సాయిభక్తుల అనుభవమాలిక 569వ భాగం.....

---

ఈ భాగంలో అనుభవాలు:

1. సకల వ్యాధులను నయం చేసే బాబా ఊదీ
2. బాబా నెరవేర్చిన కోరికలు

---

సకల వ్యాధులను నయం చేసే బాబా ఊదీ

సాయిభక్తులందరికీ నమస్కారం. ఈ బ్లాగుని నిర్వహిస్తున్న సాయి అన్నయ్యకు నా కృతజ్ఞతలు. బాబా మనందరికీ మాట ఇచ్చినట్టు, ఆయన ఊదీ సకల వ్యాధులను నయం చేస్తుంది. మనకు బాబాపై నమ్మకం ఉండాలి, అంతే. నేను ఎల్లప్పుడూ బాబా ఊదీని నాతో ఉంచుకుంటాను. నాకు ఏ కొంచెం బాధకలిగినా, ఏదైనా నొప్పి కలిగినా ఊదీని రాసుకుంటాను. ఈమధ్యకాలంలో ఊదీ మహిమతో నాకు కలిగిన అనుభవాలను ఇప్పుడు మీతో పంచుకోబోతున్నాను. 

నాకు ఈ నెలలో (సెప్టెంబరు) ఉన్నట్టుండి కీళ్ళనొప్పులు వచ్చాయి. రాత్రి సమయంలో ఆ నొప్పులు నన్ను చాలా ఇబ్బందిపెట్టాయి. కొన్ని కారణాల వల్ల నేను ఆసుపత్రికి వెళ్లలేకపోయాను. బాబాపై నమ్మకం ఉంచి, బాబాను ప్రార్థించి, నాకు నొప్పి ఉన్నచోట ఊదీ రాయటం మొదలుపెట్టాను. ప్రతిరోజూ అలా చేస్తూ వస్తుంటే ఊదీ మహిమతో మెల్లగా నా కీళ్ళనొప్పులు తగ్గుతూ వచ్చాయి. ఇప్పటికి 80 శాతం నొప్పులు తగ్గిపోయాయి. ఇంకా అప్పుడప్పుడు చాలా కొద్దిగా నొప్పులు వస్తున్నా అవి కూడా బాబా ఊదీ మహిమతో తగ్గిపోతాయి.

అలానే ఒకరోజు నాకు విపరీతమైన తలనొప్పి వచ్చింది. అది కూడా తలలో ఒకవైపు నొప్పి. ఆ నొప్పికి కడుపులో వికారంగా కూడా ఉంది. నాకు ఏం చేయాలో తెలియలేదు. వెంటనే బాబా ఊదీని నొప్పి ఉన్నచోట రాసుకుని, “బాబా! త్వరగా ఈ తలనొప్పి తగ్గితే బ్లాగులో నా అనుభవాన్ని పంచుకుంటాను” అని బాబాకు మ్రొక్కుకున్నాను. ఆశ్చర్యంగా పదినిమిషాల్లో నా తలనొప్పి తగ్గిపోయింది. సాధారణంగా అలాంటి తలనొప్పి వస్తే కనీసం గంటసేపు ఉండేది, కానీ బాబా ఊదీ మహిమతో కేవలం పదినిమిషాల్లోనే తగ్గిపోయింది. “థాంక్యూ సో మచ్ బాబా! నాకు మానసికమైన బలాన్ని ఇవ్వు బాబా. సదా నీ బిడ్డలందరికీ తోడుగా ఉండు. మేము చేసిన తప్పులన్నీ తల్లిలా కాచి మమ్మల్ని కాపాడు బాబా!”

---

బాబా నెరవేర్చిన కోరికలు

విజయవాడ నుండి సాయిభక్తురాలు శ్రీమతి నర్మద తనకు బాబా ప్రసాదించిన అనుభవాలను మనతో పంచుకుంటున్నారు.

సద్గురు సాయినాథుని దివ్య చరణకమలాలకు నా నమస్కారాలు. బ్లాగులోని సాయిబంధువులందరికీ నా నమస్కారాలు. ఈ బ్లాగులో సాటి సాయిభక్తుల అనుభవాలు చదివాక, “బాబా! నా కోరిక తీరితే నేను కూడా ఈ బ్లాగులో నా అనుభవాన్ని పంచుకుంటాను” అని బాబాకు మ్రొక్కుకున్నాను. ఆ అనుభవాన్ని ఇప్పుడు మీతో పంచుకుంటాను.

మా అమ్మాయికి వివాహమై 3 సంవత్సరాలైనా సంతానం కలగలేదు. నేను బాబాకు నమస్కరించుకుని, “బాబా! మాకు పిల్లలంటే చాలా ఇష్టం. మా అమ్మాయికి పిల్లలు కలిగేలా ఆశీర్వదించండి” అని ఎంతో ఆర్తిగా ప్రార్థించాను. బాబా కరుణించారు. మా అమ్మాయి ఇప్పుడు ఆరవ నెల గర్భవతి. మా అమ్మాయికి సుఖప్రసవమై తను పండంటిబిడ్డకు జన్మనివ్వాలని బాబాను ప్రార్థిస్తున్నాను.

ఇంకొక అనుభవం: 

మా అబ్బాయి సాయికుమార్ చెన్నైలో ఉద్యోగం చేస్తున్నాడు. 2020, మే 17వ తేదీన ఈ కరోనా సమయంలో చెన్నై నుండి విజయవాడకు రైల్లో వచ్చాడు. తనను క్వారంటైన్లో ఉంచి కోవిడ్ పరీక్షలు నిర్వహించారు. “కోవిడ్ పరీక్షల్లో మా అబ్బాయికి నెగిటివ్ వస్తే నవగురువార వ్రతం చేస్తాను బాబా. వాడు త్వరగా ఇంటికి వచ్చేలా అనుగ్రహించండి” అని నేను బాబాను ప్రార్థించాను. బాబా అనుగ్రహంతో మా అబ్బాయికి కోవిడ్ పరీక్షల్లో నెగిటివ్ వచ్చింది. బాబా తనను నాలుగు రోజుల్లో ఇంటికి పంపారు. ఎంతో ఆనందంతో బాబాకు కృతజ్ఞతలు తెలుపుకున్నాను. బాబాకు మ్రొక్కుకున్న ప్రకారం ఎంతో సంతోషంతో నేను నవ గురువార వ్రతం చేసుకున్నాను. ఈ అనుభవాలను సాటి సాయిభక్తులతో పంచుకోవటం నాకు చాలా ఆనందంగా ఉంది.

---