సాయిభక్తుల అనుభవమాలిక 904వ భాగం....

---

ఈ భాగంలో అనుభవాలు:

1. సాయి మహరాజు ప్రేమ

2. బాబాను తలిస్తే చాలు - నీడలా ఉంటూ కాపాడుతారు

3. కాసేపటికే నొప్పి తగ్గించిన బాబా

---

సాయి మహరాజు ప్రేమ

సాయిబంధువులందరికీ నా ప్రణామాలు. ఈ బ్లాగును నిర్వహిస్తున్న సాయికి నా నమస్కారాలు. నా పేరు వాణి. నేను పదవ తరగతిలో ఉండగా ఒక సినిమా ద్వారా  సాయినాథుని గురించి తెలుసుకున్నాను. అప్పటినుండి సాయినే నమ్ముకుని నాకు తెలిసినంతలో ఆయనని పూజిస్తున్నాను. ఇరవై ఏళ్ళ తరువాత అనుకోకుండా ఫోన్ ద్వారా నా ఫ్రెండుని కలుసుకున్నాను. తన ద్వారా ఈ బ్లాగ్ గురించి, అందులో విషయాల గురించి తెలిశాయి. నేను ప్రతిరోజూ రాత్రి పడుకునేముందు ఈ బ్లాగులోని భక్తుల అనుభవాలన్నీ చదివి పడుకుంటాను. ముందుగా, చాలా కాలం క్రితమే నా అనుభవాలను వ్రాయాలనుకుని ఆలస్యం చేసినందుకు సాయినాథునికి క్షమాపణలు చెప్పుకుని నా అనుభవాలు కొన్ని మీతో పంచుకుంటున్నాను.

2020 అందరికీ చాలా భయానకంగా గడించింది. అందులో నేనూ ఒకదాన్ని. ఎంతోమందిపై తన ప్రభావాన్ని చూపిన కరోనా మహమ్మారి మావారిని కూడా వదలలేదు. అయితే చాలా స్వల్పంగా ఎటాక్ అయింది. మేము చాలా భయపడ్డాము. మేము ప్రతిరోజూ మావారి నుదుటన బాబా ఊదీ పెట్టి, మరికొంత ఊదీని నీళ్లలో కలిపి ఆ తీర్థాన్ని మూడుపూటలా ఇస్తుండేవాళ్ళం. మందులన్నీ కూడా ఊదీ తీర్థంతోనే ఇచ్చేవాళ్ళం. ఊదీ మహాత్మ్యం వల్ల మావారికి తొందరగానే కరోనా తగ్గిపోయింది, పెద్దగా ఇబ్బందిపెట్టలేదు. 

ఇంకో అనుభవం: ఈమధ్య మా పాపకి జ్వరం వచ్చింది. దానికి తోడు తను రాత్రంతా కడుపునొప్పితో బాధపడింది. ఈ కరోనా సమయంలో మాకు చాలా భయం వేసింది. సాయినాథుని తలచుకుని ఊదీ కలిపిన తీర్థాన్ని తనకు ఇచ్చాను. అంతేకాదు, "ఈ జ్వరం మామూలు జ్వరమే అయుండాలి బాబా, అలా జరిగితే ఈ అనుభవాన్ని బ్లాగులో పంచుకుంటాన"ని అనుకున్నాను. అయితే, మరుసటిరోజు అది టైఫాయిడ్ జ్వరం అని తెలిసింది. కానీ మీరు నమ్మరుగానీ, ఒక్కరోజు డోసుతోనే జ్వరం తగ్గిపోయింది. మాములుగా అయితే టైఫాయిడ్ తగ్గడానికి వారం రోజులు పడుతుంది. అలాంటిది సాయినాథుని తలచుకోగానే ఆయన మా పాపని ఎక్కువ ఇబ్బందిపడనీయకుండా కాపాడారు. ఆ సాయినాథుని చల్లని చూపు అందరిమీదా ఇలానే ప్రసరించాలని మనసారా కోరుకుంటున్నాను.

ఒకరోజు నేను పూజ చేస్తూ అమ్మవారి ఫోటో వంక దీక్షగా చూశాను. ఆ ఫోటోలో ప్రతిబింబిస్తున్న దీపం వెలుగులో సాయి రూపం కనిపిస్తున్నట్లు అనిపించింది. చాలా పరీక్షగా గమనించాక స్పష్టంగా బాబా రూపు కనిపించడంతో నన్ను నేను నమ్మలేకపోయాను. ఆరోజు ఆనందించినంతగా నేనెప్పుడూ ఆనందించలేదు. ఆ ఫోటోను ఇక్కడ జతపరుస్తున్నాను. సాయిని తలచుకుని పరీక్షగా చూడండి.

మేము వ్యాక్సిన్ రెండు డోసులు వేయించుకున్నాము. మాకు ఎటువంటి ఇబ్బందులు లేకుండా చల్లగా చూశారు ఆ సాయినాథుడు. ఇలాంటి ప్రేమ జీవితాంతం మాపై ఉండాలని సాయి మహరాజుని కోరుకుంటున్నాను. "ధన్యవాదాలు బాబా. ఈ కరోనా మహమ్మారిని త్వరగా అంతమొందించి, అందరినీ కాపాడు తండ్రీ".

సర్వేజనాః సుఖినోభవంతు

లోకాః సమస్తాః సుఖినోభవంతు.

---

బాబాను తలిస్తే చాలు - నీడలా ఉంటూ కాపాడుతారు

నా పేరు చంద్రకళ. నేను తెలంగాణలోని కరీంనగర్ నివాసిని. ఈ బ్లాగ్ ద్వారా నా అనుభవాలను తోటి సాయిభక్తులతో పంచుకోవాలనుకుంటున్నాను. ముందుగా, సద్గురు సాయినాథునికి నా ప్రణామాలు. సాయిభక్తులందరికీ నా నమస్కారాలు. నా తండ్రి ద్వారా నాకు సాయిబాబా పరిచయం. అయితే, మొదట్లో నేను మామూలుగా బాబాకు నమస్కరించేదాన్ని, అంతే. కానీ ఇప్పుడు ప్రతి విషయంలోనూ బాబా నన్ను కాపాడుతున్నారని అర్థం అయింది. రెండు సంవత్సరాల క్రితం నా భర్త కడుపునొప్పితో చాలా బాధపడ్డారు. డాక్టర్ల దగ్గరకు వెళితే, "కిడ్నీలో రెండు రాళ్లున్నాయి. అవి చాలా పెద్దగా ఉన్నందున సర్జరీ తప్పద"ని చెప్పారు. నేను చాలా భయపడి మనస్ఫూర్తిగా బాబాకు మ్రొక్కుకున్నాను. ఒకరోజు రాత్రి బాబా నాకు స్వప్నదర్శనమిచ్చి, "రెండు రాళ్ళున్నాయి కదా, నేను తీసేస్తాను" అని చెప్పారు. వెంటనే నాకు మెలకువ వచ్చింది. ముందు నాకేమీ అర్థం కాలేదుగానీ, కొంతసేపటికి అర్థమై చాలా సంతోషించాను. కానీ ఈ సంగతి ఎవరికి చెప్పినా నమ్మరని మౌనంగా ఉండిపోయాను. తరువాత ఇంకో డాక్టర్ వద్దకు నా భర్తను తీసుకుని వెళ్ళాను. ఆ డాక్టర్ టెస్టులన్నీ చేసి, 10 రోజులకు మందులిచ్చి, "ఈ మందులతో తగ్గకపోతే సర్జరీ తప్పద"ని అన్నారు. నేను మావారికి ఆ మందులతోపాటు బాబా ఊదీతీర్థాన్ని ఇవ్వసాగాను. 10 రోజుల తరువాత మావారికి మళ్ళీ టెస్టులు చేయించి, ఆ రిపోర్టులను డాక్టరుకి చూపిస్తే,  అతను సంతోషంగా నవ్వుతూ, "రెండు రాళ్ళూ కరిగిపోయాయి" అని చెప్పారు. ఆ విధంగా బాబా కృపవలన నా భర్త ఆరోగ్యం పూర్తిగా కుదుటపడింది.

ఇకపోతే, ఈమధ్యకాలంలో నా భర్తకి, నాకు, నా కూతురికి కరోనా వచ్చింది. బాబా కృపవలన డాక్టరు సూచించిన మందులతో నా భర్తకి, కూతురికి ఇంట్లోనే నయమైంది. కానీ లంగ్స్ ఇన్ఫెక్ట్ అయినందువల్ల నేను మాత్రం ఐ.సి.యులో చేరాల్సి వచ్చి ఒక గురువారం రాత్రి హాస్పిటల్లో అడ్మిట్ అయ్యాను. బాబా దయవల్ల త్వరగా నా ఆరోగ్యం మెరుగుపడటంతో ఆరురోజుల్లో నన్ను డిశ్చార్జ్ చేశారు. ఆ కష్టకాలంలో మా అందరినీ బాబానే కాపాడారు. అయితే నా భర్త ఇంకా కొన్ని ఆరోగ్యసమస్యలతో భాధపడుతున్నారు. ఆ బాబానే దయచూపి రక్షించాలి.

చివరిగా, బాబా ప్రసాదించిన ఇంకొక లీలను కూడా  మీ అందరితో పంచుకోవాలని అనుకుంటున్నాను. మా అమ్మాయి కూడా బాబాను బాగా నమ్ముతుంది. తను గత సంవత్సరం బి.టెక్ పూర్తిచేసింది. బాబా దయవలన తనకి మంచి కంపెనీలలో ఉద్యోగాలొచ్చాయి. తను ఒక కంపెనీలో చేరి విజయవంతంగా ట్రైనింగ్ పూర్తిచేసింది. తరువాత తనకి ఒక ప్రాజెక్ట్ కూడా ఇచ్చారు. అయితే అది మంచి ప్రాజెక్టు కాదని, అందులో పనిచేస్తే భవిష్యత్తు ఉండదని మా అమ్మాయి చాలా టెన్షన్ పడి, బాధతో బాగా ఏడ్చింది కూడా. అప్పుడు నేను, "బాబా! అమ్మాయికి మంచి ప్రాజెక్ట్ వస్తే గనక నా అనుభవాన్ని బ్లాగులో పంచుకుంటాన"ని మ్రొక్కుకున్నాను. నిజం, చెపితే నమ్మరు కానీ బాబా దయతో తనకి మంచి ప్రాజెక్ట్ వచ్చింది. తన ఉద్యోగానికి సంబంధించిన ఏ విషయమైనా గురువారంనాడే జరగడం ఆ సాయినాథుని కృపకు నిదర్శనం. నిజంగా బాబాను తలిస్తే చాలు, ఆయన మన వెంట నీడలా ఉంటూ మనలను ఎల్లవేళలా కాపాడతారు. "బాబా! మా అమ్మాయికి అడుగడునా నీడలా నిలుస్తూ తను ఒత్తిడిని తట్టుకుని ఉద్యోగంలో విజయం సాధించేలా కరుణించు తండ్రీ. మా జీవితాల్లో అడుగడుగునా మాకు తోడుగా ఉండు తండ్రీ".

---

కాసేపటికే నొప్పి తగ్గించిన బాబా

ఓం శ్రీ సాయినాథాయ నమః. శ్రీ సాయినాథ్ మహరాజ్ కీ జై! ఈ బ్లాగును నిర్వహిస్తున్న సాయిభక్తులకు నా నమస్కారాలు. ఆ సాయినాథుని ఆశీస్సులు మనందరిపై ఉండాలని బాబాని ప్రార్థిస్తున్నాను. నేను ప్రతిరోజూ 'సాయి మహరాజ్ సన్నిధి' బ్లాగ్ చదువుతాను. నేను కూడా నా అనుభవాలు కొన్నిటిని ఇదివరకు ఈ బ్లాగులో పంచుకున్నాను. ఇప్పుడు మరో చిన్న అనుభవాన్ని పంచుకుంటున్నాను. ఈమధ్య నాకు గ్యాస్ట్రిక్ నొప్పి వచ్చి నన్ను చాలా ఇబ్బందిపెట్టింది. నేను మనసులోనే బాబాకి నమస్కరించుకుని, "ఈ నొప్పి తగ్గిపోతే నా అనుభవాన్ని మన బ్లాగులో పంచుకుంటాను" అని చెప్పుకున్నాను. బాబా దయామయుడు కాబట్టి కాసేపటికే నొప్పి తగ్గించారు. "ధన్యవాదాలు బాబా". నేను ఉద్యోగం కోసం ప్రయత్నిస్తున్నాను, అలాగే మా ఇల్లు వేరే చోటుకు మార్చాలని అనుకుంటున్నాను. ఈ కోరికలు కూడా బాబా తీరుస్తారని నమ్ముతున్నాను. చివరిగా, నా అనుభవం పంచుకునే అవకాశం ఇచ్చిన బ్లాగ్ నిర్వాహకులకు నా ధన్యవాదాలు. 

శ్రీ సాయినాథ్ మహరాజ్ కీ జై!

---