.jpeg)
1. కరుణించిన బాబా
2. ఎన్నో విధాలా రక్షణనిచ్చిన బాబా
3. దయతో హాస్పటల్లో చేరాల్సిన పరిస్థితి రాకుండా చూసిన బాబా
కరుణించిన బాబా
ఓం సాయి శ్రీసాయి జయజయ సాయి!!! నేను ఒక సాయి భక్తురాలిని. తోటి సాయి బంధువులకు నమస్కారం. ఈ బ్లాగు నిర్వహిస్తున్న వారికి నా ధన్యవాదాలు. ముందుగా శ్రీసాయినాథుని దివ్య పాదాలకు నమస్కరించి, ఆయన నాకు ఇటీవల ప్రసాదించిన ఒక అనుభవాన్ని స్పష్టంగా తోటి సాయి భక్తులకు తెలియజేయాలనుకుంటున్నాను. నేను ఒక ఉద్యోగస్తురాలిని. నా ఉద్యోగ 'సమయాలు, పనిచేసే ప్రదేశం, చుట్టూ ఉన్న మనుషులు, వారి మనస్తత్వాల కారణంగా నేను కొద్ది రోజులు విశ్రాంతి తీసుకోవాలి అనుకుని మూడు నెలల ముందు అంటే 2021, అక్టోబర్, నవంబర్ ప్రాంతంలో ముప్పై రోజులు సెలవు పెట్టాను. కానీ, 'సెలవు రద్దు చేసుకుని విధులకు హాజరవ్వమ'ని నా తోటి ఉద్యోగస్తులు చేసిన ఒత్తిడి మూలాన నేను ఆ ముప్పైరోజుల సెలవు దినాల్లో పడిన వేదన ఆ సాయినాథునికే ఎరుక. ఆ బాధాకరమైన రోజుల్లో ఈ బ్లాగు నాకు చాలా ఉపశమనం ఇచ్చింది. తోటి సాయి భక్తుల అనుభవాలను చదువుతుంటే నాలో ధైర్యం, కొత్త ఆశ చిగురించింది. నేను బాబాకు చాలా దగ్గరయ్యాను. అనుక్షణమూ నా మనసు 'బాబా బాబా' అని జపిస్తూ ఉండేది. మనసులోని భావాలను ఎవ్వరితోనూ పంచుకునే అలవాటు నాకు లేదు. కేవలం బాబా ముందర నిలబడి ఏడుస్తూ చెప్పుకుని నా సమస్య విషయంగా క్వశ్చన్ & ఆన్సర్ సైటులో బాబా సమాధానం కోసం చూసేదాన్ని. అలా చూసిన సందర్భాలలో ఒకసారి నాకు అనుకూలంగా, ఇంకోసారి "వేచి ఉండమ"ని వచ్చేది. నేను బాబాను చాలా వేదనతో, "నన్ను ఇంకో సెక్షనుకు మార్చండి బాబా ప్లీజ్" అని అడుగుతూ రోజూ సాయి సచ్చరిత్ర పారాయణ చేస్తుండేదాన్ని. ఇలా నా సెలవు దినాలు పూర్తయి తిరిగి నేను నా విధులకు హాజరు కావాల్సిన రోజు వచ్చింది. ఆ రోజు నేను పడ్డ కంగారు కేవలం బాబాకు మాత్రమే తెలుసు. నేను ఆఫీసుకు వెళ్లి నా పై అధికారికి(చీఫ్ ఇంజనీర్), అలాగే సెక్షన్ ఆఫీసరుకి రిపోర్టు చేసాను. పైఅధికారికి రిపోర్టు చేసేటప్పుడు, "నన్ను ఇంకో సెక్షన్కి మార్చమ"ని అభ్యర్థించాను. అందుకాయన సానుకూలంగా స్పందించారు. కానీ తర్వాత ఆర్డర్స్ తీసుకోవడానికని నేను చీఫ్ ఇంజనీర్ గారి ఆఫీసుకు వెళ్ళినప్పుడు నా అభ్యర్థనను వారు పరిగణలోకి తీసుకోలేదని తెలిసింది. అప్పుడు నేను బాధతో, "బాబా! ఈ బిడ్డను మళ్ళీ కష్టాల్లోకి తోసేయకండి ప్లీజ్. మిమ్మల్నే నమ్ముకున్నాను. మీరు ఉన్నారన్న ధైర్యంతో ఉన్నాను" అని చాలా దీనంగా బాబాను వేడుకుంటూ రెండు రోజులు గడిపాను. ఆ రెండు రోజుల్లో బయటకు భయంగా ఉన్నా లోపల మాత్రం 'బాబా ఉన్నారు. భయమెందుకు?' అని అనుకుంటూ ఉండేదాన్ని. చివరికి బాబా కరుణించారు. నన్ను ఇంకో సెక్షనుకు మారుస్తూ ఆర్డర్లు వచ్చాయి. కానీ అవి తాత్కాలికమైన ఆర్డర్లు అన్నారు. "ఇదేంటి బాబా?" అనుకున్నాను కానీ, "బాబా ఉన్నారు" అని నా మనసు నాకు చెప్తుంది. ఆయన కృపవలన అంతా మంచే జరుగుతుందని ఆశిస్తున్నాను. "ధన్యవాదాలు బాబా. ఈ అనుభవం పంచుకోవడానికి చాలా ఆలస్యం చేశాను. నన్ను క్షమించండి బాబా. ఈ ఆలస్యానికి కారణాలు, ఉన్న ఇతరత్రా సమస్యలు మీకు తెలుసు బాబా. వాటిని మీరు త్వరలోనే పరిష్కరిస్తారు. అప్పుడు మళ్ళీ నా అనుభవాలను ఇందులో పంచుకుంటాను తండ్రీ. ఎల్లప్పుడూ మీరు మాకు తోడుగా ఉండాలి బాబా".
ఓం శ్రీసాయినాథాయ నమః!!!
ఎన్నో విధాలా రక్షణనిచ్చిన బాబా
నేనొక సాయి భక్తురాలిని. సాయి బంధువులందరికీ నమస్కారం. మళ్ళీ సాయి కుటుంబంతో కలిసినందుకు, బాబా నాకు ప్రసాదించిన అనుభవాన్ని మీకు తెలియజేస్తున్నందుకు నాకు సంతోషంగా ఉంది. మేము యు.ఎస్.ఏలో ఉంటున్నాము. 2021, డిసెంబరులో మా పిల్లలకి క్రిస్మస్ సెలవులు మొదలవ్వడంతో మేము మా సిస్టర్ కుటుంబంతో కలిసి సెలవులు గడుపుదామని ప్లాన్ చేసుకున్నాము. మూడేళ్ళ తరువాత మేము, మా సిస్టర్ కుటుంబం కలుస్తున్నందుకు మేమంతా చాలా సంతోషించాము. అయితే గురువారం ప్రయాణం అవుతామనగా రెండు రోజుల ముందు మా అబ్బాయికి తీవ్రమైన జ్వరం వచ్చింది. మేము తనని వెంటనే డాక్టరు దగ్గరకి తీసుకెళ్లాము. ఆమె బాబుని పరిశీలించి, "చాలావరకు ఫ్లూ లక్షణాలున్నాయి. ఫ్లూ టెస్టుతో పాటు కోవిడ్ టెస్టు కూడా చేసి నిర్ధారించుకుందాం" అని అన్నారు. దురదృష్టవశాత్తూ బాబుకి కోవిడ్ పాజిటివ్ వచ్చింది. ఒక్కసారిగా మేమంతా షాక్కు గురయ్యాము. వెంటనే బాబును గృహ నిర్బంధంలో ఉంచాము. తరువాత ఎటువంటి లక్షణాలు లేకపోయినప్పటికీ మేము కోవిడ్ పరీక్ష చేయించుకుంటే, మా అందరికీ కూడా పాజిటివ్ వచ్చింది. దాంతో మా ప్రయాణం రద్దు అయినందుకు నా సిస్టర్, పిల్లలు ఏడవడం మొదలుపెట్టారు. నేను కూడా చాలా బాధపడి, "బాబా! ఇలా ఎందుకు జరిగింది?" అని బాబాను అడగసాగాను. కానీ ఆయన నా కర్మను చిన్నదానితో తీసేస్తున్నారు అనుకున్నాను. ఎందుకంటే, మొదటి రెండు కరోనా వేవ్ల్లో మేము కోవిడ్ బారినపడి ఉంటే చాలా కష్టాన్ని అనుభవించి ఉండేవాళ్ళము. ఇకపోతే ప్రయాణానికి ముందే మాకు కోవిడ్ అని తెలియజేసి బాబా మాకు ఎంతో మేలు చేసారు. మొదటిది ప్రయాణ మార్గంలో నా పిల్లలు అనారోగ్యం పాలైతే చాలా బాధపడేవాళ్ళు. రెండవది, మేము మా సిస్టర్వాళ్ళ ఇంటికి వెళ్లి ఉంటే, వాళ్లంతా కూడా కోవిడ్ బారినపడి ఉండేవారు. ఇన్నివిధాలా మేలు చేయడమే కాకుండా కోవిడ్ సమయంలో మాకు పెద్ద ఆరోగ్య సమస్యలేమీ లేకుండా అనుగ్రహించారు బాబా. ఇంకో ముఖ్య విషయం, ఆ కష్ట సమయంలో 2022, జనవరి 1వ తేదీన బాబా మమ్మల్ని తమ గుడికి రప్పించుకుని ఊదీ, ప్రసాదాలను మాకు అనుగ్రహించారు. యు.ఎస్.ఏలో ఉంటున్న ఈ 18 ఏళ్లలో ఇలా ఎన్నడూ జరగలేదు. ఆశ్చర్యకరంగా అదేరోజు మా అందరికీ చాలా శక్తి చేకూరి ఎటువంటి బలహీనత లేకుండా పోయింది. మమల్ని ఆశీర్వదించడానికే బాబా ఆరోజు మమ్మల్ని గుడికి రప్పించుకుని ఊదీ, ప్రసాదాలను ఇచ్చి 'అంతా బాగుంటుంద'ని చెప్పారు. దూరదేశంలో ఉన్నందున నీడలా వెంటుండి బాబా మమ్మల్ని చూసుకున్నారని నా నమ్మకం. "బాబా! నేను ఎంత ఒత్తిడికి గురయ్యానో, మిమ్మల్ని ఎంతలా పిలిచానో మీకు తెలుసు. సదా నా పక్కన నిలబడినందుకు మీకు ధన్యవాదాలు. దయచేసి ఇతర ఒత్తిళ్ల నుండి కూడా నన్ను విడుదల చేసి ఆటంకాలు లేకుండా నా జీవితాన్ని మలచండి బాబా. ఇంకా దయచేసి అందరికీ సహాయం చేయండి బాబా. నేను ఏదైనా తప్పు వ్రాసి ఉంటే దయచేసి క్షమించండి బాబా". త్వరలో మరో అనుభవంతో మీ అందరినీ కలుస్తాను. దయచేసి ప్రతి ఒక్కరూ బాబా చేయి గట్టిగా పట్టుకోండి. ఆయన మనల్ని ఎప్పటికీ ఒంటరిగా వదిలిపెట్టరు. మనకొచ్చే ప్రతి సమస్య మన మంచికోసమే అయుంటుంది. మనం ఎదుర్కుంటున్న సమస్యను బాబా అప్పటికే తగ్గించి ఉంటారని, దాని పరిష్కారం ఆయన చేతిలో ఉంటుందని, సరైన సమయంలో ఆయన మనల్ని ఆ సమస్యల నుండి బయటపడేస్తారని గుర్తుంచుకోండి.
శ్రీసాయినాథార్పణమస్తు.
దయతో హాస్పటల్లో చేరాల్సిన పరిస్థితి రాకుండా చూసిన బాబా
అందరికీ నమస్కారం. నా పేరు అరుణ. సాయి నాకు ప్రసాదించిన ఇంకొక అనుభవంతో నేను మళ్ళీ మీ ముందుకు వచ్చాను. మా బాబుకి పది నెలల వయస్సు. పుట్టినప్పటి నుంచి తనకి ఎలాంటి ఆరోగ్య సమస్యలు లేవు. అలాంటిది 2022, ఫిబ్రవరి నెలాఖరులో ఒకరోజు రాత్రి ఒంటిగంటకు తనకి బాగా వాంతులు, విరోచనాలు అయ్యాయి. అర్థరాత్రి అలా అవ్వడం వల్ల నేను చాలా భయపడ్డాను. మందులు వేసిన తర్వాత కూడా తగ్గకపోయేసరికి నేను చాలా ఆందోళనకి గురయ్యాను. విరోచనాలవ్వడం కాస్త నెమ్మదించినా వాంతులు అలాగే అవసాగాయి. అప్పుడు నేను, "బాబా! ఈరోజు సాయంత్రం వరకు బాబుకి వాంతులు కాకుండా ఉంటే, ఈ అనుభవాన్ని బ్లాగులో పంచుకుంటాను" అని బాబాకి మ్రొక్కుకున్నాను. బాబా దయవల్ల బాబుకి వాంతులు తగ్గాయి. ఇప్పుడు బాగున్నాడు. అయితే, విరోచనాలు ఇంకా అడపాదడపా అవుతున్నాయి. కానీ అంత ఇబ్బందిలేదు. బాబా దయవల్ల తగ్గిపోతాయనే విశ్వాసంతో నా అనుభవాన్ని ముందుగానే మీతో పంచుకున్నాను. "ధన్యవాదాలు బాబా. దయతో హాస్పటల్లో చేరాల్సిన పరిస్థితి రాకుండా చూసారు తండ్రి. ఇలాగే నాకున్న ఆరోగ్య సమస్య తగ్గేలా చేయండి బాబా. ఇంకా నాకున్న రెండు కోరికలు తీరుస్తారని ఆశిస్తున్నాను బాబా. మీ ఆశీస్సులు మా మీద ఎప్పుడూ ఇలాగే ఉండాలి తండ్రి".
