సాయిభక్తుల అనుభవమాలిక 1123వ భాగం....

---

ఈ భాగంలో అనుభవాలు:

1. ప్రతిక్షణం తోడుండే బాబా

2. నాన్న ఆరోగ్యం విషయంలో బాబా చేసిన సహాయం

3. బాబా దయ

---

ప్రతిక్షణం తోడుండే బాబా

నేను ఒక సాయి భక్తురాలిని. ప్రతిక్షణం తోడుగా ఉండి మన బాధలను తీర్చే సాయికి నేను ఎప్పటికీ ఋణపడి ఉంటాను. నేను ఇంతకు ముందు కొన్ని అనుభవాలను ఈ బ్లాగులో పంచుకున్నాను. ఇప్పుడు మరికొన్ని అనుభవాలు పంచుకుంటున్నాను. ఒకరోజు నేను రోడ్డు మీద ప్రయాణిస్తూ మన 'సాయి మహారాజ్ సన్నిధి' వాట్సాప్ గ్రూపులో ఈ క్రింది ఆర్టికల్ చదివాను. 

భక్తుడు: బాబా అనుగ్రహం వలన మనం సహాయం పొందినప్పుడు, బాబానే మనకు సహాయపడ్డారని మనకెలా తెలుస్తుంది?

🌹గురువుగారు: బాబా ఆ విషయం మీకు స్పష్టంగా తెలిసేటట్లు చేస్తారు. అది బాబా పద్ధతి. ఆయన మీకు ఏదైనా ఇవ్వడమే కాదు, అది తామే ఇచ్చామని మీకు తెలిసేటట్లు చేస్తారు కూడా! బాబా ఇచ్చే అనుభవాలు ఎంతో స్పష్టంగానూ మీరు మరోరకంగా అనుకోవడానికి వీలు లేకుండానూ ఉంటాయి. ఈ దృష్ట్యా బాబా ఇచ్చే అనుభవాలు అద్వితీయమైనవి. మీరు బాబాను ఏదైనా అడిగినప్పుడు, అది బాబానే ఇచ్చారు అనే విషయం మీకు ఎలాగోలా తెలుస్తుంది. ఎవరో ఒకతనికి  ఒక ప్రమాదం జరుగుతుంది. కారు పల్టీలు కొట్టినప్పటికీ లోపల ఉన్న అతను ఎటువంటి దెబ్బలూ  తగలకుండా బయటపడతాడు. వెంటనే అతనికి ప్రక్కన పోతున్న వేరే కారు కనిపిస్తుంది. దాని మీద అతనికి బాబా ఫోటో కనిపిస్తుంది  "నేను నీ వెనుకనే ఉన్నాను, నేను నిన్ను రక్షించాను" అని అభయమిస్తున్నట్లుగా!  ప్రమాదం జరిగిన తరువాత అతను చూసిన తొలి వాహనమది. ఆ కారు తనదారిన తాను వెళ్ళిపోయింది. కానీ, ఇతను బాబా ఫోటోను చూశాడు. బాబా ఆ విషయం నీకు తెలిసేటట్లు చేస్తారు. ఈ విషయంలో ఆయన చాలా ఖచ్చితంగా ఉంటారు! 

source:  శరశ్చంద్రికలు.

అది చదివిన తర్వాత నా మనసులో, "బాబా! మీరు నిజంగా నా బాధలు వింటుంటే, నేను చెప్పింది మీకు తెలుస్తుంటే ఇప్పుడే ఒక ఐదు నిమిషాల్లో ఏదో ఒక రూపంలో మీరు నాకు కనిపించండి. అదే జరిగితే నా అనుభవాన్ని బ్లాగులో పంచుకుంటాను" అని అనుకున్నాను. ఆశ్చర్యంగా కొద్దిసేపట్లో నాకు ఒక బాబా మందిరం కనిపించింది. నిజానికి ఎన్నోసార్లు నేను ఆ మార్గంలో వెళ్లి ఉన్నాను. కానీ అక్కడొక మందిరం ఉందని నాకు గుర్తు కూడా లేదు. అలాంటిది ఎప్పటికీ గుర్తు ఉండిపోయాలా నేను కోరుకున్న వెంటనే బాబా నాకు దర్శనం ఇచ్చారు. "చాలా చాలా ధన్యవాదాలు బాబా. మీరు నా పక్కనే ఉండి  నా బాధను వింటారన్న ధైర్యం నాకిచ్చారు తండ్రి. నేను ఒక సమస్యతో బాధపడుతున్నాను. ఆ విషయం మీకు తప్ప ఎవరికీ చెప్పుకోలేను. ఆ విషయంలో నేను అనుకున్నట్లు చేసి జీవితంలో నాకు మనశ్శాంతిని ఇవ్వు తండ్రి. ఏం చేసి మీ ఋణం తీర్చుకోవాలో నాకు తెలియదు బాబా. జన్మజన్మలకు మీకు ఋణపడి ఉంటాను తండ్రి. ఐ లవ్ యు సో మచ్ బాబా".

---

నాన్న ఆరోగ్యం విషయంలో బాబా చేసిన సహాయం

నా పేరు పెద్దారావు. నేను ఒక సాయి భక్తుడిని. నా జీవితంలో బాబా నాకోసం ఎన్నో చేశారు. వాటిలో నుండి ఒక సంఘటనను నేనిప్పుడు మీతో పంచుకోవాలనుకుంటున్నాను. ఒకసారి మా నాన్నగారు చాలా అనారోగ్యం పాలయ్యారు. డాక్టర్లు స్కాన్ చేసి కూడా సమస్యను గుర్తించలేకపోయారు. చివరికి డాక్టర్లు నాన్న కడుపు ఓపెన్ చేసి పెద్దప్రేగుల్లో సుమారు 1.5 కిలోల క్యాన్సర్ తిత్తి ఉందని గుర్తించారు. 6 గంటలపాటు కొలోస్టోమీ శస్త్రచికిత్స చేసి అంత పెద్ద తిత్తిని విజయవంతంగా తొలగించారు. అయితే అది క్యాన్సర్ తిత్తి అయినందున పెద్దప్రేగును తిరిగి కడుపులో పెట్టకుండా నాన్న శరీరంలో ఏడమవైపున ఛాతీకి కొంచం దిగువగా బయటే ఉంచి దానికి ఒక బ్యాగు పెట్టారు. దాని ద్వారా మలవిసర్జన జరుగుతుంది. కొన్నిసార్లు నాన్న ఆహారం తీసుకునేటప్పుడే మలవిసర్జన జరిగేది. ఇదంతా నాన్నకి చాలా అసౌకర్యంగా ఉండేది. ఆయన దానితో 8 నెలలకు పైగా చాలా కష్టాన్ని అనుభవించారు. పెద్దప్రేగును కడుపులో అమరిస్తేనే మలవిసర్జన చేయడం నాన్నకి ఇబ్బంది లేకుండా ఉంటుంది. కానీ అలా చేయాలంటే శరీరంలోని ఏ భాగంలోనూ క్యాన్సర్ లేదన్న ఋజువు డాక్టరుకి కావాలి. కారణం, ఏవైనా కాన్సర్ కణాలుంటే అవి శరీర భాగాలన్నిటిపై ప్రభావం చూపుతాయి. అందుచేత నాన్న శరీరంలో ఏవైనా కాన్సర్ కారక కణాలున్నాయేమో అని తెలుసుకోవడానికి మేము పీ.ఈ.టీ స్కాన్‍కి వెళ్లాము. అప్పుడు నేను నాన్న శరీరంలో క్యాన్సర్ కణాలు ఉన్నాయేమోనని అనుమానించి, "ఏదైనా అద్భుతం చేసి మాకు సహాయం చేయమ"ని బాబాను ప్రార్థించాను. బాబా దయవలన పి.ఈ.టి స్కాన్ రిపోర్టు నార్మల్ అని వచ్చింది. తరువాత డాక్టరు పెద్ద ఆపరేషన్ చేయాలని సూచించారు. దానికి  దాదాపు 4.5 లక్షలు ఖర్చు అవుతుంది. ఆ సమయంలో బాబా మరో అద్భుతమైన సహాయం చేసారు. ఆయన మరొక డాక్టరు రూపంలో వేరే హాస్పిటల్‍కి వెళ్ళమని, అక్కడ సర్జరీ ఉచితంగా చేస్తారని నాతో చెప్పారు. ఇంకా ఆయనే మమ్మల్ని ఆ ఆసుపత్రికి తీసుకెళ్లారు, సర్జరీ విజయవంతమయ్యేలా చేసారు. అంతేకాదు హాస్పిటల్ నుండి 300 కిలోమీటర్ల దూరంలో ఉన్న మా ఇంటికి ఎటువంటి ఇబ్బంది లేకుండా సురక్షితంగా చేర్చారు. ఇప్పుడు మా నాన్న ఆరోగ్యం నిలకడగా ఉంది, ఆయన సాధారణ స్థితికి వచ్చారు. ఆ సమయంలో ఆటోడ్రైవర్, నర్సులు, డాక్టర్లు, ఇంకా అనేక ఇతర రూపాల్లో కూడా బాబా మాకు సహాయం చేసారు. నాకోసం ఇంత చేసిన బాబాకు నేను ఋణపడి ఉంటాను. "చాలా చాలా ధన్యవాదాలు బాబా".

---

బాబా దయ

 

నా పేరు అలేఖ్య. బాబాకి అనంతవేల కోట్ల కృతజ్ఞతలు. 'సాయి మహారాజ్ సన్నిధి' బ్లాగుకి చాలా ధన్యవాదాలు. నేను ఇదివరకు కొన్ని బాబా లీలలు ఈ బ్లాగు ద్వారా మీ అందరితో పంచుకున్నాను. ఇప్పుడు ఇటీవల బాబా ప్రసాదించిన మరో అనుభవాన్ని పంచుకుంటున్నాను. 2022, మార్చి 1,  శివరాత్రి రోజు రాత్రి మా బాబు ఎందుకో బాగా ఏడ్చాడు. నిజానికి వాడు ఎప్పుడూ ఏడవడు. అలాంటి వాడు అలా ఏడుస్తుండేసరికి నాకు చాలా బాధేసింది, టెన్షన్‍గా అనిపించింది. అప్పుడు నా కొడుకుకి బాబా ఊదీ పెట్టి, "బాబా! నా కొడుకు ఏడవడం ఆపేస్తే, మీ అనుగ్రహాన్ని బ్లాగులో పంచుకుంటాను" అని బాబాను ప్రార్థించాను. తరువాత ఏలూరి శాంకరి అమ్మవారి తత్వమాల పారాయణ చేశాను. అంతే, బాబా దయవల్ల బాబు ఏడుపు ఆపేసి యాక్టివ్ అయ్యాడు. అలాగే తత్వమాల పారాయణతో బాబా దయవల్ల మా అమ్మకి దగ్గు తగ్గింది. "ధన్యవాదాలు బాబా".

---