1. అన్నివేళల వెంటే ఉంటూ నడిపించే బాబా2. ప్రతి విషయంలోనూ అందుతున్న బాబా సహాయం
3. బాబా ప్రసాదించిన అనుభవం
అన్నివేళల వెంటే ఉంటూ నడిపించే బాబా
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై!
ముందుగా, సాయిభక్తులకు నా హృదయపూర్వక నమస్కారాలు. నా పేరు సంగీత. మేము నిజామాబాద్‌లో నివసిస్తున్నాము. బాబా నాకు చాలా అనుభవాలు ప్రసాదించారు. ప్రతి చిన్న పనీ బాబాను తలచుకుంటే, ఆ పని అయిపోతుంది. అది నా నమ్మకం. ప్రతిరోజూ ఈ బ్లాగులోని సాయిభక్తుల అనుభవాలు చదువుతుంటే మనసుకు ఎంతో ఆనందం కలుగుతుంది. 2021లో ఒకసారి నాకు ఆరోగ్యం బాగాలేక మా అన్నయ్యవాళ్ల ఇంటికి వెళ్లి, నాలుగైదు రోజులుండి, ఒకరోజు సాయంత్రం ఇంటికి తిరిగి వచ్చాను. అయితే, నా గోల్డ్ పర్సును అక్కడే మరచిపోయాను. రాత్రి పదిగంటలకి నా పర్సు సంగతి గుర్తొచ్చి, నేను తీసుకొచ్చిన బ్యాగులోనూ, బీరువాలోనూ వెతికాను. కానీ పర్స్ ఎక్కడా లేదు. నేను మా అన్నయ్యవాళ్ళ ఇంట్లోనే పర్సును మరచి వచ్చిన సంగతి కూడా నాకు గుర్తుకు రాలేదు. చాలా టెన్షన్ పడ్డాను. అందులో చాలా బంగారం, డబ్బులు ఉన్నాయి. అప్పుడు నేను బాబాకు నమస్కరించి, "బాబా! మీ దయవలన పర్సు మా అన్నయ్యవాళ్ళ ఇంట్లో ఉండాలి" అని బాబాతో చెప్పుకుని, అన్నయ్యవాళ్ళకి ఫోన్ చేశాను. వాళ్లు చూసి, ‘పర్సు ఇక్కడే ఉంది’ అన్నారు. చాలా సంతోషం అనిపించింది. "చాలా చాలా ధన్యవాదాలు బాబా".
అదేరోజు రాత్రి 12 గంటల సమయంలో అప్పటివరకు బాగున్న మా అమ్మాయికి ఉన్నట్టుండి దగ్గు మొదలయింది. అమ్మాయి విపరీతంగా ఆగకుండా దగ్గుతూనే ఉంది. ఉదయం నాలుగు గంటలవుతున్నా తనకి నిద్రలేదు, ఒకటే దగ్గుతూ ఉంది. ఇక అప్పుడు నేను, "బాబా! మీ దయవల్ల పాపకి దగ్గు తగ్గిపోవాలి" అని బాబాకి చెప్పుకున్నాను. బాబా దయవల్ల మూడు రోజుల్లో పాపకి దగ్గు తగ్గింది. "ధన్యవాదాలు బాబా. ఈవిధంగానే ఎల్లప్పుడూ మీ కృప మా మీద ఉంచు తండ్రీ".
శ్రీ సాయినాథ్ మహరాజ్ కీ జై!!
ప్రతి విషయంలోనూ అందుతున్న బాబా సహాయం
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై!
నా పేరు తిలోత్తమ. ముందుగా, సాయిభక్తులకు నా హృదయపూర్వక నమస్కారాలు. నేను ఈ బ్లాగులో ప్రచురితమయ్యే సాయిభక్తుల అనుభవాలను ప్రతిరోజూ చదువుతూ ఎంతో ఆనందాన్ని పొందుతున్నాను. ఆ ఆనందంతో నా అనుభవాలను కూడా సాటి సాయిభక్తులతో పంచుకోవాలనిపించి ఇదివరకు మూడు అనుభవాలను పంచుకున్నాను. ఇప్పుడు బాబాకు మాటిచ్చిన ప్రకారం మరికొన్ని అనుభవాలను పంచుకుంటున్నాను. 2021 ద్వితీయార్థంలో మా అమ్మ జ్వరం, తలభారం, దగ్గుతో బాధపడింది. మందులు వేసుకుంటే, ఆ క్షణానికి తగ్గి మరలా ఆ సమస్యలు ఉంటుండేవి. డాక్టర్ దగ్గరికి వెళ్దామంటే అమ్మ ‘వద్దు’ అనేది. రోజులు గడుస్తున్నా జ్వరం తగ్గకపోతుండటంతో ఒకరోజు నేను కొంచెం బాబా ఊదీని అమ్మ నుదుటన పెట్టి, మరికొంత ఊదీని నీళ్లలో కలిపి ఇచ్చాను. దానితోపాటు 'ఓం శ్రీసాయి ఆరోగ్య క్షేమదాయ నమః' మంత్రాన్ని పఠించాను. అద్భుతం! మరుసటిరోజు ఉదయానికి అమ్మకి జ్వరం, దగ్గు లేవు. తలభారం మాత్రం కొంచెం ఉండింది. బాబా దయతో ఆ సాయంత్రానికల్లా అది కూడా తగ్గిపోయింది. "ధన్యవాదాలు బాబా".
మా తమ్ముడి ఉద్యోగం గురించి మేము ఎన్నో ప్రయత్నాలు చేశాము. కానీ, చివరివరకు వచ్చి ఏదో ఆటంకంతో ఆగిపోతూ ఉండేది. మేము చాలా బాధపడేవాళ్ళం. అప్పుడు మా పెద్దమ్మ, "ధునిలో కొబ్బరికాయ సమర్పించండి, మీ సమస్య పరిష్కారమవుతుంది" అని చెప్పింది. అంతేకాదు, తనే ఈ బ్లాగ్ గురించి మాకు చెప్పారు. అప్పుడు నేను ఈ బ్లాగ్ ద్వారా ‘మా తమ్ముడికి ఉద్యోగం ప్రసాదించమ’ని బాబాను వేడుకున్నాను. అది బ్లాగులో పబ్లిష్ అయిన మూడు నెలలకి, అలాగే మా నాన్న ప్రతి గురువారం ధునిలో కొబ్బరికాయ సమర్పించడం మొదలుపెట్టిన మూడువారాలకి మా తమ్ముడికి ఉద్యోగం వచ్చింది. మా సంతోషానికి అవధులు లేవు. ఇలా ప్రతి విషయంలోనూ సహాయం చేస్తున్న బాబాకు అనంతకోటి ధన్యవాదాలు.
సర్వం శ్రీ సాయినాథార్పణమస్తు!
బాబా ప్రసాదించిన అనుభవం
సాయిభక్తులందరికీ నా నమస్కారం. నా పేరు శ్వేత. నా భర్త ఆరోగ్య విషయంలో బాబా చూపిన దయ గురించి నేనిప్పుడు మీతో పంచుకుంటున్నాను. రెండు సంవత్సరాల క్రితం నా భర్తకి ఉన్నట్టుండి కాలినొప్పి వచ్చింది. ఆ నొప్పి నెమ్మదిగా పాదం వరకు వ్యాపించడంతో మావారు చాలా బాధను అనుభవించారు. డాక్టరుని సంప్రదిస్తే, ‘ఆ నొప్పి కేవలం కండరాలు తిమ్మిరి వల్ల వస్తుంది’ అన్నారు. అయితే, మందులు వాడుతున్నప్పటికీ నొప్పి తగ్గడానికి బదులు రానురాను పెరగసాగింది. ఆ సమయంలో నేను బాబాను నమ్ముకుని, నిరంతరం వారిని స్మరిస్తూ ఉండేదాన్ని. బాబా దయవల్ల ఒక వారం రోజుల తర్వాత మేము న్యూరాలజిస్ట్‌ని కలిస్తే, MRI స్కాన్ తీసి, "డిస్క్ సమస్య ఉంది. ఆపరేషన్ చేయాలి" అని అన్నారు. విషయం ఏమిటంటే, ఒక వారం రోజులు ఆలస్యం చేయడం వల్ల మావారికి 'ఫుట్ డ్రాప్' అయ్యింది. అప్పుడు నేను ‘నవగురువారవ్రతం’ మొదలుపెట్టాను. బాబా దయవల్ల మావారు మెల్లగా కోలుకున్నారు కానీ, ఫుట్ డ్రాప్ సమస్యలో మాత్రం మెరుగుదల లేదు. దాంతో, ‘ఆపరేషన్ అవసరం లేద’ని బాబా చాలాసార్లు చెబుతునట్లు అనిపించినప్పటికీ మావారు డాక్టర్ సలహామేరకు మైక్రో డిసెక్టమీ చేయించుకున్నారు. ఆ సర్జరీ జరగడానికి ఒక వారం ముందు నేను సచ్చరిత్ర పారాయణ మొదలుపెట్టాను. బాబా దయవల్ల ఆపరేషన్ విజయవంతమై మావారు కొంచెం కోలుకున్నారు. కానీ ఆరు వారాల తరువాత మళ్లీ నొప్పి అనిపించి MRI తీస్తే, మళ్లీ డిస్క్ వాచిందని డాక్టరు చెప్పారు. కానీ బాబా కృపవల్ల కొద్ది రోజుల్లోనే నొప్పి తగ్గి, మావారు నార్మల్ అయ్యారు. కానీ పాదం పూర్తిగా కుదురుకోలేదు. నేను అప్పటినుంచి ఇప్పటివరకు మావారికి నయం కావాలని బాబాను ప్రార్థిస్తూ ఉన్నాను. ఎప్పటికైనా ఆ స్వామి కృపవల్ల మావారు మామూలు స్థితికి వస్తారని నా ఆశ. "ధన్యవాదాలు బాబా".
సర్వేజనాః సుఖినో భవంతు.
