సాయిభక్తుల అనుభవమాలిక 750వ భాగం....

---

ఈ భాగంలో అనుభవాలు:

1. బాబా ఫోటోనే ఊదీగా భావించి పొందిన అనుగ్రహం 
2. జటిలమయిన సమస్యను సులువుగా పరిష్కరించిన బాబా

---

బాబా ఫోటోనే ఊదీగా భావించి పొందిన అనుగ్రహం 

నా పేరు సత్య. నేను ఈ ప్రపంచంలో కేవలం ఒక అణువును మాత్రమే. నా వయస్సు 67 సంవత్సరాలు. నేను చదువుకున్నాను గానీ, వ్రాసే అలవాటు అస్సలు లేదు. ఎప్పుడో చదువుకునే రోజుల్లో మా నాన్నకి ఉత్తరం వ్రాసేవాడిని, మరలా ఇన్నాళ్ళకు సాయి ప్రసాదించిన అనుభవాలను వ్రాస్తున్నాను. తప్పులేమైనా ఉంటే క్షమించండి. చిన్నప్పుడు నాకు దేవుడు, దయ్యం అనే నమ్మకాలేమీ లేవు. కానీ నేను 7వ తరగతి చదువుతున్నప్పటినుండి నాలో దైవభక్తి పెరిగింది. దానితోపాటు వయసు పెరిగింది. కాలేజీ చదువు అయిపోయింది. వివాహం కూడా జరిగింది. వివాహానికి ముందు నేను ఉద్యోగంలో చేరాను. ఒకసారి (1981 లేదా 1982లో) నేను, నా సీనియర్స్ కలిసి అఫీషియల్‌గా ఒక ప్రాజెక్టు పనిమీద పూనా వెళ్ళవలసి వచ్చింది. అప్పుడు అనుకోకుండా నేను, నా స్నేహితుడు కలిసి శిరిడీ వెళ్ళాము. ఉదయాన్నే పూనా నుండి బస్సులో బయలుదేరి శిరిడీ చేరుకుని బాబా దర్శనం చేసుకుని సాయంత్రానికల్లా హోటలుకు తిరిగి వచ్చేశాము. అప్పట్లో నాకు బాబా గురించి అంతగా తెలియదు. బాబాను దర్శించుకున్నప్పటినుండి నా జీవితంలో ఎన్నెన్నో అనుభవాలు, అద్భుతాలు జరిగాయి. ప్రస్తుతం 2021లో జరిగిన ఒక చిన్న అనుభవాన్ని మీతో పంచుకుంటాను. 

ఆ సంవత్సరం తొలి నెలల్లో మా అబ్బాయి అనారోగ్యం కారణంగా ఒకటిన్నర నెలలు నేను, మా అబ్బాయి హాస్పిటల్లోనే ఉన్నాము. అప్పటికి సుమారు 5 నెలల నుండి నేను సాయిచరిత్ర పారాయణ చేస్తున్నాను. కొద్ది రోజులకి ఉన్నట్టుండి నా కడుపులో ఎడమవైపు నొప్పి రావడం మొదలుపెట్టింది. నొప్పి తగ్గటానికి పెయిన్ బామ్, పెయిన్ స్ప్రే వాడుతున్నప్పటికీ నొప్పి తగ్గలేదు. పెట్టుకుందామంటే నా దగ్గర బాబా ఊదీ కూడా లేదు. ఇక చేసేది లేక మొబైల్ స్క్రీన్ సేవర్‌లో ఉన్న బాబా ఫోటోనే ఊదీగా భావించి దానిని కడుపుకి అద్దుకుని, ఫోటోలో ఉన్న బాబా పాదాలను చేత్తో తాకి నాలుకపై ఊదీ రాసినట్లు రాసుకున్నాను. తరువాత బాబాకు నమస్కరించి, “సాయీ, నా కడుపునొప్పి తగ్గించు తండ్రీ!” అని ప్రార్థించి పడుకున్నాను. అంతే, బాబా అనుగ్రహంతో తెల్లవారేసరికల్లా నొప్పి తగ్గిపోయింది. “థాంక్యూ బాబా!”.

---

జటిలమయిన సమస్యను సులువుగా పరిష్కరించిన బాబా

సాయిబంధువులకు నా నమస్కారములు. నా పేరు శ్రీనివాసరావు. 2005వ సంవత్సరంలో మా నాన్నగారు మరణించారు. ఆయన జీవించి ఉన్నప్పుడు ఆయన పేరుమీదుగా 1988లో గవర్నమెంటు ఒక ప్లాటు ఇచ్చింది. మా నాన్న మరణానంతరం మేము ఆ ప్లాటు ఉన్న ఊరు విడిచిపెట్టి వేరే ఊరికి వెళ్లి అక్కడే ఉంటున్నాము. మేము ఆ ప్లాటు ఉన్న ఊరిలో లేకపోవడం చేత వేరేవాళ్ళు ఆ ప్లాట్ తమదేననీ, మా నాన్నే ఆ ప్లాటును తమకు అమ్మారనీ చెప్పి దానిని ఆక్రమించుకున్నారు. వారి వద్ద ఆ ప్లాటు తమదని ఋజువుచేసే పత్రాలేమీ లేవు. మా వద్ద ఆ ప్లాటుకు సంబంధించిన పత్రాలు ఉన్నా అవి ఎక్కడ ఉన్నాయో మాకు తెలియదు. అందువల్ల ఆ సమస్య చాలాకాలం పెండింగ్‌లో ఉండిపోయింది. ఇలా ఉండగా 2021లో వాళ్ళు ఆ ప్లాటును అమ్మాలని చూస్తున్నట్టు మాకు తెలిసింది. అప్పుడు నేను బాబాకు నమస్కరించుకుని, “ధర్మం ప్రకారం ఆ ఫ్లాటు మాది అయితే దానిని మాకు అప్పగించు బాబా” అని ప్రార్థించాను. అంతేకాదు, మా ప్లాటును ఆక్రమించినవారు ఎస్సీలు అయినందువల్ల మేము ప్లాటు వద్దకు వెళితే, వాళ్ళు ఎస్సీ-ఎస్టీ కేసు పెడతారనే భయంతో, "మేము ఆ ప్లాటు వద్దకు వెళ్లకుండానే ఈ సమస్యకు తగిన పరిష్కారం చూపమ"ని బాబాను వేడుకున్నాను. అద్భుతం! మేము ఆ ప్లాట్ దగ్గరకు వెళ్లకుండానే దానిని ఆ ఊరికి చెందిన వేరేవారు మావద్ద కొనేటట్టు చేశారు బాబా. ఎంతో జటిలమయిన ఈ సమస్యను బాబా చాలా సులభంగా పరిష్కరించారు. బాబాకు మనసారా ధన్యవాదాలు తెలియజేసుకుంటూ, శ్రద్ధ, సబూరీలను ఎల్లవేళలా మాకు అనుగ్రహించవలసినదిగా ప్రార్థిస్తున్నాను.

---