సాయిభక్తుల అనుభవమాలిక 1091వ భాగం....

---

ఈ భాగంలో అనుభవాలు:

1. నమ్ముకున్నందుకు మంచి చేసిన బాబా

2. అనుగ్రహప్రదాత సాయి

3. శ్రీసాయి కృప

---

నమ్ముకున్నందుకు మంచి చేసిన బాబా

ముందుగా బ్లాగు నిర్వహిస్తున్నవారికి నా నమస్కారాలు. నా పేరు పావని. సాయి నా వెంటే ఉంటూ ఎన్నో విధాలుగా కాపాడుకుంటూ వస్తున్నారు. నేను సాయికి ఎంతో ఋణపడి ఉన్నాను. ఆయన మాకు ప్రసాదించిన ఒక అనుభవాన్ని నేనిప్పుడు మీతో పంచుకోవాలనుకుంటున్నాను. మా మామయ్యగారికి 70 సంవత్సరాలు. ఆయన చాలా మంచివారు. ఒకరోజు ఆయనకి తలలో విపరీతమైన నొప్పి వచ్చి బాగా వాంతులు అయ్యాయి. దాంతో మేము ఆయనను హాస్పిటల్‌కి తీసుకుని వెళ్ళాము. అక్కడ అన్నిరకాల టెస్టులు చేసి, "తలలో నరం ఉబ్బింది. ఆపరేషన్ చేయాలి. కానీ ఆపరేషన్ చేసినా చెప్పలేము. అలాగని ఆపరేషన్ చేయకపోతే ఉబ్బిన నరం చిట్లిపోయి కోమాలోకి వెళ్లి ఏదైనా జరగొచ్చు" అన్నారు. అంటే, ఆపరేషన్ చేసినా, చేయకున్నా సమస్యే. మా అందరికీ ఏం చేయాలో అర్థం కాలేదు. అప్పుడు నేను, "బాబా! మామయ్యగారికి ఆపరేషన్ లేకుండా తగ్గిపోవాలి. నీవే మాకు దిక్కు సాయీ. కరుణించు తండ్రీ. నేను ఇంతవరకు శిరిడీ వెళ్ళలేదు బాబా. వెళ్ళాలని చాలా కోరిక. మీ దయ ఉంటేనే ఎవరైనా శిరిడీ వెళ్ళగలరని విన్నాను. నాకు అంత అదృష్టం లేదేమో, నా మీద మీకింకా దయ రాలేదేమో తండ్రీ. మామయ్యగారికి ఆపరేషన్ లేకుండా నయమైతే నేను శిరిడీ వస్తాను. అలా జరగకుంటే నేను నా జీవితంలో శిరిడీ రాను సాయీ. కరుణించి కాపాడు తండ్రీ" అని బాబాను వేడుకున్నాను. మనసులో మాత్రం 'ఒకవేళ మావయ్యకి ఆపరేషన్ అన్నారంటే, నేను శిరిడీ వెళ్ళలేను కదా!' అని బాధపడ్డాను. సరే, మొదట మామయ్యని ఖమ్మంలో చూపించిన మేము, డాక్టర్లు చెప్పినందువల్ల ఆయన్ని హైదరాబాద్ తీసుకుని వెళ్లి సీనియర్ న్యూరాలజిస్ట్ డాక్టరుకి చూపించాం. ఆయన కూడా ఖమ్మం డాక్టరు చెప్పినట్లే చెప్పారు. దాంతో నేను, "ఇప్పుడెలా బాబా? నేను ఎందుకలా మొక్కుకున్నాను? మామయ్యకు తగ్గదా? నేను శిరిడీ వెళ్లలేనా?" అని అనుకున్నాను. తరువాత మేము మామయ్యను నిమ్స్‌కి తీసుకుని వెళ్ళాము. వాళ్ళు అన్ని టెస్టులు రాశారు. ఒకరోజంతా టెస్టులు జరిగాయి. తరువాతరోజు రిపోర్టులు వచ్చాయి. మరుసటిరోజు డాక్టరు చూస్తారనగా నేను, "బాబా! మాకున్న చివరి అవకాశం మీరే. మాకు దిక్కు మీరే. మీ మీదే భారం వేశాము సాయీ" అని బాబాను ప్రార్థించాను. తరువాత డాక్టరు వచ్చి రిపోర్టులు చూశారు. ఇంటిదగ్గర ఉన్న నేను బాబాను తలచుకుంటూ ఉన్నాను. నా గుండె వేగంగా కొట్టుకుంటోంది. అంతలో మావారు ఫోన్ చేశారు. టెన్షన్ పడుతూ ఫోన్ తీశాను. "డాక్టరు రిపోర్టులు చూశారు. నాన్న తలలో ఏమీ లేదు. ఆయన చాలా బాగున్నారు. ఆయనకు ఆపరేషన్ అవసరం లేదు, మందులు కూడా అవసరం లేదు" అని చెప్పారు మావారు. అది విని నాకెంత సంతోషం కలిగిందో చెప్పలేను. బాబానే ఆ డాక్టరు రూపంలో వచ్చారనిపించింది. "బాబా! మిమ్మల్ని నమ్ముకున్నందుకు మాకు మంచి చేశారు. మీ పాదపద్మాలకు కోటి వందనాలు. వీలుచూసుకుని శిరిడీ వస్తాను సాయీ". అన్నట్టు చెప్పడం మరచిపోయాను, 'మావయ్యకి తగ్గితే, మా అనుభవం గురించి బ్లాగులో పంచుకుంటాను' అని అనుకున్నాను. కాస్త ఆలస్యమైంది. తప్పులు ఏవైనా ఉంటే మన్నించండి.

---

అనుగ్రహప్రదాత సాయి

తోటి సాయిభక్తులకు నమస్కారం. నా పేరు రజనీకాంత్. మేము మా కొబ్బరితోటను ఒకరికి లీజుకు ఇస్తే, వాళ్ళు తోటంతా పాడుచేశారు. పాడైపోయిన తోటను చూస్తే, మాకు చాలా బాధేసింది. ఆ తోటలోని మోటారు కూడా చెడిపోతే నేను ఎలక్ట్రీషియన్‌ని తీసుకొచ్చి బాగుచేయించాలని అనుకున్నాను. కానీ ఆ సమయంలో నాకు డబ్బులకి చాలా ఇబ్బందిగా ఉండేది. అందువల్ల నేను, "బాబా! తక్కువ ఖర్చుతో మోటారు రిపేర్ అయిపోయేలా చూడు తండ్రీ" అని బాబాతో చెప్పుకున్నాను. నేను కోరుకున్నట్లే బాబా తక్కువ ఖర్చుతో మోటారు రిపేర్ అయ్యేలా చూశారు. ఇది చిన్న విషయమే కానీ, ఆ సమయంలో నాకు అది పెద్ద సమస్యగా తోచింది. తర్వాత ఆ కొబ్బరితోటను వేరే వాళ్ళకి ఇవ్వాలని చూశాము. కానీ లీజుకు తీసుకోవడానికి ఎవరూ ముందుకు వచ్చేవాళ్ళు కాదు. దాంతో మేము చాలా ఇబ్బందిపడ్డాం. అప్పుడు మాకు తెలిసిన ఒకరితో ఆ తోటను లీజుకు తీసుకోమని చెప్పి, "బాబా! వాళ్ళు తీసుకుంటే, తోటను బాగా చూసుకుంటారు. మీ దయతో వాళ్ళు గనక లీజుకు తీసుకుంటే, నా అనుభవాన్ని మీ బ్లాగు ద్వారా తోటి భక్తులతో పంచుకుంటాను" అని బాబాతో చెప్పుకున్నాను. బాబా దయవలన వాళ్ళు తోటను తీసుకున్నారు. అయితే నేను నా అనుభవాన్ని పంచుకోలేదు. తరువాత 2022, ఫిబ్రవరి 9న పెద్ద సమస్య వచ్చి పడింది. అప్పుడు నేను ఎందువల్ల ఇలా జరిగిందని అనుకుంటే, నేను నా అనుభవాన్ని పంచుకోలేదని గుర్తుకొచ్చింది. దాంతో 'అందుకే ఇలా అయిందేమో!' అనుకుని "బాబా! నా నిర్లక్ష్యం వలనే ఆ సమస్య వచ్చినట్లయితే నన్ను క్షమించండి. ఏ ఇబ్బంది, గొడవలు లేకుండా వాళ్ళు మాకివ్వాల్సిన మొత్తం డబ్బులు ఇచ్చేసి వెళ్ళిపోయేలా దయచూపండి. అలాగే, నా వల్ల వాళ్ళకి ఇబ్బంది లేకుండా కరుణించు తండ్రీ. తెలిసీ తెలియక నేను ఏమైనా తప్పులు చేసి ఉంటే క్షమించండి బాబా".

అఖిలాండకోటి బ్రహ్మాండనాయక రాజాధిరాజ యోగిరాజ శ్రీ సచ్చిదానంద సద్గురు సాయినాథ్ మహరాజ్ కీ జై!!!

---

శ్రీసాయి కృప

సాయిబంధువులందరికీ మరియు ఈ బ్లాగును నిర్వహిస్తున్న సాయికి నా నమస్కారాలు. నా పేరు శ్రీనివాస్. మాది రాజమండ్రి దగ్గర రాజానగరం. నేను ఇంతకుముందు బాబా నాకు ప్రసాదించిన కొన్ని అనుభవాలు మీతో పంచుకున్నాను. ఈరోజు మరో అనుభవం చెబుతున్నాను. నేను నా గత అనుభవంలో బాబా దయవల్ల మా మేనకోడలికి పెళ్లి కుదిరిందని, ఎటువంటి ఆటంకాలు లేకుండా వివాహం జరిగితే నా అనుభవం బ్లాగులో పంచుకుంటానని చెప్పాను. బాబా కృపతో వివాహం చాలా అద్భుతంగా జరిగింది. అందుకు బాబాకు శతకోటి నమస్కారాలు తెలియజేసుకుంటున్నాను. ఇకపోతే, మా మేనకోడలు తనకు ఉద్యోగం వస్తే, మొదటి నెల జీతం బాబాకి సమర్పించుకుంటానని మ్రొక్కుకుంది. బాబా దయవలన ఇంటర్వ్యూ పూర్తయిన రెండు రోజులకే తనకి 30,000 రూపాయల జీతంతో ఉద్యోగం వచ్చింది. శ్రద్ధ, సహనం ఉంటే బాబా అసాధ్యాలను సాధ్యం చేస్తారని  నిరూపించారు. నమ్మకంతో బాబా నామాన్ని జపిస్తే, అన్నీ అద్భుతాలే. "ధన్యవాదాలు బాబా. నా అనుభవాలను పంచుకునే అవకాశమిచ్చిన మీకు శతకోటి నమస్కారాలు. అయితే ఆలస్యంగా పంచుకున్నందుకు మన్నించండి బాబా. కానీ నన్ను ఎన్నడూ మీ భక్తికి దూరం చెయ్యొద్దు తండ్రీ".

---