సాయిభక్తుల అనుభవమాలిక 880వ భాగం....

---

ఈ భాగంలో అనుభవాలు:

1.కోరుకున్నట్లే ఆశీర్వదించిన బాబా

2. బిడ్డలు ఎక్కడున్నా వెన్నంటి ఉండి కాపాడతారు బాబా

3. ధైర్యాన్నిచ్చిన బాబా

---

కోరుకున్నట్లే ఆశీర్వదించిన బాబా

అందరికీ నమస్కారం. నా పేరు సాయిలక్ష్మి. ఇంతకుముందు నేను మీతో కొన్ని అనుభవాలను పంచుకున్నాను. ఇప్పుడు మరో రెండు అనుభవాలను మీతో పంచుకోవాలనుకుంటున్నాను. 2021, జూన్ 10న మా అక్కావాళ్ళ బాబుకి మొదటి పుట్టినరోజు వేడుక వైజాగ్‌లో చేయాలని నిశ్చయించి, ఆ వేడుకకి నన్ను కూడా రమ్మని ఆహ్వానించారు. నాకూ వెళ్ళాలని చాలా ఆసక్తిగా ఉన్నప్పటికీ కరోనా ఉధృతి ఎక్కువగా ఉండడంతో మా నాన్న నన్ను వైజాగ్ పంపడానికి ఒప్పుకోలేదు. చాలామంది నాన్నను ఒప్పించేందుకు ప్రయత్నం చేసినప్పటికీ ప్రయోజనం లేకుండా పోయింది. అప్పుడు నేను బాబాకు నమస్కరించుకుని, "బాబా! నాన్న నన్ను వైజాగ్ పంపిస్తే నా అనుభవాన్ని బ్లాగులో పంచుకుంటాను" అని మ్రొక్కుకున్నాను. బాబా ఏం అద్భుతం చేశారోగానీ వెంటనే నాన్న నేను వైజాగ్ వెళ్లడానికి అనుమతించారు. నేను చాలా సంతోషించి బాబాకు ధన్యవాదాలు తెలుపుకుని, "వైజాగ్ వెళ్లి వచ్చాక నాకు కోవిడ్ లక్షణాలేవీ రాకుండా చూడమ"ని బాబాను ప్రార్థించాను. నేను కోరుకున్నట్లే నాపై ఎటువంటి కోవిడ్ ప్రభావమూ పడకుండా కాపాడారు బాబా. "ధన్యవాదాలు తండ్రీ".

మరో అనుభవం:

నాకు నిశ్చితార్థమయింది. కానీ కరోనా కారణంగా పెళ్లికి ముహూర్తం నిశ్చయించలేదు. నన్ను చేసుకోబోయే అబ్బాయి కూడా మొదట్లో, "ఇప్పుడే పెళ్ళి వద్దు. కరోనా తగ్గాక ఘనంగా చేసుకుందామ"ని అన్నారు. కొన్ని రోజులకు మా ఇంట్లోవాళ్ళు తొందరపెట్టడంతో వెంటనే పెళ్ళిచేసుకోవటానికి నేను అంగీకరించాను. కానీ, ఆ అబ్బాయి ఒప్పుకోకపోతే గొడవలు జరుగుతాయేమోనని భయమేసి, "సాయీ! ఆ అబ్బాయి మనసు మార్చి ఎవరూ బాధపడకుండా ముహూర్తాలు కుదిరేటట్టు చేసి, మా పెళ్లి వేడుక బాగా జరిగేటట్లు చూడండి. అలా జరిగితే నా అనుభవాన్ని బ్లాగులో పంచుకుంటాన"ని బాబాకు మ్రొక్కుకున్నాను. నేను కోరుకున్నట్లే ఆశీర్వదించారు బాబా. ముందు నా పెళ్లి ముహూర్తం శుక్రవారం ఉదయమని పంతులు చెప్పారు. కానీ నేను బాబా వైపు చూస్తూ, "బాబా! ఒక్కరోజు ముందు ముహూర్తం పెట్టేటట్టు చేయొచ్చు కదా!" అని మనసులో అనుకున్నాను. అంతలోనే ఆ పంతులు, "గురువారం ఇంకా మంచి ముహూర్తం ఉంద"ని చెప్పారు. అలా నా పెళ్లి గురువారమే నిశ్చయమయ్యేలా బాబా ఆశీర్వదించారు. ఇదంతా నేను సాయి దివ్యపూజ చేసిన 4వ వారం జరిగింది. బాబా ఆశీస్సులతో నా పెళ్లి చాలా అందంగా జరిగింది. ఇంకా, నాకు సంబంధించిన అన్ని వేడుకలు కూడా గురువారంనాడే జరిగేలా అనుగ్రహించారు బాబా. "థాంక్యూ సో మచ్ బాబా". చివరిగా, నా అనుభవాన్ని పంచుకోవడానికి అవకాశమిచ్చిన సాయిబంధువులకు నా కృతజ్ఞతలు.

---

బిడ్డలు ఎక్కడున్నా వెన్నంటి ఉండి కాపాడతారు బాబా

'సాయి మహరాజ్ సన్నిధి' బ్లాగును నిర్వహిస్తున్న సాయిబంధువులందరికీ ధన్యవాదాలు. నా పేరు శ్రీదేవి. ఇంతకుముందు ఈ బ్లాగ్ ద్వారా కొన్ని అనుభవాలను మీతో పంచుకున్న నేను ఇప్పుడు మరో అనుభవాన్ని పంచుకోబోతున్నాను. 2021, జూలై 18న నేను మా బంధువులతో కలిసి గుంటూరులో ఉన్న మా మేనత్తను చూడటానికి వెళ్ళాను. అక్కడ అనుకోకుండా ఒక అపార్ట్‌మెంటులో పట్టుచీరలు అమ్మే ఒకరి ఇంటికి వెళ్ళాము. ఇంట్లోకి వెళ్ళగానే ద్వారకామాయిలో కూర్చుని ఉన్న ఫోటో రూపంలో బాబా నాకు దర్శనమిచ్చారు. బాబాను, ఆ ఇంట్లో ఉన్న శ్రీసాయిసచ్చరిత్ర గ్రంథాన్ని చూశాక ఆ ఇంటావిడ బాబా భక్తురాలని నాకు అర్థమైంది. ఆనందంగా నేను బాబాకు నమస్కరించుకుని, "ఇక్కడ కూడా బాబా ఉన్నార"ని మా బంధువులతో చెప్పాను. తరువాత చీరలు కొనుక్కొని తిరిగి వస్తూ లిఫ్ట్ ఎక్కాము. అయితే, లిఫ్ట్ గ్రౌండ్ ఫ్లోర్‌కి వచ్చిన తరువాత తలుపులు తెరుచుకోలేదు. పైగా లిఫ్ట్ దానంతట అదే ఫస్ట్ ఫ్లోర్‌కి వెళ్ళడం, మళ్లీ గ్రౌండ్ ఫ్లోర్‌కి రావడం, పెద్ద శబ్దం చేస్తూ ఆగిపోవడం జరగసాగింది(నాలుగుసార్లు). లిఫ్టులో ఉన్న మాకు ఏం చేయాలో అర్థంకాక చాలా భయపడుతూ వాచ్‌మెన్‌ని పిలుస్తూ, "ఏమైందో చూడమ"ని కేకలు పెట్టాము. అతను, "ఏదో ఒకటి చేస్తాన"ని అన్నాడు. కానీ అంతలోనే లిఫ్ట్ పెద్దపెద్ద శబ్దాలు చేస్తూ పైకి, క్రిందకి తిరుగుతోంది. అప్పుడు నేను, "బాబా! మమ్మల్ని కాపాడు. లిఫ్ట్ తలుపులు తెరుచుకునేలా చేయి. ఈ అనుభవాన్ని 'సాయి మహరాజ్ సన్నిధి' బ్లాగులో పంచుకుంటాను" అని అనుకున్నాను. అంతలో లిఫ్ట్ మళ్లీ ఫస్ట్ ఫ్లోర్‌కి వచ్చింది. ఎదురు ఫ్లాట్‌లో ఉండే ఆమె గబగబా వచ్చి లిఫ్ట్ డోర్ పట్టుకుని గట్టిగా నెట్టింది. మేము రెండో డోర్ కూడా నెట్టి తొందర తొందరగా అందరం బయటకి వచ్చేశాము. అప్పుడామె, "ఈ లిఫ్ట్ సరిగా పనిచేయడం లేదు. పైగా ముగ్గురు మాత్రమే ఎక్కాల్సిన ఈ లిఫ్టులో మీరు ఆరుగురు ఎక్కారు. మీకు వాచ్‌మెన్ చెప్పలేదా?" అని అడిగింది. నేను ఆమెతో, "మాకు ఆ విషయాలేమీ తెలియద"ని చెప్పాను. తరువాత ఆమె రూపంలో మా అందరినీ రక్షించిన బాబాకు కృతజ్ఞతలు తెలుపుకుని ఆ అపార్ట్‌మెంట్ నుండి బయటకు వచ్చాము. బాబా కృపకు ఎంతగానో సంతోషించాము. నా సాయితండ్రి తన బిడ్డలు ఎక్కడున్నా వెన్నంటి ఉండి కాపాడుతారు.

---

ధైర్యాన్నిచ్చిన బాబా

సాయిబంధువులందరికీ నా నమస్కారం. ఈ బ్లాగును నిర్వహిస్తున్నవారికి నా కృతజ్ఞతలు. నా పేరు లత. ఇంతకుముందు ఒకసారి నేను నా అనుభవాన్ని మీతో పంచుకున్నాను. ఇప్పుడు మరో అనుభవాన్ని మీతో పంచుకోబోతున్నాను. ఇటీవల సాయితండ్రి మా మనవరాలి అన్నప్రాశనను దగ్గరుండి తమ సన్నిధానంలో నిర్విఘ్నంగా జరిపించారు. అందుకు నాకు చాలా సంతోషం కలిగింది. ఇకపోతే, నాకు ఈమధ్య కోవిడ్ వచ్చి సాయితండ్రి దయవలన తగ్గింది. కోవిడ్ వచ్చి తగ్గిన తర్వాత చాలామంది ఫంగల్ ఇన్ఫెక్షన్‌కు గురై ఎంతో బాధపడుతున్నారు. ఫంగల్ ఇన్ఫెక్షన్ వల్ల చాలా భయానక పరిస్థితులు నెలకొన్నాయి. దాంతో నాకు కూడా ఫంగల్ ఇన్ఫెక్షన్ వస్తుందేమోనని నేను ప్రతిరోజూ ఎంతో భయపడుతుండేదాన్ని. అప్పుడొకరోజు నా తండ్రి బాబా, "ఎదుటివాళ్ళకు వచ్చిన ప్రతిదీ నీకూ వస్తుందని భయపడకు. నీకు ఏమీ రాదు. నీ ఇంట నేనున్నాను. నేనుండగా నీకు భయమేల? దిగులుచెందకు" అని అభయమిచ్చారు. అంతటితో నాకు భయం పూర్తిగా పోయింది. ఇలాగే నా సాయితండ్రి అన్నీ తానై నా చేయి పట్టుకుని అనుక్షణం కంటికి రెప్పలా రక్షణనిస్తున్నారు. నేను ఎన్నని చెప్పగలను? "నా బంగారుతండ్రి బాబా! మీ దయ ఎప్పటికీ నా యందు ఇలాగే ఉండాలి తండ్రీ! నన్ను, నా బిడ్డలను కంటికి రెప్పలా కాపాడు తండ్రీ. నేను మీకు ఎల్లప్పుడూ ఋణపడివుంటాను. మీకు నేను సర్వస్యశరణాగతి చేస్తున్నాను. మీ పాదాల చెంత నన్ను సదా ఉండనివ్వండి. నేను మీకు మాట ఇచ్చిన ప్రకారం బ్లాగులో నా అనుభవాన్ని పంచుకున్నాను".

శ్రీ సాయినాథ్ మహరాజ్ కీ జై!

---