సాయిభక్తుల అనుభవమాలిక 1078వ భాగం....

---

ఈ భాగంలో అనుభవాలు:

1. క్లిష్ట పరిస్థితి నుంచి కాపాడిన బాబా

2. శ్రీసాయినాథుని కృపాకటాక్షాల వలన తగ్గిన బిపి

3. వెర్టిగో నుండి కాపాడిన బాబా

---

క్లిష్ట పరిస్థితి నుంచి కాపాడిన బాబా

శ్రీసచ్చిదానంద సద్గురు సాయినాథ్ మహరాజ్ కీ జై!!!

నా పేరు కుమార్. నేను, నా భార్య వృత్తిరిత్యా హైదరాబాదులో స్థిరపడ్డాము. ఈ మధ్య నా భార్య ఒక కొత్త కంపెనీలో జాయిన్ అయ్యింది. ఆ కంపెనీలో కొత్తగా జాయిన్ అయిన వాళ్ళకి మూడునెలలు శిక్షణ ఇచ్చిన తరువాత ప్రాజెక్టులో వేస్తారు. కొన్నిరోజులు శిక్షణ బాగానే జరిగింది. తరువాత నా భార్యకి శిక్షణనిచ్చే కోచ్ ఏదో ఒక వంకతో తన మీద ప్రతిరోజూ నెగిటివ్ ఫీడ్ బ్యాక్ ఇవ్వడం మొదలుపెట్టాడు. అంతేకాక శిక్షణ కూడా సరిగా ఇవ్వకుండా ప్రతి చిన్న విషయాన్ని చాలా పెద్దదిగా చేసి వాళ్ళ మేనేజరుతో చెప్తుండేవాడు. అలా రోజురోజుకి ఆ కోచ్ ఆగడాలు మరింత ఎక్కువ అవుతూ ఉండేవి. అందువల్ల నా భార్యపై ఒత్తిడి ఎక్కువైపోయి ప్రతిరోజూ బాధపడుతూ చివరికి ట్రైనింగ్‍కి వెళ్లాలంటేనే భయపడే స్థితికి వచ్చి, 'అసలే కొత్త కంపెనీ, నెగిటివ్ ఫీడ్ బ్యాక్ వల్ల ముందు ముందు ఎన్ని ఇబ్బందులు ఎదురవుతాయోన'ని నా భార్య చాలా ఆందోళన చెందసాగింది. ఇలా ఉండగా ఒకరోజు తను తెలియక చేసిన ఒక పొరపాటు వలన ఆ కంపెనీకి 12 లక్షల రూపాయల నష్టం వచ్చే పరిస్ధితి ఏర్పడింది. అదే అదనుగా తీసుకుని ఆ కోచ్ నా భార్యను ఉద్యోగంలో నుంచి తొలగించడానికి చాలా ప్రయత్నించాడు. నిజానికి అదంతా ఆ కోచ్ వల్లనే జరిగింది. అతను సరిగ్గా ట్రైనింగ్ ఇచ్చి ఉంటే ఆ సమస్య వచ్చేదే కాదు. ఇక ఆ రోజు నా భార్య ఇంట్లో గట్టిగా ఏడుస్తూ జరిగినదంతా చెప్పి, "తనని ఉద్యోగంలో నుంచి తీసేస్తార"ని చాలా బాధపడింది. ఏ కష్టం వచ్చినా నా తండ్రి సాయినాథునికి చెప్పుకోవడం ఎప్పటినుండో నాకు అలవాటు. అందుచేత నా భార్య అలా ఏడవడం చూసిన నేను వెంటనే పూజగదిలోకి వెళ్ళి బాబా పటం ముందు నిల్చొని, దణ్ణం పెట్టుకుని సమస్యను ఆయనతో చెప్పి, "ఈ సమస్య నుండి నా భార్యను కాపాడి, ట్రైనింగ్‍లో తనకి సహాయం చేసి ఉద్యోగం నిలబడేలా చేయండి. ఈ సమస్య తీరితే, 'సాయి మహారాజ్ సన్నిధి' బ్లాగులో నా అనుభవాన్ని పంచుకుంటాను" అని ఆర్తిగా బాబాను వేడుకున్నాను. నా తండ్రి సాయినాథుడు ఎంతో పెద్ద అద్బుతం చేశారు. సరిగ్గా మూడవరోజున మేనేజర్ నా భార్యకి ఫోన్ చేసి, "జరిగిన దాని గురించి ఆలోచించకుండా ట్రైనింగ్‍లో శ్రద్ధగా ఉంటూ అన్నీ సవ్యంగా నేర్చుకో" అని చెప్పారు. ఆ మాటలు విని మేమంతా చాలా ఆశ్చర్యపోయాము. నా తండ్రి సాయినాథుని దయవలన మాత్రమే మేము ఇంత పెద్ద సమస్య నుండి బయటపడ్డాము. అంతేకాదు బాబా ఆశీస్సులతో నా భార్య తన ట్రైనింగ్ విజయవంతంగా పూర్తి చేసుకుని ప్రాజెక్ట్ లో జాయిన్ అయింది. ఇప్పుడు సాయినాథుని దయవలన తన పని తను చక్కగా చేసుకోగలుగుతుంది. అంత పెద్ద క్లిష్ట పరిస్థితి నుంచి మమ్మల్ని కాపాడిన మా సాయినాథునికి కోటానుకోట్ల హృదయపూర్వక కృతజ్ఞతలు సమర్పించుకుంటూ...

అఖిలాండకోటి అనంతకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీసచ్చిదానంద సద్గురు సాయినాథ్ మహరాజ్ కీ జై!!!

---

శ్రీసాయినాథుని కృపాకటాక్షాల వలన తగ్గిన బిపి

ఓం శ్రీసద్గురు సాయినాథ్ మహరాజ్ కీ జై!!!

నాపేరు శ్రీకాంత్. 2022, జనవరి నెల మధ్య నుండి సుమారు 15 రోజులపాటు నా గుండె దగ్గర పట్టినట్లు ఉండటం, గుండె వేగంగా కొట్టుకోవడం, చెమటలు పట్టడం వంటివి జరుగుతుండేవి. డాక్టరుని సంప్రదిస్తే, "మీకు బిపి వచ్చే లక్షణాలున్నాయి. కొన్నిరోజులపాటు రెగ్యులర్‍గా బిపి టెస్టు చేయించుకోండి" అని సూచించారు. దాంతో ఇక బిపి టాబ్లెట్లు వేసుకోక తప్పదని నేను చాలా భయపడి ఆ సాయినాథునికి నమస్కరించి, "బాబా! నా బిపి నార్మల్‍గా ఉండేటట్లు చేయి తండ్రి" అని వేడుకుని రోజూ బాబా ఊదీ నా ఛాతి దగ్గర పెట్టుకోసాగాను. ఆ సాయినాథుని కృపాకటాక్షాల కారణంగా నా బిపి నార్మల్‍కు వచ్చింది. ప్రస్తుతం నేను ఎలాంటి టాబ్లెట్లు వాడటం లేదు. ఇంతటి కృప చూపిన ఆ సాయినాథునికి సాష్టాంగ నమస్కారాలు అర్పిస్తున్నాను. 

అదేవిధంగా జనవరి నెల చివరి వారంలో ఒకరోజు అర్థరాత్రి అనుకోకుండా నా భార్యకు గుండెల్లో దడ, ఆయాసం వచ్చాయి. అప్పుడు నేను ఆ సాయినాథుని ఊదీ ఆమెకు పెట్టి, "ఆమెకు తొందరగా తగ్గేటట్లు చూడు తండ్రి. తగ్గిన వెంటనే ఆమెచేత పాలన్నం, పెరుగన్నం మీకు నైవేద్యం పెట్టిస్తాను" అని మొక్కుకున్నాను. ఆ సాయినాథుని కృపాకటాక్షాలు వలన నా భార్య తిరిగి సాధారణ స్థితికి వచ్చింది. నాకు, నా కుటుంబానికి నిత్యం ఆరోగ్యాన్ని ప్రసాదిస్తున్న ఆ సాయినాథునికి నేను ఎల్లప్పుడూ ఋణపడి ఉంటాను.

సద్గురు శ్రీ సాయినాథ్ మహరాజ్ కీ జై!!!

---

వెర్టిగో నుండి కాపాడిన బాబా

నా పేరు విక్రమ్ రెడ్డి. నేను హైదరాబాద్ నివాసిని. నేను సాయిబాబాకు అత్యంత భక్తుడిని. బాబా దయవలన నేను నా జీవితంలో ప్రతిరోజూ ఆయన అనుగ్రహాన్ని చవిచూస్తున్నాను. ఇటీవల ఒకరోజు నా భార్య, కొడుకు ఒక వివాహా వేడుకకు హాజరయ్యేందుకు వెళ్లారు. వయస్సు పైబడిన నా అత్తమామలు ఇంట్లోనే ఉన్నారు. హఠాత్తుగా నేను వెర్టిగోతో బాధపడ్డాను. తల తిరుగుతున్నట్లు అనిపించడంతో వెంటనే నేను నా కొడుకుకు ఫోన్ చేసి, "పెళ్లి నుండి వచ్చేయండి" అని చెప్పాను. వాళ్ళు వచ్చేలోపు నా భార్య మా ఇరుగుపొరుగు వాళ్ళకి ఫోన్ చేసి, 'నన్ను ఆసుపత్రికి తీసుకెళ్లమ'ని చెప్పింది. వెంటనే ఇరుగుపొరుగు వాళ్ళు వచ్చి నన్ను ఆసుపత్రికి తీసుకెళ్లారు. నన్ను ఎమర్జెన్సీ వార్డులో ఉంచి చికిత్స మొదలుపెట్టారు. కొద్దిసేపట్లో నా భార్య, కొడుకు వచ్చారు. ఇది బాబా నాపై చూపిన గొప్ప అనుగ్రహం. ఎందుకంటే, మా ఇరుగుపొరుగువారి రూపంలో బాబానే నన్ను ఆసుపత్రికి తీసుకెళ్లారు. ఆయన దయతో నేను వెర్టిగో నుండి కోలుకుని ఇప్పుడు బాగున్నాను. "ధన్యవాదాలు సాయిబాబా".

ఓం సాయి శ్రీసాయి జయజయ సాయి!!!

---