సాయిభక్తుల అనుభవమాలిక 909వ భాగం....

---

ఈ భాగంలో అనుభవాలు:

1. సాయి దయ

2. డెంగ్యూ జ్వరం నుండి కాపాడిన బాబా

3. బాబాని మనం వదిలినా, ఆయన మనలను వదలరు

---

సాయి దయ

ఓం శ్రీ సాయినాథాయ నమః. సాటి సాయిబంధువులకు, ఈ బ్లాగ్ నిర్వాహకులకు నా నమస్కారం. నా పేరు గోష్టేశ్వరి. నేను ఇదివరకు కొన్ని అనుభవాలను పంచుకున్నాను. ఇప్పుడు మరికొన్ని అనుభవాలను పంచుకుంటున్నాను. ఈమధ్య బి.ఇడి చేసేందుకు నాకు క్యాస్ట్ సర్టిఫికెట్ అవసరం వచ్చింది. అప్పటికే నేను టీచరుగా పనిచేస్తున్నందున క్యాస్ట్ సర్టిఫికెట్ అవసరం ఏముంటుందని కాస్త నిర్లక్ష్యం చేశాను. కానీ తప్పనిసరిగా ఆ సర్టిఫికెట్ చేయించుకోవాల్సిన పరిస్థితి వచ్చింది. అప్పుడు నేను, "వారం రోజుల్లో నాకు క్యాస్ట్ సర్టిఫికెట్ వస్తే, నా అనుభవాన్ని బ్లాగులో పంచుకుంటాన"ని సాయిగణేశుని ప్రార్థించాను. బాబా దయవలన సరిగ్గా గురువారంనాడు క్యాస్ట్ సర్టిఫికెట్ నా చేతికి వచ్చింది. నిజానికి కొన్ని సంవత్సరాల క్రితం మా క్యాస్ట్‌ని బీసీలో చేర్చారు. అప్పుడు క్యాస్ట్ సర్టిఫికెట్ కోసం ప్రయత్నిస్తే, మా తమ్ముడికి, చెల్లికి చేశారు గానీ, నాకు సర్టిఫికెట్ రాదని అన్నారు. నాకు ఉద్యోగం ఉన్నందువల్ల నేను కూడా దానిగురించి పెద్దగా పట్టించుకోలేదు. అలా కొన్ని సంవత్సరాలుగా ఆశ వదిలేసిన సర్టిఫికెట్ కేవలం పదిరోజుల్లోనే నా చేతికి వచ్చింది. ఇదంతా సాయిగణేశుని కృపకాక మరేంటి?

ఇకపోతే, ఈమధ్య ఒకసారి మా అమ్మగారికి శ్వాస తీసుకోవడంలో ఇబ్బందిగా అనిపించింది. అమ్మని డాక్టరు వద్దకు తీసుకువెళితే, "గుండె సంబంధిత సమస్య అయుండొచ్చు" అని అన్నారు. అప్పుడు నేను, "బాబా! అమ్మ రిపోర్టులన్నీ నార్మల్ అని వస్తే ఈ అనుభవాన్ని బ్లాగులో పంచుకుంటాన"ని బాబాను ప్రార్థించాను. మా అమ్మవాళ్లు కూడా అదేవిధంగా బాబాను ప్రార్థించారు. బాబా దయవలన రిపోర్టులన్నీ నార్మల్‌గా వచ్చాయి. నేను, అమ్మ బాబాకి మాటిచ్చినట్లు నా అనుభవాన్ని మీ అందరితో పంచుకున్నాను. "చాలా చాలా ధన్యవాదాలు బాబా".

ఇటీవల మావారు తనకు యూరిన్ ఇన్ఫెక్షన్ అయిందేమోనన్న సందేహంతో డాక్టరుని సంప్రదించారు. డాక్టరు సలహా మేరకు మావారు షుగర్ టెస్ట్, సీరం టెస్ట్, థైరాయిడ్ టెస్ట్ చేయించుకున్నారు. షుగర్ కాస్త ఎక్కువ ఉండటం తప్ప బాబా దయవలన మిగతా అన్నీ నార్మల్‌గా ఉన్నట్లు రిపోర్టు వచ్చింది. ఇలా నా జీవితంలో అడుగడుగునా నన్ను రక్షిస్తున్న నా సాయినాథునికి శతకోటి ప్రణామాలు. "ధన్యవాదాలు బాబా. మీ దయవలన షుగర్ లెవెల్స్ కూడా నార్మల్‌‌కి వస్తాయని ఆశిస్తున్నాను". 

ఈమధ్యనే క్రొత్త స్కూలుకి మార్చిన మా పాప అక్కడ ఎలా ఉంటుందోనని భయపడ్డాను. అయితే తను కొంచెం అల్లరి చేస్తున్నాగానీ స్కూలుకి వెళ్తోంది. బాబా దయవలన త్వరలోనే స్కూలుకి అలవాటుపడుతుందని ఆశిస్తున్నాను. ఇంకా నాకున్న ప్రధానమైన మనోవ్యధని బాబా త్వరలోనే తొలగించి, ఆ అనుభవాన్ని కూడా బ్లాగులో పంచుకునే అవకాశం కల్పిస్తారని ఆశిస్తున్నాను. "బాబా! తెలిసో, తెలియకో నేను చేసిన తప్పులను మన్నించండి".

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై!!

---

డెంగ్యూ జ్వరం నుండి కాపాడిన బాబా

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై!

అందరికీ నమస్కారం. ఈ బ్లాగును నిర్వహిస్తున్న సాయికి చాలా ధన్యవాదాలు. ఈ బ్లాగ్ వలన మనమంతా మన సాయితండ్రికి చాలా దగ్గరవుతున్నాము. అంతేకాదు, బాబా మనల్ని మాయలో పడకుండా కాపాడుతూ ఉన్నారు. సాయితో మనకి ప్రతిరోజూ ఏదో ఒక అనుభవం ఉండనే ఉంటుంది. నేను ఇదివరకే మూడు అనుభవాలను మీతో పంచుకున్నాను. ఇప్పుడు మరో అనుభవాన్ని పంచుకోవాలనుకుంటున్నాను. మా పెద్దబాబు ఇంటర్ రెండవ సంవత్సరం చదువుతున్నాడు. 2021, ఆగస్టు 8న కాలేజీ రీ-ఓపెన్ చేయడంతో మా అబ్బాయి కాలేజీకి వెళ్ళాడు. వెళ్లేటప్పుడు తను ఆరోగ్యంగానే ఉన్నాడు. కానీ కాసేపటికి మా అబ్బాయికి హై-ఫీవర్ వచ్చిందనీ, కాలేజీకి వచ్చి తనను ఇంటికి తీసుకుని వెళ్ళమని మాకు ఫోన్ వచ్చింది. అప్పుడు మావారు కాలేజీకి వెళ్లి, బాబుని ఇంటికి తీసుకుని వచ్చారు. బాబుకి 104 నుండి 105 డిగ్రీల టెంపరేచర్ ఉంది. తను బాగా నీరసించిపోయాడు. మాకు చాలా భయమేసి హాస్పిటల్‌కి వెళ్దామంటే, ‘నేను రాలేన’ని చెప్పి తను పడుకున్నాడు. అప్పుడు తనకి డోలో టాబ్లెట్ వేసి పడుకోమన్నాము. కానీ జ్వరం కంట్రోల్ కాలేదు. అప్పుడు నేను బాబా ఊదీని బాబుకి పెట్టి, 'ఓం శ్రీసాయి ఆరోగ్య క్షేమదాయ నమః' అనే నామాన్ని అనుకున్నాను. మరుసటిరోజుకి జ్వరం 100 నుండి 101 డిగ్రీలకు వచ్చింది. కానీ రెండు రోజులైనా జ్వరం తగ్గలేదు. ఇంక అప్పుడు తనకి బ్లడ్ టెస్ట్ చేయిస్తే, రిపోర్టులో 'డెంగ్యూ పాజిటివ్' అనీ, ప్లేట్లెట్ కౌంట్ కూడా తక్కువగా ఉందనీ వచ్చింది. అప్పుడు హాస్పిటల్‌కి వెళితే, డాక్టర్ కొన్ని టాబ్లెట్లు ఇచ్చి, "మూడు రోజుల తరువాత మళ్ళీ రండి" అని చెప్పారు. డెంగ్యూ ఫీవర్ అనగానే నాకు చాలా భయం వేసింది. అప్పుడు నేను, "బాబా! బాబుకి జ్వరం తగ్గేలా చూడండి. మీ కృపతో జ్వరం తగ్గితే ఈ అనుభవాన్ని 'సాయి మహరాజ్ సన్నిధి' బ్లాగులో పంచుకుంటాను" అని బాబాతో చెప్పుకున్నాను. మరుసటిరోజు జ్వరం 100 - 99 డిగ్రీలకు వచ్చి మూడు రోజులకి పూర్తిగా తగ్గింది. అప్పుడు హాస్పిటల్‌కి వెళ్తే తనను పరీక్షించిన డాక్టర్, "అంతా బాగానే ఉంది. బాబుకు జ్వరం తగ్గిపోయింది. ఇక మందులవసరం లేదు" అని చెప్పారు. నాకు చాలా సంతోషంగా అనిపించి బాబాకు చాలా చాలా ధన్యవాదాలు చెప్పుకున్నాను. ఇలా బాబా మా కుటుంబాన్ని ఎల్లవేళలా వెన్నంటి కాపాడుతూ ఉన్నారు. "బాబా! ఎల్లప్పుడూ మీ నామస్మరణ చేస్తూ ఉండే భాగ్యాన్ని మాకు కల్పించు తండ్రీ. కరోనాను పారద్రోలి అందరినీ చల్లగా కాపాడండి, ప్రపంచాన్ని రక్షించండి సాయీ. నాకున్న నడుమునొప్పిని, మావారి గ్యాస్ట్రిక్ సమస్యను తగ్గేలా చేసి మాకు ఆరోగ్యాన్ని ప్రసాదించండి తండ్రీ. ఇంకా మా తమ్ముడి సమస్యకు ఒక పరిష్కారం చూపించండి. ఆ అనుభవాన్ని కూడా తోటి సాయిభక్తులతో పంచుకోవాలని ఆశపడుతున్నాను సాయీ. ధన్యవాదాలు సాయీ”.

---

బాబాని మనం వదిలినా, ఆయన మనలను వదలరు

నేనొక సాయిభక్తురాలిని. చాలా రోజుల తరువాత ఈరోజు బాబా ప్రసాదించిన ఒక అనుభవాన్ని వ్రాయకుండా ఉండలేక మీకోసం ఇలా వ్రాస్తున్నాను. నిజానికి నేను వ్యక్తిగతంగా పడుతున్న ఇబ్బందుల వలన బాబా మీద శ్రద్ధను కోల్పోయే స్థితిలో ఉన్నాను. నేను ఆర్థికంగా, మానసికంగా చాలా కష్టాల్లో ఉన్నాను. 2021, ఆగస్టు నెల చివరిలో నేను వైభవలక్ష్మిపూజ మొదలుపెట్టాను. ఆగష్టు 30న మా పాపకి ఒక బంగారు గొలుసు వేసి, అది జారిపోకుండా ఒక పిన్ కూడా పెట్టాను. తరువాత నేనే తనని మా బావగారి ఇంటిలో దింపి వచ్చాను. కాసేపటి తరువాత వెళ్లి తనని ఇంటికి తీసుకొచ్చాను. తరువాత తనకి డ్రెస్ మారుస్తుంటే తన మెడలో గొలుసు కనపడలేదు. ఆ సమయంలో నేను పడ్డ టెన్షన్ ఆ దేవుడికే తెలుసు. ‘లక్ష్మీపూజ మొదలుపెట్టిన వారంలోనే గొలుసు పోవటం ఏమిట’ని బాధేసింది. ఇంట్లో అంతా వెతికి, మంచాలన్నీ దులిపినా గొలుసు దొరకలేదు. అప్పుడు మా తోడికోడలు, "గొలుసు దొరికితే కొబ్బరికాయ కొడతాన"ని బాబాకి మ్రొక్కుకుంది. వెంటనే ఇంటి గుమ్మం దగ్గర గొలుసు కనిపించింది. ఆశ్చర్యమేమిటంటే, గొలుసు దొరికిన అదేచోట నేను అంతకుముందు కూడా వెతికాను. కానీ అప్పుడు దొరకలేదు. బాబాని మనం వదిలినా, ఆయన మనలను వదలరు. ఇది నిజం! "ధన్యవాదాలు బాబా".

---