1. సాయిబాబా అనుగ్రహం
2. బాబా ఎప్పుడూ మనల్ని బాధపెట్టరు, నిరాశపరచరు
3. స్వప్నంలో బాబా ఉపదేశం
సాయిబాబా అనుగ్రహం
ఓం సాయి శ్రీసాయి జయజయ సాయి!!! ముందుగా సాయిబంధువులందరికీ నమస్కారం. బ్లాగ్ నిర్వహిస్తున్న వారికి ధన్యవాదాలు. నా పేరు పి.సి.శేఖర్. నేను ఏడు సంవత్సరాలుగా సాయిభక్తుడిని. నేను ఇంతకుముందు కొన్ని అనుభవాలు పంచుకున్నాను. ఇప్పుడు మరికొన్ని అనుభవాలు పంచుకుంటున్నాను. నాకు, నేను పని చేసే స్కూల్లోని నరేష్ సార్కి పిల్లలు లేరు. మేము 2022, ఫిబ్రవరి 28వ తేదీ మధ్యాహ్నం 'ఏ దేవుణ్ణి పూజిస్తే పిల్లలు పుడతారు? ఏ హాస్పిటల్లో చికిత్స బాగుంటుంది?' అనే విషయాలపై చర్చించుకున్నాము. తరువాత నేను 'సాయి మహారాజ్ సన్నిధి' బ్లాగు ఓపెన్ చేస్తే, అక్కడ 'సాయిభక్తుల అనుభవమాలిక 1064వ భాగం....'లో సాయిని ప్రార్థించడం ద్వారా ఒక భక్తురాలికి బాబు పుట్టాడని, మరో భక్తుడి భార్య గర్భం దాల్చిందని ఉంది. నేను చాలా ఆశ్చర్యపోయాను. కాసేపటి క్రితం మేము చర్చించుకున్న దానికి బాబా అలా సమాధానం ఇచ్చారని చాలా సంతోషించాను.
తరువాత మహాశివరాత్రి రోజు ఉదయం నేను 'సాయి మహారాజ్ సన్నిధి' బ్లాగు ఓపెన్ చేస్తే, "నీకోసం నేను విమానాన్ని పంపి, దానిలో నిన్ను కూర్చుండబెట్టి తీసుకుని వెళ్తాను. నీవు నిశ్చింతగా ఉండు!" అన్న బాబా మెసేజ్ వచ్చింది. అది చూసి నాకు చాలా చాలా సంతోషంగా అనిపించింది. అదేరోజు నేను అదివరకు క్రియేట్ చేసిన ఒక ఫ్రీ వెబ్సైటును ఓపెన్ చేయాలనుకుంటే ఆ వెబ్సైటు అడ్రస్ గుర్తు రాలేదు. అప్పుడు నేను సాయిబాబాను ప్రార్థించి గూగుల్లో సెర్చ్ చేస్తే కాసేపట్లో ఆ వెబ్సైటు వచ్చింది. "ధన్యవాదాలు బాబా".
నేను రోజూ పొద్దున్నే సాయినాథ అష్టోత్తర శతనామావళి, సాయి కష్ట నివారణ స్తోత్రం, శ్రీసాయినాథా మూలబీజాక్షర మహామంత్ర స్తోత్రం, శ్రీసాయిబాబా అష్టకం, శ్రీసాయి ఊదీ ధారణ, మానసిక పూజ(రోజుకు నాలుగుసార్లు), సాయి సచ్చరిత్ర ఒక అధ్యాయం, గురుచరిత్రలో ఒక అధ్యాయం పారాయణ చేస్తాను. అయితే 2021, డిసెంబర్ 06న కొద్దిగా ఆలస్యమై నా నిత్యక్రమం మొదలుపెట్టేసరికి పాలబ్బాయి వచ్చే సమయం అయింది. అప్పుడు నేను బాబాను, "బాబా! పాలబ్బాయి కొంచెం ఆలస్యంగా వచ్చేలా అనుగ్రహించండి" అని వేడుకున్నాను. నేను కోరుకున్నట్లే పాలబ్బాయిని ఆలస్యంగా పంపించారు బాబా. ఈ అవకాశమిచ్చిన సాయికి, 'సాయి మహారాజ్ సన్నిధి' బ్లాగు నిర్వాహకులకు చాలా చాలా ధన్యవాదాలు. "ఎల్లప్పుడూ ఇలాగే మమ్మల్ని అనుగ్రహించండి బాబా. అందరూ సచ్చరిత్ర చదివి మీ అనుగ్రహానికి పాత్రులవ్వాలని కోరుకుంటున్నాను తండ్రి".
బాబా ఎప్పుడూ మనల్ని బాధపెట్టరు, నిరాశపరచరు
శ్రీసాయినాథ్ మహరాజ్ కి జై!!! సాయి బంధువులకు నమస్కారం. ఈ బ్లాగు నిర్వహిస్తున్న సాయికి కృతజ్ఞతలు. బ్లాగులో పంచుకుంటామని సాయికి చెప్పుకోవడం వల్ల చాలా సమస్యలు తీరుతున్నాయి. నేను ఈరోజు ఇటీవల బాబా నాకు ప్రసాదించిన రెండు అనుభవాలను పంచుకోబోతున్నాను. ఈ మధ్య మానాన్న మా ఊరు వచ్చి రాత్రి తిరుగు ప్రయాణమవుతుంటే బస్సు సమయానికి రాలేదు. నిజానికి అప్పటికే చాలా ఆలస్యమైంది. చాలాసేపు వేచి చూసాక మా ఊరు వైపు వెళ్లే వేరే బస్సు వచ్చింది. నాన్న ఆ బస్సు ఎక్కారు. అయితే ఆ బస్సు ఊరికి దూరంగా రాత్రి 12 గంటల సమయంలో ఆగుతుంది. నాన్న దగ్గర చాలా విలువైన వస్తువులున్నాయి. అందువలన మాకు చాలా టెన్షన్గా అనిపించింది. నేను, "బాబా! నాన్నని క్షేమంగా ఇంటికి చేర్చు. అలా జరిగితే, నేను నా అనుభవాన్ని బ్లాగులో పంచుకుంటాను" అని బాబాతో చెప్పుకున్నాను. 12 గంటలకి నాన్నకి ఫోన్ చేస్తే, "బస్సు దిగగానే తెలిసినవాళ్ళు కనిపించారు. వాళ్ళ స్కూటర్ ఉంటే ఇంటికి వెళ్తున్నాను" అని చెప్పారు. వేళకాని వేళలో బాబా నాన్నకి ఆ విధంగా సహాయం చేశారు. "ధన్యవాదాలు బాబా".
ఇంకొకసారి నాన్న వేరే వాళ్ళ దగ్గరకెళ్ళి బంగారం వస్తువొకటి తెమ్మని మాతో చెప్పారు. దాన్ని తర్వాత రోజు మేము నాన్నకి చేర్చాలి. మేము వెళ్లి ఆ వస్తువు తీసుకున్నాము. మావారు దాన్ని తన జేబులో పెట్టుకున్నారు. తర్వాత మిగతా పనులన్నీ చూసుకుని ఇంటికి వచ్చాక చూస్తే, ఆ వస్తువు జేబులో లేదు. మాకు చాలా ఆందోళనగా అనిపించింది. నేను, "బాబా! ఆ వస్తువు వెంటనే దొరికితే, నా అనుభవాన్ని బ్లాగులో పంచుకుంటాను" అని బాబాకి చెప్పుకున్నాను. తరువాత మేము వచ్చిన దారిలో వెతకడానికి వెళ్ళాము. నేను దారంతా 'ఓం శ్రీసాయి సూక్ష్మాయ నమః' అనే నామాన్ని చెప్పుకుంటూ ఉన్నాను. దారంతా వెతికాము కానీ, ఆ వస్తువు ఎక్కడా దొరకలేదు. అప్పుడు మేము వెళ్లొచ్చిన మా ఫ్రెండ్ వాళ్ళకి ఫోన్ చేసి విషయం చెప్పి, "మీ ఇంటి దగ్గర ఎక్కడైనా పోగొట్టుకున్నామేమో! కాస్త చూడండి" అని చెప్పాము. వెంటనే ఇంటి బయట చూసిన వాళ్ళ అబ్బాయి. "రోడ్డు మీద ఆ ప్యాకెట్ పడి ఉంద"ని చెప్పారు. నేను ఆనందంతో మనసులోనే బాబాకి కృతజ్ఞతలు చెప్పుకున్నాను. మన బాబా ఎప్పుడూ మనల్ని బాధపెట్టరు, నిరాశపరచరు.
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీసాయినాథ్ మహరాజ్ కి జై!!!
స్వప్నంలో బాబా ఉపదేశం
సాయి బంధువులందరికీ నమస్కారం. నా పేరు మహేష్. నాకు బాబా అంటే చాలా ఇష్టం. ముందుగా శ్రీసాయినాథునికి నమస్కరిస్తూ ఆయన ఇటీవల నన్ను అనుగ్రహించిన తీరును నేనిప్పుడు మీకు తెలియజేస్తున్నాను. 2022, ఫిబ్రవరి 17, తెల్లవారుఝామున బాబా నాకు స్వప్న దర్శనమిచ్చారు. ఆ స్వప్నంలో బాబా ఒక ఇంట్లో ఉన్నారు. ఆయన తమ తలకి గుడ్డ కట్టుకుని, కఫనీ ధరించి ఎంతో తేజోవంతంగా వెలిగిపోతున్నారు. ఆయన ఆ ఇంటి గుమ్మం వద్ద నిలబడి ఉన్న నన్ను లోపలి నుండే చూసి, బయటకు వచ్చి, "నువ్వు మహాభాగవతం చదవటం ప్రారంభించు" అని చెప్పి ఇంటి లోపలికి వెళ్లిపోయారు. నాకు చాలా చాలా ఆనందమేసింది. నాకు మెలకువ వచ్చాక కలలో బాబా నాకు ఉపదేశించిన తీరును నేను నమ్మలేకపోయాను. నేను మహాపారాయణ గ్రూపులో ఉన్నాను. ఆ రోజు నేను చేయాల్సిన పారాయణలో ఎక్కడైనా మహాభాగవతం గురించి కనిపిస్తే, 'నిజంగానే బాబా నన్ను మహాభాగవతం చదవమని చెప్పినట్ల'ని అనుకుంటూ పారాయణ ప్రారంభించడానికి పూజగదిలోకి వెళ్లి 'సాయి సచ్చరిత్ర' తెరిచాను. 18-19అధ్యాయంలోని సాఠేకి స్వప్నంలో గురుచరిత్ర పారాయణ చేయమని బాబా ఉపదేశించిన పేజీ తెరుచుకుంది. నాకు చాలా ఆశ్చర్యం వేసింది. ఇకపోతే ఆరోజు నేను పారాయణ చేయాల్సింది -22వ అధ్యాయం. ఆ అధ్యాయం చివరిలో కాకాసాహెబ్ దీక్షిత్ ప్రతిరోజూ ఏకనాథ మహారాజ్ రచించిన మహాభాగవతం చదువుతుండేవాడని కనిపించింది. నేను అనుకున్నట్టుగానే ఆ రోజు పారాయణలో మహాభాగవతం గురించి ఉండటంతో నిజంగానే బాబా నన్ను మహాభాగవతం చదవమని ఉపదేశించారని నాకు పూర్తిగా నమ్మకం కలిగింది. "ఈవిధంగా నాకు స్వప్నంలో ఉపదేశమిచ్చి నాపై కరుణ చూపిన మీకు ధన్యవాదాలు శ్రీసాయినాథా!".
ఓం సాయి శ్రీసాయి జయజయ సాయి!!!
