సాయిభక్తుల అనుభవమాలిక 1088వ భాగం....

---

ఈ భాగంలో అనుభవాలు:

1. ప్రతి విషయంలోనూ సహాయం అందిస్తున్న బాబా

2. ప్రిన్సిపాల్ మనసు మార్చి సహాయం చేసిన బాబా

3. ఉదయానికి నొప్పి తగ్గించిన బాబా

4. మనసు కుదుటపరిచి సమస్య లేకుండా చేసిన బాబా

---

ప్రతి విషయంలోనూ సహాయం అందిస్తున్న బాబా

ఓం శ్రీసాయినాథాయ నమః!!! అఖిలాండకోటి బ్రహ్మాండనాయకుడు, రాజాధిరాజు యోగిరాజు, పరబ్రహ్మ స్వరూపుడు అయిన సచ్చిదానంద సద్గురు సాయినాథుని దివ్య పాదారవిందములకు శిరసా నా నమస్సులు. సాయిబందువులందరికీ నమస్కారం. నాపేరు శ్రీదేవి. నేను సాయి భక్తురాలిని. సమస్య చిన్నదైనా, పెద్దదైనా బాబాకి మనస్ఫూర్తిగా చెప్పుకుని, ఈ బ్లాగులో పంచుకుంటామని అనుకున్నంతనే ఎందరో భక్తుల కోర్కెలు తీరుస్తున్న సాయితండ్రి ప్రేమను ఏమని చెప్పగలం?. ఆ తండ్రి ప్రేమకు ప్రతిరూపమైన ఆయన ప్రసాదించే ప్రతి అనుభవాన్ని ఈ బ్లాగు ద్వారా మీ అందరితో పంచుకుంటున్నందుకు నాకు సంతోషంగా ఉంది. ఆ అవకాశమిచ్చిన బ్లాగు నిర్వాహకులకు నా హృదయపూర్వక కృతజ్ఞతలు.

మా బాబు పాస్‌పోర్టుకోసం దరఖాస్తు చేసుకున్న చాలా రోజుల తరువాత 2022, జనవరి 26న మాకు పాస్‍పోర్టు పంపబడిందని ఒక మెసేజ్ వచ్చింది. అయితే పోస్టుమెన్ దానిని మాకు తెచ్చివ్వలేదు. నేను అతనిని అడిగితే, "మీకు ఎలాంటి లెటర్ రాలేద"ని చెప్పాడు. అప్పుడు నేను, "బాబా! మీ దయతో పాస్‍పోర్టు వస్తే, నా అనుభవాన్ని సాయి బందువులందరితో పంచుకుంటాన"ని చెప్పుకున్నాను. బాబా కృపతో రెండురోజుల్లో పాస్‍పోర్టు వచ్చింది. "ధన్యవాదాలు బాబా. ఈ అనుభవాన్ని పంచుకోవడానికి ఆలస్యం చేశాను. నన్ను క్షమించండి బాబా".

ఒకసారి మా పాప చైన్‍కోసం నేను ఇల్లంతా వెతికినా కనిపించలేదు. దాంతో పాప ఎక్కడైనా అజాగ్రత్తగా పడేసిందేమోనని నాకు అనిపించింది. అయినా నేను బాబాను తలుచుకుని, "బాబా! ఆ చైన్ ఆచూకీ తెలిస్తే, నా అనుభవాన్ని బ్లాగులో పంచుకుంటాను" అని బాబాకి మొక్కుకున్నాను. తరువాత మా అత్తగారితో, "గొలుసు కనపడటం లేద"ని చెపితే ఆవిడ, "దాన్ని బ్యాంకులో పెట్టాము" అని చెప్పింది. అలా బాబా నా టెన్షన్ తగ్గించారు. "ధన్యవాదాలు బాబా".

2022, ఫిబ్రవరి 8న మా అన్నయ్య అకౌంట్ బుక్ ఇల్లంతా వెతికినా కనిపించలేదని ఇంట్లో అంతా బాధపడుతుంటే నేను వాళ్లతో, "బాబాకి చెప్పుకుని, అకౌంట్ బుక్ దొరికితే బ్లాగులో పంచుకుంటామ"ని చెప్పుకోమన్నాను. నేను చెప్పినట్లే వాళ్ళు బాబాని ప్రార్ధించి మళ్ళీ వెతికితే అకౌంట్ బుక్ కనిపించింది. ఇలా బాబా మాకు అండగా ఉంటూ ప్రతివిషయంలోనూ సహాయం చేస్తున్నారు. మనకు బాబా ఉండగా ఏ విషయంలోనూ భయపడాల్సిన పని లేదు. భారం బాబాకి అప్పజెప్పి మనం ఆయన నామస్మరణ చేసుకుంటే చాలు. అంతా బాబా చూసుకుంటారు. బాబా మీద పరిపూర్ణ విశ్వాసం కలిగి ఉండటమొక్కటే మనం చేయాల్సింది. "బాబా! మీ అనుగ్రహం మా అందరిపై ఎల్లవేళలా ఉండాలి తండ్రి".

---

ప్రిన్సిపాల్ మనసు మార్చి సహాయం చేసిన బాబా

సాయి భక్తులకు నమస్కారం. నేను ఒక సాయి భక్తురాలిని. నేను ఇప్పుడు మీతో బాబా నాకు ప్రసాదించిన ఒక చిన్న అనుభవాన్ని పంచుకోవాలనుకుంటున్నాను. నేను ఇంటర్మీడియెట్ పూర్తిచేసి డిగ్రీ ప్రథమ సంవత్సరంలో చేరాను. ఒకసారి నేను ఇంటర్మీడియట్ చదివిన కాలేజీలో ఉన్న నా సర్టిఫికెట్లకోసం కాలేజీకి వెళ్ళాను. అయితే నేను చదివినప్పుడు ఉన్న ప్రిన్సిపాల్ స్థానంలో కొత్త ప్రిన్సిపాల్ వచ్చి ఉన్నారు. ఆ ప్రిన్సిపాల్ సర్టిఫికెట్లు కావాలంటే 18 వేల రూపాయలు కట్టాలని, ఒక్క రూపాయి తగ్గినా ఎవరికీ సర్టిఫికెట్లు ఇచ్చేది లేదని అన్నారు. దాంతో నేను బాబాకి దణ్ణం పెట్టుకుని, "బాబా! పది వేల రూపాయలు కట్టాల్సిన దానికి అన్యాయంగా 18 వేల రూపాయలు కట్టమంటున్నారు. 10 వేల రూపాయలకే నా సర్టిఫికెట్లు నా చేతికి వస్తే, నా అనుభవాన్ని బ్లాగులో పంచుకుంటాన"ని ప్రార్థించాను. తరువాత మా నాన్న తన స్నేహితుడితో కలసి కాలేజీకి వెళ్లారు. అప్పుడు కూడా ఆ ప్రిన్సిపాల్ 18,000 రూపాయలు కడితేనే సర్టిఫికెట్లు ఇస్తామని అన్నారు. నేను మళ్ళీ నమ్మకంతో బాబాను ప్రార్థించాను. 15 నిమిషాల తర్వాత ప్రిన్సిపాల్ తన మనసు మార్చుకుని 10,000 రూపాయలు కడితే సర్టిఫికెట్లు ఇస్తానని ఫోన్ చేశారు. ఇలా ప్రతీసారి నన్ను కాపాడుతున్న బాబాకు నేను భక్తురాలినవ్వడం నా అదృష్టంగా భావిస్తున్నాను. "చాలా చాలా ధన్యవాదాలు బాబా".

---

ఉదయానికి నొప్పి తగ్గించిన బాబా

ఓం శ్రీసాయినాథాయ నమః!!! సాయి భక్తులకు నమస్కారం. నా పేరు రవీంద్ర. నేను ప్రతిరోజూ 'సాయి మహారాజ్ సన్నిధి' బ్లాగులోని భక్తుల అనుభవాలు చదువుతాను. నేను ఇంతకుముందు కొన్ని అనుభవాలు పంచుకున్నాను. ఇప్పుడు మరో అనుభవం పంచుకుంటున్నాను. నాకు ఎటువంటి సమస్య వచ్చినా బాబాకే చెప్పుకుంటాను. ఆయన నా సమస్యకు పరిష్కారం చూపుతారు. ఈమధ్య ఒకరోజు నేను వంగినప్పుడు వెనుక కండరం పట్టేసింది. నేను, "బాబా! నొప్పి తగ్గిపోతే 'సాయి మహారాజ్ సన్నిధి' బ్లాగులో పంచుకుంటాను" అని బాబాకి మొక్కుకున్నాను. బాబా దయవల్ల ఉదయానికల్లా నొప్పి తగ్గింది. "ధన్యవాదాలు బాబా. నాకు ఉన్న ఇతర ఆరోగ్య సమస్యలను కూడా తొలగించండి బాబా. అందరూ ఆరోగ్యంగా ఉండాలి".

సర్వేజన సుఖినో భవంతు!!!

---

మనసు కుదుటపరిచి సమస్య లేకుండా చేసిన బాబా

సాయి బంధువులకు నమస్కారం. బ్లాగు నిర్వహిస్తున్న వారికి ధన్యవాదాలు. నేను ఒక సాయి భక్తురాలిని. ముందుగా నాయందు ఎప్పుడూ ఉంటూ పిలిచిన వెంటనే పలికే సాయి తండ్రికి కృతజ్ఞతాపూర్వక ప్రణామాలు అర్పించుకుంటూ నా అనుభవాన్ని మీతో పంచుకుంటున్నాను. నాకు ఈ మధ్యనే వివాహం నిశ్చయమైంది. ఒకరోజు నేను నాకు కాబోయే భర్తతో మాట్లాడుతూ మాటల మధ్యలో, "నీ విషయంలో నేను తప్పుడు నిర్ణయం తీసుకున్నాను" అని అనేశాను. ఆ మాటలకి తను 'నువ్వు నాకొద్దు' అనేంతలా బాధపడ్డారు. నాకు ఏం చేయాలో తెలియక, "బాబా! నేను తప్పు చేశాను. తన విషయంలో మాట జారాను" అని బాధతో బాబాకి చెప్పుకుని, "నన్ను మీరే కాపాడాలి బాబా. తన మనసు కుదుటపడి మునుపటిలా నార్మల్ గా ఉంటే నా అనుభవాన్ని బ్లాగులో పంచుకుంటాన"ని మొక్కుకున్నాను. సాయికి నాపై దయ కలిగి నాకు కాబోయే భర్త మనసును కుదుటపరిచారు. ఇప్పుడు తను నాతో బాగా ఉంటున్నారు. "నన్ను నమ్మిన వాళ్ళని ఎప్పటికీ వదిలిపెట్టన"ని బాబా చెప్పారు. అది అక్షరసత్యం. "థాంక్యూ బాబా".

---