సాయిభక్తుల అనుభవమాలిక 1094వ భాగం....

---

ఈ భాగంలో అనుభవాలు:

1. ఆరోగ్యాన్ని ప్రసాదించే సాయి

2. బాబా దయతో చక్కబడిన ఆరోగ్యం

3. సమస్య ఎలాంటిదైనా బాబాకు చెప్పుకుంటే తీరిపోతుంది

---

ఆరోగ్యాన్ని ప్రసాదించే సాయి

శ్రీ సచ్చిదానంద సద్గురు సాయినాథ్ మహరాజ్ కీ జై!!! ఈ బ్లాగ్ నిర్వహిస్తున్న సాయికి నమస్కారాలు. నేనొక సాయిభక్తురాలిని. కోవిడ్ కాలంలో ఒకసారి మా అమ్మ అనారోగ్యం పాలైంది. మేము ఎంతో ఆందోళన చెందాము. కానీ సాయి మాకు తోడుగా ఉన్నారు. ఆయన ఒక డాక్టరు ద్వారా మాకు సహాయం అందించారు. ఆ డాక్టరు అమ్మకు ఆపరేషన్ చేశారు. ఇప్పుడు అమ్మ ఆరోగ్యంగా ఉంది. "ధన్యవాదాలు బాబా. ఏ సమస్యా లేకుండా అమ్మ ఆరోగ్యంగా ఉండేలా చూడండి సాయీ".

కరోనా మూడో వేవ్‍లో మావారికి జ్వరం వచ్చింది. కానీ బాబా దయవలన రెండు రోజులలో జ్వరం తగ్గిపోయింది. ఇంకా చిన్నచిన్న ఇబ్బందులు ఉన్నాయి. అవి బాబా దయవలన తగ్గిపోతాయని నా నమ్మకం.

దసరా సమయంలో నాకు జ్వరం వచ్చింది. ఆ సమయంలో మా ఇంటి చుట్టూ డెంగ్యూ జ్వరాలు ఉన్నాయి. అందువల్ల నాకు కూడా డెంగ్యూ జ్వరమే అయుంటుంది అనిపించింది. అయినా నేను ఏ టెస్టు చేయించుకోకుండా బాబా మీద నమ్మకముంచి పారాసెటమాల్ టాబ్లెట్లు వేసుకుంటూ, బొప్పాయి జ్యూస్ త్రాగాను. బాబా దయవలన జ్వరం రెండు రోజులలో తగ్గింది. కానీ కీళ్ళనొప్పులు 3 నెలల వరకు ఉన్నాయి. అయినా నేను డాక్టరు దగ్గరకి వెళ్లకుండా, "బాబా! నొప్పులు తగ్గితే, 5 వారాలు పూజ చేస్తాను" అని బాబాకి చెప్పుకున్నాను. అంతే, బాబా దయవలన నొప్పులు తగ్గిపోయాయి.

ఇటీవల ఒకసారి నాకు కంటికి సంబంధించి ఒక చిన్న సమస్య వచ్చింది. డాక్టరు దగ్గరకి వెళితే, "ఏమీ పర్వాలేదు" అని చెప్పి ఐ-డ్రాప్స్ ఇచ్చారు. బాబా దయవలన నాకు చాలామటుకు నయమైంది. త్వరలో పూర్తిగా తగ్గిపోతుందని నా విశ్వాసం. ఇలా సాయి నాకు, మా కుటుంబానికి ఎల్లప్పుడూ తోడుగా ఉంటున్నారు. "చాలా చాలా ధన్యవాదాలు బాబా".

ఓంసాయి శ్రీసాయి జయజయసాయి!!!

---

బాబా దయతో చక్కబడిన ఆరోగ్యం

సాయినాథునికి, ఈ బ్లాగ్ నిర్వహకులకు నా నమస్కారాలు. నా పేరు ఇందిర. నాకు సమస్తం శ్రీసాయినాథుడే. నా భర్త విషయమై నేను పడిన ఇబ్బందుల గురించి, బాబా దయవల్ల వాటినుండి బయటపడటం గురించి నేను ఇదివరకు పంచుకున్నాను. ఇప్పుడు మరో అనుభవాన్ని పంచుకుంటున్నాను. ముందుగా, నా అనుభవాలను పంచుకోవటంలో నేను చాలా ఆలస్యం చేసినందుకు నన్ను క్షమించమని మనస్ఫూర్తిగా బాబాను వేడుకుంటున్నాను. మా పాప విజయవాడలో చదువుతుంది. అసలే అంతంత మాత్రంగా ఉండే మావారి ఆరోగ్యరీత్యా మా పాపను చూడడానికి వెళ్ళిరావటం మాకు ఒక పెద్ద పని అయింది. ఒకరోజు నేను, మావారు బండి మీద విజయవాడ వెళ్ళి తిరిగి వచ్చేటప్పుడు పెద్ద వాన పడింది. రెండు రోజుల తరువాత మావారికి 103 డిగ్రీల జ్వరమొచ్చి చాలా ఇబ్బందిపడ్డారు. నాకు కూడా జ్వరం వచ్చింది. డాక్టరు వైరల్ ఫీవర్ అని చెప్పి మందులిచ్చారు. కానీ మందులు వాడుతున్నప్పటికీ మావారికి జ్వరం తగ్గకపోగా షుగర్ డౌన్ అయిపోయి చాలా ఇబ్బందిపడ్డారు. మరోవైపు జ్వరంతో లేవలేని స్థితిలో ఉన్న నాకు 'ఆయనకి ఏమవుతుందోన'ని చాలా భయమేసి బాబా మీద భారం వేసి ఊదీ మావారి నుదుటన పెట్టి, మరికొంత ఊదీ నీళ్లలో కలిపి ఇచ్చి, బాబా నామం చేస్తూ ఉండేదాన్ని. పదిరోజులకి ఆయన కోలుకున్నారు కానీ, చాలా నీరసంగా ఉండేవారు. ఇలా ఉండగా నెలరోజుల వ్యవధిలోనే మావారికి మళ్లీ జ్వరం వచ్చింది. అప్పుడు కూడా నేను బాబానే నమ్ముకుని, "బాబా! మీ దయతో ఈ పరిస్థితులన్నీ చక్కబడితే నా అనుభవాన్ని బ్లాగులో పంచుకుంటాన"ని అనుకున్నాను. బాబా అనుగ్రహంతో మెల్లగా మావారికి జ్వరం తగ్గి పరిస్థితులు చక్కబడ్డాయి. కానీ నేనే నా అనుభవాన్ని పంచుకోవడంలో చాలా ఆలస్యం చేశాను. అందుకు మరోసారి బాబాని క్షమాపణలు వేడుకుంటున్నాను.

మన కర్మల ఫలితాలను మనం తప్పక అనుభవించాలి. అవి ఒక్కరోజులో తీరిపోయేవి కావు. అందుకే నేను, 'కష్టాలని, బాధలని తట్టుకుని ధైర్యంగా నిలబడగలిగే శక్తిని నాకు, నా బిడ్డలకు ప్రసాదించమ'ని బాబాని ప్రతినిత్యం వేడుకుంటాను. "ధన్యవాదాలు బాబా. ప్రస్తుతం మా అత్తగారి పరిస్థితి బాగోలేదు. షుగర్ లెవెల్స్ చాలా ఎక్కువగా ఉన్నాయి. ఆవిడ త్వరగా కోలుకోవాలి తండ్రీ. నా భర్త విషయంలో నేను చెప్పలేని మానసిక ఆందోళనకి గురవుతున్నాను. ఆయన విషయంగా నేను మీకు మొరపెట్టుకోని రోజు లేదు. స్వతహా ఆయన మంచివారే. కాకపోతే అతి ప్రేమ, అతి కోపం. ఆయన స్థిర చిత్తాన్ని, మానసిక సమతుల్యాన్ని కలిగి ఉంటూ అటు ఆరోగ్యపరంగా, ఇటు కుటుంబపరంగా ఉన్నతమైన వ్యక్తిగా ఉండేలా అనుగ్రహించండి. చల్లని తండ్రి బాబా, మీ కరుణ ఎల్లవేళలా అందరిపై ఉండాలి తండ్రీ. ధన్యవాదాలు".

---

సమస్య ఎలాంటిదైనా బాబాకు చెప్పుకుంటే తీరిపోతుంది

అందరికీ నమస్కారం. ముందుగా సాయిబంధువులందరికీ మరియు 'సాయి మహరాజ్ సన్నిధి' బ్లాగ్ నిర్వహకులకు బాబా ఆశీస్సులు ఉండాలని కోరుకుంటున్నాను. నేను కొన్ని అనుభవాలను ఇంతకుముందు ఈ బ్లాగులో పంచుకున్నాను. ఇప్పుడు మరో అనుభవంతో మీ ముందుకు వచ్చాను. నాకు పెళ్ళై 3 సంత్సరాలైంది. మాకు ఒక పాప. మేము తనకి 'రిత్విక సాయి' అని పేరు పెట్టుకున్నాము. ఈమధ్య ఒకరోజు రాత్రి సుమారు 2 గంటల ప్రాంతంలో మేము మంచి నిద్రలో ఉండగా మా పాప మంచం మీద నుండి కింద పడిపోయింది. పెద్దగా శబ్దం వినబడటంతో మాకు మెలకువ వచ్చి చూస్తే పాప ఏడుస్తోంది. నేను తన తలకి దెబ్బ తగిలి ఉంటుంది అనుకున్నాను. నేను అనుకున్నట్లే తలకు దెబ్బ తగిలి వాపు వచ్చింది. అది చూసి నేను చాలా కంగారుపడ్డాను. ఏం చేయాలో తెలియక మనసులోనే, 'ఓం శ్రీసాయి ఆరోగ్యక్షేమదాయ నమః' అనే నామం జపిస్తూ, "పాపకు ఏమీ కాకుంటే నా అనుభవాన్ని బ్లాగులో పంచుకుంటాను" అని బాబాకి మ్రొక్కుకున్నాను. కాసేపటికి పాప ఏడవడం ఆపి నిద్రపోవడంతో మేము కూడా నిద్రపోయాము. పొద్దునే లేచి చూస్తే, ఆశ్చర్యం! దెబ్బ తగిలిన చోట రాత్రి ఉన్న వాపు ఏ మాత్రమూ లేదు, మునుపటిలా మామూలుగా ఉంది. అది చూసి మేము చాలా సంతోషించాము. "ధన్యవాదాలు బాబా. ఇలాగే అందరి కష్టాలను కడతేర్చు తండ్రీ. ఉద్యోగం గురించి ఎన్నో ఏళ్ళుగా ఎదురుచూస్తున్నాను బాబా. దయచేసి కరుణించు తండ్రీ సాయినాథా".

సర్వేజనాః సుఖినోభవంతు!!

సర్వం శ్రీ సాయినాథార్పణమస్తు!!!

---