సాయిభక్తుల అనుభవమాలిక 578వ భాగం.....

---

ఈ భాగంలో అనుభవాలు:

1. సచ్చరిత్ర పారాయణతో నా కోరిక నెరవేర్చిన బాబా
2. సాయినాథుడే రక్ష!

---

సచ్చరిత్ర పారాయణతో నా కోరిక నెరవేర్చిన బాబా

హైదరాబాదు నుండి సాయిభక్తురాలు శ్రీమతి అనిత ఇటీవల తనకి జరిగిన అనుభవాన్ని మనతో పంచుకుంటున్నారు:

అందరికి నమస్కారం. నేను సాయిబాబా భక్తురాలిని. బాబా లీలలు, మహిమలు నా జీవితంలో అనేకం. లాక్డౌన్ వల్ల మావారికి బిజినెస్ లో నష్టం వచ్చింది. మేము అప్పుడు ఢిల్లీలో ఉండేవాళ్ళం. మూడునెలలు ఉద్యోగం లేక అక్కడ చాలా కష్టాలు పడాల్సి వచ్చింది. ఇంటి అద్దె కట్టడానికి కూడా డబ్బు లేకపోయేది. కానీ బాబా దయవల్ల  మా ఇంటి యజమాని అద్దెకోసం ఎప్పుడూ ఇబ్బంది పెట్టేవాడు కాదు. ఖర్చులకు మాత్రం హైదరాబాదులో ఉన్న మా తల్లిదండ్రులు డబ్బు పంపుతుండేవారు. మూడునెలల తర్వాత రైళ్ల రాకపోకలు మొదలయ్యాయి. దాంతో హైదరాబాదుకి వెళ్లి, అక్కడ ఉద్యోగం చూసుకుందామన్న ఉద్దేశ్యంతో నేను, మావారు, మా బాబు హైదరాబాదులోని మా అమ్మవాళ్ళ ఇంటికి వచ్చేసాము. నేను ప్రతి గురువారం సాయిసచ్చరిత్ర చదువుతాను. కానీ ఢిల్లీ నుండి వచ్చేటప్పుడు సచ్చరిత్ర పుస్తకాన్ని తెచ్చుకోవటం మరచిపోయాను. దాంతో ఏమి చేయాలో నాకు అర్థం కాలేదు.

హైదరాబాదు వచ్చాక ఉద్యోగంకోసం మావారు చాలా ఇంటర్వ్యూలకు హాజరయ్యారు. అన్నీ చివరి రౌండ్ వరకు వచ్చేవి కానీ, ఉద్యోగం నిశ్చయం అయ్యేది కాదు. నాకు చాలా బాధగా అనిపించేది. ఇదిలా ఉంటే, గురువారం వస్తుంది సచ్చరిత్ర ఎలా చదవాలి అని నేను అనుకునేంతలో మా అక్కయ్య కాల్ చేసి సాయి మహాపారాయణ గురించి చెప్పి, తన జూనియర్ గ్రూపులో నన్ను చేరుస్తానని చెప్పింది. చాలా సంతోషంగా నేను ఓకే అన్నాను. మంగగారు నన్ను ఎల్లో గ్రూపులో చేర్చారు. నా రోల్ నెంబర్:45. నాలుగు వారాల పారాయణ పూర్తయ్యేసరికి బాబా నా కోరిక నెరవేర్చారు. నా భర్తకి ఉద్యోగం వచ్చింది. అది కూడా హైదరాబాదులోనే. ఉద్యోగం వస్తే, నా అనుభవాన్ని పంచుకుంటానని బాబాకి మొక్కుకున్నాను. అందుకే నా ఆనందాన్ని మీ అందరితో పంచుకుంటున్నాను. నాకు చాలా చాలా సంతోషంగా ఉంది.

ఒక్కోసారి మనం ఎంతో ఎదురుచూస్తాం, అనుకున్న సమయానికి ఏదీ జరగటం లేదని చాలా బాధపడతాం, జీవితంపై విరక్తి కూడా కలుగుతుంది. కానీ అలాంటి సమయంలోనే బాబా యందు స్థిరమైన భక్తివిశ్వాసాలు ఉంచి, 'శ్రద్ధ', 'సబూరి'లతో వేచి ఉండాలి. బాబా అనుగ్రహం వలన మనం అనుకున్నది తప్పకుండా నెరవేరుతుంది. "బాబా నన్ను క్షమించు. బాబా! నా తండ్రి మీకు వేల వేల కోట్ల ప్రణామాలు. మిలియన్ల కొద్దీ ధన్యవాదాలు".

---

సాయినాథుడే రక్ష!

ఓం శ్రీసాయినాథాయ నమః

నా పరాత్పర గురువైనటువంటి సాయినాథుని దివ్య పాదపద్మములకు నమస్కరిస్తూ, వారు చూపిన మరో మహత్యాన్ని వివరిస్తున్నాను. నాపేరు కృష్ణ, నేను వైద్య సంబంధిత వృత్తిలో ఉన్నాను. నా స్నేహితుడొకడు వైద్యుడు. మా ఇంటిలోని వారందరూ నా స్నేహితుని వద్దనే వైద్యం చేయించుకుంటారు. అయితే నేను ఎప్పుడూ నా స్నేహితుడు వైద్యం చేస్తున్నాడని అనుకోను. నా స్నేహితుని ద్వారా సాయిబాబానే వైద్యం చేస్తున్నారని ప్రగాఢంగా విశ్వసిస్తాను. మా వాళ్ళందరితో కూడా నేను అదే చెప్పి, "మీరు మీ బాధలు ఎదురుగా ఉన్న నా స్నేహితుడికి కాదు, అతనిలో ఉన్న సాయిబాబాకి చెబుతున్నారని గుర్తుంచుకోండి" అని చెప్తుంటాను. నా స్నేహితునికి వచ్చే ఆలోచన రూపంలోనూ, ఇచ్చే మందు రూపంలోనూ ఆ సాయినాథుడే ఉన్నాడని, ఆయనే స్నేహితుని రూపంలో మా ఇంట్లో వారందరికీ సంపూర్ణ ఆరోగ్యాన్ని ప్రసాదిస్తున్నారని నేను పూర్ణంగా విశ్వసిస్తాను. అందుకు నిదర్శనమైన ఒక అనుభవాన్ని నేనిప్పుడు మీతో పంచుకుంటాను.

2020, సెప్టెంబర్ నెల చివరి వారంలో మా అమ్మగారికి కాస్త ఆయాసంగా అనిపించింది. ఇప్పుడున్న కరోనా పరిస్థితుల్లో శ్వాస సంబంధిత సమస్య తలెత్తితే, ఎంత కంగారుగా ఉంటుందో మనందరికీ తెలుసు. కానీ నా పరాత్పర గురువు సాయిబాబా నాకు తోడు ఉన్నారని ఎప్పుడూ నేను ధైర్యంగా ఉంటాను. అలా ఉండగలగడం కూడా నా సాయిబాబా ప్రసాదమే. ఎప్పటిలాగే మా అమ్మ నా స్నేహితునితో (అతని రూపంలో ఉన్నటువంటి సాయిబాబాతో) తన సమస్య యొక్క లక్షణాల గురించి చెప్పింది. నా స్నేహితుడు ఒక మందుని సూచించాడు. నేను కూడా వైద్య సంబంధిత వృత్తిలో ఉండటం వల్ల, నాకున్న పరిజ్ఞానంతో అతను సూచించిన మందు ఇప్పుడున్న పరిస్థితుల్లో మా అమ్మకి సరైనది కాదని దృఢంగా అనిపించింది. కానీ నా స్నేహితుని రూపంలో సాయిబాబానే మందిస్తారన్న ఖచ్చితమైన నా విశ్వాసం గురించి ముందే చెప్పాను కదా! అందుకే నేను ఇంకేమీ ఆలోచించకుండా, ఏవిధమైనటువంటి టెన్షన్ పెట్టుకోకుండా ఆరోజు సాయంకాల ప్రార్థన పూర్తయిన తరువాత బాబాకి నమస్కరించి ఆ మందు అమ్మకి వేశాను. మీరు నమ్ముతారో, లేదో! కేవలం 15 నిమిషాల్లో ఆమెకి స్వస్థత చేకూరింది. ఆ క్షణాన నాకు ఆమెకున్న సమస్య పూర్తిగా నివారింపబడుతుంది, ఇందులో ఆశ్చర్యపోవటానికి ఏమీ లేదు అనిపించింది. ఎందుకంటే, అపర ధన్వంతరి అయినటువంటి సాయినాథుడు ఎంతోమందికి మాట మాత్రం చేత స్వస్థత చేకూర్చారు.

నా పరాత్పర గురువు సాయిబాబా ఉండగా ఎవరికీ ఎటువంటి ఇబ్బంది కలగదని ఖచ్చితంగా చెప్పగలను. సాయిబంధువులారా! మీకు ఎటువంటి ఆరోగ్యసమస్య వచ్చినా, మీరు ఏ డాక్టర్ వద్దకు వెళ్లినా ఎదురుగా ఉన్న ఆ డాక్టరులో సాయినాథుడు ఉన్నాడన్న పూర్తి విశ్వాసంతో మీకున్న బాధలు వివరంగా చెప్పుకోండి. అప్పుడు ఆ సాయినాథుడే ఆ డాక్టర్  రూపంలో మీకు మందు నిర్ణయిస్తారు, ఆ మందు రూపంలో ఆయనే పనిచేస్తారు, మీకు సంపూర్ణ ఆరోగ్యాన్ని చేకూరుస్తారు. మా ఇంటిలో వారందరినీ ఆ సాయినాథుడే అనుక్షణం వెన్నంటి ఉండి రక్షణ ఇస్తున్నారు, సంపూర్ణ ఆరోగ్యాన్ని చేకూరుస్తున్నారు. మాకు ఆ సాయినాథుడే రక్ష. "చాలా చాలా ధన్యవాదాలు బాబా".

 అన్యధా శరణం నాస్తి త్వమేవ శరణం మమ

తస్మాత్ కారుణ్య భావేన రక్ష రక్ష సాయినాథ.

---