలిక 573వ భాగం.....

---

ఈ భాగంలో అనుభవం:

• బాబా ప్రసాదించిన కొన్ని మధురానుభవాలు

---

సాయిభక్తురాలు శ్రీమతి లలిత తనకు బాబా ప్రసాదించిన అనుభవాలను మనతో పంచుకుంటున్నారు.

శ్రీ సచ్చిదానంద సద్గురు సాయినాథ్ మహరాజ్ కీ జై!

నా మొదటి అనుభవం:

మా ఆఫీసులో ఒకరోజు గీత అనే సాయిభక్తురాలు శిరిడీ వెళ్ళి బాబాను దర్శించుకుని, తిరిగి వచ్చేటప్పుడు శిరిడీ నుండి ‘సాయిలీలామృతం’ పుస్తకం తీసుకొచ్చి నాకు ఇచ్చింది. అంతకుముందే నేను శ్రీగురుచరిత్ర పారాయణ చేశాను. సాయిలీలామృతం మొదటిసారి చదివినప్పుడు నేను పూర్తిగా గందరగోళంలో పడ్డాను. ఎందుకంటే, నేను ఆంజనేయస్వామి భక్తురాలిని. సాయిలీలామృతం చదివాక ‘నేను బాబాను పూజించాలా? లేక ఆంజనేయస్వామిని పూజించాలా?’ అనే సమస్యతో తికమకపడ్డాను. ఆ తరువాత ఒకరోజు నేను మా చెల్లెలింటికి వెళ్ళినప్పుడు రెండవసారి సాయిలీలామృతం పారాయణ చేశాను. పారాయణ చేస్తుండగా, “ఇంకా నన్ను నమ్మవా? నేను వేరు, ఆంజనేయస్వామి వేరు కాదు” అని ఆ పుస్తకంలో వ్రాతపూర్వకంగా ఉండటం కనిపించింది. ఆ తరువాత నేను మళ్ళీ సాయిలీలామృతం చదివాను. కానీ ఆ ఉదయం ఏ పేజీలోనైతే ఆ వాక్యాలు చదివానో ఆ వాక్యాలు ఈసారి చదువుతున్నప్పుడు అక్కడ కనిపించలేదు. నా కోసమే ఆరోజు ఉదయం బాబా ఆ వాక్యాలను నాకు కనిపించేలా చేశారని భావించాను. అప్పటినుండి నా జీవితం బాబాకు అంకితమైంది. నేను పూర్తిగా బాబా భక్తురాలినయ్యాను. ఇంకా బాబా నాకు ఎన్నోచాలా లీలలు చూపించారు.

రెండవ అనుభవం:

ఒకసారి నేను శ్రీసాయిసచ్చరిత్ర పారాయణ చేస్తున్నాను. ఆరోజు పారాయణ చివరిరోజు. ఆరోజు కలలో నేను చూసిన ప్రదేశం ఎక్కడో ఏమో తెలియదుగానీ నాకు మాత్రం అది నాకు బాగా తెలిసిన ప్రదేశమని అనిపించింది. ఆ ప్రదేశంలో బాబా గుడి ఉంది. ఆ గుడిలోని బాబా విగ్రహం అచ్చం శిరిడీ సమాధిమందిరంలోని బాబా విగ్రహంలానే ఉంది. ఆ గుడి ప్రక్కన నేను మట్టి త్రవ్వుతూ ఉన్నాను. మట్టి త్రవ్వుతూ ఉంటే బంగారునాణేలు వస్తూనే ఉన్నాయి. ‘ఆ బంగారునాణేలను ఎవరికివ్వాలా?’ అని ఆలోచించాను. ముందు మావారికి ఇవ్వాలనుకున్నాను. తరువాత మా అన్నయ్యకు ఇవ్వాలని అనుకున్నాను. చివరికి ‘ఎవరికీ ఇవ్వద్దు’ అనుకుని అన్ని బంగారునాణేలనూ తీసుకెళ్ళి బాబా గుడిలో ఉన్న హుండీలో వేశాను.

మూడవ అనుభవం:

బాబాతో నా అనుబంధాన్ని మొదట నేను గుర్తించలేదు. అయితే ఒకరోజు నన్ను పారాయణ చేయమని మా ప్రక్కింటి ఆంటీ శ్రీసాయిసచ్చరిత్ర పుస్తకం ఇచ్చింది. సరేనని సచ్చరిత్ర పారాయణ ప్రారంభించాను. మధ్యలో ఒకరోజు ఆంటీ నన్ను, ‘సచ్చరిత్ర చదువుతున్నావా?' అని అడిగింది. ‘చదువుతున్నాన’ని చెప్పాను. ఆవిడ, “రెండు రూపాయల దక్షిణ లీల చదివావా?” అని అడిగింది. చదివానని చెప్పాను. అప్పుడు ఆవిడ, “అది చదివినప్పుడు బాబా నాకు కలలో రెండు రూపాయలు ఇచ్చారు. అప్పటినుండి నేను రెండు రూపాయలు పూజలో పెట్టుకుని ప్రతిరోజూ పూజించుకుంటున్నాన”ని చెప్పింది. అదేరోజు నేను, మా చిన్నబ్బాయి హాస్పిటల్ కి వెళ్ళేటప్పుడు బాబా గుడికి వెళ్ళి బాబాకు నమస్కరించుకున్నాము. నేను బాబాను, “బాబా! మీరు నాకెందుకు రెండు రూపాయలు ఇవ్వలేదు? నేను సరిగా పారాయణ చేయట్లేదా?” అని ఆర్తిగా అడిగాను. మా అబ్బాయి దేవుడ్ని నమ్మడు. మేమిద్దరం బస్టాప్ కి వెళ్ళాము. అంతలో నా మనసు చెప్తోంది, ‘అక్కడ రెండు రూపాయలు ఉన్నాయ’ని. నేను మా బాబుతో, “అక్కడ మట్టి తీయి, రెండు రూపాయలు ఉంటాయ”ని చెప్పాను. మా బాబు అక్కడి మట్టిని తీశాడు. అక్కడ రెండు రూపాయల నాణెం ఉంది. ఆ నాణేన్ని తీసి నాకు ఇచ్చాడు. నేను ఆ నాణేన్ని జాగ్రత్తగా ఉంచమని మా అబ్బాయి జేబులో వేసి ఉంచాను. దానిని బాబా ప్రసాదంగా భావించి ఇంటికి వచ్చిన తర్వాత బాబా పూజలో పెట్టి రోజూ పూజ చేస్తున్నాను.

నాలుగవ అనుభవం:

నేను మా ఇంటి దగ్గరున్న బాబా గుడికి ప్రతిరోజూ వెళ్తుంటాను. బాబా నా చేత ప్రతిరోజూ సేవ చేయించుకుంటున్నారు. నాతో పాటు మరో ముగ్గురు కూడా బాబా సేవకు వచ్చేవాళ్ళు. ఒకరోజు వాళ్ళు నాతో, “బాబా మాకు తరచూ కలలో కనిపించి మాట్లాడుతుంటార”ని చెప్పారు. బాబా నాకు కూడా కలలో కనిపించినప్పటికీ, కూర్చుని నన్ను చూస్తారే తప్ప నాతో ఎన్నడూ కలలో మాట్లాడలేదు. దాంతో నాకు చాలా బాధగా అనిపించి బాబాను చూస్తూ, “బాబా! మీరు నాతో ఎందుకు మాట్లాడట్లేదు? నేనేం పాపం చేశాను?” అని అడుగుతూ గుడిలోనే ఏడ్చేశాను. అదేరోజు రాత్రి 3 గంటలకు మా చిన్నబాబుకి కలలో బాబా కనిపించి, “అభిలాష్! మీ మమ్మీకి నేను మాట్లాడానని నా మాటగా చెప్పు!” అని చెప్పారట. వాడు వెంటనే లేచి, “మమ్మీ, మమ్మీ, బాబా నాకు కలలో కనిపించారు. తాను మాట్లాడినట్లు నీతో చెప్పమన్నారు” అని నాతో చెప్పాడు. మా బాబు ఆ విషయం చెప్పగానే నేను వాడితో, “చూశావా? నేను ఈరోజు ప్రొద్దున గుడిలో బాబా నాతో మాట్లాడటం లేదని ఏడ్చాను. బాబా నీకు కనిపించి నీతో మాట్లాడారు” అన్నాను. ఆరోజు నుంచి మా బాబు బాబా భక్తుడయ్యాడు.

ఐదవ అనుభవం:

బాబా మమ్మల్ని ఇప్పటివరకు సర్వకాల సర్వావస్థలయందు కాపాడుకుంటూ వస్తున్నారు. 2020, ఆగస్టు నెలలో జరిగిన ఒక అనుభవాన్ని ఇప్పుడు మీతో పంచుకుంటాను. మా ఇంటి ప్రక్కన ఇద్దరు భార్యాభర్తలు ఉన్నారు. వాళ్ళు వయసులో పెద్దవాళ్ళు. వాళ్ళ టాయ్ లెట్, మా టాయ్ లెట్ ప్రక్కప్రక్కనే ఉంటాయి. మా టాయ్ లెట్ కి వెళ్ళటానికి మేము వాళ్ళ ఇంటిముందు నించే వెళ్ళాలి. ఇటీవల ఆయనకు కరోనా పాజిటివ్ వచ్చింది. ఆ విషయం వాళ్ళు మాకు చెప్పలేదు. కానీ తెలిసాక మాకు చాలా భయమేసింది. అయినప్పటికీ మాకు తోడుగా బాబా ఉన్నారనే ధైర్యంతో ఉన్నాము. బాబా మనల్ని ఎప్పుడూ కనిపెట్టుకొనే ఉంటారు. రానున్న కష్టాన్ని ముందుగానే పసిగట్టి తగు జాగ్రత్తలు తీసుకుంటారు. కరోనా పాజిటివ్ రావటానికి 15 రోజుల ముందు నుండి మా పక్కింటి వాళ్ళు ఎందుకోగాని మాతో మాట్లాడటం మానేశారు. ఒకవేళ వాళ్ళు మాతో మాట్లాడుతూ ఉండుంటే గనక ప్రతిరోజూ ఆయన ఫోన్ గురించి తెలుసుకోవడానికి మా అబ్బాయి దగ్గరకు వచ్చేవారు. అలా వచ్చినప్పుడు ఆయన మా అబ్బాయితో చాలా సన్నిహితంగా ఉండి ఫోన్ గురించి అన్నీ అడుగుతుండేవారు. అసలే కరోనా రోజులు. అయినప్పటికీ ఆయన ఎప్పుడూ మాస్క్ పెట్టుకోకుండానే మాట్లాడుతుండేవారు. ముందుజాగ్రత్తగా మాస్క్ పెట్టుకుని మాట్లాడమని ఎన్నోసార్లు ఆయనకు చెప్పాలనిపించేది కానీ, మొహమాటంతో చెప్పలేకపోయేదాన్ని. ఆయనకి కరోనా వచ్చే 15 రోజుల ముందు నుంచి మా దగ్గరకు రావడం మానేశారు. బాబా దయవల్ల మాకు చాలా మేలు జరిగింది. అందుకే మనం చేసే ప్రతి చర్యా బాబా ఆజ్ఞతోనే జరుగుతుందని మేము అనుకుంటాము. బాబా మాకు ఏది మంచో అదే చేస్తారు. అంటే, ఏ కారణం లేకుండా ఎదుటివాళ్ళు మాతో మాట్లాడకపోవటం వలన కూడా మాకు మంచే జరిగింది. మేమంతా బాబా మీదనే భారం వేశాము. మాకు తల్లి, తండ్రి, గురువు, దైవము, తోడు, నీడ, సర్వం సాయియే.

ఆరవ అనుభవం:

ఇది జరిగిన 5 రోజుల తరువాత మా ఊరిలో ఒక వారం రోజుల పాటు ప్రతిరోజూ వర్షం పడింది. ఆ వర్షానికి మా ఇంటి గోడలు మొత్తం తడిసిపోయి గోడలన్నీ తేమగా అయ్యాయి. మా ఇంట్లో మాత్రమే అలా జరిగిందేమో అనుకున్నాము. కానీ, మా పొరుగింటివాళ్ళు కూడా వాళ్ళింటి గోడలు కూడా వర్షాలకు తడిసి తేమగా అయ్యాయనీ, ఆ ప్రభావం వల్ల వాళ్ళింట్లో కరెంట్ ఫ్యూజు ఎగిరిపోయిందనీ, ఎన్నిసార్లు కరెంట్ ఫ్యూజ్ పెట్టినా ఉండట్లేదనీ, గోడలు ముట్టుకుంటే షాక్ కొడుతోందనీ చెప్పారు. నేను ప్రతిరోజూ బాబా నామం జపిస్తూనే ఉంటాను. బాబా మాకు ఏ సమస్యా రాకుండా కాపాడారు. ఎల్లప్పుడూ ఇలాగే మమ్మల్ని కాపాడుతూ ఉండాలని బాబాను మనసారా వేడుకుంటున్నాను. సాయిరాం, సాయిరాం, సాయిరాం. బాబా గురించి ఎంత చెప్పినా తనివితీరదు. ఆనందమే ఆనందం. నేను బాబా మార్గంలోకి వచ్చిన తర్వాత బాబా చెప్పిన పలుకులను మననం చేసుకుంటూ ఉండటం వలన నాకు కష్టాలు వచ్చినా నేను ఎప్పుడూ ఆనందంగానే ఉంటున్నాను. బాబా నాకు శక్తిని, మనశ్శాంతిని, ధైర్యాన్ని ఇచ్చారు.

---