సాయిభక్తుల అనుభవమాలిక 908వ భాగం....

---

ఈ భాగంలో అనుభవాలు:

1. తన బిడ్డలు ఇబ్బందిపడుతుంటే బాబా సహించలేరు

2. సాయినాథుని దయ

3. వ్యాక్సిన్ వేయించుకున్న తరువాత ఏ సమస్యా లేకుండా చూసిన బాబా

---

తన బిడ్డలు ఇబ్బందిపడుతుంటే బాబా సహించలేరు

సాయిభక్తులకు నా నమస్కారాలు. ఈ బ్లాగును నిర్వహిస్తున్న సాయి అన్నయ్యకు నా హృదయపూర్వక ధన్యవాదాలు. నేనొక సాయిభక్తురాలిని. బాబా దయవల్ల నేను ఇదివరకు చాలా అనుభవాలను ఈ బ్లాగులో పంచుకున్నాను. ఇప్పుడు మరో అనుభవాన్ని పంచుకుంటున్నాను. ఒకరోజు నేను, మా అమ్మానాన్నలు మా బంధువుల ఫంక్షన్‌కి వెళ్లాల్సి వచ్చింది. అయితే, మేము బయలుదేరే సమయానికి వర్షం మొదలైంది. ఆ కారణంగా ఫంక్షన్‌కి ఆలస్యం అవుతుండటంతో నేను బాబాకి నమస్కరించుకుని, "బాబా! మేము ఫంక్షన్‌కి వెళ్లేంతవరకు వర్షం పడకుండా ఉండేలా చూడు సాయీ" అని చెప్పుకున్నాను. వెంటనే వర్షం తగ్గిపోయింది. ఫంక్షన్ నుండి తిరిగి వచ్చేవరకు మేము ఎక్కడా వర్షానికి దొరకలేదు. కానీ, మేము ఇంటికి వచ్చాక తెలిసింది, 'మేము వెళ్ళిన తర్వాత చాలా పెద్ద వర్షం పడింది' అని. అంతా బాబా కృప. ఆయన తన బిడ్డలు ఇబ్బందిపడుతున్నా, బాధపడుతున్నా చూసి సహించలేరు. తప్పక సహాయం అందిస్తారు. "శతకోటి వందనాలు బాబా".

కొన్ని సంవత్సరాలుగా నేను ఆస్తమాతో ఇబ్బందిపడుతున్నాను. వర్షాకాలంలో అయితే దాని తీవ్రత మరింత ఎక్కువగా ఉంటుంది. దానికి తోడు నేను ప్రతి చిన్న విషయానికి కూడా ఎక్కువగా ఆందోళన చెందుతూ ఉంటాను. ఆ కారణంగా ఈమధ్య ఒకసారి శ్వాసనాళాలు కుదించుకుపోయి నాకు ఊపిరాడటం కష్టమైంది. దాంతో నేను చాలా ఇబ్బందిపడ్డాను. అప్పుడు నేను కాస్త బాబా ఊదీని తీసుకుని నోట్లో వేసుకుని, బాబా నామస్మరణ చేస్తూ, "బాబా! మీ దయవల్ల నా సమస్య తీరితే ఈ అనుభవాన్ని బ్లాగులో పంచుకుంటాన"ని సాయిని ప్రార్థించాను. బాబా దయవలన కాసేపటికి నాకు ఉపశమనం కలిగింది. "థాంక్యూ సో మచ్ బాబా. ఎల్లప్పుడూ మీకు ఋణపడివుంటాను".

నేను చాలారోజుల వ్యవధి తర్వాత ఈమధ్య ఒకసారి మా అమ్మమ్మ వాళ్ళింటికి వెళ్ళాలని అనుకున్నాను. అయితే, అదే సమయంలో నాకు నెలసరి ఉందని చాలా దిగులుచెందాను. అయినా, బాబా ఉండగా దిగులెందుకని బాబాకి నమస్కరించుకుని, "బాబా! నేను ఊరికి వెళ్లి తిరిగి వచ్చేంతవరకు నాకు నెలసరి రాకూడదు. అలా జరిగితే నా అనుభవాన్ని బ్లాగులో పంచుకుంటాను" అని మ్రొక్కుకున్నాను. నేను భయపడ్డట్టు ఏ ఇబ్బందీ లేకుండా బాబా దయవలన సంతోషంగా ఊరికి వెళ్లి తిరిగి వచ్చాను. "చాలా చాలా ధన్యవాదాలు తండ్రీ".

---

సాయినాథుని దయ

సాయిభక్తులందరికీ నా హృదయపూర్వక నమస్కారాలు. నా పేరు శిరీష. మాది నెల్లూరు. నాకు చిన్నప్పటినుంచి బాబా అంటే ఎంతో ప్రేమ. మా ఇంట్లో అందరం బాబా భక్తులం. ఇదివరకు రెండుసార్లు బాబా నన్ను అనుగ్రహించిన సంఘటనల గురించి మీతో పంచుకున్నాను. ఇప్పుడు మరోసారి ఆ సాయినాథుడు నాకు అవకాశం ఇచ్చారు. ఆర్థికంగా చాలా ఇబ్బందిపడ్డ మా కుటుంబం బాబా సచ్చరిత్ర పారాయణతో ఇప్పుడు కాస్త కుదుటపడుతోంది. గత సంవత్సరం సెప్టెంబర్ నెలలో మా కుటుంబంలో అందరికీ కరోనా వచ్చింది. సాయినాథుని దయవల్ల ఎవరికీ ఏ హానీ జరగకుండా బయటపడ్డాం.

మా బాబుకి 17 సంవత్సరాలు. తనకి ఉన్నట్టుండి ఒక ఆరోగ్య సమస్య వచ్చింది. క్లోమం చుట్టూ వాపు వచ్చి రాత్రికి రాత్రే బాబును హాస్పిటల్లో చేర్చాల్సి వచ్చింది. బాబుని ఐ.సి.యులో ఉంచి ఆహారం, నీరు లేకుండా చికిత్స చేశారు. మేము చాలా భయపడ్డాము, తల్లడిల్లిపోయాము. ఆ కష్టకాలంలో మేము బాబానే నమ్ముకున్నాం. చిన్నగా బాబుకు నయమై పదిరోజుల తర్వాత ఇంటికి వచ్చాము. సాయి దయవల్ల ఇప్పుడు బాబుకి బాగుంది. అయితే, అదే సమయంలో మా బాబుకి ఇంటర్ పరీక్షలు, ఎంసెట్ కూడా ఉండటంతో, 'ఈ సంవత్సరం కరోనా కారణంగా పిల్లలకు కాలేజీ జరగలేదు. ఆన్లైన్ క్లాసెస్ కూడా సరిగా నిర్వహించలేదు. పైగా ఆరోగ్యసమస్యలతో బాబు పరీక్షలు ఎలా రాస్తాడు? తనను ఎంసెట్‌కి ఎలా పంపాలి?' అని నేను, మావారు సతమతమయ్యాము. కానీ బాబా దయవలన ప్రభుత్వం పరీక్షలను రద్దు చేసింది. తర్వాత, "బాబు ఎంసెట్ క్వాలిఫై అయితే చాలు" అని బాబాను గట్టిగా వేడుకుని, నేను, మావారు క్రమం తప్పకుండా ప్రతి గురువారం సాయిసచ్చరిత్ర పారాయణ చేస్తుండేవాళ్ళం. బాబా దయతో మా బాబు ఎంసెట్ వ్రాసి వచ్చాడు. ఆగష్టు 26న ఎంసెట్ ‘కీ’ విడుదలైంది. మా బాబు క్వాలిఫై అయ్యాడు. ప్రిపరేషన్ లేకుండా ఎప్పుడో ఒక సంవత్సరం క్రితం చదివిన చదువుతో పరీక్షలో క్వాలిఫై అవడమంటే అది కేవలం బాబా దయవల్లే. మా పాపకి కూడా బాబా దయవల్ల ఇంజనీరింగ్ కాలేజీలో అనుకున్న బ్రాంచీలో సీటు వచ్చింది. ఇలా అన్నిరకాలుగా మమ్మల్ని ఆదుకుంటున్న సాయినాథునికి మేమంతా సర్వస్య శరణాగతి చేసి, ఆయన పాదాలకు కోటి నమస్కారాలు సమర్పించుకుంటున్నాము. "బాబా! మమ్మల్ని ఎల్లప్పుడూ ఇలాగే తోడుండి నడిపిస్తూ కాపాడండి తండ్రీ".

---

వ్యాక్సిన్ వేయించుకున్న తరువాత ఏ సమస్యా లేకుండా చూసిన బాబా

'సాయి మహరాజ్ సన్నిధి' బ్లాగ్ నిర్వాహకులకు మరియు సాయిబంధువులందరికీ బాబా పరిపూర్ణ అనుగ్రహం ఎల్లప్పుడూ ఉండాలని మనస్ఫూర్తిగా బాబాను కోరుకుంటున్నాను. నా పేరు శ్రీదేవి. మా బాబు బీ.టెక్ మూడవ సంవత్సరం చదువుతున్నాడు. తను సరైన ఆహారం తీసుకోకపోవడం వల్ల ఎప్పుడూ బలహీనంగా ఉంటాడు. అందువల్ల తనకి వ్యాక్సిన్ వేయించాలంటే మాకు భయంగా ఉండేది. కానీ ఇటీవల తన కాలేజీ ఓపెన్ చేయడం వల్ల తప్పనిసరిగా వ్యాక్సిన్ వేయించుకోవాల్సిన పరిస్థితి వచ్చి, కోవిషీల్డ్ వ్యాక్సిన్ వేయించుకున్నాడు. అదేరోజు రెండవ డోసు వ్యాక్సిన్ వేయించుకున్న మా అన్నయ్యకి జ్వరం వచ్చింది. దాంతో నేను బాబా ఊదీని నీళ్ళల్లో కలిపి రోజూ బాబుకి త్రాగమని ఇస్తుండేదాన్ని. ఇంకా, బాబాకి నమస్కారం చేసుకుని, "బాబా! బాబుకి, అన్నయ్యకి వ్యాక్సిన్ వల్ల ఎలాంటి సమస్యా రాకుండా ఉంటే, 'సాయి మహరాజ్ సన్నిధి' బ్లాగులో నా అనుభవాన్ని పంచుకుంటాను" అని చెప్పుకున్నాను. బాబా ఊదీ మహత్యం వల్ల వాళ్లిద్దరూ ఆరోగ్యంగా ఉన్నారు. "ధన్యవాదాలు బాబా! ఇలాగే మీ ఆశీస్సులు మీ బిడ్డలందరిపై ఎల్లప్పుడూ ఉండేలా అనుగ్రహించు తండ్రీ. మా ఊరిలో త్వరగా మీ మందిరం ఏర్పడేలా ఆశీర్వదించండి".

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

---