1. ప్రేమతో సమస్యలు తీర్చిన బాబా
2. కష్టం నుండి బయటపడేసిన బాబా
3. తోటి భక్తుల అనుభవాల ద్వారా అభయమిస్తున్న బాబా
ప్రేమతో సమస్యలు తీర్చిన బాబా
సాయిబంధువులందరికీ నమస్కారం. నేను ఒక చిన్న సాయిభక్తురాలిని. ఒకరోజు ఉన్నట్టుండి నాకు గ్యాస్ట్రిక్‌కి సంబంధించిన నొప్పి చాలా తీవ్రంగా వచ్చింది. అలా నొప్పి వచ్చినప్పుడు నేను సాధారణంగా గ్లూకోజ్ ఎక్కించుకోవలసి ఉంటుంది. కానీ అది కరోనా సమయమైనందున హాస్పిటల్‌కి వెళ్ళడానికి నాకు భయం వేసింది. అప్పుడు నేను, "బాబా! గ్లూకోజ్ ఎక్కించుకోకుండానే నాకు నయమయ్యేలా చూడు తండ్రీ" అని బాబాను వేడుకున్నాను. తరువాత ఎలాగో ధైర్యం చేసి హాస్పిటల్‌కి వెళ్ళాను. డాక్టరు రెండురోజులకి మందులు ఇచ్చారు. కానీ ఆ మందులతో నొప్పి తగ్గలేదు. మళ్ళీ డాక్టరుని సంప్రదిస్తే, మందులు మార్చి ఇచ్చారు. దాంతో నొప్పి తగ్గింది. బాబా ఎంతో దయతో గ్లూకోజ్ ఎక్కించాల్సిన అవసరం లేకుండా మందులతో తగ్గేలా అనుగ్రహించారు. "బాబా! మీకు శతకోటి వందనాలు తండ్రీ. నాకు ఇప్పుడు ఒక ఆరోగ్య సమస్య వచ్చింది. దాన్ని తొందరగా నయం చేయండి బాబా. మీదే భారం తండ్రీ. ఈ అనుభవాన్ని ఆలస్యంగా పంచుకున్నందుకు నన్ను క్షమించు తండ్రీ".
ఒకసారి మా అమ్మావాళ్ళింట్లో వాషింగ్ మెషీన్లోంచి నీళ్ళు బయటికి పోకుండా స్ట్రక్ అయ్యాయి. అది లాక్‌డౌన్ సమాయమైనందున ఆ సమస్యను పరిష్కరించేందుకు ఎవరైనా వస్తారా, లేదా అన్న టెన్షన్‌తో అమ్మ బాబాకు మ్రొక్కుకుంది. బాబా దయవల్ల మా తమ్ముడు నీళ్ళు బయటికి పోవడానికి చేసిన కొన్ని ప్రయత్నాలు ఫలించి రెండు రోజులకి నీళ్ళు బయటికి పోయాయి. ఆ విధంగా బాబా సమస్యను పరిష్కరించారు. "బాబా! చిన్న విన్నపం తండ్రీ. నైట్ షిఫ్ట్స్ వలన నా సోదరుని ఆరోగ్యం పాడవుతోంది. దయచేసి తనకు ఉదయం షిఫ్ట్స్ వచ్చేలాగా ఆశీర్వదించండి బాబా".
2021లో మా అమ్మ చేతివేళ్ళలో ఒక గోరు మీద లైన్ ఒకటి ఏర్పడింది. కొన్ని రోజులకి మరో గోరుకి కూడా అలాంటి లైన్ వచ్చింది. నేను అమ్మతో, "అలా ఎందుకు వస్తుందో? ఒకసారి డాక్టరుకి చూపించుకోమ"ని చెప్పాను. దాంతో అమ్మ వెళ్లి డాక్టరుకి చూపించుకుంది. డాక్టరు, "ఒక్కోసారి నార్మల్‌గా అలా వస్తుంటాయి. అలాగే సీరియస్ ప్రాబ్లమ్ ఉన్నా వస్తాయి" అని కొన్ని టెస్టులు వ్రాశారు. నాకు భయం వేసి బాబాకు నమస్కరించుకుని, "రిపోర్ట్స్ అన్నీ నార్మల్ అని రావాలి బాబా" అని వేడుకున్నాను. బాబా దయవల్ల రిపోర్ట్స్ నార్మల్ అని వచ్చాయి. దాంతో డాక్టరు 'కాల్షియమ్ తక్కువగా ఉంద'ని చెప్పి, అందుకు మందులు రాసిచ్చి, "20 రోజులు వాడిన తరువాత మళ్లీ రండి, చూద్దాం" అన్నారు. "బాబా! మీ దయవల్ల అప్పటిలోగా అమ్మ గోర్లలో ఉన్న సమస్య నయం కావాలి తండ్రీ. బాబా! అమ్మకి వేరే ప్రాబ్లమ్ కూడా ఉంది. అది కూడా తొందరగా నయమై తను ఆరోగ్యంగా ఉండేలా చూడు తండ్రీ. మా రెండు కుటుంబాల బాధ్యత మీదే తండ్రీ. మా అందరి ఆరోగ్యాలు బాగుండేలా దీవించండి సాయీ. మీ దీవెనలు మాపై ఎల్లప్పుడూ ఉండాలి. ఈ కరోనాని అంతం చేయండి సాయితండ్రీ. చివరిగా, ఏమైనా తప్పులు ఉంటే క్షమించు తండ్రీ".
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!
సర్వం శ్రీ సాయినాథార్పణమస్తు!
కష్టం నుండి బయటపడేసిన బాబా
నేను సాయిభక్తురాలిని. కరోనా కాలంలో నేను పనిచేస్తున్న ఆఫీసులో ఇంటినుండి పనిచేసే అవకాశం ఇవ్వడంతో మేమంతా ఇంటినుండే పనిచేస్తుందేవాళ్ళము. అప్పుడు ఒక గురువారంనాడు మా సార్‌కి కరోనా వచ్చి హైదరాబాదులో ట్రీట్మెంట్ చేయించుకుంటున్నారని నాకు తెలిసింది. నిజానికి తనకొక చిన్నబాబు ఉన్నందున ఆయన చాలా జాగ్రత్తగా ఉండేవారు. అయినప్పటికీ ఆయనకి కరోనా వచ్చింది. అప్పుడు నేను, "వచ్చే గురువారానికల్లా మా సార్‌కి కరోనా తగ్గిపోవాల"ని బాబాతో చెప్పుకున్నాను. బాబా దయవలన మరుసటి గురువారానికి మా సార్ బాగున్నారని తెలిసి నాకు చాలా సంతోషంగా అనిపించింది. బాబాకు సాధ్యం కానిదంటూ ఏమీ లేదు.
నేను ఒక వ్యక్తి విషయంలో చాలా దారుణంగా మోసపోయాను. అది నా తప్పే. ఎందుకంటే, ఆ విషయంలో నా సాయి నాకు కొన్ని సూచనలు ఇచ్చినప్పటికీ నేను వాటిని గుర్తించలేకపోయాను. మాయలో ఉన్నప్పుడు మనకు అలాంటివి కనిపించవు. తీరా మోసపోయాక ఒకరోజు మధ్యరాత్రి నిద్రలేచి బాగా ఏడ్చి, "బాబా! నన్ను ఈ సమస్యను నుంచి బయటపడేయండి" అని బాబాను వేడుకున్నాను. దయతో నా సాయి నన్ను ఆ కష్టం నుండి బయటపడేశారు. అయితే నాకు ఆ చెడుకాలం గుర్తొచ్చినప్పుడల్లా చాలా బాధగా అనిపిస్తుండేది. అలా ఒకరోజు బాధలో ఉన్నప్పుడు ఇన్‌స్టాగ్రామ్‌లో ఈ క్రింది మెసేజ్ వచ్చింది:
"గతం ముగిసిపోయింది. అది మళ్ళీ రాదు. దాన్ని నీ వర్తమానంలోకి లాగవద్దు బిడ్డా. ప్రస్తుత జీవితంతో నీవు సంతోషంగా ఉన్నావు. ఉన్నదానితో సంతృప్తిగా ఉండటం నేర్చుకో! నీకు నువ్వే సమస్యలు సృష్టించుకోకు. నీదైనది ఖచ్చితంగా నీదే!"
అది చూసి చాలా సంతోషించాను. "ధన్యవాదాలు సాయీ! నన్ను ఈ చెడుకాలం నుండి పూర్తిగా బయటపడేసి, నాకు మంచి భవిష్యత్తునివ్వండి". నా అనుభవాలు చదివిన మీ అందరికీ చాలా కృతజ్ఞతలు.
ఓంసాయి శ్రీసాయి జయజయసాయి.
తోటి భక్తుల అనుభవాల ద్వారా అభయమిస్తున్న బాబా
ఓం సమర్థ సద్గురు శ్రీ సాయినాథ్ మహరాజ్ కీ జై!
సాయిబంధువులకు నమస్కారం. నేను సాయిభక్తురాలిని. 2021లో నాకు ఏ సమస్య వచ్చినా, దాన్ని తీర్చమని బాబాను అడిగిన మరుసటిరోజు అదే సమస్యకు సంబంధించి వేరే వారి అనుభవాలు ఈ బ్లాగులో వచ్చేవి. అది చదవగానే తద్వారా నాకు బాబా అభయమిస్తున్నట్లు అనిపించేది. అలాంటి అనుభవాలలో మొదటిది: 2021, జూన్ నెలలో నా కుడికన్ను ఎర్రబారి ఒక 15 రోజులు నన్ను బాగా ఇబ్బందిపెట్టింది. 'అది తగ్గాలి బాబా' అని అనుకున్నాను. అలా అనుకున్న మరుసటిరోజే వేరొకరు అదే అనుభవాన్ని బ్లాగులో పంచుకున్నారు. ఆరోజు నుంచే నా కంటి ఎరుపుదనం తగ్గటం మొదలై, పూర్తిగా తగ్గిపోయింది.
మరొకసారి గ్యాస్ట్రిక్ సమస్య వల్ల నా పొట్ట చాలా గట్టిగా అయ్యి, నేను చాలా ఇబ్బందిపడ్డాను. అప్పుడు కూడా 'ఈ సమస్య తగ్గాలి' అని బాబాకు నమస్కారం చేసుకున్నాను. మరుసటిరోజు అదే సమస్యకు సంబంధించి వేరొకరి అనుభవాన్ని ఈ బ్లాగులో చదివాను. తరువాత నా గ్యాస్ట్రిక్ సమస్య నెమ్మదిగా తగ్గిపోయింది.
2021, జూన్ నెలలోనే మేము మొదటి డోసు వ్యాక్సిన్ వేయించుకున్నాము. దానివలన ఏమైనా ఇబ్బంది కలుగుతుందేమోనని నేను చాలా భయపడ్డాను. బాబా దయవల్ల ఏ సమస్యలూ రాలేదు. సకాలంలో రెండవ డోసు మాకు అందేలా అనుగ్రహించమని బాబాను కోరుకుంటున్నాను. ఇంకా, నూతన గృహం నిర్మించుకోవాలన్న మా కోరికను మన్నించి, తమ దివ్యాశీస్సులతో ఎలాంటి ఆటంకాలు, ఇబ్బందులు లేకుండా గృహనిర్మాణం పూర్తయ్యేలా అనుగ్రహించమని బాబాను వేడుకుంటున్నాము. "నీ పాదాల యందు మాకు భక్తి, శ్రద్ధలు నిరంతరం వృద్ధి పొందేలా ఆశీర్వదించు శ్రీసాయినాథా".
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ సచ్చిదానంద సద్గురు శ్రీ సాయినాథ్ మహరాజ్ కీ జై!
సాయీ శరణం మమ.
