సాయిభక్తుల అనుభవమాలిక 932వ భాగం....

---

ఈ భాగంలో అనుభవాలు:

1. పిల్లలకు సాయి సంరక్షణ

2. ప్రెగ్నెన్సీ సమయంలో బాబా ప్రసాదించిన అనుభవాలు

3. బాబా దయతో ఆరోగ్యం

---

పిల్లలకు సాయి సంరక్షణ

నేనొక సాయిభక్తురాలిని. ముందుగా సాయిబంధువులందరికీ మరియు ఈ బ్లాగును నిర్వహిస్తున్న సాయికి నమస్కారం. ఇది నేను ఈ బ్లాగులో పంచుకుంటున్న రెండవ అనుభవం. ముందుగా మా పెద్దబాబు నవతేజస్వత్‌సాయికి జలుబు, దగ్గు వచ్చాయి. ఆ దగ్గుతో నిద్రపట్టక బాబు పడుతున్న అవస్థను మేము చూడలేకపోయాము. ఎంత తీవ్రమైన దగ్గు అంటే కొన్ని రోజుల వరకు అది తగ్గదు అనిపించింది. ఒకరోజు రాత్రి 12 గంటల సమయంలో బాబు తీవ్రంగా దగ్గుతూ ఉంటే బాబా ఊదీని వాడి నుదుటన పెట్టి, మరికొంత ఊదీని నీళ్లలో కలిపి తనకు త్రాగించి, "బాబా! మీ ఊదీ మహిమ గురించి తెలియనిది కాదు. అయినా మీ ఊదీ మహిమను నాకు చూపించు తండ్రీ. ఈ రాత్రే బాబుకి దగ్గు పూర్తిగా తగ్గిపోయి ఉదయానికల్లా వాడు నార్మల్ అయిపోవాలి. దగ్గు అస్సలు రాకూడదు. నేను ఊదీ బాబుకి పెడుతూ ఉంటాను" అని మనసులోనే బాబాను ప్రార్థించాను. ఎంత అద్భుతం జరిగిందో చూడండి! బాబుకి ఊదీ నీళ్లు త్రాగించి నేను పడుకోబోయేంతలోనే బాబు ప్రశాంతంగా నిద్రలోకి జారుకున్నాడు. ఉదయం లేచిన తరువాత బాబుకి అస్సలు దగ్గు రాలేదు.

తరువాత 2021, సెప్టెంబరు నెల రెండవ వారం చివరిలో మా రెండవ బాబు విహాన్స్‌సాయి జ్వరం, జలుబు, దగ్గుతో వారం రోజుల పాటు బాధపడ్డాడు. మందులు వాడుతుంటే తగ్గినట్లే తగ్గి మళ్లీ వస్తుండేవి. దాంతో బాబుని హాస్పిటల్‌కి తీసుకుని వెళ్ళినా తగ్గలేదు సరికదా మరుసటిరోజుకి మరింత ఎక్కువైంది. నాకు చాలా భయమేసి, 'సమయానికి ఊదీ కూడా నా దగ్గర లేదు. ఒకవేళ ఊదీ ఉండివుంటే బాబుకి తప్పకుండా తగ్గిపోయి ఉండేది' అని అనుకున్నాను. తరువాత తప్పనిసరై సెప్టెంబరు 16న మళ్లీ బాబుని హాస్పిటల్‌కి తీసుకెళ్లి మనసులో బాబాని తలచుకుని, "బాబా! బాబుకి జ్వరం అస్సలు తగ్గడం లేదు. సమయానికి నా దగ్గర ఊదీ లేదు. డాక్టరు తప్పనిసరిగా టెస్టులు చేయాలంటున్నారు. కానీ ప్రస్తుతం ఎక్కడ చూసినా డెంగ్యూ, మలేరియా జ్వరాలే. నా భర్త హైదరాబాదులో ఉన్నారు. హైకోర్టు జడ్జి వస్తున్నందున మరియు కాన్ఫరెన్స్ ఉన్నందున నాకు సెలవు అస్సలు దొరకదు. ఇటువంటి స్థితిలో బాబుని హాస్పిటల్లో చేర్చాల్సి వస్తే నా పరిస్థితి ఏమిటి సాయీ? కాబట్టి దయచేసి నా బాబు రిపోర్టులన్నీ నార్మల్ వచ్చేలా చూడండి" అని బాబాతో చెప్పుకుని ఏడ్చేశాను. ఇంకా, "రిపోర్టులు నార్మల్ వస్తే నా అనుభవాన్ని తోటి భక్తులతో వెంటనే పంచుకుంటాన"ని మ్రొక్కుకున్నాను. అయితే, రిపోర్టులన్నీ నార్మల్ గానే వచ్చాయిగానీ డాక్టరు, "కొంచెం టైఫాయిడ్ లక్షణాలున్నాయ"ని చెప్పారు. అప్పుడు నా ఆఫీసు సమస్యను డాక్టరుగారితో చెప్పాను. డాక్టరు సరేనని, బాబుని హాస్పిటల్లో అడ్మిట్ చేయమని చెప్పలేదు. నేను దేనిగురించైతే భయపడ్డానో అది జరగకుండా కాపాడారు బాబా. "థాంక్యూ సాయీ. ఈ అనుభవం ద్వారా నాకొకటి చాలా స్పష్టంగా అర్థం అయింది, 'నన్ను మీ నీడలో ఉంచుకుని నాకు సంబంధించిన ప్రతీది గమనిస్తున్నార'ని. ఎందుకు బాబా నా మీద మీకు అంత దయ? ఏ జన్మలో ఏ పుణ్యం చేసుకున్నానో చిన్నవయసులోనే మీరు నాకు గురువుగా లభించారు. మీ గురించి ఎంతని చెప్పను? ఏమని చెప్పను? ఎంత చెప్పినా తక్కువే. చివరిగా, ఆఫీసులో పనుల వల్ల వెంటనే ఈ అనుభవాన్ని పంపలేకపోయినందుకు నన్ను క్షమించండి బాబా".

---

ప్రెగ్నెన్సీ సమయంలో బాబా ప్రసాదించిన అనుభవాలు

ముందుగా సాయిభక్తులకు, ఈ బ్లాగ్ నిర్వాహకులకు నా నమస్కారాలు. నేనొక సాయిభక్తురాలిని. కష్టకాలంలో సాయిబాబా నాకు చాలాసార్లు సహాయం చేశారు. ఇప్పుడు నేను నా ప్రెగ్నెన్సీకి సంబంధించిన ఒక అనుభవాన్ని పంచుకుంటున్నాను. నేను ఈ బ్లాగులో పంచుకుంటున్న మూడవ అనుభవమిది. మా నాన్నగారు బ్యాంకు ఉద్యోగి, అమ్మ గృహిణి. వాళ్ళకి మేము ముగ్గురం ఆడపిల్లలం. మాకు అన్నదమ్ములు లేనందున ప్రతీ సంవత్సరం రాఖీ పండుగనాడు నేను ‘అన్నయ్య కానీ, తమ్ముడు కానీ ఉంటే బాగుండు’ అనుకునేదాన్ని. ఇకపోతే నాకు ప్రెగ్నెన్సీ కన్ఫర్మ్ అయ్యాక నేను, "బాబా! నాకు బాబు పుట్టి, వాడు ఆరోగ్యంగా ఉంటే నా అనుభవాన్ని బ్లాగులో పంచుకుంటాను" అని అనుకున్నాను. ప్రెగ్నెన్సీ సమయంలో రెండవసారి స్కానింగ్ తీసినప్పుడు బిడ్డ గుండెకు చిన్న మచ్చ లాంటిది ఉందని చెప్పారు. అది విని నేను కాస్త భయపడినప్పటికీ వెంటనే బాబాని తలచుకున్నాను. ఆరోజు రాత్రి బాబా స్వప్నదర్శనమిచ్చి, "నేను ఉండగా భయం దేనికి? బిడ్డ ఆరోగ్యంగా ఉంటుంది" అని అన్నారు. నాకు చాలా సంతోషంగా అనిపించి ఆరోజే నా ఆనందాన్ని బ్లాగులో పంచుకుందామని టైపు చేస్తుంటే, 'బాబు పుడితే పంచుకుంటానన్నావు కదా!' అని బాబా నన్ను ఆపుతున్నట్టు నా మనసుకి అనిపించేలా చేశారు బాబా. వెంటనే టైపు చేయడం ఆపేశాను. ప్రెగ్నెన్సీ సమయంలో, ‘పుట్టబోయేది బాబో, పాపో’ అని నాకు కుతూహలంగా ఉండేది. అలాగని నేను బాబునే కోరుకునేదాన్నని మీరు తప్పుగా అనుకోకండి. నాకు ఎవరైనా ఓకే. కానీ నాకు అన్నదమ్ములు లేనందున బాబు కావాలని కాస్త ఉండేది. ఒకసారి నేను, "బాబా! నాకు బాబు పుడతాడంటే శిరిడీలో మీరు పింక్ రంగు దుస్తులు ధరించి నాకు దర్శనం ఇవ్వండి" అని అనుకున్నాను. తరువాత శిరిడీ లైవ్ దర్శన్ యాప్ ఓపెన్ చేసి చూస్తే, నేను కోరుకున్నట్లు బాబా పింక్ రంగు దుస్తుల్లో దర్శనమిచ్చారు. చాలా సంతోషంగా అనిపించింది. చివరికి నెలలు నిండాక బాబా దయతో నాకు బాబు పుట్టాడు. నా అనుభవాన్ని మీ అందరితో పంచుకున్నందుకు చాలా సంతోషంగా ఉంది. "ధన్యవాదాలు బాబా".

---

బాబా దయతో ఆరోగ్యం

అందరికీ నమస్తే. నేనొక సాయిభక్తురాలిని. బాబా నాకు ప్రసాదించిన కొన్ని అనుభవాలను నేనిప్పుడు మీతో పంచుకుంటున్నాను. నాకు ఇద్దరు పిల్లలు. ఈమధ్య ఒకసారి మా బాబు శరీరం కాస్త వేడిగా అనిపించింది. అప్పుడు నేను, "బాబా! ఇది జ్వరం కాకూడదు. ఉదయానికల్లా తగ్గిపోవాలి" అని బాబాను ప్రార్థించాను. బాబా దయవలన ఉదయానికి బాబు నార్మల్ అయ్యాడు. అలాగే, మా పాప కూడా జ్వరం, దగ్గుతో బాధపడినప్పుడు కూడా నేను, "బాబా! మీ దయతో పాపకి తగ్గిపోవాలి" అని బాబాను ప్రార్థించాను. బాబా కృపతో పాపకి తగ్గింది. ఇంకోసారి నా సోదరుని భార్య గ్యాస్ట్రిక్ మరియు గాల్‌బ్లాడర్‌లో స్టోన్స్‌తో బాధపడుతుంటే, "శస్త్రచికిత్స అవసరం లేకుండా మందులతో తనకి నయం కావాల"ని బాబాను ప్రార్థించాను. బాబా దయవలన డాక్టరు కేవలం మందులతోనే తనకి నయం చేశారు. ప్రియమైన బాబా చేసిన మేలుకు కృతజ్ఞతగా ఆయన పవిత్ర పాదకమలాలపై నా శిరస్సు వంచి నమస్కరిస్తున్నాను.

---