సాయిభక్తుల అనుభవమాలిక 933వ భాగం....

---

ఈ భాగంలో అనుభవాలు:

1. ఆరోగ్యప్రదాత సాయి

2. బాబా కృపతో దొరికిన డాక్యుమెంట్స్

3. సాయి కృపతో దొరికిన రిజిస్టర్

---

ఆరోగ్యప్రదాత సాయి

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ సచ్చిదానంద సద్గురు శ్రీ సాయినాథునికి నా శతకోటి వందనాలు. 'సాయి మహరాజ్ సన్నిధి' బ్లాగ్ నిర్వాహకులకు ధన్యవాదాలు. గతంలో నేను ఈ బ్లాగులో కొన్ని అనుభవాలను పంచుకున్నాను. ఇప్పుడు మరికొన్ని అనుభవాలను పంచుకోవాలనుకుంటున్నాను. ఇటీవల మా అబ్బాయికి తరచూ జ్వరం వస్తూ పోతూ ఉండేది. అయినప్పటికీ బాబు రోజూ స్కూలుకి వెళ్లి వస్తుండేవాడు. కానీ కరోనా సమయం వల్ల చాలా చాలా టెన్షన్‌గా అనిపించేది. అప్పుడు నేను, "బాబా! బాబుకి జ్వరం తగ్గిపోతే నా అనుభవాన్ని బ్లాగులో పంచుకుంటాన"ని బాబాకి మాట ఇచ్చాను. తరువాత బాబుకి కరోనా టెస్టు చేయించాము. అప్పుడు కూడా, "రిపోర్ట్ నెగిటివ్ రావాల"ని బాబాను ఎంతగానో వేడుకున్నాను. బాబా దయవల్ల రిపోర్ట్ నెగిటివ్ రావడమే కాదు, ఆ మరుసటిరోజే బాబుకి జ్వరం తగ్గిపోయి మళ్లీ రాలేదు. "చాలా చాలా ధన్యవాదాలు సాయీ".

వినాయకచవితి రోజున నాకు ఒక చిన్న ఆరోగ్య సమస్య వచ్చింది. నేను ఆ నొప్పిని భరించలేక, "బాబా! నా ఈ నొప్పిని తొలగించండి. నేను నా అనుభవాన్ని బ్లాగులో పంచుకుంటాన"ని బాబాతో చెప్పుకుని బాబాను స్మరిస్తూ ఉండగా కాసేపట్లో నాకు పూర్తిగా నయమయింది. అయితే అప్పుడప్పుడు నాకు ఆ సమస్య వస్తూ ఉంది. "బాబా! దయచేసి నాకొస్తున్న ఆ బాధను పూర్తిగా తీసివేయండి. మీకు మాట ఇచ్చిన ప్రకారం నా అనుభవాలను బ్లాగులో పంచుకుంటున్నాను. ఇంకా కుటుంబంలో ఉన్న చిన్న చిన్న సమస్యలను తీర్చండి బాబా. అవి కూడా తీరిపోగానే నా అనుభవాలను మళ్ళీ బ్లాగులో పంచుకుంటాను తండ్రీ. ఎల్లప్పుడూ ఇలానే అందరినీ చల్లగా చూడండి తండ్రీ. చాలా చాలా ధన్యవాదాలు బాబా". ఏ చిన్న సమస్య వచ్చినా బాబాను స్మరించడం మర్చిపోకండి. ఆయన మనకు సరైన సమయంలో సరైన దారి చూపిస్తారు.

అనంతకోటి బ్రహ్మాండనాయక రాజాధిరాజ యోగిరాజ పరబ్రహ్మ సాయినాథ్ మహరాజ్ కీ జై!

---

బాబా కృపతో దొరికిన డాక్యుమెంట్స్

ముందుగా సాయికి నమస్కారం. నా పేరు శిరీష. 2021, సెప్టెంబరు 17న బాబా నాకు ప్రసాదించిన ఒక చిన్న అనుభవాన్ని నేనిప్పుడు మీ అందరితో పంచుకుంటాను. ఆరోజు మధ్యాహ్నం ముఖ్యమైన డాక్యుమెంట్స్ కనిపించలేదు. నేను, నా భర్త ఇల్లంతా వెతికినప్పటికీ డాక్యుమెంట్స్ దొరకలేదు. నాకు అప్పుడు భక్తుల అనుభవాలు గుర్తుకు వచ్చి 'శ్రీసాయి సూక్ష్మాయ నమః' అనే మంత్రాన్ని జపిస్తూ, "బాబా! ఆ డాక్యుమెంట్స్ దొరకకపోతే చాలా ఇబ్బంది అవుతుంది. మీ దయతో అవి దొరికితే, ఈ అనుభవాన్ని బ్లాగులో పంచుకుంటాను" అని బాబాతో చెప్పుకుంటూ డాక్యుమెంట్స్ వెతుకుతున్నాను. అంతలో నా భర్త, "ఒకసారి మీ నాన్నగారిని అడుగు" అన్నారు. సరేనని నేను నాన్నకి ఫోన్ చేస్తే ఆయన, "ఆ డాక్యుమెంట్స్ నేను మీకు ఎప్పుడో ఇచ్చేశాను. నా దగ్గర లేవు" అని అన్నారు. "అయినా ఒకసారి వెతికి చూడమ"ని నాన్నతో చెప్పి ఫోన్ పెట్టేశాను. కాసేపటికి నాన్న ఫోన్ చేసి, "డాక్యుమెంట్స్ నా దగ్గరే ఉన్నాయ"ని చెప్పారు. నేను సంతోషంగా బాబాకి ధన్యవాదాలు చెప్పుకుని, "రేపు ఈ అనుభవాన్ని మీ బ్లాగుకి పంపుతాను బాబా" అని చెప్పుకున్నాను. కానీ మరుసటిరోజు ఉదయం పని ఒత్తిడి వల్ల ఆ సంగతి మర్చిపోయాను. రోజూ ఉదయం బ్లాగులోని భక్తుల అనుభవాలు చదివాక నేను నా పని ప్రారంభిస్తాను. అలాంటిది ఆరోజు సమయంలేక చదవలేదు. వాటిని సుమారు మధ్యాహ్నం 12 గంటల సమయంలో చదువుతుంటే, అందులో బాబా అనుగ్రహంతో ముఖ్యమైన డాక్యుమెంట్స్ దొరికిన ఒక భక్తుని అనుభవం ఉంది. వెంటనే నా అనుభవం గుర్తొచ్చి ఈవిధంగా బాబా నాకు గుర్తు చేశారనిపించి వెంటనే నా అనుభవాన్ని వ్రాసి పంపాను. "ధన్యవాదాలు బాబా".

---

సాయి కృపతో దొరికిన రిజిస్టర్

ఓం శ్రీ సమర్థ సద్గురు శ్రీ సాయినాథాయ నమః.

ముందుగా నా తండ్రి సాయినాథునికి ప్రణామాలు సమర్పించుకుంటున్నాను. ఈ బ్లాగ్ నిర్వాహకులకు నా ధన్యవాదాలు. నేను ఇదివరకు రెండు అనుభవాలను ఈ బ్లాగులో పంచుకున్నాను. ఇప్పుడు 2021, సెప్టెంబరు రెండవవారంలో జరిగిన మరో అనుభవాన్ని పంచుకుంటాను. నా పేరు యశోద. మేము అనంతపురంలో నివాసముంటున్నాము. నేను టీచరుగా పనిచేస్తున్నాను. మా వృత్తిలో పాఠశాలకు సంబంధించిన అడ్మిషన్ రిజిస్టరును ఎక్కడో పెట్టి మర్చిపోయాను. ఎంత వెతికినా కనపడలేదు. దాంతో నాకు చాలా భయం వేసింది. అంతలో వినాయకచవితి పండుగ వచ్చింది. రిజిస్టర్ కనపడటంలేదన్న భయంతో నేను పండుగ కూడా సరిగా చేసుకోలేకపోయాను. తరువాత శని, ఆదివారాలు రావడంతో వరుసగా మూడురోజుల సెలవు తరువాత నేను పాఠశాలకు వెళ్లి మరోసారి వెతికినా రిజిస్టర్ కనపడలేదు. అప్పుడు నా సాయిని తలచుకుని, "రిజిస్టర్ దొరికితే నా అనుభవాన్ని సాటి సాయిభక్తులతో పంచుకుంటాన"ని చెప్పుకున్నాను. వెంటనే నా టేబుల్ సొరుగులోనే రిజిస్టర్ కనిపించింది. అది చూసి నాకు ఎంతో సంతోషం కలిగి, 'నా తండ్రి ఎప్పటికీ నాతో ఉన్నార'ని అర్థమైంది. "ధన్యవాదాలు బాబా".

అనంతకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

---