1. సాయి తలచుకుంటే ఏదైనా ఎంత పని?
2. బాబా దయ
3. యాక్సిడెంట్ నుండి కాపాడిన బాబా
సాయి తలచుకుంటే ఏదైనా ఎంత పని?
ఓం శ్రీ సాయినాథాయ నమః. నేనొక సాయిభక్తురాలిని. సాయి మనకి రోజూ చిన్న, పెద్ద అనుభవాలు చాలానే ప్రసాదిస్తూ ఉంటారు. కొన్ని అనుభవాలు చదివేవాళ్ళకి సిల్లీగా అనిపించినా వాటిని అనుభవించినవారికి మాత్రం అది సాయి కృపేనని స్పష్టంగా అనుభవమవుతూ అమితానందాన్ని ఇస్తాయి. ఈమధ్య జరిగిన అలాంటి అనుభవాలను నేనిప్పుడు సాయిబంధువులతో పంచుకోవాలనుకుంటున్నాను.
ఈమధ్య మా అమ్మాయికి, 'కాలేజీకి వచ్చి సర్టిఫికెట్స్ తీసుకుని వెళ్ళమని, అలాగే హాస్టల్ ఖాళీ చేయమ'ని మెసేజ్ వచ్చింది. విషయమేమిటంటే, గత మార్చి నుండి కోవిడ్ కారణంగా మా అమ్మాయి ఇంట్లోనే ఉంటున్నందున హాస్టల్ గది అలాగే వదిలేశాము. సాయి దయవల్ల ఇంట్లోనే తన బి.టెక్ పూర్తయి మంచి ఉద్యోగం కూడా వచ్చింది. ఇదంతా నేను ఇదివరకే నా గత అనుభవాలల్లో పంచుకున్నాను. ఇక ప్రస్తుతానికి వస్తే, కోవిడ్ కారణంగా పబ్లిక్ ట్రాన్స్‌పోర్ట్ ఉపయోగించుకోవడానికి మా అమ్మాయి భయపడింది. పోనీ, కారులో వెళదామంటే మావారికి వీలుపడలేదు. దాంతో తప్పనిసరై నేను, మా అమ్మాయి, "ఎటువంటి ఆటంకాలు లేకుండా, కోవిడ్ బారినపడకుండా చూడమ"ని సాయికి నమస్కరించుకుని ఇంటినుండి బయలుదేరాం. తీరా ఎయిర్‌పోర్టుకి వెళ్లిన తరువాత తాను 'కాలేజీ ఐడి కార్డు' మర్చిపోయానని చెప్పింది. అసలే వాళ్ళది చాలా స్ట్రిక్ట్ కాలేజీ, పైగా ఐడి కార్డు తీసుకుని రావాలని వాళ్ళు ముందే చెప్పారు. అయినప్పటికీ వెనుతిరిగి ఇంటికి వెళ్లకుండా బాబాపై భారం వేసి కాలేజీకి వెళ్ళాము. నేను కోరినట్టుగానే బాబా ఎక్కడా ఇబ్బంది కలగకుండా ఈ-కాపీతోనే పని జరిగేలా చూశారు. ఆ కాలేజీలో ఇదంతా జరగడం నిజంగా చాలా గొప్ప విషయం. కేవలం బాబా వల్లే సాధ్యమైంది.
తిరుగు ప్రయాణంలో లగేజీ ఉండడం వల్ల మేము ట్రైనుకి బయలుదేరాం. తెల్లవారుఝామున మా ఊర్లో దిగాల్సి ఉండగా నేను నిద్రలేచినప్పటినుంచి ఒకటే వర్షం పడుతోంది. ఆ ట్రైన్ ఎప్పుడూ మా ఊరిలోని రెండవ నెంబర్ ప్లాట్‌ఫాం మీదకి వస్తుంది. ఆ ప్లాట్‌ఫాంకి షెల్టర్ ఉండదు, మొత్తం ఓపెన్ ఉంటుంది. పైగా అక్కడ దిగాక మెట్ల వరకు వెళ్ళడానికి చాలాదూరం నడవాల్సి ఉంటుంది. కాబట్టి ఆ ప్లాట్‌ఫాం మీద దిగితే మేము, మా లగేజీ అంతా వర్షంలో తడిసి ముద్దవడం ఖాయం. ఇటువంటి పరిస్థితుల్లో బాబానే మనకి శరణం. ఆయన తప్ప మనకి దిక్కెవరు? అందుచేత నేను, "బాబా! ఈ ఒక్కరోజు ట్రైన్ మొదటి ప్లాట్‌ఫాం పైకి వెళ్లేలా చూడండి" అని వేడుకుని ప్రశాంతంగా ఉన్నాను. ఏం జరిగిందో సాయిబంధువులకు ప్రత్యేకంగా చెప్పాల్సిన అవసరం లేదు కదా. కాసేపట్లో ట్రైన్ ఒకటో నెంబర్ ప్లాట్‌ఫాం మీద ఆగింది. మేము ఏ మాత్రమూ వర్షంలో తడవకుండా క్షేమంగా ఇంటికి చేరుకున్నాం. నేను ఇప్పటివరకూ కనీసం 10 సార్లైనా చూసి ఉంటాను ఆ ట్రైన్ రెండవ నంబర్ ప్లాట్‌ఫాం మీదకి రావడం. ఒక్కసారి కూడా మొదటి ప్లాట్‌ఫాంకి రావడం నేను చూడలేదు. కానీ సాయి తలచుకుంటే అదెంత పని? ఒకే ప్రయాణంలో బాబా నాకు ఈ రెండు అనుభవాలను ప్రసాదించారు. "థాంక్యూ వెరీ మచ్ బాబా".
సర్వం శ్రీసాయినాథ దివ్య చరణారవిందార్పణమస్తు!
బాబా దయ
ఓం శ్రీ సాయినాథాయ నమః. సాయిబంధువులందరికీ నా నమస్కారాలు. ఈ బ్లాగును నిర్వహిస్తున్నవారికి ప్రత్యేక కృతజ్ఞతలు. నేనొక సాయిభక్తురాలిని. నేను ఇంతకుముందు నా అనుభవాన్ని ఈ బ్లాగులో పంచుకున్నాను. ఇప్పుడు సాయినాథుని దయవలన మరికొన్ని అనుభవాలను పంచుకుంటున్నాను.
ఈమధ్య మా రెండవ చెల్లికి జ్వరం, కాళ్లనొప్పులు వచ్చాయి. అసలే మూడు నెలల ముందు తనకు కోవిడ్ వచ్చి తగ్గినందున తను చాలా బలహీనంగా ఉంటోంది. అటువంటి తనకి మళ్లీ జ్వరం వస్తుండటంతో మాకు చాలా భయమేసి వివిధ రకాల రక్తపరీక్షలతోపాటు కోవిడ్ పరీక్ష కూడా చేయించి, "బాబా! మీ దయతో కోవిడ్ రిపోర్టు నెగిటివ్ వస్తే వెంటనే బ్లాగుకి రాసి పంపుతాన"ని బాబాకి మ్రొక్కుకున్నాను. బాబా దయవలన కోవిడ్ రిపోర్టు నెగిటివ్ వచ్చింది. "సాయినాథా! మీ దయవలన చెల్లికి ఎటువంటి ఇబ్బందికర జ్వరము కాకుండా, త్వరగా తగ్గి తను పూర్తిగా కోలుకోవాలని మిమ్మల్ని వేడుకుంటున్నాను తండ్రీ".
నేను ఎల్లప్పుడూ బాబాను శరణు వేడుతాను. నేను టెన్షన్ పడిన ప్రతి సమయంలోనూ ఆ సాయినాథుని తలచుకుంటే వెంటనే ఆయన నాకు మంచి ఫలితాన్ని ఇస్తారు. ఈమధ్యకాలంలో జ్వరం వచ్చిందంటే భయంగా ఉంటోంది. మా మనవడికి 13 నెలల వయస్సు. ఈమధ్య ఒకసారి వాడికి జ్వరం వచ్చింది. వెంటనే నేను, "బాబుకి జ్వరం తగ్గిపోవాల"ని సాయిని వేడుకున్నాను. బాబా ఎంతో దయతో బాబుకి జ్వరం తగ్గించారు. "ధన్యవాదాలు బాబా".
మా చెల్లెలి కూతురికి నీట్ పరీక్షలో మంచి మార్కులు వచ్చాయంటే అది శ్రీసాయినాథుని దయేనని, సాక్షాత్తూ బాబానే తనచేత పరీక్ష బాగా వ్రాయించి ఉంటారని నేను నమ్ముతున్నాను. ఎందుకంటే పరీక్ష జరిగేరోజు తను చాలా టెన్షన్‌లో పరీక్షకు వెళ్ళింది. అప్పుడు నేను, "పాప పరీక్ష బాగా వ్రాస్తే ఆ అనుభవాన్ని బ్లాగులో పంచుకుంటాన"ని బాబాకి మ్రొక్కుకున్నాను. ఇలాగే తను కోరుకున్న కాలేజీలో మంచి సీటు రావాలని బాబాను వేడుకుంటున్నాను. ఈవిధంగా ఎల్లప్పుడూ బాబా నాకు అండగా ఉంటారు. ఈ బ్లాగు ద్వారా బాబాకు కృతజ్ఞతలు తెలియజేసే అవకాశమిచ్చిన బ్లాగు నిర్వాహకులకు సదా ఋణపడివుంటాను. "ధన్యవాదాలు బాబా. నేను రెండు విషయాల గురించి చాలా మనోవేదనలో ఉన్నాను సాయీ. త్వరలోనే మీరు అనుగ్రహించి ఆ విషయాల్లో నాకు సంతోషం కలిగించాలని శరణు వేడుతున్నాను. శుభఫలితాలను అందుకున్న వెంటనే ఆ అనుభవాలను కూడా బ్లాగులో తెలియజేసుకుంటాను బాబా".
యాక్సిడెంట్ నుండి కాపాడిన బాబా
నేను ఒక సాయి భక్తురాలిని. నేను రోజూ స్కూటీ నడుపుతున్నప్పుడు 'బాబా బాబా సాయి' అని బాబాని తలచుకుంటూ ఉంటాను. 2021, సెప్టెంబర్ 16న కూడా బాబాని తలుచుకుంటూ నేను, నా ఫ్రెండ్ కాలేజ్ నుండి స్కూటీ మీద వస్తున్నాము. హఠాత్తుగా మాకు వ్యతిరేక దిశలో వస్తున్న ఒక వ్యక్తి(ఫుల్ గా డ్రింక్ చేసి) వేగంగా వచ్చి మా స్కూటీని గుద్దేసాడు. స్కూటీతో సహా నేను, నా ఫ్రెండ్ కింద పడిపోయాము. క్షణకాలం మాకేమీ అర్థం కాలేదు. బాబా దయవలన నాకైతే ఒక్క దెబ్బ కూడా తగల్లేదు. కానీ నా ఫ్రెండ్ కి కొంచం దెబ్బలు తగిలాయి. స్కూటీ అయితే పూర్తిగా డామేజ్ అయ్యింది. నాకు దెబ్బలు తగలకుండా ప్రమాదం నుండి కాపాడిన బాబాకు అనేకవేల శతకోటి వందనాలు సమర్పించుకుంటున్నాను. "బాబా! నేను మిమ్మల్ని ఒక కోరిక కోరుకుని 1008 సార్లు సాయి చాలీసా పఠిస్తానని అనుకున్నాను. ఇప్పటికి 250 సార్లు పఠించానని మీకు తెలుసు. నేను కోరుకున్నది నాకెంత అవసరమో మీకు తెలుసు. మీరు అనుకుంటే అది క్షణాల్లో నెరవేరుతుంది. అసాధ్యం అన్న దాన్ని కూడా మీరు సాధ్యం చేస్తారు. దయచేసి నన్ను అనుగ్రహించండి బాబా".
