- సాయిదేవుని కృప
- పిలిచినంతనే పలికే కొంగుబంగారం మన సాయి
సాయిదేవుని కృప
నా పేరు రాంప్రసాద్. సమస్య వచ్చిన ప్రతిసారీ సాటి సాయిబంధువులతో బాబా ప్రేమను పంచుకోవడం ద్వారా నాకు ఎంతో సాంత్వన చేకూరింది. నా సాయిదేవుడు తన కృపను ఎల్లవేళలా నాపై కురిపిస్తూ నాకు ఎంతో ధైర్యాన్నిస్తున్నారు. 2009 నుంచి ఇప్పటివరకు మా స్థిరాస్తి తనఖాలో నలిగిపోతూ వస్తోంది. గడచిన 12 సంవత్సరాలు నేను సాయిబాబా మార్గంలో ఎన్నో ఆటుపోట్లు చవిచూశాను. నా బాల్యం నుంచి నాకు సాయిబాబా గురించి కొంచెం అవగాహన ఉండేది. శ్రీసాయి సచ్చరిత్ర పారాయణ, శ్రీగురుచరిత్ర పారాయణ చేయడం ద్వారా, సాయిబాబా చూపిన ఎన్నో లీలల ద్వారా బాబా పట్ల నా విశ్వాసం దృఢమవుతూ వస్తోంది. కానీ ఎన్ని చేసినా మా స్థిరాస్తి గొడవ మాత్రం ఎప్పటికీ తీరని ఒక సమస్యగానే ఉండిపోయింది. 2009లో దృఢంగా సంకల్పం చేసుకొని, “మా ఆస్తి మాకు దక్కేలా చూడు బాబా” అని ఆర్తిగా బాబాను వేడుకుని పారాయణలు చేస్తూ ఉండేవాడిని. కాలం గడిచే కొద్దీ ఆస్తి విషయంలో అవమానాలు, కోర్టు సమస్యలు అధికమవుతూ వచ్చాయి. బాబా ‘ప్రశ్నలు-సమాధానాలు’ పుస్తకంలో బాబా సూచనలకోసం చూసినప్పుడల్లా, “పని విజయమంతమవుతుంది” అని బాబా నుండి సమాధానం వస్తోంది. ‘బహుశా శ్రద్ధ, సబూరిలు అలవరచుకోమనీ, కాలం కలిసి వచ్చేవరకు వేచి ఉండమని బాబా చెప్తున్నారు కాబోలు’ అని నన్ను నేను సమాధానపరచుకున్నాను. ఒకరోజు అకస్మాత్తుగా బాబా ‘ప్రశ్నలు-జవాబులు” పుస్తకంలో, "నేను నిన్ను నీ చిన్నప్పటినుంచి చూస్తున్నాను. నీలో శ్రద్ధ లేదు, భక్తి లేదు” అని వచ్చింది. "నా విశ్వాసంలో ఎక్కడో అపశ్రుతి ఉంది, నన్ను నేను బాబాకు సరిగా శరణాగతి కాలేకపోయాను” అనుకుని మరింత పట్టుదలతో సచ్చరిత్ర పారాయణ చేస్తూ, ప్రతి గురువారం సంధ్య ఆరతికి బాబా మందిరానికి వెళ్లి అందరితో కలిసి ఆరతిలో, పూజలో పాల్గొంటూ బాబాకు మరింత దగ్గర కావాలని ప్రయత్నించాను. 2018 నుంచి ప్రతి గురువారం సంధ్య ఆరతికి వెళ్తూ ఉండటంతో ఆరతి పాట కంఠస్థమైంది. ధుని ప్రదక్షిణలు, సచ్చరిత్ర పారాయణ నిత్యకృత్యం. కానీ నా ఆస్తి విషయంలో మాత్రం కాలయాపన జరుగుతూనే వచ్చింది. బాబా సూచనలు, సలహాలు మాత్రం ఆశాజనకంగానే వస్తుండేవి. కానీ 12 సంవత్సరాల నుంచి అనుభవిస్తున్న నరకయాతనను ఇంకా భరించలేక, “బాబా! ఈ నరకయాతనను భరించలేకపోతున్నాను. నా ఆస్తి నాకు రాకపోయినా పర్వాలేదు. మీరు ఇచ్చిందే భిక్ష అనుకొని మీ సేవలో ఈ జీవితం హాయిగా సాగనీ” అని బాబాను వేడుకున్నాను. నాకు తెలుసు, బాబా మన భవిష్యత్తు గురించి ఖచ్చితంగా ఒక ప్రణాళికతో ఉంటారు. మన ప్రణాళిక కంటే బాబా ప్రణాళిక చాలా గొప్పది. మనకు ఏది శ్రేయస్సునిస్తుందో అది మాత్రం బాబా మనకు తప్పకుండా ప్రసాదిస్తారని విశ్వసిస్తున్నాను. ఒకరోజు హఠాత్తుగా భగవద్గీతలోని ఒక శ్లోకం, దాని తాత్పర్యం నా కంటపడింది. అది, "శ్రీహరి ముందుగా తను రక్షించదలచుకున్న భక్తుని యొక్క సర్వాన్ని హరించివేస్తాడు" అని. అది చూసి, ‘బహుశా నన్ను కూడా బాబా అలాగే కరుణిస్తారు’ అని సమన్వయపరచుకున్నాను. ఇంతలో, 2021, మార్చి 29న బాబా తమ అద్భుత లీలను చూపిస్తూ నా ఆస్తి విషయంలో ఒక సందేశం ద్వారా శుభసంకేతం ఇచ్చారు. ఆ సందేశం: “భయపడవద్దు. ఈ దయగల ఫకీరు నిన్ను తప్పక రక్షించును. నీవు నిశ్చింతగా కూర్చో! జరగవలసినదంతా నేను చూసుకుంటాను”. అది చూసి, “నా సమస్యకు పరిష్కారం వస్తే ఈరోజే నేను నా అనుభవాన్ని సాయి మహరాజ్ సన్నిధి బ్లాగు ద్వారా తోటి సాయిబంధువులతో పంచుకుంటాను” అని అనుకున్నాను. సందేశమిచ్చినట్లుగానే బాబా నా ఆస్తి విషయంలో ఒక శుభసంకేతంగా తొందరలో పని జరిగేదానికి సమయము, సందర్భము సూచనప్రాయంగా తెలిపారు. బాబాకిచ్చిన మాట ప్రకారం వెంటనే నా ఆనందాన్ని ఈ సాయి మహరాజ్ సన్నిధి బ్లాగ్ ద్వారా తోటి సాయిబంధువులతో పంచుకుంటున్నాను. బాబా ఆశీస్సులతో త్వరలో మా సమస్యకు పరిష్కారం దొరకగానే ఆ అనుభవంతో మళ్ళీ మీ ముందుకు వస్తాను.
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై!
పిలిచినంతనే పలికే కొంగుబంగారం మన సాయి
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!
సాయిబంధువులందరికీ నా నమస్కారాలు. నా పేరు లక్ష్మి. నేను ప్రతిరోజూ ఈ బ్లాగులో వచ్చే బాబా లీలలను చదివి చాలా ఆనందిస్తాను. ఆ లీలలు చదువుతుంటే నాకు సచ్చరిత్ర పారాయణ చేసినట్లుగా ఉంటుంది. పొరపాటున ఏ రోజైనా చదవలేకపోతే నాకు ఏదో వెలితిగా అనిపిస్తుంది. అంతగా నేను ఈ బ్లాగుకు అలవాటుపడ్డాను. కొద్దిరోజుల క్రితం ఒకరోజు సాయంత్రం 5 గంటల సమయంలో అకస్మాత్తుగా మా అబ్బాయికి తుమ్ములు మొదలై, జలుబు చేసి ముక్కు కారసాగింది. అసలే చుట్టూ నెలకొన్న కరోనా పరిస్థితుల దృష్ట్యా ఏ చిన్న అనారోగ్య సమస్య వచ్చినా చాలా భయంగా ఉంటుండటం వల్ల వెంటనే నేను, "తండ్రీ, సాయినాథా! బాబుకి త్వరగా జలుబు తగ్గేలా చూడు" అని మన సద్గురు సాయినాథుని ప్రార్థించి, వేడినీళ్లలో బాబా ఊదీ వేసి మా అబ్బాయి చేత ఆవిరి పట్టించాను. బాబా దివ్య ఆశీర్వాదబలంతో మా అబ్బాయికి జలుబు తగ్గింది. మనస్ఫూర్తిగా ప్రార్థిస్తే బాబా అనుగ్రహించకపోవడమంటూ ఉండదు. పిలిచినంతనే పలికే కొంగుబంగారం మన సాయి. ఆయనకు సర్వస్య శరణాగతి చేసి ప్రార్థించడమే మనం చేయాల్సింది. బాబా ఆశీస్సులు అందరికీ లభించాలని కోరుకుంటున్నాను.
