1. బాబా అనుగ్రహం గురించి ఎంత చెప్పుకున్నా తక్కువే!
2. ఛాతీనొప్పి నుండి అమ్మను రక్షించిన బాబా3. జరగబోయేదాన్ని ముందే సూచించిన బాబా
బాబా అనుగ్రహం గురించి ఎంత చెప్పుకున్నా తక్కువే!
సాయిభక్తులందరికీ నా నమస్కారం. నా పేరు రాధిక. నేను బాబా భక్తురాలిని. బాబా నాకు ప్రసాదించిన అనుభవాలు ఒకటీ, రెండూ కాదు. బాబా గురించి నాకు తెలిసినప్పటినుంచి ఇప్పటివరకు నా జీవితమంతా అద్భుతాలే. నేనీనాడు ఈమాత్రం ఇలా ఉన్నానంటే అది కేవలం బాబా దయవల్లనే. నా జీవితం బాబా పెట్టిన భిక్ష. 8 సంవత్సరాల క్రితం నా కాలుకి ఆపరేషన్ జరిగింది. అయితే, డాక్టర్లు ఆపరేషన్ సరిగా చేయలేదు. నా కాలు కాస్త క్రాస్ చేసేశారు. అందువలన నేను నడవడానికి వీలవదని అన్నారు. ఆ సమయంలో బాబా నాపై ఎంతో దయచూపించారు. బాబా ప్రేరణతో మరో డాక్టరును సంప్రదిస్తే, ఆయన ఫిజియోథెరపీ చేయించమన్నారు. దాంతో ఫిజియోథెరపిస్ట్‌ను కలిశాము. ఆయన నా కాలిని పరీక్షించి, "నీకు ఏం కాలేదమ్మా, నిన్ను నడిపించే బాధ్యత నాది" అని కేవలం 4 రోజుల్లో నా చేతులు పట్టుకుని మెట్లు దింపించారు.
ఒకసారి మా ఇళ్ళు అమ్మకానికి పెట్టినప్పుడు ఎవరూ కొనడానికి రాలేదు. అప్పుడు బాబాను ప్రార్థిస్తే, మంచి బేరం వచ్చేలా బాబా అనుగ్రహించారు. మరొకప్పుడు క్రెడిట్ కార్డ్స్ వాళ్లు డబ్బుల కోసం తరచూ ఇంటికి వస్తుంటే, బాబాకు చెప్పుకున్నాను. దాంతో వాళ్లను ఇంటికి రాకుండా చేశారు బాబా. ఇలా ఒకటీ రెండూ కాదు, నా జీవితమంతా బాబా పెట్టిన భిక్షే. అందుకే మా అక్క, "నీ విషయంలో బాబా అంతా మంచే చేస్తారు" అని అంటూ ఉంటుంది. బాబా దేవుడు కాదు, మా ఇంటిలో ఒక మనిషి, మా తాతగారు. నాకు బాధ అనిపించి ఏడిస్తే, ఆయన అసలు చూడలేరు. బాబా గురించి ఇలా చెబుతూ పోతే చాలా చాలా ఉంది.
మాకు మూడేళ్ళ చిన్నపాప ఉంది. తను నా కడుపులో ఉన్నప్పుడు నేను చాలా కష్టాలు చూశాను. కానీ తను మాకు బాబా ఆశీర్వాదం. మేము పాపకి 'సాయి అక్షయ' అని పేరు పెట్టుకున్నాము. 2021, మార్చి నెలలో తనకు ఒకటే వాంతులు, విరేచనాలు అయ్యాయి. పైగా జ్వరం కూడా ఉండేసరికి నాకు చాలా భయం వేసింది. హాస్పిటల్‌కి తీసుకువెళితే, "ఇన్ఫెక్షన్ అయింది, తగ్గిపోతుంది" అన్నారు. కానీ పరిస్థితిలో ఏ మార్పూ లేదు. పరిస్థితి ఎంత దారుణంగా ఉండేదంటే, పాప విరేచనాలు చేసుకుంటుంటే నాకు ఏడుపు వచ్చేది. తను చాలా నీరసించిపోయింది. ఈసారి పాపని వేరే హాస్పిటల్‌కి తీసుకుని వెళ్ళాము. అప్పుడు నేను, "బాబా! పాపకి తగ్గితే నాకు ఇష్టమైన పదార్థాన్ని వదిలేస్తాను" అని బాబాకు మ్రొక్కుకున్నాను. అంతే, ఆ పూట నుండి పాపకి విరేచనాలు ఆగిపోయాయి. నిజానికి ఆరోజు పాపకి వేయడానికి ఒక్క డైపర్ కూడా లేదు. "ఎలా బాబా?" అనుకున్నాను. కానీ ఆ రాత్రి పాప ఒక్కసారి కూడా విరేచనం చేసుకోలేదు. ఉదయానికి పూర్తిగా తగ్గింది. బాబా చూపిన అనుగ్రహానికి ఆరోజు అనుకున్నాను, 'నా అనుభవాన్ని బ్లాగులో పంచుకుంటాన'ని. కానీ ఆలస్యం చేశాను. "బాబా! నన్ను క్షమించండి".
పాపకి తగ్గగానే అవే లక్షణాలతో నేను అనారోగ్యం పాలయ్యాను. ఒకటే వాంతులు. నాకు ఏం చేయాలో అర్థం కాలేదు. నాకు నయం కావాలని బాబాకు మ్రొక్కుకున్నాను. అప్పటికే కాలునొప్పితో నడవలేకపోతున్నాను. పైగా క్రొత్త ఆరోగ్య సమస్య. మరోప్రక్కన పాపని చూసుకోలేక చాలా బాధపడ్డాను. అంతే, మరుసటిరోజు అమ్మ మా ఇంటికి వచ్చి, పాపని వాళ్ళింటికి తీసుకువెళ్ళింది. అప్పుడు నేను మళ్ళీ బాబాను ప్రార్థించి, "నాకు తగ్గితే, ఇంకొక పదార్థం వదిలేస్తాన"ని అనుకున్నాను. బాబా దయవల్ల మరుసటిరోజుకి నాకు తగ్గింది. ఇలా నన్ను ఒక్కదాన్నే కాదు, ఈ ప్రపంచంలో ఉన్న సమస్త మానవాళిని, పశుపక్ష్యాదులను, జంతువులను ఆ బాబానే చూసుకుంటారు. నేను నిరంతరం 'ఓంసాయి శ్రీసాయి జయజయసాయి' అనే నామస్మరణ చేస్తూ బాబా స్మరణలో ఉంటాను. "ధన్యవాదాలు బాబా".
అయితే, నేను ఏం పాపం చేశానోగానీ, నాకు అన్నీ బాధలే. ఆ బాధలకి చాలాసార్లు చనిపోవాలనుకున్నాను. కానీ మా సాయిని(పాపని) వదిలి వెళ్ళాలంటే నావల్ల కాలేదు. తను ఒక బాబా మిరాకిల్. తను నాకు కూతురు కాదు, అమ్మ! ఆ బాబా తన రూపంలో నాకు మరో అమ్మనిచ్చారు. తను నన్ను అర్థం చేసుకున్నట్లు ఎవరూ అర్థం చేసుకోలేరు. ఇది కాస్త ఆశ్చర్యంగా అనిపించవచ్చు, కానీ నిజం. మొదటినుంచి నా రెండు కాళ్ళకి సమస్య ఉంది. ఆ కారణంగా నేను ఏ మాత్రం కిందపడ్డా బోన్ ఫ్రాక్చర్ అవుతుంది. నేను బరువులు అసలు ఎత్తకూడదు. అందువలన నేను ఇప్పటివరకు మా పాపని ఎత్తుకోలేదు. కానీ తను నన్ను ఎంతలా అర్థం చేసుకుంటుందంటే, తనను ఎత్తుకోమని నన్ను తప్ప అందరినీ అడుగుతుంది. ఎందుకని ఎవరైనా అడిగితే, ‘మా అమ్మ కాళ్ళు బాగలేవు’ అని చెపుతుంది. ఇకపోతే, గత ఐదునెలలుగా ఒక కాలు మొత్తం నొప్పిగా ఉండటం వల్ల కర్ర సహాయంతో పనులు చేసుకుంటుండేదాన్ని. అలాంటి నేను ఇటీవల క్రిందపడిపోవడంతో రెండో కాలికి కూడా దెబ్బ తగిలి ఇప్పుడు పూర్తిగా నడవలేకపోతున్నాను. అందువలన పాపని మా అమ్మ దగరకు పంపించాను. ఎప్పుడూ నా దగ్గరే పడుకుంటానని మారాం చేసే మా పాప అక్కడ అసలు ఏడవటం లేదట. పైగా ఎవరైనా అడిగితే, 'మా అమ్మకి బాగలేదు. తన కాలికి దెబ్బ తగిలింది' అని చెపుతుందంట. అంతేకాదు, 'మా అమ్మకి త్వరగా తగ్గిపోవాల'ని బాబాను ప్రార్థిస్తుంది. తను తన చిట్టి చిట్టి చేతులతో నాకు పనుల్లో సహాయం చేస్తుంది. నన్ను ఎవరైనా ఏమైనా అంటే తను ఊరుకోదు. అసలు చిన్నపాపని చూసుకోవడమంటే ఎంత కష్టం? కానీ నా బిడ్డ విషయంలో నాకు అసలు కష్టం అనిపించదు. నాకు బాబా అంత మంచి కూతురుని ఇచ్చారు. కానీ, మా పాపకి మంచి అమ్మని ఇవ్వలేదు. ఎందుకంటే, నా కూతురుకి కూడా తన తల్లితో అన్నీ చేయించుకోవాలని ఉంటుంది కదా! బాబా పెట్టే పరీక్షలు కాదుగానీ, నా కూతురిని బాగా చూసుకోలేకపోతున్నానన్నదే నా బాధ. "బాబా! నా బాధను మీరే తీర్చగలరు. నా ఆరోగ్యాన్ని పూర్తిగా బాగుపరచి, మీ వరప్రసాదమైన మా పాపను బాగా చూసుకునేలా నన్ను అనుగ్రహించు తండ్రీ".
శ్రీ సాయినాథ్ మహరాజ్ కీ జై!
ముందుగా, ఈ బ్లాగును నిర్వహిస్తున్న సాయికి నా హృదయపూర్వక నమస్కారాలు. నా పేరు దిలీప్. మాది జనగాం జిల్లా. లాక్‌డౌన్ కారణంగా ప్రస్తుతం నేను ఇంటినుంచే వర్క్ చేస్తున్నాను. బాబా నాకు ప్రసాదించిన రెండు అనుభవాలను నేనిప్పుడు మీతో పంచుకుంటాను.
ఛాతీనొప్పి నుండి అమ్మను రక్షించిన బాబా:
ఒకరోజు రాత్రి మా అమ్మ తనకు ఛాతీలో నొప్పి వస్తోందని అందరినీ నిద్రలేపింది. నేను వెంటనే బాబా పటం దగ్గర ఉన్న ఊదీ తీసుకుని 'ఓం శ్రీసాయి ఆరోగ్యక్షేమదాయ నమః' అనే నామాన్ని ఉచ్చరిస్తూ అమ్మ నుదుటన కొద్దిగా పెట్టి, మరికొంత ఊదీని అమ్మకిచ్చి తన ఛాతీ భాగంలో రాసుకోమన్నాను. తరువాత బాబాకు నమస్కరించుకుని, "అమ్మకు ఏమీ కాకూడదు బాబా, ఉదయం లేచి తన పనులు తాను చేసుకునేలా చూడండి" అని వేడుకున్నాను. పది నిమిషాల్లో అమ్మ ప్రశాంతంగా నిద్రలోకి జారుకుంది. ఉదయం లేచి తన పనులు తాను చేసుకుంది. ఇదంతా బాబా దయవల్ల మాత్రమే జరిగింది. బాబాకు మేము ఎంతగానో ఋణపడివున్నాము.
జరగబోయేదాన్ని ముందే సూచించిన బాబా:
నా వివాహ విషయంలో ఏ అమ్మాయిని చేసుకుంటే బాగుంటుందా అని ఆలోచిస్తున్న సమయంలో నేను ఒకరోజు బాబా నామస్మరణ చేసుకుని నిద్రపోయాను. ఆ రాత్రి కలలో బాబా దర్శనమిచ్చి నాకు ఒక అమ్మాయిని చూపించారు. అయితే, నేను దాన్ని పెద్దగా పట్టించుకోలేదు. కానీ కొన్ని నెలల తర్వాత కలలో బాబా నాకు చూపించిన అదే అమ్మాయిని నేను యాదృచ్ఛికంగా కలిశాను. ఆమెతోనే నా వివాహం నిశ్చయమైంది. అతి త్వరలోనే మా వివాహం జరగనుంది. బాబా ఉంటే చాలు, మనకోసం అన్నీ ఆయనే ఆలోచిస్తారు. మనల్ని నడిపించేది మన తండ్రి అయిన సాయి మాత్రమే!
ఓం శ్రీ సాయినాథాయ నమః!!!
