సాయిభక్తుల అనుభవమాలిక 1098వ భాగం....

---

ఈ భాగంలో అనుభవాలు:

1. టెన్షన్ వలదు - బాబా మార్గం చూపుతారు

2. ఆరోగ్యం బాగుండేలా సహాయం చేసిన బాబా

3. బాబా దయ ఉంటే కానిది ఏముంది?

---

టెన్షన్ వలదు - బాబా మార్గం చూపుతారు

ఓం సాయి శ్రీసాయి జయజయ సాయి. ముందుగా సాయినాథుని పాదపద్మములకు నా శతకోటి పాదాభివందనాలు. సాయి బంధువులకు నమస్కారాలు. నేను 30 సంవత్సరాల నుండి సాయి భక్తురాలిని. ఆ సాయినాథుని అనుగ్రహంతో నాకు ఎన్నో అనుభవాలు జరిగాయి, బాబా ఎన్నో నిదర్శనాలు చూపారు. ఆయన నన్ను ఒక గండం నుండి కాపాడారు. ఈరోజు నేను ఇలా ఉన్నానంటే సాయినాథుని దయవల్లే. ఇప్పుడు ఇటీవల జరిగిన ఒక అనుభవాన్ని పంచుకుంటాను. 2021, ఆగష్టులో సాయినాథుని దయవల్ల మా పాపకి చాలా మంచి సంబంధం వచ్చింది. ఆ సంబంధం కుదరడంతో ఆగష్టు 15న వేరే ఊరిలో నిశ్చితార్థం పెట్టుకున్నాము. ఒక గంటలో బయలుదేరుతామని అన్ని సర్దుకుంటుండగా నగలు కూడా పెట్టుకుందామని చూస్తే పట్టణంలోని లాకరులో ఉన్న నగలు తెచ్చుకోవడం మర్చిపోయాను అని తెలిసింది. ఆరోజు బ్యాంకు సెలవు కూడా. దాంతో ఏం చేయాలో తెలియక నేను చాలా టెన్షన్ పడ్డాను. అప్పుడు మా పాప, "టెన్షన్ పడకు అమ్మ. బాబా ఏదైనా మార్గం చూపుతారు" అంది. మా ఇంట్లో హాల్లో ఒక పెద్ద బాబా ఫోటో ఉంది. అక్కడికి వెళ్ళి, "సాయినాథా! నాకు మార్గం చూపించండి" అని బాబాను వేడుకున్నాను. నిజంగా చాలా అద్భుతం చూపారు సాయితండ్రి. మావారు తెలిసిన వాళ్ళకి ఫోన్ చేసి విషయం చెప్పారు. వాళ్ళు వెంటనే బ్యాంకు మేనేజర్‌కి ఫోన్ చేసి, "ఒకసారి లాకర్ ఓపెన్ చేయగలరా?" అని అడిగారు. అందుకు ఆ మేనేజర్, "సెలవు రోజు కదా, ఆగస్టు 15న లాకర్ తెరవము. అయినా అవకాశం ఉందేమో చూస్తాను" అని అన్నారు. తరువాత ఆయన లాకర్ తెరిచే వ్యక్తికి ఫోన్ చేస్తే, అతను వస్తాను అన్నాడు. తరువాత కాసేపట్లో లాకర్ ఓపెన్ చేసి మాకు కావాల్సిన వడ్డాణం మాకు ఇచ్చారు. ఇక నిశ్చితార్థం బాగా జరిగింది. ఇదంతా ఆ సాయితండ్రి వల్లే జరిగింది. తరువాత ఆ సాయినాథుని ఆశీస్సులతో నవంబరు 17న మా అమ్మాయి పెళ్ళి చాలా బాగా జరిగింది. "చాలా చాలా ధన్యవాదాలు తండ్రి. ఆలస్యంగా బ్లాగులో పంచుకున్నందుకు నన్ను క్షమించండి సాయితండ్రి".

ఫిబ్రవరి 5న మా అమ్మాయి పుట్టినరోజు. ఈ సంవత్సరం తను వాళ్ళ అత్తగారింట్లో ఉంది. పుట్టినరోజునాడు తన దగ్గరకి వెళదామని ఆరోజు తెల్లవారుఝామున మేము బయలుదేరి కారులో వెళ్తూ 7గంటలప్పుడు ఒక చోట టిఫిన్ చేద్దామని ఆగాము. టిఫిన్ చేసి అరగంట తర్వాత కారు స్టార్టు చేస్తే స్టార్టు కాలేదు. ఇంకా 3గంటలు ప్రయాణం చేస్తే కాని మా అమ్మాయి వాళ్ళ ఇంటికి చేరుకోలేము. కానీ అరగంటసేపు ఎంత ప్రయత్నించినా కారు స్టార్టు కాలేదు. అక్కడ 10 కిలోమీటర్ల దూరంలో మాత్రమే మెకానిక్ దొరుకుతారు అని చెప్పారు. మాకు ఏమి చేయాలో తెలియలేదు. నేను వెంటనే, "సాయితండ్రి! కారు స్టార్ట్ అయితే బ్లాగులో పంచుకుంటాను" అని సాయితండ్రికి మొక్కుకున్నాను. తరువాత మావారు దగ్గరలో ఎవరైనా మెకానిక్ దొరుకుతారేమోనని ఫోన్‌లో చూస్తుంటే బాబా దయవల్ల ఒక మెకానిక్ ఫోన్ నెంబరు దొరికింది. అయితే ఫోన్ చేస్తే, అతను ఫోనే తీయలేదు. మేము ఇప్పుడేం చేయాలని అనుకుంటుండగా అతనే మాకు కాల్ చేసి ఎవరు అని అడిగాడు. మేము అతనితో పరిస్థితి ఇది అని చెప్పాం. అతను ఫోన్ మా కారు డ్రైవరుకి ఇవ్వమని, కారును కొద్ది దూరం తోస్తే, స్టార్టు అవుతుందని చెప్పాడు. బాబా దయవల్ల కొద్ది దూరం తోయగానే కారు స్టార్టు అయింది. మేము క్షేమంగా మా అమ్మాయివాళ్ళ ఇంటికి చేరుకున్నాము. అప్పటివరకు స్టార్ట్ అవ్వని కారు సాయితండ్రిని వేడుకోగానే ఐదు నిమిషాల్లో జరిగిన సాయి మహిమ ఇది. "ధన్యవాదాలు బాబా". ఇంకా రెండు అనుభవాలతో మళ్లీ మీ ముందుకు వస్తాను.

---

ఆరోగ్యం బాగుండేలా సహాయం చేసిన బాబా

నా పేరు శ్వేత. ముందుగా ఎల్లప్పుడూ నాకు తోడుగా ఉండే సాయినాథునికి నా శతకోటి వందనాలు. తోటి సాయి బంధువులందరికీ నా నమస్కారాలు. ఈ బ్లాగు నిర్వహిస్తున్న సాయి అన్నయ్యకు కృతజ్ఞతలు. నేనిప్పుడు ఇటీవల బాబా నాకు ప్రసాదించిన ఒక అనుభవం మీతో పంచుకోవాలనుకుంటున్నాను. ఈమధ్య మా ఇంట్లో అందరికీ కరోనా వచ్చి తగ్గింది. బాబా దయవల్ల అందరం బాగున్నాము కానీ, మా ఇంటి పెద్ద అయిన మా మామయ్యగారిని కోల్పోయాం. చాలా బాధేసినప్పటికీ బాబా మమ్మల్ని చల్లగా చూసుకుంటారని ధైర్యంతో ఉన్నాము. ఇకపోతే చాలారోజుల క్రితం మావారి పన్ను ఒకటి తీసేయాలని డాక్టరు చెప్పారు. కానీ ఏదో ఒక పని ఉండటం వల్ల పన్ను తీయించడానికి సమయం దొరకలేదు. 2022, ఫిబ్రవరి రెండవ వారంలో మా పిల్లలిద్దరికీ కొంచెం పంటి సమస్య ఉండటం వల్ల డెంటిస్ట్ దగ్గరకి తీసుకుని వెళ్ళాము. అప్పుడు మావారికి తను కూడా పన్ను తీయించుకోవాలన్న సంగతి గుర్తొచ్చి డాక్టరుని అడిగితే, "సరే, రాత్రి భోజనం చేశాక రండి. పన్ను తీసేస్తాను" అన్నారు. దాంతో నేను, మావారు ఆ రోజు రాత్రి భోజనం చేసాక వెళితే, పది నిమిషాల్లో పన్ను తీసి, మందులిచ్చి పంపించారు. ఇంటికి వచ్చాక మావారు మందులు వేసుకున్నారు. కాసేపటికి అదే పనిగా ఆయనకు వాంతులు మొదలయ్యాయి. నేను, "బాబా! వాంతులు ఆగిపోయేలా చూడు స్వామి. అది జరిగితే నేను ఈ అనుభవాన్ని బ్లాగులో పంచుకుంటాను" అని బాబాను వేడుకున్నాను. సమయానికి మా ఆడపడుచు భర్త ఇంట్లోనే ఉన్నారు. ఆయన వెంటనే మావారిని పక్కనే ఉన్న హాస్పిటల్‍కి తీసుకుని వెళదామన్నారు. సరేనని, మావారిని వెంటనే హాస్పిటల్‍కి తీసుకుని వెళ్ళాము. అక్కడ వాళ్ళు వాంతులు ఆగడానికి మావారికి ఇంజెక్షన్ వేశారు బాబా దయవల్ల మారికి వాంతులు ఆగిపోయాయి. ఇప్పుడు మావారు బాగున్నారు. "మీ చల్లని దయ మా అందరిపై ఎప్పుడూ ఇలానే ఉండేలా చూడండి సాయి. అన్నిటికీ మీకు చాలా చాలా ధన్యవాదాలు సాయి. ఏమైనా తప్పులు ఉంటే క్షమించండి బాబా".

---

బాబా దయ ఉంటే కానిది ఏముంది?

శ్రీసచ్చిదానంద సద్గురు సాయినాథ్ మహరాజ్ కి జై!!!

సద్గురు శ్రీసాయినాథుని శరత్ బాబూజీ కి జై!!!

ముందుగా ఈ బ్లాగు నిర్వహిస్తున్నవారికి నా హృదయపూర్వక ధన్యవాదాలు. నా పేరు జ్యోతి. బాబా దయవలన మా కుటుంబమంతా ఆయన భక్తులం. ఇంతకు పూర్వం నా భర్త కొన్ని అనుభవాలు మీతో పంచుకున్నారు. ఇప్పుడు బాబా నాకు ప్రసాదించిన అనుభవాన్ని మీతో పంచుకుంటున్నందుకు సంతోషంగా ఉంది. మేము కొంతకాలంగా ఆర్థికపరమైన ఇబ్బందులు చాలా అనుభవిస్తుండగా కరోనా కారణంగా అవి ఇంకా ఎక్కువ అయ్యాయి. అటువంటి పరిస్థితుల్లో నా చెల్లి, తన భర్త సంక్రాంతి పండుగకు మా ఇంటికి వస్తున్నామని చెప్పారు. వాళ్ళు కొత్తగా పెళ్ళైన జంట. వాళ్ళను చూసుకోవడానికి సమయానికి మా దగ్గర డబ్బులు లేనందున నేను, "బాబా! పెళ్ళైన తరువాత మొదటిసారి నా చెల్లి, తన భర్త మా ఇంటికి వస్తున్నారు. మా ఆర్థిక పరిస్థితి అంతంత మాత్రంగా ఉంది. మీరే ఈ సమస్యను పరిష్కరించాలి తండ్రి" అని బాబాను వేడుకున్నాను. ఇంకా, "నా అనుభవాన్ని బ్లాగులో పంచుకుంటాను తండ్రి" అని కూడా అనుకున్నాను. బాబా దయ ఉంటే కానిది ఏముంది? ఆయన దయవల్ల సమయానికి డబ్బులు అందాయి. నా చెల్లి వాళ్లకు కొత్త బట్టలు పెట్టి ఆనందంగా పండుగ చేసుకున్నాము. "ధన్యవాదాలు బాబా! నా అనుభవాన్ని పంచుకోవటం ఆలస్యమైనందుకు నన్ను మన్నించండి. ఆర్థిక ఇబ్బందులను తట్టుకోలేకపోతున్నాము సాయీ. మమ్మల్ని ఈ సమస్యల నుంచి గట్టెక్కించు తండ్రి. మీరు తప్పితే మాకు దిక్కులేదు బాబా. నువ్వే మా కుటుంబానికి రక్షణ బాబా. సాయి... సాయి.. సాయి".

---