సాయిభక్తుల అనుభవమాలిక 1122వ భాగం....

---

ఈ భాగంలో అనుభవాలు:

1. బాబా అనుగ్రహం

2. సాయి స్మరణతో సమస్య లేకుండా పోయింది

3. బాబా దయవల్ల నార్మల్ వచ్చిన స్కానింగ్ రిపోర్ట్

---

బాబా అనుగ్రహం

ఈ బ్లాగు నిర్వాహకులకు మరియు సాటి సాయి బంధువులకు నా నమస్కారాలు. నేను ఒక సాయి భక్తురాలిని. 2022, మార్చి 7వ తారీఖున మా పాప ఎందుకో తెలీదు చాలా ఏడ్చింది. నాలుగో నెల నడుస్తున్న తనకి కడుపులో నొప్పో, తలనొప్పో, ఇంకేమైనా నొప్పో తెలియక నాకు చాలా చాలా టెన్షన్‍గా అనిపించింది. వెంటనే బాబా ఊదీ పాపకి పెట్టి, 'పాప ఏడుపు ఆపితే, నా అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను' అని అనుకుని పాపకి మందులు వేసాను. కాసేపటికి బాబా దయవల్ల పాప ఏడుపు ఆపి పడుకుంది. అయితే కాసేపటికే మళ్లీ ఏడుపు మొదలుపెట్టింది. ఇంకో మందు వేసి పడుకోబెట్టాము. "థాంక్యూ బాబా. కానీ ఎందుకో నా మనసు ఏమీ బాగోవట్లేదు? ఎందుకో తెలీదు, ఏదో నెగిటివ్ ఎనర్జీ ఆవహించినట్లు నాకున్న భక్తి రోజురోజుకీ తగ్గుతుంది. మిమ్మల్ని ఎంతగానో పూజించే నేనెందుకు ఇంతకుముందులా మిమ్మల్ని పూజించుకోలేకపోతున్నానో నాకు అర్థం కావడం లేదు. నా బిడ్డకున్న గుండె సమస్య పూర్తిగా నయమయ్యేంతవరకు ఇలాగే మీ మీద భక్తి తగ్గుతూ ఉంటుందా?  ప్లీజ్ బాబా, మీ మీద భక్తి పెరిగేలా నన్ను ఆశీర్వదించండి. నా బిడ్డను కాపాడండి. నా కుటుంబ బాధ్యత మీదే బాబా".

ఇకపోతే, ఆరోజు నేను ఎంతో బాధగా, బలవంతంగా సచ్చరిత్ర ఒక అధ్యాయం పూర్తి చేసుకున్నాను. ఎందుకో బాబా నాతో, 'పాపకి నయమయ్యేవరకు నీకు బాగా ఇష్టమైనదేదో ఒకటి వదిలేయమ'ని చెప్తున్నట్లు అనిపించింది. అందువలన బాగా ఆలోచించి, నాకు చాలా ఇష్టమైన కాఫీని నేను వదిలేద్దామనుకున్నాను. ఎందుకంటే, కాఫీ అంటే నాకు ప్రాణం. అది లేకుండా నాకు రోజు గడవదు. "బాబా! ఈ రోజు నుండి నా బిడ్డకున్న గుండె సమస్య నయమై తను ఆరోగ్యవంతురాలయ్యేవరకు నేను కాఫీని తాగడం మానేస్తున్నాని మీకు ప్రమాణం చేస్తున్నాను. ఇంకా పాపకి నయమయ్యేంతవరకు అరటిపండు మీకు, సూర్యదేవునికి వదిలేస్తున్నాను. దయచేసి నా బిడ్డని కాపాడండి బాబా".

మా నాన్నవాళ్ళు వాళ్ళ ఇల్లు అమ్మాలని ఎన్నాళ్ళనుండో అనుకుంటున్నారు. ఇల్లు అమ్మగా వచ్చే డబ్బు నా తల్లిదండ్రులకు ఎంతో అవసరం. అందువల్ల ఈమధ్య నేను బాబాతో, "మా అమ్మవాళ్ల ఇల్లు త్వరగా అమ్ముడుపోతే, ఈ అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను" అని అనుకున్నాను. అలా అనుకున్న మూడునెలలకే బాబా దయవల్ల ఆ ఇల్లు కొనడానికి ఒక బేరం వచ్చి సెటిల్ అయింది. మిగతా పనులు కూడా మంచిగా జరిగిపోవాలని బాబాని ప్రార్థిస్తున్నాను. "థాంక్యూ బాబా".

కొన్నిరోజుల ముందు నా భర్త భుజం మీద కురుపుల్లా వచ్చాయి. అది 'సర్పి' అని అనుమానం. సాధారణంగా సర్పికి ఏదో మంత్రం వేస్తారు, దాంతో అది తగ్గిపోతుంది అంటారు. కానీ మావారు, "మంత్రాలు వంటివి పాతకాలపు పద్ధతులు. అప్పట్లో మందులు  ఉండేవి కాదు కాబట్టి, అలా చేసేవాళ్ళు. ఈ జనరేషన్‍లో ఇంగ్లీష్ మందులు మీద ఆధారపడాల"ని చెప్పి హాస్పిటల్‍కి వెళ్లి మందులు తెచ్చుకున్నారు. నేను, "బాబా! మా వారికి త్వరగా నయం అయ్యేలా చేయండి. ఆయనకి బాగైతే నా అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను" అని అనుకున్నాను. బాబా దయవల్ల పదిరోజుల్లో మా వారికి తగ్గిపోయి ఆరోగ్యంగా ఉన్నారు. "థాంక్యూ సో మచ్ బాబా. నా భర్తని క్షమించండి బాబా. ఆయన ఎక్కువగా వెంకటేశ్వరస్వామి, ఆంజనేయస్వామి మొదలైన దేవతలను ప్రార్థిస్తారు. అలా అని మీరు లేరనరు, మిమ్మల్ని కూడా నమ్ముతారు. అయితే మా పాపకి గుండె సమస్య ఉందని తెలిసిన తర్వాత ఒకసారి కోపమో, బాధో ఏమోగాని, 'బాబా బాబా అని రోజంతా అంటుంటావు. అంతలా అడిక్ట్ అవ్వకు. ఏదైనా లిమిట్‍లో ఉండాలి. అతిగా చేయొద్దు, అయినా సమాధి అవన్నీ ఏంటి?' అని సమాధి అనే పదాన్ని కొంచెం వెటకారంగా అన్నారు. ఆయన అన్నంతనే నాకు చాలా బాధేసింది. నిజానికి మావారు చాలా మంచివారు. ఒకరి గురించి పట్టించుకోరు. మీ దయవల్లే ఆయనకి ఉద్యోగం వచ్చింది(నా మొదటి అనుభవంలో ఆ వివరాలు పంచుకున్నాను). అప్పుడు సంతోషంగా మీకు ధన్యవాదాలు కూడా చెప్పుకున్నారు. అలాంటిది పాప ఆరోగ్యం గురించి తెలిసి కోపంలో, బాధలో మీ గురించి అలా నెగిటివ్‍గా మాట్లాడారు. నేను మావారి చేత మీకు క్షమాపణలు కూడా చెప్పించాను. దయచేసి మావారిని క్షమించండి బాబా. ఆయన పేరులో కూడా మీ పేరు 'సాయి' ఉంది. మీ బిడ్డని క్షమించి, తన వెంటే ఉండి తనకి మీ మీద భక్తి పెరిగేలా అనుగ్రహించండి బాబా. ఆలస్యంగా నా అనుభవాలను పంచుకున్నందుకు, అలాగే ఏదైనా తప్పుగా వ్రాసి ఉన్నా క్షమించండి. థాంక్యూ బాబా".

ఓం శ్రీసచ్చిదానంద సమర్ధ సద్గురు సాయినాథాయ నమః!!!

---

సాయి స్మరణతో సమస్య లేకుండా పోయింది

ఓం సాయి శ్రీసాయి జయజయ సాయి!!! శ్రీ సాయినాథుని పాదపద్మములకు శతకోటి వందనాలు. సాయి బంధువులకు నా నమస్కారాలు  నేను ఒక సాయి భక్తురాలిని. నాకు సాయి తండ్రి మీద చాలా చాలా నమ్మకం. నేను ఇంతకుముందు ఈ బ్లాగులో బాబా నాకు ప్రసాదించిన కొన్ని అనుభవాలను పంచుకున్నాను. ఇప్పుడు ఇంకో అనుభవంతో మళ్ళీ మీ ముందుకు వచ్చాను. నేను షుగర్ పేషెంట్‍ని. బాబా దయవల్ల నార్మల్‍గానే ఉన్నప్పటికీ నేను 3నెలలకు ఒకసారి చెకప్‍‍కి వెళుతుంటాను. అలాగే 2022, మార్చి 6న కూడా వెళ్ళాను. అప్పుడు ఈ.సి.జీ తీసి, "కొద్దిగా సమస్య ఉంది. హార్ట్ స్పెషలిస్ట్ ‍‍ను కలవండి" అని చెప్పారు. అది విని మావారు, మాపాప చాలా భయపడిపోయారు. కానీ నేను అంతగా భయపడలేదు. ఎందుకంటే, సాయిబాబా నన్ను చాలాసార్లు అనేక గండాల నుండి గట్టెంక్కించారు. మరుసటిరోజు మేము హార్ట్ స్పెషలిస్ట్ దగ్గరకి వెళితే, "కొన్ని టెస్టులు చేయాలి" అని చెప్పారు. నేను 'ఓం శ్రీసాయి ఆరోగ్యక్షేమదాయ నమః' అని మనసులో అనుకుంటూ కూర్చుని, "నాకు ఏ సమస్య లేకపోయినట్లైతే బ్లాగులో పంచుకుంటాను" అని సాయికి మొక్కుకున్నాను. మొదట ఒక టెస్టు చేసి, "ఏ సమస్య లేద"ని చెప్పి మరో టెస్టు అన్నారు. అప్పుడు కూడా నేను సాయి నామం చేసుకుంటూ కూర్చున్నాను. ఆ టెస్టులో కూడ ఏమి లేదని, మందులు కూడా అవసరం లేదని చెప్పారు. నేను ఇదంతా సాయి మహిమ అంటే మావారు, పాప ఎంతో ఉపశమనంగా ఫీల్ అయ్యారు. "ధన్యవాదాలు బాబా".

ఓం శ్రీ సాయినాథాయ నమః!!!

---

బాబా దయవల్ల నార్మల్ వచ్చిన స్కానింగ్ రిపోర్ట్

అందరికీ నమస్తే. నా పేరు నాగవేణి. ముందుగా బాబాకు శతకోటి ప్రణామాలు. సాయి బంధువులకు నమస్కారాలు. ఈ బ్లాగు నిర్వహిస్తున్న వారికి ధన్యవాదాలు. నేను ఇప్పుడు బాబా నాకు ప్రసాదించిన ఒక అనుభవాన్ని మీతో పంచుకుంటున్నాను. ఒకసారి నా తమ్ముడికి కడుపునొప్పి వచ్చి చాలా ఇబ్బందిపెట్టింది. హాస్పిటల్‍కి వెళితే స్కానింగ్ చేసారు. అప్పుడు నేను బాబాను తలచుకుని, "బాబా! స్కానింగ్ రిపోర్టు నార్మల్ వచ్చి నా తమ్ముడికి కడుపునొప్పి తగ్గితే, ఈ అనుభవాన్ని బ్లాగులో పంచుకుంటాను" అని దణ్ణం పెట్టుకున్నాను. బాబా దయవల్ల స్కానింగ్ రిపోర్ట్ నార్మల్ వచ్చింది. తమ్ముడికి కడుపునొప్పి కూడా తగ్గింది. "ధన్యవాదాలు బాబా. నాకు వివాహమై 4 సంవత్సరాలవుతున్నా సంతానం కలగలేదు తండ్రి. మీ దయతో నాకు పుత్ర సంతానం కలిగితే, నా అనుభవాన్ని బ్లాగులో పంచుకుంటాను బాబా".

---